ਮਾਹਵਾਰੀ ਦੇ ਚੱਕਰ ਦਾ ਉਹ ਪੜਾਅ ਜੋ ਔਰਤਾਂ ਦੀ ਦਿਖ, ਨੀਂਦ ਅਤੇ ਮੂਡ 'ਤੇ ਅਸਰ ਪਾ ਸਕਦਾ ਹੈ

"ਕੀ ਇਹ ਸਿਰਫ਼ ਮੈਨੂੰ ਹੀ ਲੱਗਦਾ ਹੈ ਜਾਂ ਫਿਰ ਮੈਂ ਦੁਨੀਆ ਦੀ ਸਭ ਤੋਂ ਬਦਸੂਰਤ ਇਨਸਾਨ ਹਾਂ ?" ਉਮਰ ਦੇ 30ਵਿਆਂ ਦੀ ਸ਼ੁਰੂਆਤ ਵਿੱਚ ਇੱਕ ਔਰਤ ਟਿਕਟੌਕ 'ਤੇ ਕੈਮਰੇ ਸਾਹਮਣੇ ਇਹ ਕਹਿੰਦੇ ਹਨ। ਵੀਡੀਓ ਨਾਲ ਕੈਪਸ਼ਨ ਲਿਖਿਆ ਹੈ: "ਪੀਓਵੀ: ਜਦੋਂ ਕੁੜੀਆਂ ਆਪਣੇ ਲਿਊਟੀਅਲ ਫੇਜ਼ ਵਿੱਚ ਹੁੰਦੀਆਂ ਹਨ।"

ਇਸ ਵੀਡੀਓ ਨੂੰ 24 ਲੱਖ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਹੈ ਅਤੇ ਇਸ 'ਤੇ ਸੈਂਕੜੇ ਟਿੱਪਣੀਆਂ ਆਈਆਂ ਹਨ।

ਇੱਕ ਔਰਤ ਲਿਖਦੇ ਹਨ, "ਇਹ ਤਾਂ ਬਿਲਕੁਲ ਮੇਰੇ ਨਾਲ ਹੁੰਦਾ ਹੈ।" ਇੱਕ ਹੋਰ ਕਹਿੰਦੇ ਹਨ, "ਇਹ ਇੰਨਾ ਸਹੀ ਹੈ ਕਿ ਮੈਨੂੰ ਗੁੱਸਾ ਆ ਰਿਹਾ ਹੈ।"

'ਲਿਊਟੀਅਲ ਫੇਜ਼' ਕੀ ਹੁੰਦਾ ਹੈ

ਸੋਸ਼ਲ ਮੀਡੀਆ 'ਤੇ ਅਜਿਹੀਆਂ ਹਜ਼ਾਰਾਂ ਵੀਡੀਓਜ਼ ਹਨ, ਜਿਨ੍ਹਾਂ ਵਿੱਚ ਔਰਤਾਂ "ਲਿਊਟੀਅਲ ਅਗਲੀਜ਼" ਬਾਰੇ ਗੱਲ ਕਰਦੀਆਂ ਹਨ।

ਇਸ ਸ਼ਬਦ ਦਾ ਇਸਤੇਮਾਲ ਉਨ੍ਹਾਂ ਸਰੀਰਕ ਅਤੇ ਮਾਨਸਿਕ ਬਦਲਾਵਾਂ ਲਈ ਕੀਤਾ ਜਾਂਦਾ ਹੈ, ਜੋ ਔਰਤਾਂ ਦੇ ਅਨੁਸਾਰ ਮਾਹਵਾਰੀ ਚੱਕਰ ਦੇ ਲਿਊਟੀਅਲ ਫੇਜ਼ (ਓਵਿਊਲੇਸ਼ਨ ਯਾਨੀ ਅੰਡਾ ਨਿਕਲਣ ਤੋਂ ਤੁਰੰਤ ਬਾਅਦ ਅਤੇ ਅਗਲੀ ਮਾਹਵਾਰੀ ਸ਼ੁਰੂ ਹੋਣ ਤੱਕ ਲਗਭਗ 12 ਤੋਂ 14 ਦਿਨ ਤੱਕ ਦਾ ਸਮਾਂ) ਦੌਰਾਨ ਨਜ਼ਰ ਆਉਂਦੇ ਹਨ।

