'Da ni'n cael ein gadael ar ôl' - y dref glan môr gyda signal ffôn gwaethaf y DU

Dinbych-y-pysgodFfynhonnell y llun, Getty Images
Disgrifiad o’r llun,

Yn ôl Which?, Dinbych-y-pysgod yw'r lle gwaethaf yn y DU am signal ffôn

GanShelley PhelpsCharlie Buckland a Harri EvansBBC Cymru Fyw
  • Cyhoeddwyd

Mae pobl a busnesau mewn tref glan môr boblogaidd yn Sir Benfro, sydd wedi'i enwi'r lle gwaethaf am signal ffôn yn y DU, yn cael eu rhwystro'n sylweddol gan y broblem.

Yn 2025 cafodd cod post Dinbych-y-pysgod ei enwi fel y lle gwaethaf yn y Deyrnas Unedig o ran ansawdd signal ffôn symudol gan gwmni Which?.

Yn siarad mewn dadl yn San Steffan yn gynharach yn yr wythnos, dywedodd yr AS lleol nad yw'r cynlluniau i wella mast ffôn yn yr ardal o fewn dwy flynedd yn "ddigon da".

Dywedodd un sy'n rhedeg siop yn y dref ei fod yn treulio oriau bob wythnos yn ceisio ffonio cwsmeriaid yn ôl oherwydd y signal gwael a bod pobl a busnesau wedi cael eu "gadael ar ôl".

Dywedodd llywodraeth y DU fod ganddyn nhw "uchelgeisiau mawr" o ran cysylltedd, a'u bod yn gweithio'n agos gyda'r diwydiant i'w cyflawni.

Roedd Henry Tufnell o'r Blaid Lafur, yr Aelod Seneddol dros Ganol a De Sir Benfro, yn arwain dadl ar gysylltedd gwledig yn Nhŷ'r Cyffredin ddydd Mercher.

Dywedodd nad yw "band eang a signal ffôn dibynadwy yn foethusrwydd".

"Ond mewn llawer o gymunedau gwledig, fel y rhai yn fy etholaeth i, mae cysylltedd yn dal i fod yn brin," meddai.

Dywedodd fod data Ofcom yn rhoi ei etholaeth yn 444fed o 650 yn y DU o ran ansawdd gwasanaethau symudol.

Mae'r broblem wedi cael ei wneud yn waeth gan benderfyniad i ddadgomisiynu mast ffôn yn yr ardal yn gynharach yn y flwyddyn, sy'n effeithio ar gwsmeriaid O2, Vodafone a Three.

Henry TufnellFfynhonnell y llun, Tŷ'r Cyffredin
Disgrifiad o’r llun,

Dywedodd Henry Tufnell fod y ffaith na fyddai uwchraddiad arfaethedig gan VodafoneThree i fast allweddol yn yr ardal yn cael ei gwblhau tan 2028 "ddim yn ddigon da"

Dywedodd Mr Tufnell wrth Aelodau Seneddol: "Dim ond 1% o eiddo yn fy etholaeth sydd â signal 5G annibynnol o ansawdd uchel, o'i gymharu ag 86% yn genedlaethol.

"Mae'r niferoedd hynny'n syfrdanol, ac mae canlyniadau cysylltedd mor wael yn cael eu teimlo bob dydd gan fy etholwyr."

Dywedodd fod y broblem ar ei waethaf yn Ninbych-y-pysgod, lle mae "ymwelwyr yn cael trafferth defnyddio apiau parcio, busnesau'n colli allan pan fydd systemau talu cardiau yn methu a thrigolion methu cael mynediad at wasanaethau hanfodol ar-lein".

Dywedodd fod y ffaith na fyddai uwchraddiad arfaethedig gan VodafoneThree i fast allweddol yn yr ardal yn cael ei gwblhau tan 2028 "yn syml ddim yn ddigon da".

Vince MaloneFfynhonnell y llun, Vince Malone
Disgrifiad o’r llun,

Mae Vince Malone yn dweud bod y broblem signal yn costio amser ac arian iddo

Dywedodd Vince Malone, sy'n rhedeg siop yn Ninbych-y-pysgod, wrth BBC Cymru ei fod yn clywed cwynion am signal ffôn gwael "yn gyson" gan gwsmeriaid a thwristiaid.

Dywedodd Mr Malone, sy'n rhedeg Tenby Stores a'r Swyddfa Bost, fod y broblem yn costio amser ac arian iddo.

"Ro'n i ar y ffôn gyda chwsmer bore 'ma, a thorrodd yr alwad ddwywaith," meddai.

