Dynes wedi ei thrywanu yn ei chalon cyn gyrru car mewn i wal - cwest

Cafodd Eleanor Barnfield ei disgrifio fel person "caredig, cariadus a dewr" gan ei theulu
- Cyhoeddwyd
Cafodd dynes ei thrywanu yn ei chalon cyn gyrru ei char mewn i wal, mae cwest wedi clywed.
Cafodd Eleanor Barnfield, 47, ei chludo i'r ysbyty yn dilyn gwrthdrawiad car ar Heol Coety ym Mhen-y-bont ar Ogwr ar 19 Hydref.
Fe wnaeth y gwasanaethau brys ganfod bod ganddi anafiadau nad oeddent yn gysylltiedig â gwrthdrawiad a bu farw'n ddiweddarach y diwrnod hwnnw.
Mewn agoriad cwest yn Llys Crwner Pontypridd ddydd Iau, fe wnaeth y crwner ddod i gasgliad dros dro fod Ms Barnfield wedi marw o ganlyniad i "anaf trywanu yn ymwneud â'r galon".
Fe wnaeth Clifford Foster, 61, ymddangos yn y llys fis diwethaf wedi ei gyhuddo o lofruddio Ms Barnfield.
Dyn, 61, yn y llys wedi'i gyhuddo o lofruddio 'mam gariadus'
- Cyhoeddwyd23 Hydref
Teyrnged i 'fam garedig a chariadus' fu farw ar ôl cael ei thrywanu
- Cyhoeddwyd21 Hydref
Arestio dyn ar amheuaeth o lofruddio wedi ymgyrch heddlu arfog
- Cyhoeddwyd20 Hydref
Yn ystod y gwrandawiad fe ddywedodd swyddfa'r crwner fod yr heddlu wedi ymateb i'r digwyddiad yn dilyn adroddiad am wrthdrawiad car.
"Daeth i'r amlwg i'r parafeddygon fu'n ymateb i'r digwyddiad fod gyrrwr y car, Eleanor Barnfield, wedi cael ei thrywanu yn ei brest."
Clywodd y cwest iddi gael ei chludo i'r ysbyty ond bu farw yno yn ddiweddarach.
Fe gadarnhaodd y crwner Rachel Knight y byddai'r cwest nawr yn cael ei ohirio tra bod yr ymchwiliad troseddol yn parhau.
Mewn teyrnged yn fuan wedi ei marwolaeth, dywedodd teulu Ms Barnfield mai hi oedd "y person mwyaf caredig, mwyaf cariadus a mwyaf dewr yn y byd".
"Hi oedd popeth i ni, a bydd ei theulu a'i ffrindiau yn ei charu ac yn ei cholli'n fawr am byth. Hi oedd ein craig."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.