Labaran wasannin BBC Hausa daga 17 zuwa 23 Agusta

Rahoto kai-tsaye

Muhammad Buhari Fagge

1. 20 Agusta 2026Za a iya ganin sauyi a tawagar Aston Villa

   

   Asalin hoton, Getty Images

   A al'ada, lashe gasar Europa League da kuma samun gurbin shiga Gasar Zakarun Turai kan sanya ƙungiya ta yi siyayya mai ƙarfi.

   Sai dai Aston Villa ta fuskanci matsaloli a wannan bazarar, inda ta zama ɗaya daga cikin waɗanda tsarin da ta dade tana suka ya shafa.

   Domin tabbatar da cewa ƙungiyar ta bi ƙa'idojin kuɗi na UEFA da na Premier League, an tilasta mata sayar da Morgan Rogers zuwa Chelsea kan kuɗin da ya kafa tarihi na fam miliyan 117.

   Ko da bayan haka, an kuma sayar da Youri Tielemans, wanda tare da Rogers ya zura ƙwallo a wasan karshe na Europa League da Freiburg a watan Mayu, zuwa Manchester United.

   Villa ta kuma so ta canza salon 'yan wasan bayan hagu da take da su, don haka aka amince Lucas Digne ya koma Paris Saint-Germain, yayin da Matteo Ruggeri daga Atletico Madrid ya zo domin maye gurbinsa.

   Sai dai har yanzu akwai babban rashin tabbas game da tawagar Aston Villa, duk da cewa saura kwanaki huɗu kacal su fara kakar wasanni da wasan Brighton.

2. 20 Agusta 2026Arsenal za ta yi wa Konsa gwajin lafiyar komawa Emirate

   

   Asalin hoton, Getty Images

   Dan wasan bayan Aston Villa, Ezri Konsa, zai yi gwajin lafiya da Arsenal a ranar Alhamis kafin kammala komawarsa filin wasa na Emirates kan kuɗin da ya haura fam miliyan 50.

   Arsenal ta cimma yarjejeniya da Aston Villa kan ɗan wasan ƙungiyar ƙwallon ƙafa ta Ingila a ranar Laraba bayan tattaunawa da shawarwari da suka ɗauki makonni da dama.

   Yanzu an bai wa ɗan wasan bayan izinin tafiya zuwa arewacin Landan.

   BBC Sport ta bayyana a makon da ya gabata cewa Arsenal ta sake buɗe tattaunawa da Aston Villa kan cinikin Konsa, amma har yanzu ba a kai ga yarjejeniya ba a wancan lokacin.

   Daga baya ya zama kamar Gunners za su karkata hankalinsu ga Jarell Quansah na Bayer Leverkusen, kafin daga bisani su sake mai da hankali kan Konsa, lamarin da ya kai ga samun nasarar cimma yarjejeniya.

   Konsa mai shekaru 28, wanda ya koma Aston Villa a watan Yulin shekarar 2019, ya buga wasanni 286 a cikin kakar wasanni bakwai da suka gabata.

3. 19 Agusta 2026Bai kamata a bar Vinicius ya bar Real Madrid ba - Mourinho

   

   Asalin hoton, Getty Images

   Kocin Real Madrid, Jose Mourinho, ya bayyana cewa ya shawo kan Vinicius Jr ka da ya bar kungiyar, inda ya gaya masa cewa komawa wata kungiya "ba zai amfani shi ba."

   Dan wasan na Brazil mai shekaru 26 ya shiga shekararsa ta karshe a kwantaraginsa a Santiago Bernabéu, lamarin da zai ba shi damar barin Real Madrid kyauta a bazara mai zuwa idan bai sabunta kwantaragi ba.

   Wannan ya jawo hankalin gwarzuwar Premier Ingila, Arsenal, wadada ta ga damar daukar daya daga cikin fitattun ‘yan wasan gefe na duniya yayin da tattaunawar sabunta kwantaragi ke ci gaba.

   Sai dai a farkon wannan watan, Vinicius Jr ya yanke shawarar ci gaba da zama a Real Madrid bayan ya sanya hannu kan sabon kwantiragi na tsawon shekaru shida.

   Mourinho, mai shekaru 63, wanda aka tabbatar da dawowarsa Real Madrid karo na biyu a watan Yuni, ya yi magana kan rawar da ya taka wajen tabbatar da cewa dan wasan ya ci gaba da zama a Madrid.

