Ayavugwa mw’igura n’igurishwa ry’abakinyi: Felix, Martinez, Zidane, Bellingham, Ings, Memphis

Atletico Madrid iriko irasaba Manchester United  imiriyoni 9.5 z’amapawundi yongere yiyemeze kugura ku miriyoni 70 z’amapawundi kugira ngo yemere kuyitiza umusatirizi wayo wa Portugal Joao Felix w’imyaka 23. (Sunday Mirror)

Roberto Martinez yahoze amenyereza Everton, akaba yari n’umumenyereza w’umurwi nserukiragihugu w’Ububirigi mu kiringo c’imyaka itandatu imbere y’uko asezera inyuma y’ihiganwa ry’igikombe c’isi yose ca 2022, yashitse ku masezerano yo ku munwa na Portugal kugira ngo amenyereze umurwi nserukiragihugu wayo. (Athletic)

Zinedine Zidane yahoze amenyereza Real Madrid yanse ubusabe bwa Reta Zunze Ubumwe za Amerika bwo kumenyereza umurwi nserukiragihugu wayo. (L'Equipe iciye kuri Mail)

Tottenham Hotspur yatoye umunyegori wa Everton n’umurwi nserukiragihugu w’Ubwongereza Jordan Pickford w’imyaka 28, nk’uwushobora gusubirira kizigenza w’Ubufaransa Hugo Lloris w’imyaka 36. (Sunday Mirror)

Al-Nassr yemeye kurekura umusatirizi wa Cameroun  Vincent Aboubakar w’imyaka 30, asanzwe avugwa ko ashobora kwimukira muri Manchester United, kugira ngo arekere ikibanza wa musatirizi wa Portugal Cristiano Ronaldo w’imyaka 37. (Al-Riyadh) 

Crystal Palace iriteguye guhangana na Everton mu rugamba rwo kurondera uwahoze ari umusatirizi w’Ubwongereza Danny Ings w’imyaka 30 ubu akaba asanzwe akinira Aston Villa. (Sun)

Umumenyereza wa Brighton  Roberto de Zerbi yabwiye Leandro Trossard ko akeneye  vyinshi kuri we gusumba, inyuma y’aho ashiriye ku ruhande uyu musatirizi w’Umubirigi w’imyaka 28 mu gihe hari amakuru avuga ko ariko araronderwa na Newcastle United hamwe na Chelsea. (The Athletic)

Umuyobozi nshingwabikorwa wa Brighton  Paul Barber aragabisha Chelsea na Liverpool ko kugira ngo uyo murwi uyihe umukinyi wo hagati wa Equateur Moises Caicedo w’imyaka 21 itegerezwa kwemera kumutangako amafaranga menshi cane. (Metro)

Chelsea yatanguye ibiganiro na Borussia Monchengladbach kugira ngo irabe ko yoronka umusatirizi w’Ubufaransa Marcus Thuram w’imyaka 26 muri kuno kwa mbere, mu gihe amasezerano yiwe azorangira mu ci riza. (Fabrizio Romano)

Leeds United iriko iraraba ko yoronka umusatirizi wa Hoffenheim Umufaransa Georginio Rutter w’imyaka 20. (Sky Sports mu kidagi)

Umunya-Ukraine Igor Kryvenko asanzwe ari umuserukizi wa FIFA  muri ico gihugu yizeye ko Shakhtar Donetsk itazorekura umukinyi wayo wo ku ruhande umunya-Ukraine Mykhaylo Mudryk w’imyaka  22 ngo agende ku miriyoni 88 z’amapawundi zitangwa na Arsenal, akavuga ko ico giciro kidakwiranye na we. (Footboom iciye kuri FourFourTwo.com)

Mudryk ariko ararwanirwa na Chelsea yiyemeje gukubita hasi umurwi uwo ari wo wose worondera guhangana nayo muri uru rugamba rwo kumurondera, be n’umukeba wayo wa Londres, Arsenal. (Sun)

Arsenal ntishaka kwinjira mu ntambara na Chelsea yo kurwanira Mudryk ikaba ahubwo igiye kwongereza uburyo kugira ngo irabe ko yogura umusatirizi wa Portugal Joao Felix w’imyaka 23 akinira Atletico Madrid. (Telegraph)

Umumenyereza w’aba ba Gunners Mikel Arteta ariko arita ku rutare kugira ngo umurwi wiwe ushobore kugura Mudryk na Felix bompi muri kuno kwa mbere. (Mirror)

Umukinyi w’inyuma wa Aston Villa Umufaransa Frederic Guilbert w’imyaka 28 yerekanye ko ashobora kuba yipfuza kuva muri uno murwi muri kuno kwa mbere. (Birmingham Mail)

Umusatirizi wa Barcelona n’umurwi nserukiragihugu w’Ubuholande Memphis Depay w’imyaka 28 aripfuza gusubira muri Manchester United inyuma y’imyaka itandatu avuye muri Old Trafford. (Sport – mu ki Espagnol)

Manchester City iriko iritegura gukomeza uruhande rwo hagati mu mwaka w’inkino uza, Umwongereza Jude Bellingham w’imyaka 19 akinira Borussia Dortmund akaba ari we aronderwa. (ESPN)

Borussia Dortmund yiteze ko Bellingham azokwemeza mu mayinga ari imbere umurwi yipfuza kuzoba akinira mu mwaka w’inkino uza, mu gihe Liverpool, Real Madrid na Manchester City yose irindiriye ingingo yiwe. (90min)