31 ਸਾਲਾਂ ਤੋਂ ਵਿਛੜੇ ਮਾਂ-ਪੁੱਤ ਦੇ ਮਿਲਣ 'ਚ ਆਇਆ ਨਵਾਂ ਮੋੜ, 'ਪੁੱਤਰ' ਬਾਰੇ ਪਤਾ ਲੱਗੀ ਇੱਕ ਨਵੀਂ ਕਹਾਣੀ
- ਲੇਖਕ, ਸੁਸ਼ੀਲਾ ਸਿੰਘ ਅਤੇ ਰਾਜੇਸ਼ ਡੋਬਰਿਆਲ
- ਰੋਲ, ਬੀਬੀਸੀ ਪੱਤਰਕਾਰ
- ਪ੍ਰਕਾਸ਼ਿਤ
- ਪੜ੍ਹਨ ਦਾ ਸਮਾਂ: 8 ਮਿੰਟ
ਪਿਛਲੇ ਕੁਝ ਦਿਨਾਂ ਤੋਂ ਇੱਕ ਮਾਮਲਾ ਸੁਰਖੀਆਂ 'ਚ ਹੈ ਅਤੇ ਉਹ ਹੈ 'ਗਾਜ਼ੀਆਬਾਦ 'ਚ 31 ਸਾਲ ਪਹਿਲਾਂ ਗੁੰਮ ਹੋਇਆ ਭੀਮ ਸਿੰਘ ਉਰਫ ਰਾਜੂ ਦਾ, ਜੋ ਆਪਣੇ ਪਰਿਵਾਰ ਨੂੰ ਮਿਲ ਗਿਆ ਹੈ।'
ਹਾਲਾਂਕਿ ਹੁਣ ਇਸ ਮਾਮਲੇ 'ਚ ਨਵਾਂ ਮੋੜ ਆ ਗਿਆ ਹੈ।
ਗਾਜ਼ੀਆਬਾਦ ਦੇ ਟਰਾਂਸ ਹਿੰਡਨ ਦੇ ਡੀਸੀਪੀ ਨਿਮਿਸ਼ ਪਾਟਿਲ ਨੇ ਬੀਬੀਸੀ ਨੂੰ ਦੱਸਿਆ ਹੈ ਕਿ ਰਾਜੂ ਨਾਮ ਦਾ ਇਹ ਵਿਅਕਤੀ ਦੇਹਰਾਦੂਨ ਵਿੱਚ ਇੱਕ ਅਜਿਹੀ ਹੀ ਕਹਾਣੀ ਸੁਣਾ ਕੇ ਇੱਕ ਪਰਿਵਾਰ ਦਾ ਮੈਂਬਰ ਬਣ ਗਿਆ ਸੀ ਅਤੇ ਉੱਥੇ ਕਰੀਬ ਪੰਜ ਮਹੀਨੇ ਰਿਹਾ ਸੀ।
ਦੇਹਰਾਦੂਨ ਪੁਲਿਸ ਮੁਤਾਬਕ ਸਾਲ 2008 'ਚ ਕਪਿਲ ਦੇਵ ਸ਼ਰਮਾ ਅਤੇ ਆਸ਼ਾ ਸ਼ਰਮਾ ਦਾ 16 ਸਾਲਾ ਬੇਟਾ ਮੋਨੂੰ ਸ਼ਰਮਾ ਲਾਪਤਾ ਹੋ ਗਿਆ ਸੀ ਅਤੇ ਉਨ੍ਹਾਂ ਨੇ ਗੁੰਮਸ਼ੁਦਗੀ ਦੀ ਰਿਪੋਰਟ ਵੀ ਦਰਜ ਕਰਵਾਈ ਸੀ।
ਕਪਿਲ ਦੇਵ ਸ਼ਰਮਾ ਅਨੁਸਾਰ ਉਨ੍ਹਾਂ ਦੇ ਪੁੱਤਰ ਮੋਨੂੰ ਸ਼ਰਮਾ ਦੀ ਉਮਰ 5-7 ਸਾਲ ਦੀ ਸੀ ਜਦੋਂ ਉਸ ਨੂੰ ਕਾਰ ਨੇ ਟੱਕਰ ਮਾਰ ਦਿੱਤੀ ਸੀ ਅਤੇ ਉਦੋਂ ਤੋਂ ਹੀ ਉਸ ਦਾ ਮਾਨਸਿਕ ਸੰਤੁਲਨ ਕੁਝ ਵਿਗੜ ਗਿਆ ਸੀ।
ਇਸ ਤੋਂ ਬਾਅਦ 2008 'ਚ 16 ਸਾਲ ਦੀ ਉਮਰ 'ਚ ਉਹ ਲਾਪਤਾ ਹੋ ਗਿਆ।