ਇਹ ਪੜਾਅ ਮਾਹਵਾਰੀ ਚੱਕਰ ਦੇ ਦੂਜੇ ਅੱਧ ਵਿੱਚ ਹੁੰਦਾ ਹੈ ਅਤੇ ਅਗਲੀ ਮਾਹਵਾਰੀ ਸ਼ੁਰੂ ਹੋਣ ਨਾਲ ਖ਼ਤਮ ਹੁੰਦਾ ਹੈ। ਇਸ ਸਮੇਂ ਦੌਰਾਨ ਔਰਤ ਦੇ ਸਰੀਰ ਵਿੱਚ ਓਸਟ੍ਰੋਜਨ ਹਾਰਮੋਨ ਦਾ ਪੱਧਰ ਤੇਜ਼ੀ ਨਾਲ ਘੱਟਦਾ ਹੈ। ਅਜਿਹੇ ਵਿੱਚ ਕੀ "ਲਿਊਟੀਅਲ ਅਗਲੀਜ਼" ਵਾਕਈ ਕੋਈ ਹਕੀਕਤ ਵਾਲੀ ਸਥਿਤੀ ਹੈ ?

ਜਨਰਲ ਪ੍ਰੈਕਟੀਸ਼ਨਰ ਅਤੇ ਔਰਤਾਂ ਦੇ ਹਾਰਮੋਨਾਂ ਦੇ ਮਾਹਰ ਡਾ. ਲੁਈਜ਼ ਨਿਊਸਨ ਮੁਤਾਬਕ, ਹਾਰਮੋਨਾਂ ਵਿੱਚ ਇਹ ਬਦਲਾਅ ਔਰਤਾਂ ਦੀ ਦਿਖ, ਨੀਂਦ ਅਤੇ ਮੂਡ 'ਤੇ ਅਸਰ ਪਾ ਸਕਦਾ ਹੈ।

ਨਿਊਸਨ ਕਹਿੰਦੇ ਹਨ, "ਸਾਡੇ ਹਾਰਮੋਨ ਚਮੜੀ ਅਤੇ ਕੋਲਾਜਨ ਨੂੰ ਪ੍ਰਭਾਵਿਤ ਕਰਦੇ ਹਨ। ਇਸ ਕਰਕੇ ਕਈ ਲੋਕਾਂ ਦੀ ਚਮੜੀ ਸੁੱਕੀ ਹੋ ਜਾਂਦੀ ਹੈ, ਚਿਹਰੇ ਦੀ ਰੌਣਕ ਘੱਟ ਹੋ ਜਾਂਦੀ ਹੈ ਅਤੇ ਮੁਹਾਸੇ ਜਾਂ ਦਾਣੇ ਨਿਕਲ ਸਕਦੇ ਹਨ। ਇਸ ਤੋਂ ਇਲਾਵਾ ਪੇਟ ਫੁੱਲਣ ਦੀ ਸਮੱਸਿਆ ਹੋ ਸਕਦੀ ਹੈ ਅਤੇ ਛਾਤੀਆਂ ਦੇ ਆਕਾਰ ਵਿੱਚ ਵੀ ਤਬਦੀਲੀ ਆ ਸਕਦੀ ਹੈ।"

"ਮੈਨੂੰ ਲੱਗਦਾ ਹੈ ਜਿਵੇਂ ਮੇਰਾ ਦਿਮਾਗ ਹੌਲੀ-ਹੌਲੀ ਕੰਮ ਕਰ ਰਿਹਾ ਹੋਵੇ"

25 ਸਾਲ ਦੇ ਐਲੀਨਾ ਸਪੇਵਨ ਕਹਿੰਦੇ ਹਨ ਕਿ ਉਹ ਟਿਕਟੌਕ 'ਤੇ ਆਉਣ ਵਾਲੀਆਂ ਇਨ੍ਹਾਂ ਵੀਡੀਓਜ਼ ਨਾਲ ਜੁੜਾਅ ਮਹਿਸੂਸ ਕਰਦੇ ਹਨ ਕਿਉਂਕਿ ਉਨ੍ਹਾਂ ਨੂੰ ਵੀ ਮਾਹਵਾਰੀ ਦੇ ਦੂਜੇ ਅੱਧ ਦੌਰਾਨ ਬਲੋਟਿੰਗ (ਬਹੁਤ ਜ਼ਿਆਦਾ ਢਿੱਡ ਫੁੱਲਣ ) ਦੀ ਸਮੱਸਿਆ ਹੁੰਦੀ ਹੈ।

