Heddlu'n adnewyddu apêl wedi marwolaeth beiciwr modur 19 oed

Digwyddodd y gwrthdrawiad ar Ben y Gogarth yn Llandudno ar 29 HydrefFfynhonnell y llun, Getty Images
Disgrifiad o’r llun,

Digwyddodd y gwrthdrawiad ar Ben y Gogarth yn Llandudno ar 29 Hydref

GanGwen Aeron
BBC Cymru
  • Cyhoeddwyd

Mae Heddlu'r Gogledd wedi adnewyddu eu hapêl am wybodaeth yn dilyn marwolaeth beiciwr modur 19 oed a ddisgynnodd i'r môr ar ôl gwrthdrawiad ar Ben y Gogarth yn Llandudno.

Cafodd swyddogion eu galw i Marine Drive, yn ardal Pen y Gogarth, am 22:30 nos Iau 29 Hydref yn dilyn adroddiadau am wrthdrawiad yn ymwneud â beic modur.

Ymatebodd nifer o wasanaethau brys i'r digwyddiad, gan gynnwys Heddlu'r Gogledd, yr RNLI a Gwylwyr y Glannau.

Cafodd y dyn ei dynnu o'r dŵr a'i gludo mewn hofrennydd i Ysbyty Gwynedd ym Mangor, lle cafodd ei ddatgan yn farw.

Cafodd tri dyn, rhwng 17 ac 18 oed, eu harestio a'u holi mewn cysylltiad â'r digwyddiad. Maen nhw wedi cael eu rhyddhau ers hynny tra bod yr ymchwiliad yn parhau.

Digwyddodd y gwrthdrawiad tua milltir (1.6km) o'r Tolldy, i gyfeiriad copa Pen y Gogarth.

Mae Pen y Gogarth yn bentir sy'n codi hyd at 207m (679 troedfedd) uwch lefel y môr, gyda chlogwyni serth ar hyd yr arfordir.

Yr olygfa o leoliad y gwrthdrawiad
Disgrifiad o’r llun,

Yr olygfa o leoliad y gwrthdrawiad ar y Gogarth

Mae'r heddlu wedi adnewyddu eu hapêl ar i unrhyw un sydd â gwybodaeth am y digwyddiad, neu luniau fideo o'r ardal ar y pryd, gysylltu â nhw.

Dywedodd yr heddlu eu bod, ers yr apêl gyhoeddus gyntaf, wedi dod o hyd i gerbyd du a oedd yn yr ardal adeg y gwrthdrawiad.

Dywedodd yr Arolygydd Ditectif Tim Evans, o'r uned ymchwilio i wrthdrawiadau difrifol: "Rwy'n credu bod yna bobl yn ein cymuned leol sydd â gwybodaeth uniongyrchol a allai gynorthwyo'r ymchwiliad hwn a rhoi atebion am yr hyn arweiniodd at farwolaeth drasig ac ysgytwol dyn ifanc, a oedd yn annwyl i gynifer."

Mae'r heddlu wedi annog y cyhoedd i beidio â dyfalu am amgylchiadau'r gwrthdrawiad nac i wneud sylwadau amdano ar y cyfryngau cymdeithasol.

Maen nhw'n apelio ar unrhyw un a allai fod wedi gweld y digwyddiad neu sydd ag unrhyw wybodaeth a allai gynorthwyo'r ymchwiliad i gysylltu â Heddlu'r Gogledd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig