लाइभ, कृष्णभीरमा सडक कटानमा परेपछि वैकल्पिक बाटो प्रयोग हुँदै

गत बुधवार आएको भोटेकोशी-त्रिशूली बाढीपछि थप शवहरू फेला परेका छन् भने सम्पर्कविहीनहरूको खोजीकार्य जारी रहेको अधिकारीहरूले बताएका छन्।

सारांश

बुधवार भोटेकोशी नदीमा आएको बाढीमा परेर मृत्यु हुनेको सङ्ख्या ७५० नाघ्यो, झन्डै २५ सय जना अझै सम्पर्कविहीन
तिब्बततर्फ पनि मृतक र बेपत्ताको सङ्ख्यामा वृद्धि
सीमा क्षेत्रमा बनेको एउटा ताल फुटेको र त्यसको पानी बाहिर प्रवाह भैसकेको जल तथा मौसम विज्ञान विभागका अधिकारीहरूको भनाइ
धादिङको कृष्णभीरमा त्रिशूली नदीसँगै जोडिएको पृथ्वी राजमार्गको एउटा खण्ड कटान

लाइभ कभरेज

३० अगष्ट २०२६बाढीप्रभावित क्षेत्रमा नेपाल टेलिकमका सेवा निःशुल्क
नेपाल टेलिकमले भोटेकोशी बाढीबाट प्रभावित क्षेत्र र आसपासका सेवाग्राहीलाई उपलब्ध गराउँदै आएको निःशुल्क भोइस, डेटा र एसएमएस सुविधा अर्को सूचना नभएसम्म निरन्तर उपलब्ध हुने जनाएको छ।
यसअघि टेलिकमले भदौ १४ गतेसम्मका लागि निःशुल्क भोइस कल, प्रतिदिन २ जीबी डेटा र ५० वटा एसएमएस सुविधा उपलब्ध गराएको थियो।
राहत वितरण तथा उद्धारकार्यलाई सहज बनाउन कम्पनीले उक्त सुविधा थप समयका लागि निरन्तरता दिएको टेलिकमका प्रवक्ता कमल लामिछानेले बताए।
राष्ट्रिय समाचार समितिका अनुसार बाढीका कारण कम्पनीका विभिन्न भौतिक संरचनामा क्षति पुगे पनि दूरसञ्चार सेवा यथासम्भव नियमित राख्न तथा प्रभावित संरचनाको मर्मतसम्भारका लागि प्राविधिक टोली परिचालन भएको छ।
३० अगष्ट २०२६विद्युत् आयोजनामा फसेकाहरूको खोजी र उद्धारको प्रयास जारी
तस्बिर स्रोत, PM Secretariat
भोटेकोशी हुँदै त्रिशूली नदीमा आएको बाढीबाट प्रभावित त्रिशूली–३ ‘बी’ जलविद्युत् आयोजनास्थलमा खोज तथा उद्धारमा नेपाली सेनासहितको प्राविधिक टोली परिचालन भएको छ।
बुधवारको बाढीका कारण विभिन्न जलविद्युत् आयोजनाका सुरुङमा प्राविधिक र कर्मचारीहरूसहित ठूलो सङ्ख्यामा मानिसहरू फसेको अनुमान छ।
आयोजनाका प्रमुख, परामर्शदाता कम्पनीका प्रमुख तथा साइट इन्जिनियरसहित नेपाली सेनाको टोली घटनास्थलमा पुगेर काम सुरु गरेको ऊर्जा, जलस्रोत तथा सिँचाइमन्त्रीको सचिवालयले जनाएको छ।
प्रतिकूल मौसम तथा चुनौतीपूर्ण भौगोलिक अवस्थाका कारण खोज तथा उद्धार गर्न जटिल भए पनि खोज टोली सचेत भएर काममा जुटेको ऊर्जा, जलस्रोत तथा सिँचाइ मन्त्रालयले जनाएको छ।
माथिल्लो त्रिशूली ३ 'ए'मा पनि प्रयास जारी
तस्बिर स्रोत, PM Secretariat
यसअघि प्रधानमन्त्रीको सचिवालयले प्रतिकूल मौसम र रातको अँध्यारोका बीच माथिल्लो त्रिथूली-३ 'ए' जलविद्युत् आयोजनामा फसेका मानिसहरूको उद्धार गर्ने प्रयास गरेको जनाएको थियो।
सचिवालयले जारी गरेको विज्ञप्तिमा "रातको अँध्यारो र प्रतिकूल मौसमका कारण सिर्जित जोखिमलाई पन्छाउन उच्च क्षमताका फ्लडलाइटहरू जडान गरी कार्यस्थलमा काम जारी राखिएको" उल्लेख छ।
सुरुङको प्रवेशद्वारमा बाढी, लेदो र भग्नावशेष थुप्रिएकाले पन्छाएर भित्र प्रवेश गर्नका लागि उद्धार टोलीले खन्ने र बाटो बनाउने प्रयास गरेको बताइएको छ। त्यसका लागि एक्स्कभेटर प्रयोग गरिएको छ।
उद्धार टोलीले अत्याधुनिक 'सर्च क्यामरा' तथा विशेष मोनिटर प्रयोग गरेको पनि प्रधानमन्त्रीको सचिवालयले जनाएको छ।
३० अगष्ट २०२६उद्धार कोषको नाममा ठगी गर्न खोजेको आशङ्कामा एक जना पक्राउ
प्रधानमन्त्री दैवी प्रकोप उद्धार कोषको नाममा ठगी गर्न खोजेको आशङ्कामा प्रहरीले एक जनालाई पक्राउ गरेको छ।
भदौ १० गते रसुवाको भोटेकोशी नदी र तल त्रिशूली नदीमा आएको बाढीका कारण प्रभावित मानिसहरूलाई उद्धार गर्न तथा राहत सङ्कलन गर्न नेपाल सरकारले प्रधानमन्त्री दैवी प्रकोप उद्धार कोषमा सहयोग गर्न सार्वजनिक आह्वान गरेको छ।
तर एक युवकले आफूले रु १,२०,००० रकम सहयोग गरेको भनी "च्याटजीपीटीबाट नक्कली स्टेटमन्ट बनाएर आफ्नो क्यूआर कोड पनि सामाजिक सञ्जालमा पोस्ट" गरेको भन्दै उनलाई नियन्त्रणमा लिई थप अनुसन्धान भइरहेको जिल्ला प्रहरी कार्यालय रामेछापले जनाएको छ।
यो पनि पढ्नुहोस्
बाढीपीडितलाई कसरी गर्ने सहयोग, आफैँले के गर्न मिल्छ के मिल्दैन
३० अगष्ट २०२६भोटेकोशी र त्रिशूली हुँदै आएको बाढी नारायणीमा पुग्दा केही शिथिल
रसुवाको भोटेकोशी नदी हुँदै त्रिशूली नदीमा आइतवार बिहान फेरि बाढी आयो। बिहान ५:१५ बजेदेखि बढेको त्रिशूली नदीको जलसतह बिस्तारै घटेको नुवाकोटका प्रमुख जिल्ला अधिकारी शम्भुप्रसाद रेग्मीले राष्ट्रिय समाचार समितिलाई बताए।
भोटेकोशी र त्रिशूली नदी हुँदै उक्त बाढी नारायणी नदीमा पुगेको थियो। तर नारायणघाट पुग्दा बाढी केही शिथिल भएको देखिएको थियो।
उक्त बाढीका कारण बुधवारको विपत्तिबाट प्रभावित क्षेत्रमा कस्तो असर पुग्यो भन्ने थाहा हुन बाँकी नै छ।
तस्बिर स्रोत, RSS
तस्बिर स्रोत, RSS
तस्बिरको क्याप्शन, त्रिशूली नदी आज बिहान फेरि उर्लिएको देखिएको थियो
तस्बिर स्रोत, RSS
तस्बिरको क्याप्शन, नारायणघाटमा नारायणी नदीमा हिलो मिसिएको पानी पुगेको थियो तर बाढीको प्रवाह केही घटेको थियो
३० अगष्ट २०२६बाढीप्रभावित क्षेत्रमा दिउँसो वर्षा हुन सक्ने
तस्बिर स्रोत, RSS
तस्बिरको क्याप्शन, रसुवाको धुन्चेबाट जिल्लास्थित विभिन्न स्थानमा बाढीबाट प्रभावित मानिसहरूलाई वितरण गर्न हेलिकप्टरबाट राहत सामग्री लग्न थालिएको छ
भोटेकोशी र त्रिशूली नदीमा आएको बाढीका कारण प्रभावित रसुवा, नुवाकोट र धादिङ आसपासका क्षेत्रमा आज दिउँसो वर्षा हुने सम्भावना रहेको जल तथा मौसम विज्ञान विभागले जनाएको छ।
विभागका अनुसार बाढीप्रभावित क्षेत्रमा अहिले बिहान बादल लागेको छ भने दिउँसो मौसममा बदली भई वर्षा हुने सम्भावना छ।
“बाढीप्रभावित क्षेत्रमा अहिले बादल देखिएको छ,” विभागका मौसमविद् डेविट ढकालले राष्ट्रिय समाचार समितिसँग भने।
उनका अनुसार पछि रसुवा, नुवाकोट र धादिङमा मध्यमसम्मको वर्षा हुने सम्भावना छ भने एक–दुई स्थानमा भारी वर्षा हुन सक्छ। “अपराह्ण ४:०० बजेपछि भने खोज तथा उद्धारका लागि मौसम थप प्रतिकूल हुने सम्भावना रहेको छ।”
विज्ञहरूले भोटेकोशी तथा त्रिशूली नदी क्षेत्रमा बाढीको जोखिम कायमै रहेको र माथिल्लो क्षेत्रमा बनेको हिमताल फुट्ने सम्भावना पनि रहेकाले थप वर्षाका कारण राहत, उद्धारमा समस्या आउने भनी सम्बद्ध पक्षको ध्यानाकर्षण गराएको राससले जनाएको छ।
विभागले यस किसिमको विषम परिस्थितिमा नदी तटीय क्षेत्रका प्रभावित बासिन्दा तथा खोज र उद्धारमा खटेका सुरक्षाकर्मी र अन्य जनशक्तिलाई विशेष सतर्कता अपनाउन सुझाव दिएको छ।
३० अगष्ट २०२६कृष्णभीरमा पहिरो जाँदा सडक भासियो, पृथ्वी राजमार्ग अवरुद्ध
तस्बिर स्रोत, RSS
धादिङको कृष्णभीरमा पहिरो खसेपछि पृथ्वी राजमार्ग अवरुद्ध भएको राष्ट्रिय समाचार समितिले जनाएको छ।
काठमाण्डू उपत्यका ट्राफिक कार्यालयका अनुसार त्रिशूली नदीले राजमार्गको भाग कटान हुँदा कृष्णभीर क्षेत्रमा पहिरो गएको र दुवैतर्फ सडक अवरुद्ध भएको हो।
कार्यालयका प्रवक्ता नरेशराज सुवेदीले पहिरोका कारण सडक अवरुद्ध भएपछि पृथ्वी राजमार्ग हुँदै सञ्चालन हुने सवारीसाधन काठमाण्डूमै रोकिएको जानकारी राससलाई दिएका छन्।
बाढी र पहिरोका कारण रसुवासहित विभिन्न जिल्लाका मुख्य राजमार्ग तथा सडकखण्डमा यातायात सेवा प्रभावित भएको छ।
काठमाण्डूस्थित नयाँबसपार्क सञ्चालन गर्ने ल्होत्स बहुउद्देश्यीय प्रालिका महाप्रबन्धक पङ्कज मल्लका अनुसार पृथ्वी राजमार्ग प्रयोग गर्ने गरी काठामाण्डूबाट बाहिरिन लागेका सवारीसाधनहरू नयाँबसपार्कमै रोकिएका छन्।
३० अगष्ट २०२६मृतकको सङ्ख्या बढ्यो, झन्डै २५ सय जना अझै सम्पर्कविहीन
नेपाल प्रहरीले बुधवार आएको बाढीपछि अहिलेसम्म ७३४ जनाको शव फेला परेको आइतवार बिहान जनाएको छ। चितवन र नवलपरासी पूर्वमा सर्वाधिक सङ्ख्यामा शव फेला परेका हुन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले २,४९८ जना अझै सम्पर्कविहीन रहेको जनाएको छ।
तीमध्ये सर्वसाधारण मानिस, सुरक्षाकर्मी, सरकारी तथा विभिन्न जलविद्युत् आयोजनाका कर्मचारी र विदेशी पर्यटक छन्।
प्राधिकरणले अहिलेसम्म ८,१०० जनाभन्दा बढी मानिसलाई प्रभावित स्थानबाट उद्धार गरिएको जनाएको छ।
प्रभावित स्थानहरूमा अहिले खोज, उद्धार र राहतका लागि विभिन्न निकायका झन्डै २०,००० सुरक्षाकर्मी परिचालन गरिएको सरकारी निकायहरूले जनाएका छन्।
३० अगष्ट २०२६मौसमसम्बन्धी जानकारीबारे अद्यावधिक रहन आग्रह
जल तथा मौसम विज्ञान विभागले कम्तीमा सोमवारसम्मका लागि वर्षा हुने चेतावनी जारी गरेको छ र मानिसहरूलाई मौसमसम्बन्धी पछिल्लो जानकारीबारे अद्यावधिक रहन आग्रह गरेको छ।
यसले गर्दा खोज तथा उद्धार कार्य थप चुनौतीपूर्ण हुनसक्ने अधिकारीहरूले बताएका छन्।
विभागले जारी गर्ने तीन तहका चेतावनीमध्ये सबैभन्दा न्यून तहको चेतावनी हो।
यस्तो चेतावनी उक्त क्षेत्रमा सामान्यजस्तै भए पनि यसले प्रभावित स्थलमा भइरहेको खोज तथा उद्धार प्रयासलाई थप कठिन बनाउने सम्भावना रहेको बताइन्छ।
३० अगष्ट २०२६तिब्बततर्फ मृत्यु हुने र बेपत्ता हुनेको सङ्ख्या बढ्यो
चिनियाँ सरकारी प्रसारक सीसीटीभीका अनुसार शनिवार स्थानीय समयअनुसार साँझ ६ बजेसम्म शिगात्से सहरको गिरोङ(केरुङ) काउन्टीमा गएको पहिरोमा १६ जनाको मृत्यु भएको छ भने थप ५४६ जना बेपत्ता छन्।
यसअघि अधिकारीहरूले सात जनाको मृत्यु भएको बताएका थिए।
गिरोङ काउन्टीमा भएको पत्रकार सम्मेलनमा अधिकारीहरूले पहिरोका कारण दुई देशबीचको सीमा नाकामा ठूलो जनधनको क्षति भएको बताएका छन्।
३० अगष्ट २०२६खराब मौसमले उद्धार कार्यमा बाधा
नेपाल र तिब्बतका सीमावर्ती क्षेत्रमा विनाशकारी आकस्मिक बाढीपछि खराब मौसमले उद्धार कार्यमा बाधा पुर्‍याइरहेको अधिकारीहरूले बताएका छन्।
अधिकारीहरूका अनुसार वर्षा र बाक्लो कुहिरोका कारण प्रभावित क्षेत्रमा पुग्न निकै कठिन भइरहेको छ।
भोटेकोशी र त्रिशुली नदीमा आएको बाढीमा परेर ज्यान गुमाउनेको सङ्ख्या कम्तीमा ६७५ पुगेको छ भने अहिलेसम्म करिब ६३० वटा शव फेला पारिसकेका छन्।
तीमध्ये केही शव भारतसम्म धेरै किलोमिटर तल बगेर पुगेका छन्।
उद्धार टोलीहरू हिलो र चट्टानले भरिएको उजाडजस्तो क्षेत्रमा उद्धार कार्यमा जुटेका देखिन्छन्।
उद्धार प्रयासको एउटा मुख्य केन्द्र जलविद्युत् आयोजनाको सुरुङ बनेको छ जहाँ करिब १०० जना कामदार फसेको हुन सक्ने आशङ्का गरिएको छ।
तस्बिर स्रोत, SHAKTIMAYA TAMANG
३० अगष्ट २०२६लाइभ पेजमा यहाँलाई स्वागत छ
नमस्कार। बीबीसी नेपाली सेवाको लाइभ पेजमा यहाँलाई स्वागत छ।
यो पेजमा आज हामी भोटेकोशी-त्रिशूली नदीमा आएको बाढीले पुर्‍याएको क्षति र त्यसपछि जारी उद्धार तथा राहतका प्रयासबारे भइरहेका गतिविधिको अप्डेट गराउने छौँ।