ਰਾਜੂ ਇਸ ਸਾਲ ਜੁਲਾਈ ਵਿੱਚ ਉਨ੍ਹਾਂ ਨੂੰ ਮਿਲਿਆ ਸੀ ਅਤੇ ਉਸ ਵਲੋਂ ਆਪਣੀ ਪਛਾਣ ‘ਲਾਪਤਾ ਮੋਨੂੰ ਸ਼ਰਮਾ’ ਵਜੋਂ ਦੱਸੀ ਗਈ ਸੀ।
ਫਿਰ ਨਵੰਬਰ ਦੇ ਆਖ਼ਰੀ ਹਫ਼ਤੇ ਗਾਜ਼ੀਆਬਾਦ ਵਿੱਚ ‘31 ਸਾਲਾਂ ਬਾਅਦ ਲਾਪਤਾ ਵਿਅਕਤੀ ਨੂੰ ਲੱਭਿਆ ਤਾਂ ਉਸ ਦਾ ਪਰਿਵਾਰ’ ਦੀ ਖ਼ਬਰ ਸੁਰਖੀਆਂ ਵਿੱਚ ਆਈ।
ਇਸ ਖ਼ਬਰ ਦੀ ਪੁਸ਼ਟੀ ਲਈ ਜਦੋਂ ਬੀਬੀਸੀ ਦੀ ਟੀਮ 29 ਨਵੰਬਰ ਨੂੰ ਗਾਜ਼ੀਆਬਾਦ ਦੇ ਸ਼ਹੀਦ ਨਗਰ ਵਿੱਚ ਰਹਿਣ ਵਾਲੀ ਲੀਲਾਵਤੀ ਦੇ ਘਰ ਪਹੁੰਚੀ ਤਾਂ ਪਰਿਵਾਰ ਨੇ ਰਾਜੂ ਨੂੰ ਆਪਣਾ ਲਾਪਤਾ ਪੁੱਤਰ ਦੱਸਿਆ ਸੀ।
ਰਾਜੂ ਨੇ ਉਦੋਂ ਬੀਬੀਸੀ ਪੱਤਰਕਾਰ ਨੂੰ ਆਪਣੇ ਕਥਿਤ ਅਗਵਾ ਹੋਣ ਅਤੇ ਕਿਸੇ ਤਰ੍ਹਾਂ ਰਾਜਸਥਾਨ ਤੋਂ ਦਿੱਲੀ ਪਹੁੰਚਣ ਦੀ ਕਹਾਣੀ ਵੀ ਸੁਣਾਈ ਸੀ ਅਤੇ ਲੀਲਾਵਤੀ ਨੇ ਵੀ ਨਿਸ਼ਾਨਾਂ ਦੇ ਆਧਾਰ 'ਤੇ 'ਪੁੱਤਰ' ਦੀ ਪਛਾਣ ਦੀ ਪੁਸ਼ਟੀ ਕੀਤੀ ਸੀ।
ਪਰ ਦੋ ਦਿਨ ਬਾਅਦ, ਪੁਲਿਸ ਨੂੰ ਰਾਜੂ ਦੀ ਕਹਾਣੀ 'ਤੇ ਸ਼ੱਕ ਹੋਇਆ ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਰਾਜੂ ਨੇ ਦੇਹਰਾਦੂਨ ਦੇ ਇੱਕ ਪਰਿਵਾਰ ਨਾਲ ਵੀ ਅਜਿਹਾ ਹੀ ਦਾਅਵਾ ਕੀਤਾ ਸੀ।
ਦੇਹਰਾਦੂਨ ਵਿੱਚ ਵੀ ਅਜਿਹਾ ਮਾਮਲਾ ਆਇਆ ਸੀ ਸਾਹਮਣੇ
ਤਸਵੀਰ ਸਰੋਤ, Rajesh Dobrial
ਦੇਹਰਾਦੂਨ 'ਚ ਰਹਿਣ ਵਾਲੇ ਕਪਿਲ ਦੇਵ ਸ਼ਰਮਾ ਨੇ ਦੱਸਿਆ ਕਿ 2008 ਤੋਂ ਬਾਅਦ ਇਸ ਸਾਲ ਜੁਲਾਈ ਮਹੀਨੇ 'ਚ ਉਨ੍ਹਾਂ ਨੂੰ ਅਖਬਾਰਾਂ ਰਾਹੀਂ ਪਤਾ ਲੱਗਾ ਕਿ ਇੱਕ ਨੌਜਵਾਨ ਮਿਲਿਆ ਹੈ ਜੋ ਉਨ੍ਹਾਂ ਹਾਲਾਤਾਂ 'ਚ ਲਾਪਤਾ ਹੋਇਆ ਸੀ ਜਿਵੇਂ ਉਨ੍ਹਾਂ ਦਾ ਆਪਣਾ ਪੁੱਤਰ।
ਉੱਤਰਾਖੰਡ ਪੁਲਿਸ ਮੁਤਾਬਕ 1 ਜੁਲਾਈ ਨੂੰ ਦੇਹਰਾਦੂਨ ਪੁਲਿਸ ਕੋਲ ਇੱਕ ਨੌਜਵਾਨ ਆਇਆ ਅਤੇ ਦੱਸਿਆ ਕਿ ਉਸ ਨੂੰ 16 ਸਾਲ ਪਹਿਲਾਂ ਕਿਸੇ ਨੇ ਅਗਵਾ ਕਰ ਲਿਆ ਸੀ। ਇਸ ਨੌਜਵਾਨ ਨੇ ਆਪਣਾ ਨਾਂ ਰਾਜੂ ਦੱਸਿਆ।
ਉਸ ਨੇ ਦੱਸਿਆ ਕਿ ਅਗਵਾਕਾਰ ਨੇ ਉਸ ਨੂੰ ਰਾਜਸਥਾਨ ਵੇਚ ਦਿੱਤਾ ਅਤੇ ਉੱਥੇ ਬੱਕਰੀ ਚਰਾਉਣ ਦਾ ਕੰਮ ਕਰਨ ਲਈ ਲੈ ਗਿਆ। ਉੱਥੇ ਵੀ ਉਸ ਨੂੰ ਸਹੀ ਭੋਜਨ ਨਹੀਂ ਦਿੱਤਾ ਗਿਆ ਅਤੇ ਕਿਸੇ ਤਰ੍ਹਾਂ ਉਹ ਉੱਥੋਂ ਭੱਜ ਕੇ ਦੇਹਰਾਦੂਨ ਪਹੁੰਚ ਗਿਆ।
ਦੇਹਰਾਦੂਨ ਦੀ ਮਨੁੱਖੀ ਤਸਕਰੀ ਰੋਕੂ ਸ਼ਾਖਾ ਦੇ ਇੰਚਾਰਜ ਪ੍ਰਦੀਪ ਪੰਤ ਨੇ ਬੀਬੀਸੀ ਨੂੰ ਦੱਸਿਆ, "ਇਸ ਨੌਜਵਾਨ ਦੀ ਮਦਦ ਕਰਨ ਦੇ ਇਰਾਦੇ ਨਾਲ ਅਸੀਂ ਇਸ ਦੀ ਕਹਾਣੀ ਕੁਝ ਪੱਤਰਕਾਰਾਂ ਨੂੰ ਦੱਸੀ। ਇਸ ਤੋਂ ਬਾਅਦ 2 ਜੁਲਾਈ ਨੂੰ ਇਸ ਨੌਜਵਾਨ ਦੀ ਖ਼ਬਰ ਸਥਾਨਕ ਅਖਬਾਰਾਂ 'ਚ ਪ੍ਰਕਾਸ਼ਿਤ ਹੋਈ।"
ਆਸ਼ਾ ਸ਼ਰਮਾ ਨੂੰ ਇਹ ਖ਼ਬਰ ਉਸ ਦੇ ਗੁਆਂਢੀਆਂ ਤੋਂ ਪਤਾ ਲੱਗੀ।
ਅਖਬਾਰ 'ਚ ਛਪੀ ਖਬਰ ਦਾ ਪਤਾ ਲੱਗਣ ਤੋਂ ਬਾਅਦ ਆਸ਼ਾ ਸ਼ਰਮਾ ਆਪਣੇ ਗੁੰਮ ਹੋਏ ਬੇਟੇ ਨੂੰ ਲੱਭਣ ਦੀ ਉਮੀਦ 'ਚ ਥਾਣੇ ਪਹੁੰਚੀ। ਰਾਜੂ ਨਾਂ ਦੇ ਇਸ ਨੌਜਵਾਨ ਨੇ ਜਿਵੇਂ ਹੀ ਆਸ਼ਾ ਸ਼ਰਮਾ ਨੂੰ ਦੇਖਿਆ ਤਾਂ ਉਸ ਨੇ ਉਸ ਨੂੰ ਆਪਣੀ ਮਾਂ ਕਿਹਾ ਅਤੇ ਉਸ ਨੂੰ ਵੀ ਲੱਗਾ ਕਿ ਉਹ ਉਸ ਦਾ ਗੁਆਚਿਆ ਪੁੱਤਰ ਮੋਨੂੰ ਹੈ। ਉਹ ਉਸਨੂੰ ਘਰ ਲੈ ਆਈ।
ਇੱਕ ਛੋਟੀ ਨਮਕੀਨ ਪੈਕਿੰਗ ਫੈਕਟਰੀ ਵਿੱਚ ਕੰਮ ਕਰਨ ਵਾਲੇ ਕਪਿਲ ਦੇਵ ਸ਼ਰਮਾ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਪੂਰਾ ਯਕੀਨ ਨਹੀਂ ਸੀ ਕਿ ਉਹ ਉਨ੍ਹਾਂ ਦਾ ਪੁੱਤਰ ਹੈ, ਪਰ ਉਨ੍ਹਾਂ ਨੇ ਕੋਈ ਇਤਰਾਜ਼ ਵੀ ਨਹੀਂ ਕੀਤਾ।
'ਧੀ ਨੂੰ ਘਰੋਂ ਕੱਢਣ ਦੀ ਕੀਤੀ ਸੀ ਕੋਸ਼ਿਸ਼'
ਤਸਵੀਰ ਸਰੋਤ, Rajesh Dobrial
ਕਪਿਲ ਦੇਵ ਸ਼ਰਮਾ ਦੱਸਦੇ ਹਨ, "ਰਾਜੂ ਉਰਫ਼ ਮੋਨੂੰ ਸ਼ਰਮਾ ਘਰ 'ਚ ਬੇਟੇ ਵਾਂਗ ਰਹਿਣ ਲੱਗ ਪਿਆ। ਦੋ ਦਿਨ ਤੱਕ ਠੀਕ ਰਿਹਾ, ਪਰ ਫਿਰ ਲੜਨਾ ਸ਼ੁਰੂ ਹੋ ਗਿਆ।"
ਉਹ ਬਚਪਨ ਤੋਂ ਕਪਿਲ ਅਤੇ ਆਸ਼ਾ ਦੇ ਨਾਲ ਰਹਿ ਰਹੀ ਉਨ੍ਹਾਂ ਦੀ ਬੇਟੀ ਦੇ ਬੱਚਿਆਂ ਨੂੰ ਵੀ ਇਹ ਕਹਿ ਕੇ ਘਰ ਛੱਡਣ ਲਈ ਕਹਿੰਦਾ ਇਹ ਕਹਿ ਕਿ ਇਹ ਉਸ ਦਾ ਘਰ ਹੈ।
ਕਪਿਲ ਸ਼ਰਮਾ ਦਾ ਕਹਿਣਾ ਹੈ ਕਿ ਉਹ ਉਨ੍ਹਾਂ ਨਾਲ ਲੜਦਾ ਰਹਿੰਦਾ ਸੀ ਅਤੇ ਕਈ ਵਾਰ ਦੋਵਾਂ 'ਤੇ ਹੱਥ ਚੁੱਕਣ ਦੀ ਕੋਸ਼ਿਸ਼ ਵੀ ਕਰ ਚੁੱਕਾ ਸੀ।
ਆਸ਼ਾ ਸ਼ਰਮਾ ਦੱਸਦੀ ਹੈ, "ਰਾਜੂ ਗੱਲ ਕਰਨ ਤੋਂ ਬਾਅਦ ਆਪਣੇ ਬੈਗ ਵਿੱਚ ਕੱਪੜੇ ਲੈ ਕੇ ਚਲਾ ਜਾਂਦਾ ਸੀ ਅਤੇ ਕਹਿੰਦਾ ਸੀ ਕਿ ਉਹ ਦੁਬਾਰਾ ਵਾਪਸ ਨਹੀਂ ਆਵੇਗਾ। ਉਹ ਉਸਨੂੰ ਮਨਾਉਂਦਾ ਸੀ, ਪਰ ਉਹ ਚਲਾ ਜਾਂਦਾ ਸੀ। ਪਰ ਫਿਰ ਉਹ ਸ਼ਾਮ ਨੂੰ ਦੁਬਾਰਾ ਵਾਪਸ ਆ ਜਾਂਦਾ ਸੀ।"
ਜਦੋਂ ਝਗੜਾ ਵਧ ਗਿਆ ਰਾਜੂ ਨੇ ਕਪਿਲ ਅਤੇ ਆਸ਼ਾ ਦੇ ਨਾਲ ਰਹਿ ਰਹੇ ਦੋਤੇ-ਦੋਤੀਆਂ ਨੂੰ ਘਰੋਂ ਬਾਹਰ ਕੱਢ ਦਿੱਤਾ।
