Cyn-chwaraewr rygbi Cymru wedi marw yn 42 oed

Chwaraeodd James Ireland i Rugby Parma yn yr Eidal ac i'r Dreigiau
- Cyhoeddwyd
Mae'r chwaraewr rygbi James Ireland, a gynrychiolodd Cymru ar lefel dan-21, wedi marw yn Bermuda, yn ôl ei hen glybiau.
Chwaraeodd Ireland, a oedd yn 42 oed, i Rugby Parma yn yr Eidal ac i'r Dreigiau a ddywedodd eu bod yn "drist iawn" i glywed am ei farwolaeth.
Dywedodd Rugby Parma fod ei farwolaeth yn golled fawr i deulu Gialloblù.
Roedd Ireland gyda thîm Italia Classic yn cystadlu yng Nghlasur Rygbi'r Byd yn Bermuda pan fu farw, meddai'r clwb.
Mae BBC Cymru wedi cysylltu â Gwasanaeth Heddlu Bermuda.
Chwaraeodd Ireland fel mewnwr i'r Dreigiau yn Rodney Parade ar 10 achlysur dros dri thymor rhwng 2004 a 2006.
Dywedodd Clwb Rygbi'r Dreigiau: "Byddai James hefyd yn chwarae yng Nghymru i Glwb Rygbi Casnewydd, Cross Keys a Bedwas yn ogystal â chyfnodau i Crociati Rugby, Parma Rugby, Birmingham Moseley a London Welsh.
"Enillodd gapiau rhyngwladol i Gymru ar lefel Dan-21, Dan-19 ac ieuenctid.
"Mae James yn cael ei gofio'n annwyl o'i gyfnod gyda'r Dreigiau ac mae ein meddyliau gyda'i deulu a'i ffrindiau yn ystod yr amser trist iawn hwn."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol .
Lawrlwythwch yr ap am y diweddaraf o Gymru ar eich dyfais symudol.