Marwolaeth myfyriwr 'disglair' mewn llyn yn Eryri yn 'ddamwain' - cwest

Roedd Mahammed Naim Islam yn 20 oed pan fu farw yn Eryri
- Cyhoeddwyd
Mae cwest yng Nghaernarfon wedi cofnodi mai damwain oedd marwolaeth myfyriwr 20 oed o Lundain a foddodd mewn llyn yn Eryri.
Roedd Mahammed Naim Islam wedi bod yn cerdded ar yr Wyddfa gyda dau ffrind pan benderfynodd fynd i nofio yn Llyn Glaslyn, islaw'r copa, ar 26 Medi.
Clywodd y gwrandawiad yng Nghaernarfon fod y llyn yn adnabyddus am ei ddyfnder, ac na fyddai tymheredd y dŵr wedi bod yn fwy na 10 gradd Celsius.
Dywedodd y crwner fod Mahammed wedi mynd allan o'i ddyfnder yn y dŵr, mewn amgylchiadau "trasig a thrist iawn".
Canfod corff dyn 'disglair a chariadus' mewn llyn ger yr Wyddfa
- Cyhoeddwyd28 Medi
Myfyriwr 'disglair' wedi boddi mewn llyn ger copa'r Wyddfa - cwest
- Cyhoeddwyd7 Hydref
Dywedodd cydlynydd Achub Mynydd, Elfyn Jones, fod y llyn yn fas ar lan y dŵr ond ei fod yn dyfnhau'n serth iawn o fewn ychydig fetrau.
Clywodd y llys nad oedd Mahammed yn gallu nofio, a'i fod wedi cael ei weld yn diflannu o dan y dŵr.
Aeth dau berson oedd yn mynd heibio i mewn i'r dŵr mewn ymgais i achub y myfyriwr, ond nid oeddent yn gallu dod o hyd iddo.
Anfonwyd aelodau o Dîm Achub Mynydd Llanberis i'r ardal, a chynhalion nhw chwiliadau ar y lan a'r dŵr nes iddi dywyllu.
Y diwrnod canlynol, daeth deifwyr yr heddlu o hyd i gorff y dyn ifanc.
Clywodd y cwest nad oedd archwiliad post-mortem wedi canfod unrhyw dystiolaeth o anafiadau eraill, nac o gyffuriau nac alcohol.
Cofnodwyd mai boddi oedd achos ei farwolaeth.
Wrth gofnodi ei chasgliad, dywedodd y dirprwy grwner ar gyfer gogledd-orllewin Cymru, Sarah Riley, ei bod yn fodlon mai damwain oedd y farwolaeth.
"Bu farw Mahammed Naim Islam ar 27 Medi yn Llyn Glaslyn o ganlyniad i foddi," meddai.
Dywedodd teulu Mahammed Naim Islam mewn teyrnged adeg ei farwolaeth ei fod yn "ddyn ifanc disglair gyda dyfodol addawol o'i flaen".
"Roedd yn fab ffyddlon, yn frawd cariadus ac yn ffrind annwyl, ac mi wnaeth ei garedigrwydd a'i gymeriad gyffwrdd â bywydau pawb yr oedd yn ei adnabod."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.