'ਕਿਸੇ ਅਣਜਾਣ ਨੂੰ ਮੇਰੀ ਕਬਰ ਵਿੱਚ ਦਫ਼ਨਾ ਦਿੱਤਾ', ਜਦੋਂ ਇਸ ਔਰਤ ਨੇ ਲੜੀ ਆਪਣੀ ਹੀ ਕਬਰ ਲਈ ਲੜਾਈ

- ਲੇਖਕ, ਸਾਰਾ-ਮੇ ਬੁਚੇਰੀ
- ...ਤੋਂ, ਡੀਪਿੰਗ ਸੇਂਟ ਜੇਮਜ਼ ਤੋਂ ਰਿਪੋਰਟਿੰਗ
- ਪ੍ਰਕਾਸ਼ਿਤ
- ਪੜ੍ਹਨ ਦਾ ਸਮਾਂ: 5 ਮਿੰਟ
ਇੱਕ ਮਹਿਲਾ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਜਿਸ ਕਬਰ ਵਾਲੀ ਥਾਂ ਲਈ ਪੈਸੇ ਦੇ ਕੇ ਪਹਿਲਾਂ ਹੀ ਬੁਕਿੰਗ ਕਰਵਾ ਲਈ ਸੀ, ਹੁਣ ਉਹ ਉਸ ਬਾਰੇ "ਪਹਿਲਾਂ ਵਰਗਾ ਮਹਿਸੂਸ ਨਹੀਂ ਕਰ ਸਕਦੇ"।
ਅਜਿਹਾ ਇਸ ਲਈ ਹੋਇਆ ਕਿਉਂਕਿ ਗਲਤੀ ਨਾਲ ਉੱਥੇ ਇੱਕ ਅਣਜਾਣ ਵਿਅਕਤੀ ਨੂੰ ਦਫ਼ਨਾ ਦਿੱਤਾ ਗਿਆ ਸੀ, ਜਿਸ ਦੇ ਦੇਹਾਂਤਕ ਅਵਸ਼ੇਸ਼ਾਂ ਨੂੰ ਬਾਅਦ ਵਿੱਚ ਕਬਰ ਵਿੱਚੋਂ ਬਾਹਰ ਕੱਢਿਆ ਗਿਆ।
69 ਸਾਲਾ ਮੈਰੀ ਲੇਨ ਨੇ ਦੱਸਿਆ ਕਿ ਉਨ੍ਹਾਂ ਨੇ ਲਿੰਕਨਸ਼ਾਇਰ ਦੇ ਡੀਪਿੰਗ ਸੇਂਟ ਜੇਮਜ਼ ਕਬਰਿਸਤਾਨ ਵਿੱਚ ਆਪਣੇ ਮਰਹੂਮ ਮਾਪਿਆਂ ਦੀ ਕਬਰ ਦੇ ਪਿੱਛੇ ਇੱਕ ਥਾਂ ਬੁੱਕ ਕਰਵਾਈ ਸੀ।
ਉਨ੍ਹਾਂ ਕਿਹਾ ਕਿ ਪੈਰਿਸ਼ ਕੌਂਸਲ ਨੇ ਜਿਸ ਤਰ੍ਹਾਂ ਇਸ ਗਲਤੀ ਨੂੰ ਠੀਕ ਕਰਨ ਦੀ ਕੋਸ਼ਿਸ਼ ਕੀਤੀ, ਉਸ ਕਾਰਨ ਉਨ੍ਹਾਂ ਨੂੰ "ਬਹੁਤ ਖਾਲੀਪਣ" ਮਹਿਸੂਸ ਹੋਇਆ ਅਤੇ ਉਹ "ਹੱਕੇ-ਬੱਕੇ" ਰਹਿ ਗਏ।
ਇਸ ਸਾਲ ਦੀ ਸ਼ੁਰੂਆਤ ਵਿੱਚ, ਨਿਆਂ ਮੰਤਰਾਲੇ ਨੇ ਇਸ ਗਲਤੀ ਨੂੰ ਠੀਕ ਕਰਨ ਲਈ ਲੇਨ ਦੀ ਕਬਰ ਵਿੱਚ ਦਫ਼ਨਾਏ ਗਏ ਵਿਅਕਤੀ ਦੀ ਦੇਹ ਨੂੰ ਬਾਹਰ ਕੱਢਣ ਦੀ ਇਜਾਜ਼ਤ ਦੇ ਦਿੱਤੀ।
ਡੀਪਿੰਗ ਸੇਂਟ ਜੇਮਜ਼ ਪੈਰਿਸ਼ ਕੌਂਸਲ ਨੇ ਮੰਨਿਆ ਕਿ "ਇੱਕ ਗਲਤੀ ਹੋਈ ਸੀ" ਅਤੇ "ਦੋਵਾਂ ਪਰਿਵਾਰਾਂ ਨੂੰ ਹੋਈ ਪਰੇਸ਼ਾਨੀ" ਲਈ ਮੁਆਫ਼ੀ ਮੰਗੀ। ਉਨ੍ਹਾਂ ਦੱਸਿਆ ਕਿ ਕਬਰ ਵਾਲੀ ਉਹ ਥਾਂ ਲੇਨ ਨੂੰ ਵਾਪਸ ਸੌਂਪ ਦਿੱਤੀ ਗਈ ਹੈ।
"ਮੈਂ ਆਪਣੇ ਮਾਪਿਆਂ ਦੇ ਨੇੜੇ ਰਹਿਣ ਲਈ ਇਹ ਥਾਂ ਖਰੀਦੀ ਸੀ"

ਲੇਨ ਨੇ ਦੱਸਿਆ ਕਿ ਸਾਲ 2013 ਵਿੱਚ ਉਨ੍ਹਾਂ ਨੇ ਆਪਣੀ ਮਾਂ ਦੀ ਕਬਰ ਦੇ ਪਿੱਛੇ ਵਾਲੀ ਥਾਂ 'ਤੇ ਦਫ਼ਨ ਹੋਣ ਦਾ ਵਿਸ਼ੇਸ਼ ਅਧਿਕਾਰ ਖਰੀਦਿਆ ਸੀ।
ਡੀਪਿੰਗ ਸੇਂਟ ਜੇਮਜ਼ ਪੈਰਿਸ਼ ਕੌਂਸਲ ਦੇ ਇੱਕ ਦਸਤਾਵੇਜ਼ ਤੋਂ ਇਸ ਦੀ ਪੁਸ਼ਟੀ ਹੁੰਦੀ ਹੈ, ਜਿਸ ਨੂੰ ਬੀਬੀਸੀ ਨੇ ਦੇਖਿਆ ਹੈ।
ਲੇਨ ਨੇ ਕਿਹਾ, "ਮੈਂ ਆਪਣੇ ਮਾਪਿਆਂ ਦੇ ਨੇੜੇ ਰਹਿਣ ਲਈ ਇਹ ਥਾਂ ਖਰੀਦੀ ਸੀ।"
"ਜੇ ਮੈਂ ਆਪਣੇ ਪਿਆਰਿਆਂ ਦੇ ਨਾਲ ਨਹੀਂ ਰਹਿ ਸਕਦੀ, ਤਾਂ ਇੱਥੇ ਦਫ਼ਨ ਹੋਣ ਦਾ ਕੋਈ ਮਤਲਬ ਹੀ ਨਹੀਂ ਹੈ।"
ਲੇਨ ਨੇ ਦੱਸਿਆ ਕਿ 2023 ਦੀ ਸ਼ੁਰੂਆਤ ਵਿੱਚ ਜਦੋਂ ਉਹ ਕਬਰਿਸਤਾਨ ਗਏ, ਤਾਂ ਉਨ੍ਹਾਂ ਨੇ ਦੇਖਿਆ ਕਿ ਉਨ੍ਹਾਂ ਦੀ ਥਾਂ 'ਤੇ ਕਿਸੇ ਹੋਰ ਵਿਅਕਤੀ ਨੂੰ ਦਫ਼ਨਾ ਦਿੱਤਾ ਗਿਆ ਸੀ।
ਉਨ੍ਹਾਂ ਯਾਦ ਕਰਦਿਆਂ ਕਿਹਾ, "ਸੱਚ ਦੱਸਾਂ ਤਾਂ, ਮੈਂ ਉੱਥੇ ਖੜ੍ਹੀ ਰਹਿ ਗਈ ਅਤੇ ਮੈਨੂੰ ਸਮਝ ਨਹੀਂ ਆਇਆ ਕਿ ਕੀ ਕਰਾਂ।"
"ਮੇਰੀ ਕਬਰ ਵਿੱਚ ਇੱਕ ਅਜਿਹਾ ਵਿਅਕਤੀ ਦਫ਼ਨਾਇਆ ਗਿਆ ਸੀ, ਜਿਸ ਨੂੰ ਮੈਂ ਜਾਣਦੀ ਤੱਕ ਨਹੀਂ ਸੀ।"
ਲੰਮੀ ਕਾਨੂੰਨੀ ਲੜਾਈ

ਲੇਨ ਨੇ ਦੱਸਿਆ ਕਿ ਉਸ ਵਿਅਕਤੀ ਦੀ ਦੇਹ ਨੂੰ ਉੱਥੋਂ ਹਟਵਾਉਣ ਦੀ ਅਪੀਲ ਕਰਨ ਵਿੱਚ ਉਨ੍ਹਾਂ ਨੂੰ ਤਿੰਨ ਸਾਲ ਤੋਂ ਵੱਧ ਸਮਾਂ ਲੱਗ ਗਿਆ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਕੋਲ "ਕੋਈ ਹੋਰ ਰਸਤਾ ਨਹੀਂ ਸੀ", ਕਿਉਂਕਿ ਉਨ੍ਹਾਂ ਦੇ ਮਾਪਿਆਂ ਦੀ ਕਬਰ ਦੇ ਕੋਲ ਕੋਈ ਹੋਰ ਖਾਲੀ ਥਾਂ ਨਹੀਂ ਬਚੀ ਸੀ।
ਇੰਗਲੈਂਡ ਵਿੱਚ, ਕਿਸੇ ਅਜਿਹੀ ਥਾਂ ਤੋਂ ਦੇਹ ਨੂੰ ਬਾਹਰ ਕੱਢਣ ਲਈ, ਜੋ ਧਾਰਮਿਕ ਤੌਰ 'ਤੇ ਪਵਿੱਤਰ ਨਹੀਂ ਹੈ, ਨਿਆਂ ਮੰਤਰਾਲੇ ਤੋਂ ਲਾਇਸੈਂਸ ਲੈਣਾ ਪੈਂਦਾ ਹੈ। ਇਸ ਦੇ ਨਾਲ ਹੀ, ਆਮ ਤੌਰ 'ਤੇ ਉਸ ਵਿਅਕਤੀ ਦੇ ਨਜ਼ਦੀਕੀ ਰਿਸ਼ਤੇਦਾਰਾਂ ਦੀ ਸਹਿਮਤੀ ਵੀ ਜ਼ਰੂਰੀ ਹੁੰਦੀ ਹੈ।
ਨਿਆਂ ਮੰਤਰਾਲੇ ਵੱਲੋਂ 'ਡੀਪਿੰਗ ਸੇਂਟ ਜੇਮਜ਼ ਪੈਰਿਸ਼ ਕੌਂਸਲ' ਨੂੰ ਭੇਜੇ ਗਏ ਇੱਕ ਪੱਤਰ ਵਿੱਚ ਵਿਭਾਗ ਨੇ ਪਰਿਵਾਰ ਦੀ ਸਹਿਮਤੀ ਤੋਂ ਬਿਨ੍ਹਾਂ ਅਤੇ ਮ੍ਰਿਤਕ ਦੇ ਪਰਿਵਾਰ ਦੇ "ਨੈਤਿਕ ਅਤੇ ਧਾਰਮਿਕ" ਇਤਰਾਜ਼ਾਂ ਦੇ ਬਾਵਜੂਦ ਦੇਹ ਨੂੰ ਬਾਹਰ ਕੱਢਣ ਦੀ ਇਜਾਜ਼ਤ ਦੇ ਦਿੱਤੀ।
ਵਿਭਾਗ ਨੇ ਦੱਸਿਆ ਕਿ "ਹੋਈ ਗਲਤੀ ਨੂੰ ਠੀਕ ਕਰਨ" ਲਈ "ਕੋਈ ਹੋਰ ਰਸਤਾ ਮੌਜੂਦ ਨਹੀਂ ਸੀ", ਇਸ ਲਈ ਦੇਹ ਨੂੰ ਬਾਹਰ ਕੱਢਣ ਦੀ ਇਜਾਜ਼ਤ ਦਿੱਤੀ ਗਈ।
ਬੀਬੀਸੀ ਨੇ ਉਸ ਵਿਅਕਤੀ ਦੇ ਪਰਿਵਾਰ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ, ਜਿਸ ਦੀ ਦੇਹ ਨੂੰ ਕਬਰ ਵਿੱਚੋਂ ਬਾਹਰ ਕੱਢਿਆ ਗਿਆ ਸੀ।
"ਬਹੁਤ ਬੁਰਾ ਅਸਰ"

ਮੈਰੀ ਲੇਨ ਦੇ ਪਤੀ, 77 ਸਾਲਾ ਐਰਿਕ ਲੇਨ ਨੇ ਦੱਸਿਆ ਕਿ ਇਸ ਪੂਰੀ ਪ੍ਰਕਿਰਿਆ ਦਾ ਉਨ੍ਹਾਂ ਦੀ ਪਤਨੀ 'ਤੇ "ਬਹੁਤ ਬੁਰਾ ਅਸਰ" ਪਿਆ ਹੈ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਪੈਰਿਸ਼ ਕੌਂਸਲ "ਸਹੀ ਰਿਕਾਰਡ ਨਹੀਂ ਰੱਖ ਸਕੀ ਇਸੇ ਕਾਰਨ ਅਜਿਹੀ ਗਲਤੀ ਹੋਈ" ਅਤੇ ਉਨ੍ਹਾਂ ਨੂੰ ਚਿੰਤਾ ਹੈ ਕਿ ਭਵਿੱਖ ਵਿੱਚ ਫਿਰ ਤੋਂ ਅਜਿਹੀ ਗਲਤੀ ਹੋ ਸਕਦੀ ਹੈ।
ਬੀਬੀਸੀ ਨੇ ਕੌਂਸਲ ਦੇ ਸਾਹਮਣੇ ਇਹ ਇਲਜ਼ਾਮ ਰੱਖਿਆ ਅਤੇ ਪੁੱਛਿਆ ਕਿ ਭਵਿੱਖ ਵਿੱਚ ਅਜਿਹੀਆਂ ਗਲਤੀਆਂ ਨੂੰ ਰੋਕਣ ਲਈ ਕੀ ਕਦਮ ਚੁੱਕੇ ਗਏ ਹਨ। ਇਸ ਦਾ ਕੋਈ ਜਵਾਬ ਨਹੀਂ ਮਿਲਿਆ।
