Penodi'r Athro Medwin Hughes yn gadeirydd ar Gyngor Prifysgol Bangor

Yr Athro Medwin HughesFfynhonnell y llun, Prifysgol Bangor
Disgrifiad o’r llun,

Cafodd penodiad yr Athro Medwin Hughes ei gymeradwyo gan aelodau'r cyngor mewn cyfarfod ddydd Llun, 26 Hydref

GanGwydion Edwards
BBC Cymru Fyw
  • Cyhoeddwyd

Mae'r Athro Medwin Hughes wedi cael ei benodi yn gadeirydd newydd ar Gyngor Prifysgol Bangor.

Cafodd y penodiad ei gadarnhau gan y brifysgol ddydd Iau ac mi fydd yn olynu'r cadeirydd presennol, Marian Wyn Jones, wnaeth gyhoeddi'n gynharach eleni ei bwriad i gamu i lawr ddiwedd mis Tachwedd.

Dywedodd yr Athro Hughes mai "anrhydedd mawr" oedd cael ei wadd i'r rôl, a'i fod yn "edrych ymlaen yn fawr" at y cydweithio.

Mae'r Is-ganghellor, yr Athro Edmund Burke, yn "falch iawn" o'i groesawu, meddai.

"Bydd ei brofiad eithriadol o wasanaeth cyhoeddus, llywodraethu ac arwain prifysgolion, ynghyd â'i ddealltwriaeth drylwyr o Gymru a'i sector addysg uwch, yn gaffaeliad aruthrol i Brifysgol Bangor."

'Profiad helaeth'

Yn ôl datganiad y brifysgol, mae'r Athro Hughes yn "un o arweinwyr addysg uwch mwyaf uchel ei barch Cymru".

"Mae ganddo brofiad helaeth o wasanaeth cyhoeddus, llywodraethu ac arwain prifysgolion.

"Yn ystod gyrfa sydd wedi para dros dri degawd, mae wedi arwain rhaglenni trawsnewid ac uno sefydliadol mawr ar draws y sector addysg uwch, yn fwyaf nodedig fel is-ganghellor Prifysgol Cymru a Phrifysgol Cymru y Drindod Dewi Sant ac mewn uwch swyddi ym Mhrifysgol Cymru Llanbedr Pont Steffan a Phrifysgol Fetropolitan Abertawe."

Yr Athro Edmund BurkeFfynhonnell y llun, Prifysgol Bangor
Disgrifiad o’r llun,

Mae'r is-ganghellor, yr Athro Edmund Burke, yn "falch iawn" o groesawu'r Athro Medwin Hughes i'r rôl

Graddiodd o Brifysgol Cymru, Aberystwyth, a Choleg Iesu, Prifysgol Rhydychen.

Mae wedi gwasanaethu ar nifer o gyrff cenedlaethol a rhyngwladol, gan gynnwys UNESCO, y Comisiwn Ewropeaidd, Cyngor Ewrop a Llywodraeth Cymru.

Bu hefyd yn cadeirio a gwasanaethu ar amrywiaeth eang o sefydliadau ym maes addysg, iechyd, diwylliant a bywyd dinesig, gan gynnwys Llais - corff Llais y Dinesydd ar gyfer Iechyd a Gofal Cymdeithasol Cymru, corff sy'n cynrychioli'r Eglwys yng Nghymru ac Opera Cenedlaethol Cymru.

Cafodd CBE ei ddyfarnu iddo yn 2023 i gydnabod ei gyfraniad i fywyd cyhoeddus.

Marian Wyn Jones
Disgrifiad o’r llun,

Bydd yr Athro Medwin Hughes yn olynu Marian Wyn Jones yn y swydd, wnaeth gyhoeddi'n gynharach eleni ei bwriad i gamu i lawr ddiwedd mis Tachwedd

Esboniodd yr Athro Hughes ei fod yn "edrych ymlaen yn fawr at weithio gyda'r is-ganghellor a'm cyd-aelodau o'r Cyngor a staff ar draws y brifysgol i gefnogi datblygiad parhaus y sefydliad".

"Gall Cymru fod yn falch o Brifysgol Bangor ac o'i thraddodiad academaidd ac ymchwil nodedig.

"Edrychaf ymlaen at wasanaethu'r brifysgol yn y blynyddoedd i ddod," ychwanegodd.

Meddai'r Is-ganghellor, yr Athro Edmund Burke: "Edrychaf ymlaen at gydweithio'n agos â Medwin.

"Mae ei ymrwymiad i addysg, diwylliant ac ymgysylltiad dinesig yn cyd-fynd â gwerthoedd a chenhadaeth y brifysgol."

'Gwasanaeth rhagorol'

Estynnodd yr Athro Edmund Burke ei ddiolch hefyd "i Marian Wyn Jones am ei hymroddiad a'i gwasanaeth rhagorol".

"Mae ei harweinyddiaeth wedi helpu llywio Prifysgol Bangor trwy gyfnod o newid i'r brifysgol a'r sector addysg uwch ehangach.

"Mae ymroddiad ac ymrwymiad di-syfl Marian wedi bod yn gyfraniad amhrisiadwy at y sefydliad a'i gymuned."

Dywedodd Marian Wyn Jones ei bod yn "falch o fod wedi chwarae rhan yn nhaith y brifysgol yn ystod cyfnod o her a newid digynsail ar draws y sector addysg uwch".

"Mae wedi bod yn fraint cael gwasanaethu sefydliad sy'n gwneud gwahaniaeth mor gadarnhaol i gynifer o fywydau.

"Rwy'n falch dros ben mai'r Athro Medwin Hughes fydd yn fy olynu ac rwy'n dymuno pob llwyddiant iddo wrth iddo arwain y Cyngor drwy'r bennod nesaf yn hanes y brifysgol."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.