ਉਹ ਕਹਿੰਦੇ ਹਨ, "ਮੇਰੀ ਚਮੜੀ ਸੁੱਕੀ ਅਤੇ ਖੁਰਦਰੀ ਜਿਹੀ ਲੱਗਦੀ ਹੈ। ਚਿਹਰਾ ਆਮ ਨਾਲੋਂ ਵੱਧ ਥੱਕਿਆ ਹੋਇਆ ਦਿਖਾਈ ਦਿੰਦਾ ਹੈ ਅਤੇ ਛਾਤੀ ਭਾਰੀ ਅਤੇ ਇਸ ਵਿੱਚ ਦਰਦ ਮਹਿਸੂਸ ਹੁੰਦਾ ਹੈ।"

ਯੂਨੀਵਰਸਿਟੀ ਕਾਲਜ ਲੰਡਨ ਦੇ ਰੀਪ੍ਰੋਡਕਟਿਵ ਐਂਡ ਮੋਲੀਕਿਊਲਰ ਜੈਨੇਟਿਕਸ ਵਿੱਚ ਸਹਾਇਕ ਪ੍ਰੋਫੈਸਰ ਹੈਲੇਨ ਓ ਨੀਲ ਕਹਿੰਦੇ ਹਨ ਕਿ ਜਦੋਂ ਮਾਹਵਾਰੀ ਆਉਣ ਤੋਂ ਕੁਝ ਦਿਨ ਪਹਿਲਾਂ ਓਸਟ੍ਰੋਜਨ ਦਾ ਪੱਧਰ ਘੱਟਦਾ ਹੈ ਤਾਂ ਪ੍ਰੋਜੈਸਟੇਰੋਨ ਵੱਧ ਜਾਂਦਾ ਹੈ। ਇਸ ਨਾਲ ਚਮੜੀ ਵਿੱਚ ਤੇਲ ਦਾ ਉਤਪਾਦਨ ਵੱਧ ਜਾਂਦਾ ਹੈ।

ਹਾਰਮੋਨਾਂ ਵਿੱਚ ਇਸ ਤਬਦੀਲੀ ਦੌਰਾਨ ਸਰੀਰ ਵਧੇਰੇ ਤਰਲ ਪਦਾਰਥ ਸੰਭਾਲ ਕੇ ਰੱਖਦਾ ਹੈ। ਇਸ ਕਾਰਨ ਚਿਹਰਾ ਸੁੱਜਿਆ ਹੋਇਆ ਲੱਗ ਸਕਦਾ ਹੈ, ਸਰੀਰ ਵਿੱਚ ਸੋਜ ਜਾਂ ਢਿੱਡ ਫੁੱਲਣ ਦੀ ਸਮੱਸਿਆ ਹੋ ਸਕਦੀ ਹੈ ਅਤੇ ਛਾਤੀਆਂ ਵਿੱਚ ਸੋਜ ਅਤੇ ਦਰਦ ਵੀ ਮਹਿਸੂਸ ਹੋ ਸਕਦਾ ਹੈ।

ਮਾਹਵਾਰੀ ਬਾਰੇ ਹੋਰ ਜਾਗਰੂਕਤਾ ਦੀ ਲੋੜ

ਲੰਡਨ ਵਿੱਚ ਹੋਸਪਿਟੈਲਿਟੀ ਖੇਤਰ ਵਿੱਚ ਕੰਮ ਕਰਨ ਦੇ ਨਾਲ-ਨਾਲ ਅਦਾਕਾਰੀ ਕਰਨ ਵਾਲੇ ਐਲੀਨਾ ਕਹਿੰਦੇ ਹਨ ਕਿ ਲਿਊਟੀਅਲ ਫੇਜ਼ ਦੌਰਾਨ ਉਹ ਆਪਣੇ ਆਪ ਨੂੰ ਸੁਸਤ ਅਤੇ "ਪ੍ਰੇਰਣਾ ਰਹਿਤ" ਮਹਿਸੂਸ ਕਰਦੇ ਹਨ।