   Da yake magana a shirin talabijin na Spain El Chiringuito, Mourinho ya ce: "Vinicius ya kamu da son Real Madrid."

   Mourinho ya yi imanin cewa ci gaba da zama a Real Madrid shi ne mafi alheri ga Vinicius Jr, wanda ya kasance daya daga cikin muhimman ‘yan wasan kungiyar a shekarun baya-bayan nan.

4. 19 Agusta 2026Arsenal ta cimma yarjejeniya da Aston Villa kan Konsa

   

   Asalin hoton, Getty Images

   Arsenal ta cimma yarjejeniya ta sama da fam miliyan 50 domin dauko ɗan bayan Aston Villa, Ezri Konsa.

   Dan wasan na tawagar Ingila zai yi gwajin lafiya kafin ya kammala komawarsa filin wasan Emirates Stadium.

   A makon da ya gabata, BBC Sport ta bayyana cewa Arsenal ta sake buɗe tattaunawa da Aston Villa kan cinikin Konsa, amma a lokacin bangarorin biyu ba su kai ga cimma matsaya ba.

   Daga baya, Arsenal ta bayyana kamar ta karkata hankalinta zuwa ga dan wasan baya na Bayer Leverkusen, Jarell Quansah.

   Sai dai kungiyar ta sake mayar da hankali kan neman Konsa, kuma yanzu ta cimma yarjejeniya da Aston Villa kan daukar dan wasan.

   Konsa mai shekaru 28, wanda ya koma Aston Villa a watan Yulin 2019, ya buga wasanni 286 a tsawon shekaru bakwai da suka gabata.

   A kakar wasan da ta wuce, ya buga wasanni 48 a dukkan gasa, inda ya ci kwallaye biyu tare da bayar da taimakon kwallo guda daya.

   Hakan ya taimaka wa kungiyar da kocinta Unai Emery ta lashe gasar Europa League, sannan ta kare a matsayi na hudu a gasar Premier League, wanda ya ba ta damar shiga gasar Champions League ta kakar 2026-27.

5. 19 Agusta 2026Babu batun komawata Ingila da kwallo

   

   Asalin hoton, Getty Images

   Harry Kane ya bayyana cewa sha'awar komawa Ingila daga Jamus domin kokarin karya tarihin yawan kwallayen da aka ci a gasar Premier League ba ta da karfi kamar da.

   Dan wasan gaban ya bar Tottenham zuwa Bayern Munich a shekarar 2023 bayan ya ci kwallaye 213 a gasar Premier League, wanda ya rage masa kwallaye 47 kacal ya kai tarihin Alan Shearer na kwallaye 260.

   Tun bayan komawarsa Munich, Kane ya kasance cikin gagarumar bajinta ga kulob dinsa da kuma tawagar Ingila. A kakar wasan da ta wuce kadai, ya ci jimillar kwallaye 73.

   Yanzu Kane ya shiga watanni 12 na karshe na kwantiragin shekaru hudu da ya sanya lokacin da ya koma Bayern Munich kan kudi kimanin fam miliyan 86.4 daga Spurs shekaru uku da suka gabata. Duk da haka, ana sa ran zai fara tattaunawa kan sabon kwantiragi da Bayern.

   Bayan karbar kyautar Golden Shoe saboda zama wanda ya fi kowa zura kwallo a raga a gasar Bundesliga ranar Laraba, kyaftin din Ingila ya jaddada irin yadda ya samu kwanciyar hankali a Bayern Munich.

   Kane ya ce:“Lokacin da na fara barin Ingila, tabbas wannan wani abu ne da nake tunani a kai. Na yi imanin cewa lallai zan dawo wata rana. Amma yanzu wannan sha'awar ba ta da karfi sosai kamar da.”

6. 19 Agusta 2026Manchester United ta taya Baleba £60m

   

   Asalin hoton, Getty Images

   Manchester United na daf da kammala sake gina tsakiyarta a ynkurin da take na maye gurbin ɗan wasan Brazil Casemiro.

   Bayan daukar Andrey Santos daga Chelsea da kuma Youri Tielemans daga Aston Villa cikin sa’o’i 24 kacal a watan da ya gabata, an shafe kusan makonni biyar ana ta rade-radin ko kungiyar za ta kara sayen wani dan wasan tsakiya ko a’a.

