Pryderon ynghylch effaith gornest Fury-Joshua ar Gaerdydd yn oriau mân y bore

Tyson Fury ac Anthony Joshua (30 Medi)Ffynhonnell y llun, Getty Images
Disgrifiad o’r llun,

Bydd yr ornest rhwng y bocswyr pwysau trwm, Tyson Fury (chwith) ac Anthony Joshua, yn digwydd ar 12 Rhagfyr

GanGwydion Edwards
BBC Cymru Fyw
  • Cyhoeddwyd

Wrth i'r bocswyr Tyson Fury ac Anthony Joshua baratoi at eu gornest hir-ddisgwyliedig yng Nghaerdydd, mae rhai wedi codi pryderon am effaith y digwyddiad ar bobl leol.

Bydd yr ornest yn cael ei chynnal yn Stadiwm Principality ar 11 Rhagfyr, ond gan nad oes disgwyl i'r digwyddiad orffen tan 03:00 y bore canlynol, mae Cyngor Caerdydd wedi derbyn gwrthwynebiadau.

Fe gafon nhw'r gwrthwynebiadau fel rhan o gais y stadiwm i ymestyn eu horiau trwyddedu, ac yn eu plith mae pryderon am ymddygiad gwrthgymdeithasol, sŵn, traffig a diogelwch y cyhoedd.

Mae disgwyl i'r digwyddiad orffen yn oriau mân y bore er mwyn cyd-fynd â'r oriau gwylio poblogaidd yn yr Unol Daleithiau.

Bydd is-bwyllgor trwyddedu'r cyngor yn trafod y cynigion ar 25 Tachwedd.

Mae Cyngor Caerdydd a Stadiwm Principality wedi cael ceisiadau am sylw.

Stadiwm PrincipalityFfynhonnell y llun, Getty Images
Disgrifiad o’r llun,

Cafodd Stadiwm Principality ei hagor yn 1999, dan enw Stadiwm y Mileniwm

Mae'r stadiwm yn gweithredu cyrffyw tan 01:00 pan fydd y to ar gau, ond maen nhw wedi gofyn am ganiatâd i weithgareddau trwyddedig - sy'n cynnwys gwerthu alcohol a chwarae cerddoriaeth - barhau tan 03:00 ddydd Sadwrn 12 Rhagfyr, a'r lleoliad i aros ar agor tan 03:30.

Wedi'i lleoli yng nghanol Caerdydd mae yno gartrefi yn agos i'r stadiwm.

Ysgrifennodd un person, sy'n byw'n union gyferbyn, at y cyngor gan ddweud eu bod yn cefnogi cynnal y digwyddiad, ond galwon nhw am "amodau ychwanegol" i gael eu gweithredu, er mwyn "diogelu trigolion sy'n byw o amgylch y stadiwm".

Esboniodd y person fod y safbwynt yn "ymwneud ag atal niwsans cyhoeddus ac atal troseddau ac anhrefn".

Galwodd am gynllun gwasgaru ar gyfer y strydoedd o amgylch y stadiwm, gyda stiwardiaid yno nes bod y torfeydd wedi gwasgaru, dim chwarae cerddoriaeth trwy uwchseinyddion y tu allan i'r stadiwm ar ôl hanner nos, ac y dylai gwaith glanhau'r strydoedd gael ei gwblhau erbyn 08:00 ar 12 Rhagfyr.

'Hwb economaidd sylweddol'

Ysgrifennodd tri arall at y cyngor hefyd yn galw i'r cais gael ei wrthod, gydag un yn dadlau na fyddai'r "sŵn ac aflonyddwch hwyr nos" yn dod i ben pan fydd y digwyddiad yn gorffen.

Yn ôl trigolyn lleol arall, sydd â phlant ifanc, byddai'r digwyddiad yn parhau tan oriau mân y bore ac yn "achosi anhrefn llwyr i'r rhai ohonom sy'n byw reit wrth ei ymyl".

Dywedodd yr unigolyn y byddai "gweiddi a chanu" yn oriau mân y bore yn "deffro'r tŷ cyfan ac yn ein gadael gyda phlant sydd wedi blino'n lân ac o dan straen".

Ar y llaw arall mae rhai wedi ysgrifennu yn mynegi cefnogaeth rhoi caniatâd i'r amodau trwyddedu, gydag un yn dweud eu bod yn credu y byddai'r digwyddiad yn dod â "hwb economaidd sylweddol" i fusnesau yn y ddinas.

Roedd un arall yn dweud y gallai'r digwyddiad helpu i ddenu mwy o dwristiaid yno, yn enwedig o America.

Joe Calzaghe (dde) yn erbyn Mikkel KesslerFfynhonnell y llun, Getty Images
Disgrifiad o’r llun,

Ni wnaeth buddugoliaeth Joe Calzaghe (dde) yn erbyn Mikkel Kessler yn 2007 gychwyn yn y stadiwm tan ei bod hi'n 02:00

Bu lleoliadau eraill yn cael eu hystyried ar gyfer cynnal y digwyddiad, gan gynnwys Wembley, ond roedd y cyrffyw llym o 23:00 ar gyfer digwyddiadau yno yn broblem, gan fod Netflix yn ffafrio darlledu yn ystod oriau poblogaidd America.

Yng Nghaerdydd er bod gorffen yn oriau mân y bore yn gofyn am gydlynu helaeth o ran trafnidiaeth, plismona a rheoli torfeydd yng nghanol y ddinas, mae cynsail eisoes ar gyfer digwyddiadau ymladd hwyr nos.

Er enghraifft, ni wnaeth buddugoliaeth Joe Calzaghe yn erbyn Mikkel Kessler yn 2007 gychwyn tan ei bod hi'n 02:00.

Mae cais y stadiwm i newid y drwydded wedi'i wneud yn unol â Deddf Trwyddedu 2003, gyda chyfnod ymgynghori o 28 diwrnod wedi'i ganiatáu.

Mae'n bosib cyflwyno sylwadau i wrthwynebu neu gefnogi'r cynigion mewn perthynas ag atal troseddau ac anhrefn, diogelwch y cyhoedd, niwsans cyhoeddus, a diogelu plant rhag niwed.

Os caiff gwrthwynebiadau eu derbyn, yna mae'n rhaid i is-bwyllgor trwyddedu'r cyngor gyfarfod i'w hystyried, ac mi allen nhw "addasu amodau'r drwydded neu wrthod y cais yn gyfan gwbl neu'n rhannol".

Mae Cyngor Caerdydd a Stadiwm Principality wedi cael ceisiadau am sylwadau.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.