ਉਹ ਕਹਿੰਦੇ ਹਨ, "ਮੈਨੂੰ ਲੱਗਦਾ ਹੈ ਜਿਵੇਂ ਮੇਰਾ ਦਿਮਾਗ ਬਹੁਤ ਹੌਲੀ ਰਫ਼ਤਾਰ ਨਾਲ ਕੰਮ ਕਰ ਰਿਹਾ ਹੋਵੇ। ਮੈਂ ਅਕਸਰ ਅਣਜਾਣੇ ਵਿੱਚ ਗਲਤੀਆਂ ਕਰਨ ਲੱਗ ਪੈਂਦੀ ਹਾਂ ਅਤੇ ਆਮ ਨਾਲੋਂ ਕਾਫ਼ੀ ਵੱਧ ਭੁੱਲਣ ਲੱਗ ਜਾਂਦੀ ਹਾਂ। ਮੇਰਾ ਕਿਸੇ ਨਾਲ ਮਿਲਣ-ਜੁਲਣ ਦਾ ਮਨ ਨਹੀਂ ਕਰਦਾ ਅਤੇ ਮੈਂ ਆਪਣੇ ਆਪ ਵਿੱਚ ਉਦਾਸ ਮਹਿਸੂਸ ਕਰਦੀ ਹਾਂ।"

ਡਾ. ਨਿਊਸਨ ਕਹਿੰਦੇ ਹਨ ਕਿ ਭਾਵੇਂ ਹੁਣ ਔਰਤਾਂ ਆਪਣੇ ਮਾਹਵਾਰੀ ਚੱਕਰ ਦੇ ਅਸਰ ਬਾਰੇ ਪਹਿਲਾਂ ਨਾਲੋਂ ਵੱਧ ਗੱਲ ਕਰਨ ਲੱਗੀਆਂ ਹਨ ਪਰ ਅਜੇ ਵੀ ਜ਼ਿਆਦਾਤਰ ਨੂੰ ਇਹ ਨਹੀਂ ਪਤਾ ਕਿ ਇਨ੍ਹਾਂ ਲੱਛਣਾਂ ਨਾਲ ਕਿਵੇਂ ਨਜਿੱਠਿਆ ਜਾਵੇ।

ਉਹ ਕਹਿੰਦੇ ਹਨ, "ਇਹ ਔਰਤਾਂ ਵਾਕਈ ਤਕਲੀਫ਼ ਝੱਲ ਰਹੀਆਂ ਹਨ ਅਤੇ ਇਸ ਦਾ ਅਸਰ ਉਨ੍ਹਾਂ ਦੀ ਕੰਮ ਕਰਨ ਦੀ ਸਮਰੱਥਾ, ਰੋਜ਼ਾਨਾ ਦੀ ਜ਼ਿੰਦਗੀ, ਸਮਾਜਿਕ ਜੀਵਨ ਅਤੇ ਆਮ ਜ਼ਿੰਦਗੀ ਬਿਤਾਉਣ 'ਤੇ ਪੈ ਰਿਹਾ ਹੈ।"

ਉਹ ਅੱਗੇ ਕਹਿੰਦੇ ਹਨ ਕਿ ਔਰਤਾਂ ਦੀਆਂ ਇਨ੍ਹਾਂ ਸਮੱਸਿਆਵਾਂ ਪ੍ਰਤੀ ਲੋਕਾਂ ਦੀ ਪ੍ਰਤੀਕਿਰਿਆ ਵੀ ਕਈ ਵਾਰ ਨਿਰਾਸ਼ਾਜਨਕ ਹੁੰਦੀ ਹੈ।

"ਕੀ ਤੁਸੀਂ ਕਿਸੇ ਮਰਦ ਨੂੰ ਕਹੋਗੇ ਕਿ 'ਤੁਹਾਡਾ ਟੈਸਟੋਸਟੇਰੋਨ ਘੱਟ ਗਿਆ ਹੈ, ਇਸ ਲਈ ਜਿਮ ਨਾ ਜਾਓ, ਸਾਰਾ ਦਿਨ ਬਿਸਤਰ ਵਿੱਚ ਹੀ ਪਏ ਰਹੋ ?' ਇਹ ਕਿਸੇ ਹਾਲ ਕਬੂਲਯੋਗ ਨਹੀਂ ਕਿ ਔਰਤਾਂ ਨੂੰ ਇਹ ਸਭ ਚੁੱਪਚਾਪ ਸਹਿਣਾ ਪਵੇ।"