ਐਰਿਕ ਲੇਨ ਨੇ ਦੱਸਿਆ ਕਿ ਉਨ੍ਹਾਂ ਦੀ ਪਤਨੀ ਨੂੰ ਹੁਣ ਕਬਰਿਸਤਾਨ ਜਾਣਾ "ਪਸੰਦ ਨਹੀਂ ਹੈ"।
ਉਨ੍ਹਾਂ ਕਿਹਾ, "ਇੱਥੇ ਇੰਨੀ ਕੁੜੱਤਣ ਅਤੇ ਬੁਰੀਆਂ ਯਾਦਾਂ ਜੁੜ ਗਈਆਂ ਹਨ ਕਿ ਪਤਾ ਨਹੀਂ ਇਹ ਕਦੇ ਖ਼ਤਮ ਹੋਣਗੀਆਂ ਜਾਂ ਨਹੀਂ।"

ਮੈਰੀ ਲੇਨ ਨੇ ਕਿਹਾ ਕਿ ਉਹ ਉਸ ਪਰਿਵਾਰ ਪ੍ਰਤੀ ਹਮਦਰਦੀ ਰੱਖਦੇ ਹਨ, ਜਿਸ ਦੇ ਪਰਿਵਾਰਕ ਮੈਂਬਰ ਨੂੰ ਗਲਤੀ ਨਾਲ ਉਨ੍ਹਾਂ ਦੀ ਕਬਰ (ਪਲਾਟ) ਵਿੱਚ ਦਫ਼ਨਾ ਦਿੱਤਾ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਉਹ ਸਮਝ ਸਕਦੇ ਹਨ ਕਿ ਉਸ ਪਰਿਵਾਰ ਨੂੰ ਕਿਹੜੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ ਹੋਵੇਗਾ।
ਉਨ੍ਹਾਂ ਕਿਹਾ, "ਮੈਂ ਉਨ੍ਹਾਂ ਨੂੰ ਮਿਲਣਾ ਚਾਹੁੰਦੀ ਸੀ।"
"ਮੈਂ [ਪੈਰਿਸ਼ ਕੌਂਸਲ] ਨੂੰ ਕਈ ਵਾਰ ਉਨ੍ਹਾਂ ਨਾਲ ਮਿਲਵਾਉਣ ਦੀ ਬੇਨਤੀ ਕੀਤੀ, ਪਰ ਮੈਨੂੰ ਇਨਕਾਰ ਕਰ ਦਿੱਤਾ ਗਿਆ।"
ਮੈਰੀ ਲੇਨ ਨੇ ਅੱਗੇ ਕਿਹਾ, "ਮੈਨੂੰ ਕਬਰਿਸਤਾਨ ਜਾਣ ਵਿੱਚ ਵੀ ਬਹੁਤ ਅਸਹਿਜ ਮਹਿਸੂਸ ਹੁੰਦਾ ਹੈ। ਹੁਣ ਅਸੀਂ ਇੱਥੇ ਪਹਿਲਾਂ ਵਾਂਗ ਅਕਸਰ ਨਹੀਂ ਆਉਂਦੇ।"
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਮਨ ਵਿੱਚ ਅਜੇ ਵੀ ਕਈ ਸਵਾਲ ਹਨ।
ਉਨ੍ਹਾਂ ਕਿਹਾ, "ਇਸ ਵਿੱਚ ਤਿੰਨ ਸਾਲ ਅਤੇ ਤਿੰਨ ਮਹੀਨੇ ਨਹੀਂ ਲੱਗਣੇ ਚਾਹੀਦੇ ਸਨ ਅਤੇ ਸਾਨੂੰ ਇਸ ਤਰ੍ਹਾਂ ਸੰਘਰਸ਼ ਵੀ ਨਹੀਂ ਕਰਨਾ ਪੈਣਾ ਚਾਹੀਦਾ ਸੀ।"
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ































