Connie Fisher ac 20 mlynedd ers perfformio Maria yn y West End

- Cyhoeddwyd
Ar 15 Tachwedd 2006, agorodd sioe gerdd The Sound of Music yn theatr The Palladium yn y West End yn Llundain, gyda Connie Fisher o Hwlffordd yn chwarae'r brif ran.
Roedd Connie wedi cael ei dewis i chwarae Maria drwy'r rhaglen realaeth How Do You Solve a Problem Like Maria? lle roedd 10 perfformwraig yn canu o flaen beirniaid - gan gynnwys y cyfansoddwr Andrew Lloyd Webber - er mwyn brwydro am eu lle ar y llwyfan.
Dyma rai o atgofion Connie am y profiad a newidiodd ei bywyd.
'Beth oedd gen i i'w golli?'
O'n i newydd raddio o goleg drama Mountview yn haf 2025, ond yn y byd mawr, dydy gradd dosbarth cyntaf mewn dawnsio tap ddim yn ddefnyddiol iawn!
Beth wyt ti ei angen ydy profiad, felly rhaid i ti roi'r gwaith mewn a thrio eto ac eto, ac o'n i'n mynd i glyweliadau ar gyfer sioeau West End; dwi'n meddwl mod i wedi trio am Christine yn The Phantom of the Opera o leia' tair gwaith y flwyddyn honno.
Roedd gen i swydd mewn telesales, oedd yn hyblyg o amgylch y clyweliadau – roedd y rhan fwyaf o'r staff yno yn berfformwyr hefyd, oedd yn gwneud yr un peth.
Un diwrnod, dywedodd Lucy dros y ddesg bod Andrew Lloyd Webber yn chwilio am Maria, ac y dyliwn i fynd amdano. Dywedodd fy asiant 'No way' – dyma'r tro cyntaf oedden nhw'n castio rhywun i sioe gerdd drwy raglen deledu.

Andrew Lloyd Webber oedd yn gyfrifol am adfywio sioe gerdd The Sound of Music yn y West End, a phenderfynu dod o hyd i'r brif ran drwy raglen deledu
Ond dyna pryd 'nes i benderfynu fod rhaid i mi – roedd hi wedi bod yn flwyddyn, a doedd gen i ddim swydd. Ac o'n i'n gwybod mod i'n iawn ar gyfer y rhan yma, felly roedd rhaid i mi fynd amdano.
Beth oedd gen i i'w golli?
'Cael fy nhaflu mewn'
Yn y rownd derfynol, o'n i'n disgwyl i Siobhán ennill, felly roedd e'n sioc pan ddaeth hi'n drydydd. Roedd Helena wedi ennill bob sing-off, ac o'n i wedi gwneud bach o gamgymeriad yn y perfformiad olaf...
Dwi'n cofio sefyll wrth Graham Norton, yn meddwl 'waw, gall y foment yma newid fy mywyd'. Do'n i methu ystyried peidio ennill, achos o'n i wir ddim eisiau meddwl yn negyddol ar yr eiliad yna.
O'n i'n crynu gan ofn ac adrenalin – a dwi dal i gofio'r teimlad 'na nawr. Yr eiliad pan waeddodd e 'CONNIE', roedd 'na dân gwyllt a bangs ac roedd e fel breuddwyd – hollol anhygoel.

Roedd clywed ei henw yn cael ei weiddi yn 'hollol anhygoel' meddai Connie
Dwi'n cofio'r conffeti yn disgyn, ac Andrew yn dod i roi cwtsh i mi a dweud 'dim gormod o siampên heno, 'dyn ni yn y stiwdio recordio fore Llun'. Beth?!
Felly ges i nhaflu reit mewn iddo.
'Nes i recordio albwm unigol ac albwm cast y sioe cyn wedyn cael chwech wythnos o ymarfer cyn i'r sioe agor. O'n i'n meddwl sut dwi am ddysgu hyn i gyd?!
O'n i wedi hyfforddi ar ei gyfer e ac o'n i'n barod – ond tan ti'n cael dy daflu i mewn, ti wir ddim yn gwybod.
Ond o'dd e'n briliant, a phopeth o'n i wedi bod eisiau ei wneud, ac o'n i'n ei garu e.
Ro'n i'n caru'n gynulleidfa, a dwi'n meddwl bod nhw'n caru dod i ngweld i. Roedd 'na ovation mor hir ar y noson gynta'.
Roedd y bobl wir gyda fi, yn enwedig y gynulleidfa o Gymru. Roedd Edwards Coaches yn dod lan i'r Palladium ddwywaith y dydd i ngweld i! Ddaeth yr holl Gymoedd draw dwi'n meddwl – ac o'n i mor ddiolchgar. Pawb yn dweud wrtha i bod nhw 'di pleidleidio drosta i. O'n i'n blown away.