ਡਾ. ਨਿਊਸਨ ਦਾ ਕਹਿਣਾ ਹੈ ਕਿ ਲਿਊਟੀਅਲ ਫੇਜ਼ ਦੌਰਾਨ ਔਰਤਾਂ ਦੇ ਰਿਸ਼ਤਿਆਂ 'ਤੇ ਵੀ ਅਸਰ ਪੈ ਸਕਦਾ ਹੈ।

'ਨਿਰਾਸ਼ਾ ਅਤੇ ਬੇਚੈਨੀ'

ਫ੍ਰੀਲਾਂਸ ਪੱਤਰਕਾਰ ਹੈਨਰੀਏਟਾ ਦਾ ਤਜ਼ਰਬਾ ਵੀ ਕੁਝ ਅਜਿਹਾ ਹੀ ਹੈ।

30 ਸਾਲ ਦੇ ਹੈਨਰੀਏਟਾ ਕਹਿੰਦੇ ਹਨ, "ਜੇ ਮੈਨੂੰ ਆਪਣੇ ਸ਼ਾਨਦਾਰ, ਹਸਮੁੱਖ ਅਤੇ ਸ਼ਾਂਤ ਸੁਭਾਅ ਵਾਲੇ ਸਾਥੀ 'ਤੇ ਬਿਨਾਂ ਵਜ੍ਹਾ ਚਿੜਚਿੜਾਪਣ ਮਹਿਸੂਸ ਹੋਣ ਲੱਗੇ ਤਾਂ ਬਹੁਤ ਸੰਭਾਵਨਾ ਹੁੰਦੀ ਹੈ ਕਿ ਜਾਂ ਤਾਂ ਮੈਂ ਕੌਫ਼ੀ ਨਹੀਂ ਪੀਤੀ, ਕੁਝ ਖਾਧਾ ਨਹੀਂ ਜਾਂ ਫਿਰ ਮੈਂ ਆਪਣੇ ਲਿਊਟੀਅਲ ਫੇਜ਼ ਵਿੱਚ ਹਾਂ।"

ਇਸ ਦਾ ਅਸਰ ਉਨ੍ਹਾਂ ਦੀਆਂ ਦੋਸਤੀਆਂ 'ਤੇ ਵੀ ਪੈਂਦਾ ਹੈ।

ਉਹ ਕਹਿੰਦੇ ਹਨ, "ਆਪਣੇ ਦੋਸਤਾਂ ਨਾਲ ਮੈਂ ਜਾਂ ਤਾਂ ਬਹੁਤ ਜ਼ਿਆਦਾ ਨਿੱਜੀ ਗੱਲਾਂ ਸਾਂਝੀਆਂ ਕਰ ਬੈਠਦੀ ਹਾਂ ਅਤੇ ਬਾਅਦ ਵਿੱਚ ਪਛਤਾਉਂਦੀ ਹਾਂ, ਜਾਂ ਫਿਰ ਉਨ੍ਹਾਂ ਤੋਂ ਬਿਲਕੁਲ ਦੂਰ ਹੋ ਜਾਂਦੀ ਹਾਂ ਅਤੇ ਫਿਰ ਉਸ ਗੱਲ ਦਾ ਵੀ ਪਛਤਾਵਾ ਹੁੰਦਾ ਹੈ।"

ਹੈਨਰੀਏਟਾ ਦੱਸਦੇ ਹਨ ਕਿ ਲਿਊਟੀਅਲ ਫੇਜ਼ ਦੌਰਾਨ ਕਈ ਵਾਰ ਉਨ੍ਹਾਂ ਨੂੰ ਗਹਿਰੀ ਨਿਰਾਸ਼ਾ ਅਤੇ ਮਾਨਸਿਕ ਬੇਚੈਨੀ ਮਹਿਸੂਸ ਹੁੰਦੀ ਹੈ। ਉਨ੍ਹਾਂ ਨੂੰ ਲੱਗਦਾ ਹੈ ਜਿਵੇਂ ਉਹ ਕਿਸੇ ਕੰਮ ਦੇ ਸਮਰੱਥ ਨਹੀਂ ਹਨ ਅਤੇ ਕਈ ਵਾਰ ਬੀਤੇ ਸਮੇਂ ਦੀਆਂ ਸ਼ਰਮਨਾਕ ਜਾਂ ਦੁਖਦਾਈ ਘਟਨਾਵਾਂ ਬਹੁਤ ਤੀਬਰਤਾ ਨਾਲ ਯਾਦ ਆਉਣ ਲੱਗਦੀਆਂ ਹਨ।

