Afcon 2027: Super Eagles ta samu gagarumar nasara a kan Tanzania, Super Eagles

Asalin hoton, Getty Images
Tawagar Super Eagles ta Najeriya ta samu muhimmiyar nasara a wasan neman gurbin shiga gasar Kofin Nahiyar Afirka ta AFCON 2027, bayan da ta doke Tanzania da ci 3-1 a wasan rukuni na 12 da aka buga a filin wasa na Godswill Akpabio da ke Uyo ranar Juma'a.
Najeriya ta fara wasan da karfin gwiwa da cin kwallo cikin mintuna biyu da fara karawar ta hannun Alhassan Yusuf, wanda ya samu tamaula daga wajen Ademola Lookman, lamarin da ya sanya magoya bayan cikin murna tun da wuri.
Sai dai Tanzania ba ta bari aka ci gaba da matsa mata lamba ba, domin ta dawo ta farke kwallon a minti na 32 ta hannun Alphonce Msanga, kenan wasan ya koma 1-1 kuma haka aka je hutu.
Bayan dawowa daga hutun rabin lokaci ne Najeriya ta kara nuna kwarewa da sa matsi ga tawagar Tanzania.
Daga nan Super Eagles ta kara ta biyu ta hannun Tolu Arokodare a minti na 52, sannan ya ci na uku saura minti 30 a tashi daga karawar, kuma haka aka tashi Najeriya ta yi nasarar cin 3-1.
Da wannan sakamakon Super Eagles tana ta biyu a teburin rukuni na 12 da maki shida daga wasa uku, tana da tazarar maki daya tsakani da Guinea Bisau, wadda take kan teburi.
Tawaga daya ce za a dauka a wannan rukuni daga karshe domin shiga gasar cin kofin nahiyar Afirka a 2027 da za a yi a Kenya da Tanzania da kuma Uganda.


