Tair actores sydd wedi portreadu Maria Von Trapp - Jean Bayless o'r cynhyrchiad West End gwreiddiol yn 1961, Julie Andrews o'r ffilm enwog o 1965, a Connie o'r adfywiad yn y West End o 2006
Ges i gyfloedd anhygoel, fel cael cyfarfod Julie Andrews. Es i'w gweld hi yn perfformio yn yr O2, a gefn llwyfan, gofynnodd hi i mi sut oedd ei pherfformiad hi?! O'n i mor star-struck.
Roedd e un o amseroedd gorau mywyd i. Ennill oedd un o adegau gorau fy mywyd i, yn sicr, achos newidiodd i fy mywyd i, ac roedd yn brofiad mor anhygoel.
'Nes i gofio gymaint dwi'n caru'r theatr'
'Nes i'r sioe yn y Palladium am bron i ddwy flynedd, wedyn proseictau eraill, yna mynd ar daith The Sound of Music am bum mlynedd.
Ond doedd e ddim yn gwneud synnwyr gyda dechrau teulu. A dwi wedi cael trafferthion gyda fy llais dros y blynyddoedd, a do'n i methu cario 'mlaen i wneud wyth neu naw sioe yr wythnos. Roedd rhaid i mi wneud penderfyniadau mawr.
Felly roedd rhaid i mi gymryd cam oddi wrth y byd yna.
Dwi nawr yn berchen ar gwmni cynhyrchu, ac hefyd yn rhoi gwersi canu i bobl ifanc sydd eisiau mynd i goleg drama.
Am flynyddoedd, 'nes i stopio gwneud dim gyda'r theatr achos o'n i'n hiraethu amdano gymaint.
Ond ar ôl cyfarfod Tim Green, sef fy mhartner busnes nawr, 'naethon ni ddechrau mynd i'r theatr gyda'n gilydd. 'Nes i gofio gymaint dwi'n caru'r theatr.

Cafodd Connie bron i ddwy flynedd hapus yn chwarae Maria ar lwyfan y Palladium yn y West End - gan weithio gydag 83 plentyn oedd yn chwarae'r plant Von Trapp!
A dwi wedi dechrau canu mwy yn ddiweddar. Dwi'n meddwl mod i wedi dysgu i dderbyn fy llais fel mae e heddiw, a dim trio cael y llais oedd gen i yn 23 oed.
Dwi'n canu'n gyhoeddus mewn cyngerdd elusennol mis Rhagfyr, a hynny am y tro cyntaf ers oesoedd. Ti'n gallu colli hyder yn dy hun. Dwi'n meddwl mod i wedi bod angen ychydig o amser a phellter i sylweddoli beth dwi wir yn ei garu mewn bywyd, a hynny ydy canu a pherfformio.
Dwi wedi cyrraedd oedran lle dwi'n poeni llai am beth mae pobl yn ei feddwl, a mwy am lenwi fy enaid gyda cherddoriaeth. Dwi'n meddwl mod i'n barod i ganu eto.
Anodd meddwl beth fyddai wedi digwydd i mi, tasen i heb ennill.
Ond dwi'n meddwl fydden i wedi cario 'mlaen i drio, achos rhaid i ti 'climb ev'ry mountain, 'til you find your dream', yn does?!
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Hefyd o ddiddordeb
- Cyhoeddwyd28 Chwefror

- Cyhoeddwyd29 Awst

- Cyhoeddwyd17 Ebrill