   A wasu lokuta, neman “dan wasan tsakiya na uku” ya zama babban batu da ya dauki hankalin masu bibiyar harkokin cinikayyar ‘yan wasa.

   An danganta Manchester United da dan wasan Real Madrid, Aurélien Tchouaméni, haka kuma da Alex Scott na Bournemouth da Manu Koné na Roma.

   A kwanakin baya-bayan nan kuma, sunan Sander Berge na Fulham ya fi karfi a rahotanni, yayin da sunan Tyler Adams na Bournemouth bai gushe daga cikin jerin wadanda ake alakantawa da kungiyar ba.

   A gefe guda, Manchester United ta rage karfin rahotannin da ke cewa tana sha’awar Carlos Baleba na Brighton.

   Sai dai a wani bangare, ba lallai ne kungiyar ta nuna sabuwar sha’awa a kansa ba, domin mafi yawan aikin neman sa an yi shi tun watanni 12 da suka gabata, lokacin da United ta yi kokarin daukarsa amma ta janye bayan ta gano cewa Brighton na neman sama da fam miliyan 100 domin sayar da shi.

   Yanzu kuwa, Manchester United ta gabatar da tayinta na farko, wanda ya kai fam miliyan 60 tare da karin fam miliyan 5 a matsayin kari.

   Ana sa ran wannan tayin ba zai isa ya gamsar da Brighton ba.

   Duk da haka, tattaunawa tsakanin bangarorin biyu na ci gaba, kuma ana sa ran cewa daga karshe za a kammala cinikin.

7. 19 Agusta 2026Tijjani Reijnders ya koma Al-Qadsiah ta Saudiyya daga Man City

   

   Asalin hoton, Getty Images

   Dan wasan tsakiya ɗan kasar Netherlands Tijjani Reijnders ya kammala komawa kungiyar Al-Qadsiah ta Saudiyya daga Manchester City kan kudi fam miliyan 52.

   Dan wasan mai shekaru 28 ya koma Manchester City ne a bara daga AC Milan kan fam miliyan 46.5, amma bai samu damar nuna bajintarsa yadda ake tsammani ba.

   Reijnders ya buga wasanni 50 a dukkan gasa tare da Manchester City, inda ya zura kwallaye bakwai, sannan ya taimaka wa kungiyar ta lashe FA Cup da Carabao Cup a kakar wasa ta karshe da Pep Guardiola ya jagoranci kungiyar.

   Ya fara wasa a dukkan wasannin rukuni uku da Netherlands ta buga a Gasar Kofin Duniya ta 2026, amma bai samu shiga fili ba a wasan zagaye na 32 da suka sha kashi a hannun Morocco, inda aka bar shi a benci har aka tashi wasan.

8. 19 Agusta 2026Inter Milan na dab da ɗaukar Jones daga Liverpool

   

   Asalin hoton, Getty Images

   Inter Milan na dab da kammala yarjejeniyar sayen dan wasan tsakiya na Liverpool, Curtis Jones, kan kudi fan miliyan 35.

   A watan Yuni, Liverpool ta yi watsi da tayin fan miliyan £21.7 daga gwarzuwar Italiya, Inter Milan. A wancan lokacin, Liverpool ta kimanta darajar Jones, mai shekaru 25 wanda ya rage masa shekara guda kacal a kwantiraginsa na yanzu, da ya kai fan miliyan £35.

   Yanzu dai ana ganin cewa yarjejeniyar ta kusan fan miliyan £30 za ta iya sa kungiyoyin biyu su cimma matsaya.

   Majiyoyi daga Italiya na cewa an riga an cimma yarjejeniyar baka, amma dukkan bangarorin biyu sun ce har yanzu akwai wasu bayanai da suke bukatar tattaunawa a kansu.

   Liverpool a shirye take ta sayar da Jones, kuma tana son ta samu kudin da suka yi daidai da burinta na fan miliyan £30 da Inter ta biya Tottenham wajen sayen Djed Spence.

   Kungiyar ta Serie A ta nuna sha'awarta ga Jones tun a watan Janairu, inda ta gabatar da tayin aro tare da zabin saye daga baya, amma Liverpool ta yi watsi da wannan tayi.