ਇਸ 'ਤੇ ਉਨ੍ਹਾਂ ਦੀ ਬੇਟੀ ਸ਼ਿਲਪੀ ਨੇ ਦੇਹਰਾਦੂਨ ਦੇ ਪਟੇਲ ਨਗਰ ਥਾਣੇ 'ਚ ਜਾ ਕੇ ਸ਼ਿਕਾਇਤ ਕੀਤੀ।
ਉਨ੍ਹਾਂ ਨੇ ਬੀਬੀਸੀ ਨੂੰ ਦੱਸਿਆ ਕਿ ਪੁਲਿਸ ਨੇ ਸਮਝਾਇਆ ਕਿ ਉਹ ਆਪਣੇ ਬੱਚਿਆਂ ਨੂੰ ਆਪਣੇ ਕੋਲ ਰੱਖੇ ਅਤੇ ਰਾਜੂ ਉਰਫ਼ ਮੋਨੂੰ ਨੂੰ ਆਪਣੇ ਮਾਪਿਆਂ ਕੋਲ ਰਹਿਣ ਦੇਵੇ।
ਸ਼ਿਲਪੀ ਨੇ ਦੱਸਿਆ ਕਿ 21 ਨਵੰਬਰ 2024 ਨੂੰ ਰਾਜੂ ਉਰਫ਼ ਮੋਨੂੰ ਸ਼ਰਮਾ ਇਹ ਕਹਿ ਕੇ ਘਰੋਂ ਚਲੇ ਗਏ ਕਿ ਉਹ ਦਿੱਲੀ ਜਾ ਕੇ ਕੋਈ ਕੰਮ ਕਰੇਗਾ ਅਤੇ ਕੰਮ ਮਿਲਣ ਤੋਂ ਬਾਅਦ ਘਰਦਿਆਂ ਨੂੰ ਸੂਚਿਤ ਕਰੇਗਾ।
ਹਾਲਾਂਕਿ ਨਾ ਤਾਂ ਉਸ ਨੇ ਕੋਈ ਫੋਨ ਕੀਤਾ ਅਤੇ ਨਾ ਹੀ ਉਸ ਬਾਰੇ ਕੋਈ ਜਾਣਕਾਰੀ ਮਿਲੀ।
ਕੀ ਕਹਿੰਦੀ ਹੈ ਗਾਜ਼ੀਆਬਾਦ ਪੁਲਿਸ?
ਉੱਥੇ ਹੀ ਇਸ ਤੋਂ ਬਾਅਦ, ਦਿੱਲੀ-ਐੱਨਸੀਆਰ ਖੇਤਰਾਂ ਵਿੱਚ ਇੱਕ ਨੌਜਵਾਨ ਦੀ ਪਰਿਵਾਰ ਨਾਲ ਚਿਰਾਂ ਪਿੱਛੋਂ ਹੋਈ ਮੁਲਾਕਾਤ ਬਾਰੇ ਅਖਬਾਰਾਂ ਵਿੱਚ ਇੱਕ ਕਹਾਣੀ ਛਪੀ।
ਗਾਜ਼ੀਆਬਾਦ ਦੇ ਖੋਦਾ ਥਾਣੇ ਪਹੁੰਚੇ ਰਾਜੂ ਨੇ ਵੀ ਅਜਿਹੀ ਹੀ ਕਹਾਣੀ ਦੱਸੀ ਅਤੇ ਇੱਕ ਪਰਚਾ ਦਿਖਾਇਆ।
ਰਾਜੂ ਨੇ ਦੱਸਿਆ ਕਿ ਉਸ ਨੂੰ ਸਕੂਲ ਤੋਂ ਵਾਪਸ ਆਉਂਦੇ ਸਮੇਂ ਅਗਵਾ ਕਰ ਲਿਆ ਗਿਆ ਸੀ। ਅਗਵਾ ਕਰਕੇ ਉਸ ਨੂੰ ਰਾਜਸਥਾਨ ਲਿਜਾਇਆ ਗਿਆ ਸੀ ਅਤੇ ਉੱਥੇ ਉਹ ਭੇਡਾਂ-ਬੱਕਰੀਆਂ ਚਾਰਦਾ ਸੀ।
ਉਸ ਨੇ ਪੁਲਿਸ ਵਾਲੀਆਂ ਨੂੰ ਦੱਸਿਆ ਕਿ ਉਹ ਇੱਕ ਸਰਦਾਰ ਟਰੱਕ ਡਰਾਈਵਰ ਦੀ ਮਦਦ ਨਾਲ ਭੱਜਣ ਵਿਚ ਕਾਮਯਾਬ ਹੋ ਗਿਆ ਅਤੇ ਥਾਣੇ ਪਹੁੰਚ ਗਿਆ।
