Beiciwr modur a ddisgynnodd i'r môr wedi marw o 'anafiadau difrifol' - cwest

Bu farw Filip Szwarnog-Stepien, 19 oed o Landudno, yn dilyn gwrthdrawiad ar Ben y Gogarth ar 29 Hydref
- Cyhoeddwyd
Bu farw beiciwr modur, a ddisgynnodd i'r môr ger Llandudno, yn dilyn anafiadau difrifol i'w ben, ei frest a'i abdomen, clywodd cwest.
Cafodd Filip Szwarnog-Stepien, 19 oed o Landudno, ei ladd yn dilyn gwrthdrawiad ar Ben y Gogarth ar 29 Hydref.
Mi gafodd Mr Szwarnog-Stepien ei dynnu o'r dŵr a'i gludo i Ysbyty Gwynedd ym Mangor, lle cafodd ei farwolaeth ei chadarnhau yn oriau mân y bore canlynol.
Cafodd y cwest i'w farwolaeth ei agor a'i ohirio gan Kate Robertson, crwner cynorthwyol dwyrain gogledd Cymru a'r canolbarth.
Dywedodd Ms Robertson, oherwydd "ymchwiliadau parhaus gyda Heddlu'r Gogledd", y byddai'r gwrandawiad yn cael ei ohirio nes y bydd y rheiny wedi cael eu cwblhau.

Yr olygfa o leoliad y gwrthdrawiad ar y Gogarth
Cafodd tri dyn, rhwng 17 ac 18 oed, eu harestio a'u holi mewn cysylltiad â'r digwyddiad, ond maen nhw wedi cael eu rhyddhau ers hynny.
Mae'r heddlu wedi apelio eto i unrhyw un sydd â gwybodaeth neu ddeunydd fideo i gysylltu â nhw.
Ers yr apêl gyhoeddus wreiddiol, dywedodd y llu eu bod wedi dod o hyd i gerbyd du a'u bod yn credu fod y cerbyd yn yr ardal ar y pryd.
Dywedodd y Ditectif Arolygydd Tim Evans ei fod yn "credu bod yno bobl o fewn ein cymuned leol sydd hefo gwybodaeth uniongyrchol a allai helpu'r ymchwiliad yma a darparu atebion o ran beth wnaeth arwain at farwolaeth drasig bachgen ifanc, oedd yn cael ei garu gan gymaint o bobl".
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- Cyhoeddwyd30 Hydref

- Cyhoeddwyd6 Tachwedd