   Jones ya buga wa Liverpool wasanni 228 tun bayan da ya fara taka leda a karkashin Jurgen Klopp a shekarar 2019. A kakar wasan da ta gabata, ya buga wasanni 49 a dukkan gasa, amma ya fara wasa sau 18 kacal a gasar Premier League, kuma ya fuskanci wahala wajen tabbatar da matsayinsa a cikin tawagar farko ta tsakiya karkashin sabon koci, Arne Slot.

9. 19 Agusta 2026Aston Villa ta sayi Suzuki da Ruggeri

   

   Asalin hoton, Getty Images

   Aston Villa ta tabbatar da daukar sabbin ‘yan wasa biyu, wato mai tsaron gida Zion Suzuki da kuma mai tsaron baya na hagu Matteo Ruggeri.

   Dan wasan kasar Japan Zion Suzuki ya koma Villa Park daga kungiyar Italiya ta Parma kan kudi kusan fam miliyan 30.

   Shi kuma dan bayan kasar Italiya Matteo Ruggeri ya koma Aston Villa daga kungiyar Atletico Madrid kan cinikin da ya kai fam miliyan 17.

   Suzuki, mai shekaru 23, ya koma Villa duk da cewa yunkurin da mai tsaron ragar kungiyar Emiliano Martinez ya yi na komawa Juventus ya rushe a karshen makon da ya gabata, bayan kungiyoyin biyu sun kasa cimma matsaya kan ciniki.

   Martinez, wanda ya taimaka wa Villa ta lashe Europa League a watan Mayu kuma ya lashe Kofin Duniya na 2022 tare da Argentina, yanzu yana fuskantar rashin tabbas game da makomarsa bayan cinikin zuwa Juventus ya ci tura.

   Aston Villa na kallon Suzuki mai shekaru 23 a matsayin zabin dogon lokaci na mai tsaron ragarsu na farko, watakila har na tsawon shekaru goma masu zuwa.

   Ya shafe shekaru biyu a Parma, inda ya buga wasanni 59 a Serie A, kuma ya taimaka wa kungiyar ta kammala kakar da ta gabata a matsayi na 13.

   Ruggeri, mai shekaru 24, wanda har yanzu bai taba bugawa babbar tawagar kasar Italiya wasa ba, ya zo ne domin maye gurbin Lucas Digne, wanda PSG a ranar 9 ga Agusta.

   Ruggeri ya lashe Europa League tare da Atalanta a shekarar 2024, sannan ya buga sama da wasanni 100 a kungiyar kafin ya koma Atletico Madrid a bazarar bara.

10. 19 Agusta 2026Aston Villa ta ƙi amincewa da tayin £38.5m daga Al Hilal kan Watkins

    

    Asalin hoton, Getty Images

    Kungiyar Al Hilal ta Saudiyya tana tattaunawa da Aston Villa kan cinikin ɗan wasan gabanta Ollie Watkins, wanda shi kansa yana da sha’awar komawa wannan ƙungiya.

    Rahotanni sun ambato cewa ƙungiyar ta Saudiyya ta riga ta miƙa tayin Yuro miliyan 45 kan dan wasan, wanda ya kai kusan Fam miliyan 38.5, sai dai Aston Villa ta ƙi amincewa da tayin.

    Amma duk da haka, tattaunawar tsakanin ɓangarorin biyu na ci gaba da gudana yayin da suke ƙoƙarin cimma matsaya da za ta sa cinikin ya tabbata.

    Aston Villa kuma na bukatar ta dauki wani dan wasa da zai maye gurbin Watkins da zai tafi, ko da yake ana hasashen cewa hakan ne zai hana ɗan wasan tafiya da wuri, dan kar ta sake shi ta rasa wanda za ta saya.

    Watkins, mai shekaru 30, na cikin jerin 'yan wasan da ake son dauka a matsayin wanda zai maye gurbin Karim Benzema, yayin da Al Hilal ke kokarin nemo hanyar warware matsalar kwantiragin dan wasan Faransa domin ba shi damar barin kulob din.

11. 19 Agusta 2026Hukumar kwallon Ƙafa ta Wales ta nemi Infantino ya yi murabus

    

    Asalin hoton, Getty Images

    Babban jami’in gudanarwa na Kungiyar Kwallon Kafa ta Wales FAW, Noel Mooney, ya ce shugaban FIFA, Gianni Infantino, ya kamata ya yi murabus.

    Infantino ya fuskanci suka mai yawa kan yunkurinsa na sayar da hannayen jari a gasar Kofin Duniya ga masu zuba hannun jari masu zaman kansu.

    Mooney, wanda ya taba aiki tare da Infantino a UEFA, ya yi imanin cewa dole ne ya sauka daga mukaminsa saboda “illar da aka yi wa kwallon kafa”, duk da cewa an janye shirin sayar da hannayen jarin.

    Mooney ya ce: “Idan ina zaune tare da Gianni a wannan lokacin, da zan ba shi shawara cewa ya yi kyakkyawan aiki a rayuwarsa ta sana’a.

    A matsayinsa na babban sakataren UEFA, ya gudanar da abubuwa masu kyau sosai. A FIFA kuma, akwai wasu abubuwa kamar aikin da Arsène Wenger ya yi ta hanyar shirin bunkasa fasaha Technical Development Scheme, wanda ya taimaka wajen ciyar da harkar kwallon kafa gaba sosai.”

    Gianni Infantino yana ta fuskantar koma baya a harkokinsa na shugabancin Fifa tun lokacin da ya gabatar da shirin da bai yi nasara ba.

12. 18 Agusta 2026Jamal Musiala ya sake faduwa a fili karo na biyu a kwana huɗu

    

    Asalin hoton, Getty Images

    Bayern Munich ta bayyana cewa Jamal Musiala zai yi magana da kansa bayan da ɗan wasan tsakiyar Jamus ya faɗi a fili yayin wasa karo na biyu cikin kwanaki huɗu.

    A ranar Talata, Musiala ya faɗi mintuna shida kacal bayan da ya shiga fili daga benci, a wasan sada zumunta da Bayern Munich ta doke Heidenheim da ci 4-2.

    Ɗan wasan mai shekaru 23 ya bayyana kamar yana cikin ruɗani yayin da ma’aikatan lafiya suka ba shi kulawa kafin daga bisani aka taimaka masa wajen fita daga filin wasan.

    Lamarin ya faru ne bayan ya kuma faɗi a wasan sada zumunta da Bayern ta doke RB Leipzig 3-1 a Munich ranar Asabar.

    Da yake magana ranar Talata, daraktan wasanni na Bayern Munich, Max Eberl, ya ce:

    "Jamal zai yi magana game da wannan nan ba da jimawa ba. Mun san abin da ya faru kuma muna da cikakken bayani kan halin da ake ciki."

    "Jamal zai yi magana da kansa. Yana cikin ɗakin canza kaya a yanzu, yana shirin canzawa da yin wanka."

    An yi zaton cewa tsananin zafi ya taka rawa a faɗuwar da Musiala ya yi ranar Asabar, inda yanayin zafin ya haura digiri 30 na Celsius.

    Musiala ya rasa watanni shida na farkon kakar wasan da ta gabata bayan ya karya ƙafarsa a gasar Kofin Duniya na Kungiyoyi ta 2025. Sai dai ya dawo taka leda a rabin na biyu na kakar, sannan ya fara wasa a uku cikin wasanni huɗu da Jamus ta buga a Kofin Duniya na 2026.

    Har yanzu Bayern Munich ba ta bayyana cikakken bayani kan musabbabin faɗuwar Musiala ba, amma ana sa ran ɗan wasan zai yi karin haske game da lamarin nan gaba kaɗan.

13. 18 Agusta 2026Ana tattaunawa kan Wan-Bissaka tsakanin West Ham da Aston Villa

    

    Asalin hoton, Getty Images

    Ana ci gaba da tattaunawa tsakanin Aston Villa da West Ham United kan yiwuwar ɗaukar ɗan wasan baya Aaron Wan-Bissaka.

    Aston Villa na shirin sayar da ɗan wasan baya na dama Kosta Nedeljkovic zuwa ƙungiyar Rangers.

    Wan-Bissaka ne babban zaɓin da Villa ke son ɗauka domin maye gurbinsa, kuma rahotanni sun nuna cewa Villa Park ne mafi kusancin wurin da ɗan wasan zai koma idan aka cimma yarjejeniya.

    Ɗan wasan mai shekaru 28 ya taka rawar gani a West Ham tun bayan komawarsa daga Manchester United, kuma ƙwarewarsa wajen kare kai da kai hare-hare daga gefen dama ya sa Aston Villa ke ganin zai iya ƙara ƙarfi ga tawagarta.

    Har yanzu tattaunawar na gudana tsakanin ɓangarorin biyu, yayin da Aston Villa ke ƙoƙarin kammala cinikin domin ƙarfafa tawagarta kafin rufe kasuwar saye da sayar da 'yan wasa.

14. 18 Agusta 2026Senegal ta naɗa Patrick Vieira a matsayin sabon kocinta

    

    Asalin hoton, Getty Images

    Tsohon kyaftin ɗin Arsenal da Faransa, Patrick Vieira, an naɗa shi a matsayin sabon babban kocin ƙungiyar ƙwallon ƙafa ta maza ta ƙasar Senegal.

    Vieira mai shekaru 50 ya maye gurbin Pape Thiaw, wanda aka kora daga aiki bayan ficewar Senegal daga gasar Kofin Duniya ta FIFA 2026 a matakin 'yan 32.

    An haifi Vieira ne a Dakar, babban birnin Senegal, kuma yanzu zai jagoranci ƙasar da aka haife shi. Ya koma Faransa yana da shekara takwas, inda daga baya ya wakilci tawagar ƙasar Faransa fiye da sau 100, ya kuma lashe Kofin Duniya na 1998 da kuma Euro 2000.

    Hukumar Ƙwallon Ƙafa ta Senegal FSF ta ce naɗin nasa yana ya yi daidai da manufofin wasanni na ƙasar.

    Har yanzu ana tattauna cikakkun bayanan kwantiraginsa da kuma ranar da zai fara aiki a hukumance.

    Ana sa ran wasanninsa na farko tare da Teranga Lions za su kasance a watan gobe, a wasannin neman gurbin shiga gasar cin kofin Afirka ta 2027 AFCON.

    Vieira ya zo Senegal ne bayan ya bar aikinsa na kocin Genoa bisa amincewar juna a watan Nuwamban bara, lokacin da ƙungiyar ke kasan teburin Serie A.

    A kakar wasa ta 2024-25, ya yi nasara a wasanni takwas sannan ya yi canjaras tara daga cikin wasanni 26, wanda ya taimaka wa Genoa ta tsira daga faɗuwa tare da kammala kakar a matsayi na 13.

    Sai dai ya bar ƙungiyar bayan samun nasara biyu kacal a kakar 2025-26, kuma dukkansu a gasar Coppa Italia ne.

    Kafin hakan, ya horar da New York City FC, Nice, Crystal Palace da kuma RC Strasbourg.

    A Crystal Palace, ya jagoranci ƙungiyar zuwa matsayi na 12 a Premier League tare da isa wasan kusa da na ƙarshe na FA Cup a kakar 2021-22, kafin a kore shi a watan Maris na 2023 bayan wasanni 12 ba tare da nasara ba.

15. 18 Agusta 2026Mark Zuckerberg, Jeff Bezos me Amazon sun sayi kashi 40 na Liverpool

    

    Asalin hoton, Getty Images

    Wata ƙungiyar masu zuba jari da ta haɗa da wanda ya kafa Amazon, Jeff Bezos, ta sayi kusan kashi 40% na hannun jarin Liverpool daga Fenway Sports Group.

    Da farko an ruwaito cewa kamfanin 1892 Holdings ya sayi kusan kashi ɗaya bisa uku na kulob ɗin, amma kamar yadda jaridar The Athletic ta bayyana, a zahiri adadin ya kai kusan kashi 38%.

    Har ila yau, ƙungiyar masu zuba jarin tana da zaɓin sayen rinjayen hannun jarin Liverpool cikin watanni 12 masu zuwa, duk da cewa babu wata yarjejeniya ta tilas da ke tabbatar da hakan a yanzu.

    A cikin wata sanarwa da ta fitar ranar Juma'a, FSG ta tabbatar da cewa ta cimma “yarjejeniya ta ƙarshe” kan sayar da wani muhimmin kaso na hannun jari marar rinjaye ga 1892 Holdings.

    Ƙungiyar, wadda aka sanya wa suna bisa shekarar da aka kafa Liverpool wato 1892, na ƙarƙashin jagorancin attajirin ɗan kasuwa ɗan asalin Birtaniya da Indiya, Amit Bhatia. Haka kuma ta haɗa da Jeff Bezos da kuma attajirin da ya kafa Facebook tare da Mark Zuckerberg, Eduardo Saverin.