ਗਾਜ਼ੀਆਬਾਦ ਦੇ ਪੁਲਿਸ ਸੁਪਰਡੈਂਟ ਰਜਨੀਸ਼ ਉਪਾਧਿਆਏ ਨੇ ਇਸ ਬਾਰੇ ਬੀਬੀਸੀ ਨੂੰ ਦੱਸਿਆ ਸੀ ਕਿ ਉਨ੍ਹਾਂ ਨੇ ਸੋਸ਼ਲ ਅਤੇ ਸਥਾਨਕ ਮੀਡੀਆ ਵਿੱਚ ਇਸ ਨੌਜਵਾਨ ਬਾਰੇ ਖ਼ਬਰ ਪ੍ਰਕਾਸ਼ਿਤ ਕੀਤੀ ਜਿਸ ਤੋਂ ਬਾਅਦ ਕਈ ਪਰਿਵਾਰ ਥਾਣੇ ਆ ਗਏ।
ਉਨ੍ਹਾਂ ਨੇ ਦੱਸਿਆ, “ਰਾਜੂ ਨੇ ਲੀਲਾਵਤੀ ਨੂੰ ਜੱਫੀ ਪਾ ਲਈ ਅਤੇ ਰੋਣ ਲੱਗ ਪਿਆ। ਇਸ ਤੋਂ ਬਾਅਦ ਲੀਲਾਵਤੀ ਨੇ ਰਾਜੂ ਦੇ ਸਰੀਰ 'ਤੇ ਬਚਪਨ ਦੇ ਤਿੰਨ ਨਿਸ਼ਾਨਾਂ ਦੀ ਜਾਂਚ ਕੀਤੀ ਅਤੇ ਇਕ ਫੋਟੋ ਦਿਖਾਈ ਅਤੇ ਉਸ ਨੇ ਸਾਰਿਆਂ ਬਾਰੇ ਪੁੱਛਿਆ। ਜਿਸ ਵਿੱਚ ਰਾਜੂ ਨੇ ਆਪਣੀਆਂ ਭੈਣਾਂ ਦੇ ਸਹੀ ਨਾਮ ਦੱਸੇ ਸਨ।"
ਉਨ੍ਹਾਂ ਦੇ ਅਨੁਸਾਰ, "ਰਾਜੂ ਨੇ ਆਪਣੇ ਬਚਪਨ ਦੀ ਕਹਾਣੀ ਦੱਸੀ ਕਿ ਕਿਵੇਂ ਉਹ ਸਕੂਲ ਤੋਂ ਆ ਰਿਹਾ ਸੀ, ਉਸ ਦੀ ਆਪਣੀ ਭੈਣ ਨਾਲ ਛੱਤਰੀ ਨੂੰ ਲੈ ਕੇ ਲੜਾਈ ਹੋ ਗਈ ਸੀ ਅਤੇ ਫਿਰ ਉਸ ਨੂੰ ਅਗਵਾ ਕਰ ਲਿਆ ਗਿਆ ਸੀ ਅਤੇ ਜਦੋਂ ਪਰਿਵਾਰ ਨੇ ਇਹੋ ਕਹਾਣੀ ਸੁਣਾਈ ਤਾਂ ਅਸੀਂ ਉਸਨੂੰ ਪਰਿਵਾਰ ਦੇ ਹਵਾਲੇ ਕਰ ਦਿੱਤਾ।"
ਲੀਲਾਵਤੀ, ਜਿਸ ਨੂੰ ਰਾਜੂ ਨੇ ਆਪਣੀ ਮਾਂ ਦੱਸਿਆ ਸੀ, ਨੇ ਬੀਬੀਸੀ ਨੂੰ ਦੱਸਿਆ ਸੀ ਕਿ 'ਉਸ ਦੇ ਪਤੀ ਤੁਲਾਰਾਮ ਅਤੇ ਬੇਟੀਆਂ ਨੇ ਸਾਰੇ ਸੰਕੇਤਾਂ ਨੂੰ ਦੇਖ ਕੇ ਉਸ ਦੀ ਪਛਾਣ ਦੀ ਪੁਸ਼ਟੀ ਕੀਤੀ ਸੀ।'
ਉਨ੍ਹਾਂ ਨੇ ਕਿਹਾ, "ਇਸ ਤੋਂ ਬਾਅਦ ਹੀ ਅਸੀਂ ਉਸ ਨੂੰ ਸਵੀਕਾਰ ਕਰ ਲਿਆ।"
ਪੁਲਿਸ ਨੂੰ ਹੁਣ ਤੱਕ ਕੀ ਪਤਾ ਲੱਗਾ ਹੈ?
