Tân ym Melin Wlân Ceulan yn Nhal-y-bont
Tân yn dinistrio hen felin yn Nhal-y-bont, Ceredigion
- Cyhoeddwyd
Cafodd criwiau tân eu galw i Felin Wlân Ceulan yn Nhal-y-bont, Ceredigion, nos Iau.
Roedd y tân mewn adeilad adfeiliedig tri llawr, ac roedd y fflamau ar bob un o'r lloriau.
Oherwydd cyflwr yr adeilad, roedd rhaid i'r diffoddwyr ymladd y tân o'r tu allan, yn ôl Gwasanaeth Tân ac Achub Canolbarth a Gorllewin Cymru.
Does neb wedi cael ei anafu.

Disgrifiad o’r llun, Aeth pedwar criw i'r safle er mwyn diffodd y tân
1 o 5
Cafodd tri chriw o orsaf dân Aberystwyth eu galw i'r digwyddiad am 19:31, yn ogystal ag un o Fachynlleth, ar ôl derbyn adroddiad am dân ar Stryd Birkenhead yn Nhal-y-bont.
Defnyddiodd y diffoddwyr bedwar jet dŵr a'u hysgol droadwy er mwyn diffodd y tân.
Gadawodd y criwiau am 23:27 a chafodd y safle ei drosglwyddo i'r awdurdod lleol i'w ddiogelu.
Roedd Melin Ceulan, sydd ar lan afon Ceulan, yn felin wlân brysur a llewyrchus ar un adeg, ond caeodd yn ystod y 1950au.
Roedd peiriannau mawr, gan gynnwys gwyddiau a fframiau gwehyddu, yn llenwi tri llawr yr adeilad, ond mae wedi aros yn wag ers cau.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- Cyhoeddwyd28 Chwefror