ਉਹ ਕਹਿੰਦੇ ਹਨ ਕਿ ਧੁੰਦਲਾ ਦਿਖਾਈ ਦੇਣਾ, ਗੱਲਬਾਤ ਦੌਰਾਨ ਆਮ ਸ਼ਬਦ ਵੀ ਯਾਦ ਨਾ ਆਉਣਾ ਅਤੇ ਧਿਆਨ ਨਾ ਲੱਗਣਾ ਵਰਗੇ ਲੱਛਣਾਂ ਨਾਲ ਦਫ਼ਤਰ ਵਿੱਚ ਕੰਮ ਦੌਰਾਨ ਨਜਿੱਠਣਾ ਕਈ ਵਾਰ ਸ਼ਰਮਿੰਦਗੀ ਵਾਲਾ ਅਨੁਭਵ ਬਣ ਜਾਂਦਾ ਹੈ।

ਉਹ ਉਮੀਦ ਜਤਾਉਂਦੇ ਹਨ ਕਿ ਕਾਸ਼ ਇਸ ਮੁੱਦੇ ਬਾਰੇ ਲੋਕਾਂ ਵਿੱਚ ਹੋਰ ਜਾਗਰੂਕਤਾ ਹੁੰਦੀ।

ਉਹ ਕਹਿੰਦੇ ਹਨ, "ਅਜੇ ਵੀ ਇਸ ਬਾਰੇ ਕਈ ਗਲਤਫਹਿਮੀਆਂ ਹਨ ਕਿ ਹਾਰਮੋਨ ਔਰਤਾਂ ਦੀ ਸਿਹਤ ਅਤੇ ਮਾਨਸਿਕ ਤੰਦਰੁਸਤੀ ਨੂੰ ਕਿਵੇਂ ਅਤੇ ਕਿਉਂ ਪ੍ਰਭਾਵਿਤ ਕਰਦੇ ਹਨ।"

ਹੈਨਰੀਏਟਾ ਦੱਸਦੇ ਹਨ ਕਿ ਜਦੋਂ ਉਨ੍ਹਾਂ ਦੀ ਮਾਹਵਾਰੀ ਸ਼ੁਰੂ ਹੁੰਦੀ ਹੈ ਤਾਂ ਉਹ ਕਾਫ਼ੀ ਰਾਹਤ ਮਹਿਸੂਸ ਕਰਦੇ ਹਨ।

ਡਾ. ਨਿਊਸਨ ਕਹਿੰਦੇ ਹਨ ਕਿ ਲਿਊਟੀਅਲ ਫੇਜ਼ ਅਜਿਹੀ ਸਥਿਤੀ ਨਹੀਂ ਹੈ ਜਿਸ ਵਿੱਚੋਂ ਔਰਤਾਂ "ਇੱਕਦਮ ਬਾਹਰ ਨਿਕਲ ਸਕਣ।" ਉਨ੍ਹਾਂ ਦੇ ਅਨੁਸਾਰ, ਅਕਸਰ ਔਰਤਾਂ ਨੂੰ ਗਲਤ ਢੰਗ ਨਾਲ ਇਹ ਮਹਿਸੂਸ ਕਰਵਾ ਦਿੱਤਾ ਜਾਂਦਾ ਹੈ ਕਿ ਉਨ੍ਹਾਂ ਦੇ ਲੱਛਣ ਆਮ ਹਨ ਜਾਂ ਉਹ ਸਿਰਫ਼ ਲੋੜ ਤੋਂ ਵੱਧ ਭਾਵੁਕ ਹੋ ਰਹੀਆਂ ਹਨ।

'ਰਿਸ਼ਤੇ ਵੀ ਹੁੰਦੇ ਹਨ ਪ੍ਰਭਾਵਿਤ'

36 ਸਾਲ ਦੇ ਕਾਰੋਬਾਰੀ ਅਤੇ ਦੋ ਬੱਚਿਆਂ ਦੀ ਮਾਂ ਸ਼ਾਰਲਟ ਡੋਡਜ਼ ਕਹਿੰਦੇ ਹਨ ਕਿ ਲੋਕ ਅਕਸਰ ਇਨ੍ਹਾਂ ਲੱਛਣਾਂ ਨੂੰ "ਸਿਰਫ਼ ਪੀਐਮਐਸ (ਪ੍ਰੀ-ਮੈਨਸਟਰੂਅਲ ਸਿੰਡਰੋਮ)" ਕਹਿ ਕੇ ਨਜ਼ਰਅੰਦਾਜ਼ ਕਰ ਦਿੰਦੇ ਹਨ। ਜਿਸ ਦੇ ਲੱਛਣਾਂ ਵਿੱਚ ਢਿੱਡ ਫੁੱਲਣਾ, ਚਿਹਰੇ 'ਤੇ ਦਾਣੇ ਨਿਕਲਣਾ ਅਤੇ ਧਿਆਨ ਕੇਂਦਰਿਤ ਕਰਨ ਵਿੱਚ ਮੁਸ਼ਕਿਲ ਸ਼ਾਮਿਲ ਹਨ।

ਉਹ ਕਹਿੰਦੇ ਹਨ ਕਿ ਇਹ ਲੱਛਣ ਉਨ੍ਹਾਂ ਦੇ ਆਤਮ-ਵਿਸ਼ਵਾਸ ਨੂੰ ਕਾਫ਼ੀ ਠੇਸ ਪਹੁੰਚਾਉਂਦੇ ਹਨ, ਖ਼ਾਸ ਕਰਕੇ ਜਦੋਂ ਉਹ ਬਿਜ਼ਨੈੱਸ ਕਲਾਇੰਟਸ ਨਾਲ ਕੰਮ ਕਰ ਰਹੇ ਹੁੰਦੇ ਹਨ। ਸ਼ਾਰਲਟ "ਬੇਕਿੰਗ ਬੌਸਿਜ਼" ਨਾਂ ਦੀ ਇੱਕ ਬਿਜ਼ਨੈੱਸ ਕਮਿਊਨਿਟੀ ਚਲਾਉਂਦੇ ਹਨ, ਜੋ ਲੋਕਾਂ ਨੂੰ ਘਰ ਤੋਂ ਬੇਕਿੰਗ ਦਾ ਕਾਰੋਬਾਰ ਸ਼ੁਰੂ ਕਰਨ ਵਿੱਚ ਮਦਦ ਕਰਦੀ ਹੈ।

ਉਹ ਕਹਿੰਦੇ ਹਨ, "ਪਰ ਜਦੋਂ ਤੁਸੀਂ ਮੇਰੀ ਤਰ੍ਹਾਂ ਸਵੈ-ਰੁਜ਼ਗਾਰ ਕਰਦੇ ਹੋ ਤਾਂ ਤੁਹਾਡਾ ਕੰਮ ਸਿਰਫ਼ ਇਸ ਕਰਕੇ ਨਹੀਂ ਰੁਕ ਸਕਦਾ ਕਿ ਤੁਹਾਡੇ ਹਾਰਮੋਨਸ ਵਿੱਚ ਤਬਦੀਲੀ ਆ ਰਹੀ ਹੈ।"

ਲਿਊਟੀਅਲ ਫੇਜ਼ ਦੇ ਲੱਛਣਾਂ ਨਾਲ ਕਿਵੇਂ ਨਜਿੱਠਿਆ ਜਾਵੇ ?

ਐਲੀਨਾ ਦਾ ਕਹਿਣਾ ਹੈ ਕਿ ਮਾਹਵਾਰੀ ਚੱਕਰ ਬਾਰੇ ਵਧੇਰੇ ਜਾਣਕਾਰੀ ਅਤੇ ਖੁੱਲ੍ਹੀ ਚਰਚਾ ਦੀ ਲੋੜ ਹੈ। ਉਹ ਦੱਸਦੇ ਹਨ ਕਿ ਉਨ੍ਹਾਂ ਨੂੰ 24 ਸਾਲ ਦੀ ਉਮਰ ਵਿੱਚ ਸੋਸ਼ਲ ਮੀਡੀਆ ਰਾਹੀਂ ਪਹਿਲੀ ਵਾਰ ਲਿਊਟੀਅਲ ਫੇਜ਼ ਬਾਰੇ ਪਤਾ ਲੱਗਾ ਸੀ।

ਡਾ. ਹੈਲੇਨ ਕਹਿੰਦੇ ਹਨ ਕਿ "ਔਰਤਾਂ ਨੂੰ ਆਪਣੇ ਸਰੀਰ ਦੇ ਬੁਨਿਆਦੀ ਕੰਮਕਾਜ ਬਾਰੇ ਬਹੁਤ ਘੱਟ ਸਿੱਖਿਆ ਦਿੱਤੀ ਜਾਂਦੀ ਹੈ।"