    Bhatia zai zama mataimakin shugaban Liverpool, sannan zai shiga sabon kwamitin gudanarwar kulob ɗin da aka fadada, idan hukumomin da suka dace suka amince da hakan.

    Bhatia surukin fitaccen attajirin ɗan kasuwar Indiya Lakshmi Mittal ne. Ya shafe shekaru 18 a matsayin darakta kuma mai hannun jari a kulob ɗin Queens Park Rangers (QPR) kafin ya sayar da hannun jarinsa a watan da ya gabata.

    Ana sa ran wannan yarjejeniya ta kimanta darajar Liverpool tsakanin fam biliyan biyar zuwa fam biliyan shida.

16. 18 Agusta 2026Ko cinikin Enzo da City zai zama irin na Alexander Isak da Liverpool?

    

    Asalin hoton, Getty Images

    Rahoton cewa cinikin Alexander Isak na fam miliyan 125 zuwa Liverpool ya mamaye kasuwar saye da sayar da 'yan wasa ta bazarar bara, kuma akwai alamun cewa yunƙurin Manchester City na ɗaukar Enzo Fernandez zai iya bin irin wannan hanya.

    Chelsea ta cimma yarjejeniya da wakilin ɗan wasan tsakiya na Argentina, Javier Pastore, a ƙarshen watan Mayu cewa Fernandez zai iya barin kulob ɗin kan kuɗin fam miliyan 120, amma ta sanya ranar 14 ga Agusta a matsayin wa'adin karɓar tayi.

    Yanzu da wa'adin ranar Juma'ar da ta gabata ya wuce ba tare da wata tayi ta hukuma ba, Chelsea ta sanar da tawagar Fernandez cewa ɗan wasan ba na sayarwa ba ne a wannan kasuwar musayar 'yan wasa.

    Sai dai, kamar yadda aka gani a saga ɗin Isak a bara, abubuwa ba su da sauƙi haka. Dan wasan gaba na Sweden ya kammala komawarsa Liverpool a ranar ƙarshe ta kasuwar musayar 'yan wasa, duk da cewa Newcastle United ta shafe makonni tana jaddada cewa ba za ta sayar da shi ba.

    Shekara guda bayan haka, rashin tabbas kan makomar Fernandez bai ƙare ba.

    Manchester City, wadda tsohon kocin Fernandez a Chelsea, Enzo Maresca, ke jagoranta, har yanzu tana da ƙwarin gwiwar ɗaukar ɗan wasan mai shekaru 25, kuma tana ganin Chelsea har yanzu tana sha'awar kulla yarjejeniya.

    Manchester City, wadda kuma ke tattaunawa a mataki na gaba kan yarjejeniyar fam miliyan 85 domin ɗaukar ɗan wasan tsakiya na Morocco Ayyoub Bouaddi, na son ƙarfafa tsakiyar fili bayan Rodri ya amince da komawa Barcelona, yayin da Bernardo Silva ya bar kulob ɗin bayan ƙarewar kwantiraginsa.

17. 18 Agusta 2026Rodri ya koma Barcelona zuwa 2030

    

    Asalin hoton, Getty Images

    Dan wasan tsakiya na kasar Sifaniya, Rodri, ya bayyana cewa bugawa Barcelona wasa wani babban buri ne a gare shi bayan ya isa birnin domin kammala komawarsa daga Manchester City.

    Barcelona ta amince za ta biya Manchester City kusan fam miliyan 65 domin sayen dan wasan mai shekaru 30, wanda ake sa ran zai sanya hannu kan kwantiragin shekara hudu da zakarun gasar La Liga.

    Da yake magana da 'yan jarida a filin jirgin sama ranar Litinin, Rodri ya ce: "Ina matukar farin ciki da zuwa nan. Kwanakin baya sun kasance masu cike da abubuwa, amma ina farin cikin ganin an kammala komai. Tabbas, yin wasa a FC Barcelona buri ne a gare ni."

    Ya kara da cewa yana marmarin haduwa da sabbin abokan wasa, musamman waɗanda ya taɓa wasa da su a tawagar kasarsu Sifaniya.