ਗਾਜ਼ੀਆਬਾਦ ਪੁਲਸ ਦਾ ਕਹਿਣਾ ਹੈ ਕਿ ਸੂਚਨਾ ਮਿਲਣ ਤੋਂ ਬਾਅਦ ਰਾਜੂ ਨੂੰ 30 ਨਵੰਬਰ ਨੂੰ ਹਿਰਾਸਤ 'ਚ ਲਿਆ ਗਿਆ ਸੀ ਅਤੇ ਉਸ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।
ਜਦੋਂ ਇਹ ਖ਼ਬਰ ਮੀਡੀਆ ਵਿੱਚ ਆਈ ਤਾਂ ਬੀਬੀਸੀ ਨੇ ਗਾਜ਼ੀਆਬਾਦ ਵਿੱਚ ਪਰਿਵਾਰ ਨਾਲ ਸੰਪਰਕ ਕੀਤਾ ਤਾਂ ਪਰਿਵਾਰ ਦੀ ਸਭ ਤੋਂ ਛੋਟੀ ਧੀ ਹੇਮਾ ਨੇ ਦੱਸਿਆ ਕਿ ਪੁਲਿਸ ਵਾਲੇ ਦੋ ਵਾਰ ਘਰ ਆਏ ਸਨ।
ਹੇਮਾ ਕਹਿੰਦੀ ਹੈ, "ਮੈਂ ਰਾਜੂ ਨੂੰ ਪੁੱਛਿਆ ਕਿ ਕੀ ਤੁਸੀਂ ਲਿਖਿਆ ਹੋਇਆ ਹੈ ਕਿ ਚਾਰ ਭੈਣਾਂ ਹਨ? ਜਵਾਬ ਵਿੱਚ ਉਸ ਨੇ ਕਿਹਾ ਕਿ ਮੈਂ ਉਸਨੂੰ ਚਾਰ ਭੈਣ-ਭਰਾ ਦੱਸੀਆਂ ਸੀ, ਜਿਨ੍ਹਾਂ ਵਿੱਚ ਤਿੰਨ ਭੈਣਾਂ ਅਤੇ ਇੱਕ ਭਰਾ ਹੈ ਪਰ ਅਖਬਾਰ ਨੇ ਚਾਰ ਲਿਖਿਆ ਸੀ, ਉਸ 'ਤੇ ਵਿਸ਼ਵਾਸ ਨਹੀਂ ਹੋਇਆ। ਨਾ ਹੀ ਸਾਨੂੰ ਨਾ ਹੀ ਪੁਲਿਸ ਵਾਲਿਆਂ ਨੂੰ।
"ਅੱਠ ਸਾਲ ਦੀ ਉਮਰ ਵਿੱਚ ਲਾਪਤਾ ਹੋਇਆ ਕੋਈ ਵਿਅਕਤੀ 30 ਸਾਲ ਬਾਅਦ ਮਿਲੇ ਤਾਂ ਕੀ ਤੁਸੀਂ ਉਸ ਨੂੰ ਪਛਾਣ ਸਕੋਗੇ? ਪੁਲਿਸ ਦਾ ਕਹਿਣਾ ਹੈ ਕਿ ਤੁਸੀਂ ਆਪਣੇ ਬੱਚੇ ਨੂੰ ਰੱਖ ਸਕਦੇ ਹੋ ਪਰ ਅਸੀਂ ਤਾਂ ਪੁੱਛ-ਗਿੱਛ ਕਰਾਂਗੇ ਕਿ ਇਹ ਕਿਵੇਂ ਹੋਇਆ, ਉਹ ਕਿੱਥੋਂ ਆਇਆ?"
