An dade ana alakanta Pochettino da aikin kocin Man United, Manchester United

Asalin hoton, Getty Images
Lokacin da aka kammala abin da ake sa ran zai kasance matakan ƙarshe na sallamar Michael Carrick daga Manchester United, bayan wani muhimmin taro a Monaco a birnin Faris da alama Mauricio Pochettino na dab da sauya dangantakar da ta ɗauki kusan shekara goma tsakaninsa da Old Trafford zuwa sabon kociyan kungiyar.
Tarihin alaƙar Pochettino da United ta daɗe, inda aka fara danganta sunansa da kungiyar tun lokacin da aka gan shi yana fita daga gidan cin abincin Scott's da ke Mayfair tare da Sir Alex Ferguson a shekarar 2016.
A lokacin, Ferguson ya shafe shekara uku da ritaya, yayin da Pochettino ke gina sunansa a Tottenham Hotspur, inda ya ƙirƙiri wata ƙungiya mai cike da kuzari da kai hare-hare ba ƙaƙƙautawa, salon da fitaccen ɗan Scotland ɗin ya burge shi.
Pochettino ya bayyana a wajen cin anincin a matsayin: "Ganawa ce tsakanin abokan aiki a London, tsakanin wani haziki da kuma mai koyon aiki."
A wannan lokaci ne aka fara haɗa sunansa da Manchester United.
An ambaci Pochettino a matsayin ɗaya daga cikin waɗanda za su maye gurbin Louis van Gaal lokacin da aka sallame shi a watan Mayun 2016 da kuma lokacin da Jose Mourinho ya fuskanci irin wannan ƙaddara a watan Disambar 2018.
Pochettino ya kuma kasance ɗaya daga cikin sunayen da ke gaban jerin zaɓin United lokacin da aka naɗa Erik ten Hag a watan Afrilun 2022, sannan kuma lokacin da aka sallami ɗan ƙasar Holland ɗin a watan Oktoban 2024.
Yanzu, yayin da Carrick ke jiran abin da ya yi kama da hukuncin da ba za a iya kauce masa ba, alamu na nuna cewa Pochettino ne zai gaji aikin horar da Manchester United a Old Trafford.
















