Abubuwan da ke faruwa a Najeriya da sauran sassan duniya

Rahoto kai-tsaye

Nabeela Mukhtar Uba da Abdullahi Diginza da Rabiatu Kabir Runka

1. 25 Satumba 2026An hana kafafen yaɗa labarai shiga White House duk da umarnin alƙali

   

   Asalin hoton, Reuters

   'Yan jarida daga gidajen talabijin din CNN da MS NOW sun bayyana cewa an hana su shiga wurin liyafar cin abincin daren da aka shiryawa shugaban na China, duk da hukuncin da wani alkali ya yanke na cewa a bar su su koma Fadar White House.

   Gwamnatin Trump ta ce hukuncin ba ya nufin suna da ƴancin shiga su kuma bayar da rahoto kan duk wani taron da ake gudanarwa.

   Wakiliyar BBC ta ce Shugaba Trump ya fara hana kafafen yada labaran shiga Fadar White House a daren Juma'ar da ta gabata ne, inda ya zarge su da yada "labaran karya," da kuma rashin yi wa gwamnatinsa adalci a rahotanninsu.

   Wani alkalin kotun tarayya ya yanke hukuncin mayar da takardun izinin shiga fadar White House ga 'yan jaridar nan take na tsawon kwanaki 14, yayin da kafofin yada labaran ke ci gaba da kalubalantar lamarin a gaban kotu.

2. 25 Satumba 2026Amurka da China sun cimma matsaya kan batutuwa da dama - Xi

   

   Asalin hoton, Reuters

   Shugaban Amurka Donald Trump ya karbi bakuncin shugaban China, Xi Jinping, da matarsa ​a wata liyafar cin abinci ta musamman a Fadar White House, inda ya bayyana su a matsayin mutanen arziki.

   Mista Trump ya tabbatar da cewa kasashen biyu suna da "tsare-tsare daban-daban" -- amma ya ce suna samun fahimtar juna fiye da kowane lokaci a shekarun baya.

   Xi ya ce dole ne kasashen biyu su “tafiyar da al’amuransu a matsayin manyan kasashe masu ɗaukar nauyi domin biyan muradun al’umominsu”, yayin da Trump ya yi fatan samun makoma ta “jituwa, zaman lafiya da nasara” ga kasashen biyu.

   Mista Xi ya bayyana cewa, a yayin tattaunawar da suka yi ranar Alhamis, sun cimma matsaya kan batutuwa da dama, ba tare da ya yi wani karin bayani ba.

   Wakilin BBC ya ce ba a nuna jawaban - da kuma yawancin abubuwan da aka gudanar lokacin ziyarar a gidajen talabijin na Amurka da sauran wurare ba, sakamakon takunkumin da Shugaba Trump ya sanya wa kafofin yada labarai guda uku a makon da ya gabata.

3. 25 Satumba 2026Salam Alaikum!

   Masu bibiyar mu a wannan shafi na Kai Tsaye da BBC Hausa ke kawo maku a kullum, barka da hantsi.

   Da fatan muna cikin ƙoshin lafiya. Kamar kodayaushe, za mu ci gaba da wallafa labarai da rahotanni na abubuwan da ke faruwa a sassan duniya musamman Najeriya da ƙasashe maƙwabta.

   Sai ku kasance tare da mu.