Cymeradwyo cynllun i droi hen swyddfeydd yn gartrefi yng Nghaernarfon

Cafodd Swyddfeydd y Goron ym Mhenrallt, sydd wedi bod yn wag ers 2018, eu prynu gan y cyngor yn 2024
- Cyhoeddwyd
Mae cynllun yng Nghaernarfon i drosi hen swyddfeydd Llywodraeth Cymru yn unedau preswyl i bobl ddigartref gam yn nes wedi i bwyllgor cynllunio Cyngor Gwynedd gymeradwyo'r cais.
Cafodd Swyddfeydd y Goron ym Mhenrallt, sydd wedi bod yn wag ers 2018, eu prynu gan y cyngor yn 2024 fel rhan o gynllun i ddarparu mwy o lety i bobl sydd angen cartref.
Y bwriad bellach yw creu 37 o unedau preswyl a fyddai'n cynnig llety dros dro o safon i bobl wrth iddyn nhw aros am gartref parhaol.
Mae disgwyl i'r gwaith adnewyddu gostio rhwng £12m a £14m.
Caernarfon: Prynu adeilad 'blêr' i daclo digartrefedd
- Cyhoeddwyd12 Mawrth 2024
Galw am ymrwymiad i swyddi Caernarfon
- Cyhoeddwyd5 Ionawr 2018
Cymeradwyodd aelodau'r pwyllgor cynllunio'r cais yn unfrydol, ond bydd y caniatâd ffurfiol yn dibynnu ar dderbyn ymateb ffafriol gan Dŵr Cymru.
Wrth drafod y cynllun, cododd y Cynghorydd Cai Larsen bryderon am effaith bosibl y datblygiad ar drigolion cyfagos.
Dywedodd fod rhai pobl leol wedi mynegi pryder ynghylch parcio, sŵn a maint y cynllun o ystyried ei leoliad yng nghanol ardal breswyl.
Fel rhan o'r cynnig, byddai preswylwyr yr unedau newydd yn gallu defnyddio maes parcio aml-lawr y cyngor sydd gerllaw'r safle.
Er gwaethaf y pryderon hynny, dywedodd y Cynghorydd Larsen fod y sefyllfa bresennol o ran llety dros dro ledled Gwynedd yn "anfoddhaol".
"Mae gan y cyngor gyfrifoldeb moesol i fynd i'r afael â hynny," meddai.
Yn ôl Cofrestr Tai Cyffredin Cyngor Gwynedd, mae 1,370 o ymgeiswyr ym Mandiau 1a a 2 y gofrestr aros am dai cymdeithasol yn y sir.
Wrth gefnogi'r cynllun, clywodd aelodau'r pwyllgor fod y datblygiad yn rhan o ymdrechion y cyngor i ymateb i'r galw cynyddol am dai a lleihau'r ddibyniaeth ar lety dros dro fel gwestai a llety gwely a brecwast.
Os bydd caniatâd cynllunio terfynol yn cael ei roi, bydd 37 o unedau preswyl yn cael eu creu yn yr adeilad er mwyn darparu llety dros dro i bobl sy'n aros am gartref parhaol yng Ngwynedd.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.