दशैँ: यसरी ग्रहण गरिँदैछ टीका

बहुसङ्ख्यक नेपालीले मनाउने बडादशैँको दशौँ दिन शुक्रवार धेरैले मान्यजनबाट टीका, जमरा र आशीर्वाद ग्रहण गरिरहेका छन्।

नेपालका कतिपय क्षेत्रमा विजयादशमीबाट असोज शुक्ल पूर्णिमासम्म पाँच दिनसम्मै टीका लगाउने प्रचलन छ।

विशेषगरी पश्चिमी क्षेत्रमा दशमीको एक दिन मात्र टीका लगाएर आशीर्वाद दिने चलन छ।

दशैँको शुभकामना सन्देश दिँदै राष्ट्रपति विद्यादेवी भण्डारी र प्रधानमन्त्री शेरबहादुर देउवाले दशैँले आपसी सद्‌भाव‚ सहिष्णुता र बन्धुत्वको भावना अभिवृद्धि गरी राष्ट्रिय एकता सुदृढ गर्न थप मद्दत पुग्ने विश्वास व्यक्त गरेका छन्।

कोरोनभाइरस महामारीका कारण यसपालि पनि अधिकारीहरूले सावधानी अपनाएर दशैँ मनाउन भनेका थिए।

पूर्वराजा ज्ञानेन्द्र सहितले सार्वजनिक रूपमा लगाइदिने गरेका टीका यसपालि पनि स्थगित गरेका छन्। 

१५ दिनसम्म मनाइने दशैँ नेपालीहरूको सबैभन्दा ठूलो चाड हो।

दशैँमा पिङ खेल्ने, शक्ति पीठहरूमा पूजा गर्ने, बलि दिने र मीठो परिकार बनाएर खाने चलन छ।