गुणरत्न सदावर्ते: 'नथुरामजी यांनी सांगितलं होतं की गांधीजींनी हे राम म्हटलंच नव्हतं' #5मोठ्याबातम्या

आज विविध वृत्तपत्र आणि वेबसाईटवर प्रसिद्ध झालेल्या बातम्यांपैकी पाच मोठ्या बातम्यांचा थोडक्यात आढावा,

1. 'नथुरामजी यांनी सांगितलं होतं की गांधीजींनी हे राम म्हटलंच नव्हतं' - गुणरत्न सदावर्ते

एसटी आंदोलनात आघाडीवर असलेल्या वकील गुणरत्न सदावर्ते यांनी सोमवारी (9 मे) त्यांच्या नवीन एसटी कर्मचारी संघटनेची घोषणा केली. यावेळी त्यांनी महात्मा गांधींची हत्या करणाऱ्या नथुराम गोडसेच्या नावाचा उल्लेख 'गोडसेजी' असा केला.

'एसटी कष्टकरी जनसंघ' या नवीन एसटी कर्मचारी संघटनेची स्थापना गुणरत्न सदावर्ते यांनी केली आहे. यावेळी त्यांनी 'जय श्रीराम' अशा घोषणा दिल्या.

ते म्हणाले, "गांधीजींनी शेवटच्या क्षणी श्वास सोडताना 'हे राम' म्हटलं असं इतिहासात लिहिलं आहे. पण नथुराम 'गोडसेजी' यांची न्यायालयात ट्रायल झाली त्यावेळी त्यांनी स्पष्ट केलं होतं की गांधीजींनी कधीही 'हे राम' म्हटलं नव्हतं." एबीपी माझाने हे वृत्त दिलं आहे.

ते पुढे म्हणाले, "गांधीवादाने देशाची आणि महाराष्ट्राची फसवणूक केली. देशात एक षडयंत्र रचण्याचा प्रयत्न गांधीवादी राजकारण्यांकडून केला जात आहे. गेल्या 70 वर्षांत कष्टकरी समाजासाठी कोणतही ठोस काम झालेलं नाही. त्यांना न्याय मिळालेला नाही. यापुढे आम्ही कष्टकऱ्यांसाठी लढू. त्यांना न्याय देण्यासाठी लढू. मातृभूमीसाठी आणि मानवतावाद यातून कष्टकरी कामगारांचा विकास ही आमची भूमिका आहे."

"राम जन्मभूमीचे आम्ही वकील होतो. न्यायालयात आम्ही यासाठी लढलो. प्रभू श्रीरामचंद्रांचा आशीर्वाद घेऊन आम्ही यापुढे लढणार," असंही ते म्हणाले.

गुणरत्न सदावर्ते यांनी या संघटनेची घोषणा करत राजकारणात प्रवेश केल्याचं दिसतं. आगामी मुंबई महानगरपालिका निवडणुका किंवा राज्यातील कोणत्याही निवडणुकीत कामगार उतरेल, असा इशाराही यावेळी त्यांनी दिला.

2. राज ठाकरेंविरोधात भाजप खासदाराचं शक्तीप्रदर्शन

महाराष्ट्र नवनिर्माण सेनेचे अध्यक्ष राज ठाकरे येत्या 5 जूनला अयोध्येचा दौरा करणार आहेत. भाजपचे खासदार ब्रीजभूषण सिंह यांनी मात्र या दौऱ्याला विरोध दर्शवला आहे.

ब्रिजभूषण सिंह आज (10 मे) राज ठाकरेंच्या विरोधात शक्तीप्रदर्शन करू शकतात. या दौऱ्याला विरोध करण्यासंदर्भात त्यांनी एक महत्त्वाची बैठकही बोलवली आहे. यासाठी संतांसह परिसरातील जवळपास 50 हजार उत्तर भारतीय उपस्थित राहणार असल्याचा दावा करण्यात येत आहे. टीव्ही 9 ने हे वृत्त दिलं आहे.

यावेळी नवाबगंज ते नंदिनीनगपर्यंत रॅली काढली जाणार आहे. यापूर्वीही ब्रिजभूषण सिंह यांनी राज ठाकरे यांना अयोध्येत पाय ठेवू देणार नाही, असा इशारा दिला होता.

अयोध्येला येण्याआधी राज ठाकरे यांनी उत्तर भारतीयांची हात जोडून माफी मागावी अशी मागणी त्यांनी केली आहे. "राज यांनी सार्वजनिक माफी मागितली नाही तर मी त्यांना अयोध्येत घुसू देणार नाही," असं ब्रिजभूषण शरण सिंह यांनी म्हटलंय.

"योगी आदित्यनाथ यांनी जनभावना लक्षात घेता जोपर्यंत राज माफी मागत नाही तोपर्यत त्यांना भेटू नये," अशी मागणीसुद्धा ब्रिजभूषण यांनी केली आहे.

3. 'मला जातीयवादी म्हणून हिनवलं त्या विनोदी वक्तव्याचा मी आस्वाद घेतला' - शरद पवार

'मला जातीयवादी म्हणून हिनवलं त्या विनोदी वक्तव्याचा मी आस्वाद घेतला,' असा टोला राष्ट्रवादी काँग्रेसचे अध्यक्ष शरद पवार यांनी मनसे अध्यक्ष राज ठाकरेंना लगावला आहे.

"अशा प्रकारची विधानं केल्यामुळे लोक हसतात. अशी विधानं लोक गांभीर्याने घेत नाहीत. लोक ऐकून सोडून देतात," असंही शरद पवार म्हणाले आहेत.

साताऱ्यात कर्मवीर भाऊराव पाटील यांच्या 63 व्या पुण्यतिथीनिमित्त कार्यक्रमात शरद पवार उपस्थित होते. यावेळी त्यांनी माध्यमांशी संवाद सादला. शरद पवार जातीयवादी असल्याची टीका राज ठाकरे यांनी आपल्या भाषणांमधून केली होती.

देशात महागाई, बेरोजगारी वाढली असताना अशा विषयांवर बोलायचं सोडून भोंग्यांच्या विषयाला प्राधान्य दिलं जातं, लोकांची मनं भरकटवण्याचा प्रयत्न केला जातो, अशी टीका राज ठाकरे यांचं नाव न घेता पवारांनी केली. महाराष्ट्र टाईम्सने हे वृत्त दिलं आहे.

ओबीसी आरक्षणाबाबत मुख्यमंत्री उद्धव ठाकरे आणि जाणकार निर्णय घेतील. सर्वांना मान्य असणारा निर्णय घेतला जाईल असंही शरद पवार म्हणाले.

4. महागाई विरोधात महिलांनी सिलेंडर नदीत फेकले

देशभरात महागाईविरोधात तीव्र संताप व्यक्त केला जात असताना कोल्हापूर जिल्ह्यात कृती समितीच्यावतीने महिलांनी आगळ्या वेगळ्या पद्धतीने केंद्र सरकारविरोधात आंदोलन केलं.

इंधन दरवाढीनंतर आता गॅस सिलेंडरचे दर वाढल्याने घरगुती सिलेंडरची किंमत आता जवळपास 1019 रुपयांपर्यंत पोहोचली आहे. याच्या निषेधार्थ आंदोलनकर्त्या महिलांनी पंचगंगा नंदीत गॅस सिलेंडर फेकले.

तर काही महिलांनी नदीजवळ चूल पेटवून झुणका भाकर बनवली. यावेळी पंतप्रधान नरेंद्र मोदी यांच्याविरोधात घोषणाबाजी करण्यात आली. लोकमतने हे वृत्त दिलं आहे.

'मोदी तेरे देश मे सस्ती दारू, महंगा गॅस' अशी घोषणाबाजी महिलांनी केली.

घरगुती गॅसचे दर सामान्यांच्या आवाक्याबाहेर गेल्याने केंद्र सरकारवर टीका केली जात आहे.

5. 'काँग्रेसने तुम्हाला भरभरून दिलं, आता परतफेड करण्याची वेळ' - सोनिया गांधी

काँग्रेसने आतापर्यंत तुम्हाला भरभरून दिलृं, आता कठीण परिस्थितीत पक्षाला 'कर्जा'ची परतफेड करण्याची वेळ आली आहे, असा स्पष्ट संदेश काँग्रेस अध्यक्षा सोनिया गांधी यांनी दिला. त्या काँग्रेसच्या कार्यसमितीच्या बैठकीत बोलत होत्या.

13 ते 15 मे राजस्थान येथे काँग्रेसचे चिंतन शिबीर होणार असून त्यासंदर्भातील कार्यसमितीच्या बैठकीत सोनिया गांधी पदाधिकाऱ्यांशी बोलत होत्या.

"पक्ष संघटना मजबूत करणं म्हणजे जादूची छडी फिरवणे नव्हे. नेते, पदाधिकारी आणि कार्यकर्त्यांनी स्वार्थ त्यागून कामाला लागलं पाहिजे. सातत्याने आणि शिस्तीने सामूहिक धेय्यासाठी काम केल्यास आव्हानांचा सामना करता येईल," असंही त्या यावेळी म्हणाल्या.

प्रत्येक पक्षाला आत्मचिंतनाची गरज असते, पण टीकेमुळे कार्यकर्त्यांचा आत्मविश्वास ढासळणार नाही, याचीही खबरदारी घ्यायला हवी असा इशाराही त्यांनी काँग्रेस नेत्यांना दिला.

आगामी निवडणुकांसाठी कृती आराखडा, पक्षाची रणनीती आणि चिंतन यासाठी तीन दिवस सलग काँग्रेसच्या बैठका होणार आहेत. काँग्रेसचे ज्येष्ठ नेते जयराम रमेश यांनी पत्रकार परिषदेत सांगितलं, भाजपच्या राजकीय धोरणांमुळे निर्माण झालेल्या आव्हानांचा सामना करणं आणि पक्ष संघटनेवर काम करणं यासाठी चिंतन शिबीर आयोजित केलं आहे.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)