ਇੰਨੀ ਘੱਟ ਕਿ ਬਹੁਤ ਸਾਰੀਆਂ ਔਰਤਾਂ ਜਾਣਕਾਰੀ ਅਤੇ ਸਲਾਹ ਲਈ ਟਿਕ-ਟੌਕ ਦਾ ਸਹਾਰਾ ਲੈ ਰਹੀਆਂ ਹਨ।

24 ਲੱਖ ਤੋਂ ਵੱਧ ਵਾਰ ਦੇਖੀ ਗਈ ਇੱਕ ਵੀਡੀਓ ਵਿੱਚ ਇੱਕ ਨੌਜਵਾਨ ਔਰਤ ਪੁੱਛਦੀ ਹੈ:

"ਲਿਊਟੀਅਲ ਫੇਜ਼ ਦੌਰਾਨ ਆਪਣੇ ਆਪ ਨੂੰ ਬਿਹਤਰ ਮਹਿਸੂਸ ਕਰਨ ਲਈ ਤੁਸੀਂ ਕੀ ਕਰਦੇ ਹੋ ? ਸੱਚ ਦੱਸਾਂ ਤਾਂ ਹੁਣ ਮੇਰੇ ਤੋਂ ਇਹ ਬਰਦਾਸ਼ਤ ਨਹੀਂ ਹੋ ਰਿਹਾ।"

ਇਸ ਵੀਡੀਓ 'ਤੇ ਹਜ਼ਾਰਾਂ ਕੁਮੈਂਟਸ ਆਏ ਹਨ। ਕੋਈ ਕਹਿੰਦਾ "ਢਿੱਲੇ ਕੱਪੜੇ ਪਾਓ ਅਤੇ ਸ਼ੀਸ਼ੇ ਤੋਂ ਦੂਰ ਰਹੋ," ਜਦੋਂਕਿ ਕੋਈ ਹੋਰ ਕਹਿੰਦਾ, "ਚਾਕਲੇਟ ਖਾਓ।"

ਇੱਕ ਹੋਰ ਔਰਤ ਨੇ ਲਿਖਿਆ ਕਿ ਲਿਊਟੀਅਲ ਫੇਜ਼ ਦੌਰਾਨ ਉਹ "ਆਪਣੇ ਪਤੀ ਤੋਂ ਦੂਰ ਰਹਿੰਦੇ ਹਨ," ਜਦਕਿ ਕਿਸੇ ਹੋਰ ਨੇ ਕਿਹਾ ਕਿ ਉਹ "ਵਾਈਨ ਦੀ ਬੋਤਲ ਨਾਲ ਟੀਵੀ ਦੇਖ ਕੇ" ਇਸ ਨਾਲ ਨਜਿੱਠਦੇ ਹਨ।

ਹਾਲਾਂਕਿ, ਮਾਹਿਰਾਂ ਦਾ ਕਹਿਣਾ ਹੈ ਕਿ ਅਜਿਹੀਆਂ ਕੁਝ ਸਲਾਹਾਂ ਨੁਕਸਾਨਦੇਹ ਵੀ ਹੋ ਸਕਦੀਆਂ ਹਨ। ਫਿਰ ਇਸ ਦੌਰਾਨ ਕੀ ਕਰਨਾ ਚਾਹੀਦਾ ਹੈ ?

ਡਾ. ਨਿਊਸਨ ਕਹਿੰਦੇ ਹਨ, "ਜੇ ਪਹਿਲੀ, ਦੂਜੀ ਜਾਂ ਤੀਜੀ ਮੁਲਾਕਾਤ ਵਿੱਚ ਵੀ ਤੁਹਾਨੂੰ ਲੱਗੇ ਕਿ ਤੁਹਾਡੀਆਂ ਸਮੱਸਿਆਵਾਂ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਜਾ ਰਿਹਾ ਤਾਂ ਕਿਸੇ ਹੋਰ ਡਾਕਟਰ ਨਾਲ ਮਿਲੋ। ਇਹ ਲੱਛਣ ਆਮ ਤੌਰ 'ਤੇ ਆਪਣੇ ਆਪ ਠੀਕ ਨਹੀਂ ਹੁੰਦੇ।"

ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTER, WhatsApp ਅਤੇ YouTube 'ਤੇ ਜੁੜੋ।)