    "Ba zan iya jira in hadu da abokan wasana ba, da dama daga cikinsu na riga na san su daga tawagar kasa. Lokaci ya yi domin aiki tare kuma in in yi iya kokarina."

    Rodri ya kuma bayyana cewa burinsa shi ne ya taimaka wa Barcelona wajen lashe gasar zakarun Turai ta Champions League da sauran kofunan da za su fafata a kansu.

    Dan wasan, wanda ya lashe kyautar Ballon d'Or ta 2024, ya buga wasanni 298 a cikin shekaru bakwai da ya yi a Manchester City bayan ya koma kungiyar daga Atletico Madrid a shekarar 2019 kan kudin da ya kasance tarihin kungiyar a lokacin, kusan fam miliyan 62.8.

18. 18 Agusta 2026Real Sociedad na son ɗaukar Alvarez daga West Ham

    

    Asalin hoton, Getty Images

    Rahotanni sun nuna cewa kulob ɗin Real Sociedad La Liga yana duba sharuɗɗan da za su ba ta damar kulla yarjejeniya domin ɗaukar ɗan wasan ƙasar Mexico.

    An kuma fahimci cewa sha’awar da Ajax ke nuna wa Álvarez mai shekaru 28 ta ragu a wannan watan.

    Álvarez yana da saura shekara biyu a kwantiraginsa da West Ham United.

    Idan cinikin ya tabbata, zai kasance wata muhimmiyar ƙara ga tawagar Real Sociedad, wadda ke neman ƙarfafa yankin tsakiya kafin fara sabowar kakar wasanni.

19. 18 Agusta 2026Newcastle ta ɗauki Amar Dedić daga Benfica

    

    Asalin hoton, Getty Images

    Ɗan wasan ƙasar Bosniya da Herzegovina Amar Dedić ya koma kulob ɗin ne kan kwantiragin shekaru biyar bayan ya yi gwajin lafiya a yankin Tyneside ranar Litinin.

    Ya sake haɗuwa da kocinsa Matthias Jaissle, wanda tare da shi suka lashe kambun gasar Austrian League a Red Bull Salzburg a shekarar 2023.

    Da yake magana bayan sanar da komawar tasa a ranar Talata, wadda kuma ita ce ranar cikar sa shekaru 24 a duniya, dan wasan ya ce "Jin daɗi ne na musamman kuma babban abin alfahari a gare ni na shiga Newcastle United.

    Ina matuƙar farin cikin kasancewa a nan, kuma na ƙagu na fara buga wa kulob ɗin da kuma magoya bayan sa masu ban mamaki wasa. Sake yin aiki tare da Matthias ya kasance babbar hujja a gare ni. Mun san juna sosai. Ya san abin da zan iya bayarwa a fili, kuma ina farin cikin sake ci gaba da wasa ƙarƙashin jagorancin sa.

    Yin wasa a gasar Firimiya ta Ingila a filin wasa na St James' Park zai zama wani abu na musamman ƙwarai. Kowane wasa yana kama da babban biki, tare da yanayi mai kayatarwa. Ina ɗaukin fara wasa."

    Newcastle na neman sabon ɗan wasan baya na dama tun bayan tafiyar tsohon ɗan wasanta Kieran Trippier, wanda ya koma Wolverhampton Wanderers kyauta bayan kwantiragin sa ya ƙare a farkon wannan bazarar.

20. 18 Agusta 2026Chelsea ta ƙayyade kuɗin da za ta sayar da Neto

    

    Asalin hoton, Getty Images

    Chelsea ta yi wa dan wasanta na gaba Pedro Neto kudi da ya kai fam miliyan 100, yayin da kulob ɗin Al Hilal na Saudiyya ke nuna sha’awar ɗaukar dan wasan.

    Kulob ɗin na Saudiyya na daga cikin ƙungiyoyi da dama da ke zawarcin ɗan wasan gefe, wanda ya koma Chelsea daga Wolves kan kuɗin fam miliyan 54 shekaru biyu da suka gabata.

    Neto ya fara wasa tare da João Pedro da Cole Palmer a wasan Chelsea lokacin da suka doke Real Sociedad da ci 3-1 a wasan sada zumunta a ƙarshen makon da ya gabata.

    Chelsea dai na da matasan 'yan wasa da dama, wanda hakan ka iya zama dalilinta na rabuwa da wasu daga cikin 'yan wasanta.