"Mae cwsmeriaid swni'n gallu eu gwasanaethu, ond dwi'n treulio 10 munud ychwanegol yn ffonio rhywun yn ôl ar ôl i'r alwad dorri.

"Dwi'n colli rhwng pythefnos a thair wythnos o fy amser bob blwyddyn, dim ond trwy ffonio pobl yn ôl pan fydd galwadau'n torri."

Fahran ThurstonFfynhonnell y llun, Fahran Thurston
Disgrifiad o’r llun,

Mae Fahran Thurston yn dweud bod rhai cwsmeriaid yn "mynd yn ymosodol" oherwydd y problemau talu

Dywedodd Fahran Thurston, sy'n gweithio yn siop anrhegion Equinox ar stryd fawr Dinbych-y-pysgod, fod signal gwael wedi achosi ciwiau enfawr, "gyda llinell yn ymestyn i gefn y siop".

Dywedodd Fahran, 27, fod prosesu taliadau cerdyn yn "ofnadwy", gyda chwsmeriaid yn gorfod aros o gwmpas neu gadael i nôl arian parod.

"Mae rhai pobl yn deall ond mae rhai yn gallu mynd yn flin ac yn ymosodol," meddai.

"Cafon ni un wythnos diwethaf lle wnaeth y signal fynd fel yr oedd y cwsmer yn ceisio talu.

"Does dim byd 'da ni'n gallu gwneud."

Dinbych-y-pysgodFfynhonnell y llun, Getty Images

Dywedodd Jamie Munn, 40, sy'n rhedeg y siop emwaith Cariads yng nghanol Sgwâr Tudor gyda'i wraig Rebecca, fod y busnes yn colli arian oherwydd y problemau cysylltiad.

"Y peth mwyaf rhwystredig yw ein bod ni i gyd yn talu'r cwmnïau ffôn, ond dydyn ni ddim yn cael y gwasanaeth," meddai.

Dywedodd y gall peiriannau cardiau ei siop weithio drwy signal ffôn a band eang, ond weithiau nid oedd yr un ohonyn nhw'n gweithio yn ystod y tymor prysur oherwydd y galw mawr.

Ychwanegodd: "Os oes angen i gwsmer fynd at beiriant i nôl arian, mae'n 50/50 a fyddan nhw'n dod yn ôl i gwblhau'r pryniant."

Jamie Munn a'i wraig RebeccaFfynhonnell y llun, Jamie Munn
Disgrifiad o’r llun,

Mae perchnogion Cariads hefyd wedi colli refeniw oherwydd y broblem

Dywedodd Ian Murray, gweinidog yn yr Adran Digidol, Diwylliant, Cyfryngau a Chwaraeon, wrth ddadl yn San Steffan ddydd Mercher bod "gwaith cadarnhaol" yn mynd rhagddo.

"Mae gan BT gynlluniau i uwchraddio wyth mast yn ei etholaeth; bydd dau ohonynt yn cael eu cwblhau eleni, a'r chwech sy'n weddill y flwyddyn nesaf," meddai.

Cytunodd hefyd i drafodaethau pellach ynglŷn â dyddiad cwblhau 2028 ar gyfer mast newydd sy'n gwasanaethu Dinbych-y-pysgod, er mwyn gweld a oedd unrhyw beth y gallai'r llywodraeth ei wneud "i bwyso am i'r seilwaith gael ei adeiladu'n gyflymach".

Dywedodd llefarydd ar ran Cyngor Sir Benfro eu bod yn gweithio gyda phartneriaid i wella cysylltedd ledled Dinbych-y-pysgod, ac eu bod yn ddiweddar wedi gosod pwynt Wi-Fi cyhoeddus ym maes parcio aml-lawr y dref "er mwyn helpu modurwyr i wneud taliadau heb arian parod".

Dywedodd Vodafone mewn datganiad: "Rydym yn deall y pryderon ynghylch y ddarpariaeth yn Ninbych-y-pysgod ac ar draws Sir Benfro, ac rydym wedi ymrwymo i wella cysylltedd.

"Bydd cynlluniau ar gyfer mast newydd yn helpu i gryfhau darpariaeth 4G a 5G ar gyfer trigolion, busnesau ac ymwelwyr yn yr ardal gyfagos; yn y cyfamser, bydd ein rhaglen fuddsoddi bresennol o £11 biliwn yn y DU yn ymestyn darpariaeth '5G Standalone' i 99% o'r boblogaeth erbyn 2030, ac i 99.96% erbyn 2034."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol .

Lawrlwythwch yr ap am y diweddaraf o Gymru ar eich dyfais symudol.