ਗਾਜ਼ੀਆਬਾਦ ਵਿੱਚ ਟਰਾਂਸ ਹਿੰਡਨ ਦੇ ਡੀਸੀਪੀ ਨਿਮਿਸ਼ ਪਾਟਿਲ ਨੇ ਬੀਬੀਸੀ ਨੂੰ ਪੁਸ਼ਟੀ ਕੀਤੀ ਕਿ 'ਉਨ੍ਹਾਂ ਨੂੰ ਜੋ ਨੌਜਵਾਨ ਰਾਜੂ ਉਰਫ਼ ਭੀਮ ਸਿੰਘ ਮਿਲਿਆ ਹੈ, ਉਹ ਉਹੀ ਵਿਅਕਤੀ ਹੈ ਜੋ ਦੇਹਰਾਦੂਨ ਵਿੱਚ ਮੋਨੂੰ ਸ਼ਰਮਾ ਵਜੋਂ ਰਹਿ ਰਿਹਾ ਸੀ।'
ਉਨ੍ਹਾਂ ਨੇ ਦੱਸਿਆ ਕਿ 'ਹੁਣ ਉਹ (ਰਾਜੂ) ਕਹਿੰਦਾ ਹੈ ਕਿ ਇਹ (ਲੀਲਾਵਤੀ ਦਾ ਪਰਿਵਾਰ) ਉਸ ਦਾ ਅਸਲੀ ਪਰਿਵਾਰ ਹੈ ਅਤੇ ਦੇਹਰਾਦੂਨ ਵਿਚ ਰਹਿੰਦਿਆਂ ਉਸ ਨੇ ਸਮਝ ਲਿਆ ਹੈ ਕਿ ਉਹ (ਸ਼ਰਮਾ ਪਰਿਵਾਰ) ਉਸ ਦਾ ਅਸਲੀ ਪਰਿਵਾਰ ਨਹੀਂ ਹੈ।'
ਹਾਲਾਂਕਿ ਡੀਸੀਪੀ ਪਾਟਿਲ ਦਾ ਕਹਿਣਾ ਹੈ ਕਿ ਉਨ੍ਹਾਂ ਤੋਂ ਅਜੇ ਪੁੱਛਗਿੱਛ ਕੀਤੀ ਜਾ ਰਹੀ ਹੈ ਅਤੇ ਜਾਂਚ ਤੋਂ ਬਾਅਦ ਹੀ ਕੁਝ ਕਿਹਾ ਜਾ ਸਕਦਾ ਹੈ।
ਦੇਹਰਾਦੂਨ ਵਿਚ ਸ਼ਰਮਾ ਪਰਿਵਾਰ ਨੇ ਰਾਜੂ ਨੂੰ ਪਰਿਵਾਰਕ ਮੈਂਬਰ ਵਜੋਂ ਰੱਦ ਕਰ ਦਿੱਤਾ ਹੈ।
ਕਪਿਲ ਸ਼ਰਮਾ ਨੇ ਉਸ ਦੇ ਜਾਣ ਅਤੇ ਗ੍ਰਿਫਤਾਰੀ 'ਤੇ ਰਾਹਤ ਜ਼ਾਹਰ ਕੀਤੀ ਹੈ।
ਪਰ ਡੀਸੀਪੀ ਪਾਟਿਲ ਦਾ ਕਹਿਣਾ ਹੈ ਕਿ ਸਾਹਿਬਾਬਾਦ ਪਰਿਵਾਰ ਅਜੇ ਵੀ ਦੁਵਿਧਾ ਵਿੱਚ ਹੈ।
ਹਾਲਾਂਕਿ ਲੀਲਾਵਤੀ ਦੀ ਧੀ ਰਾਜੋ ਨੇ ਬੀਬੀਸੀ ਨੂੰ ਦੱਸਿਆ ਸੀ ਕਿ ਉਹ ਡੀਐਨਏ ਟੈਸਟ ਕਰਵਾਉਣਗੇ, ਪਰ ਜਦੋਂ ਲੀਲਾਵਤੀ ਦੇ ਪਤੀ ਤੁਲਾਰਾਮ ਤੋਂ ਇਹੀ ਗੱਲ ਪੁੱਛੀ ਗਈ ਤਾਂ ਉਨ੍ਹਾਂ ਕਿਹਾ, 'ਜਦੋਂ ਸਾਨੂੰ ਪਤਾ ਹੈ ਕਿ ਇਹ ਸਾਡਾ ਹੈ ਤਾਂ ਅਸੀਂ ਇਹ ਕਿਉਂ ਕਰਵਾਵਾਂਗੇ।'
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
