बोरिस जॉन्सन यांचा भारत दौरा रद्द, प्रजासत्ताक दिनी उपस्थित राहणार नाहीत

युकेचे पंतप्रधान बोरिस जॉन्सन हे भारताच्या प्रजासत्ताक दिनाच्या कार्यक्रमाला प्रमुख पाहुणे म्हणून उपस्थित राहणार नाहीत.

बोरिस जॉन्सन यांनी आज (5 जानेवारी) सकाळी पंतप्रधान नरेंद्र मोदी यांच्याशी बोलून भारत दौरा रद्द केल्याचं कळवलं.

भारताच्या प्रजासत्ताक दिनी उपस्थित राहू शकत नसल्याबद्दल बोरिस जॉन्सन यांनी दु:खही व्यक्त केलं.

26 जानेवारी 2021 रोजी प्रजासत्ताक दिनी युकेचे पंतप्रधान बोरिस जॉन्सन हे नियोजित पाहुणे होते.

"युकेमध्ये काल (4 जानेवारी) रात्रीपासून देशव्यापी लॉकडाऊन जारी करण्यात आला आहे, तसंच कोरोनाचा नवीन प्रकार इंग्लंडमध्ये पसरत आहे, त्यामुळे बोरिस जॉन्सन यांना युकेमध्येच राहणं योग्य वाटतं," अशी माहिती युके सरकारकडून देण्यात आली आहे.

यावेळी बोरिस जॉन्सन आणि नरेंद्र मोदी यांनी भारत-युके यांच्यातील संबंधांचा पुनरुच्चार करत कोरोनाविरोधातील लढाईसह इतर मुद्द्यांवरही सहकार्य सुरू ठेवण्याबाबत चर्चा झाली.

जी-7 शिखर संमेलन यंदा ब्रिटनमध्ये होणार आहे. त्यापूर्वीच म्हणजे आगामी सहा महिन्यातच भारताचा दौरा करण्याची आशा बोरिस जॉन्सन यांनी व्यक्त केली.

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.रोज रात्री8 वाजता फेसबुकवर बीबीसी मराठी न्यूज पानावर बीबीसी मराठी पॉडकास्ट नक्की पाहा.)