Cymru v Awstralia: Pedwar newid i'r tîm gurodd y Crysau Duon

Aaron Wainwright a Josh AdamsFfynhonnell y llun, Getty Images
Disgrifiad o’r llun,

Roedd Aaron Wainwright a Josh Adams yn absennol o'r fuddugoliaeth yn erbyn y Crysau Duon

GanIfan Ywain
BBC Cymru
  • Cyhoeddwyd

Mae Aaron Wainwright a Josh Adams wedi eu dewis i ddechrau'r gêm yn erbyn Awstralia ym Mhencampwriaeth y Cenhedloedd nos Sadwrn.

Mae Steve Tandy wedi gwneud pedwar newid i'r tîm ddechreuodd y fuddugoliaeth hanesyddol o 35-28 yn erbyn Seland Newydd y penwythnos diwethaf

Bydd Wainwright yn dechrau fel wythwr ar ôl gwella o anaf, mae Alex Mann wedi ei ddewis yn lle James Botham, bydd Ben Carter yn cymryd lle Adam Beard yn yr ail-reng tra bod Josh Adams yn dychwelyd i'r asgell.

Mae Tandy wedi dewis yr un tîm a ddechreuodd y fuddugoliaeth yn erbyn Japan bythefnos yn ôl.

Dydy seren y gêm yn erbyn y Crysau Duon, James Botham ddim wedi ei ddewis yn y garfan gan fod disgwyl i'w blentyn cyntaf gael ei eni yr wythnos hon.

Yn y rheng-ôl felly, Wainwright sydd yn safle'r wythwr gydag Alex Mann a Jac Morgan yn flaenasgellwyr.

Bydd Dafydd Jenkins yn parhau yn yr ail-reng gyda Ben Carter wedi ei ddewis yn lle Adam Beard - gafodd ei anafu yn erbyn Seland Newydd.

Mae Joe Hawkins wedi ei ddewis ar y fainc ar ôl i Dan Edwards ddioddef anaf wrth ymarfer yr wythnos hon.

Dydy Taine Basham na Gabriel Hamer-Webb wedi eu cynnwys yn y garfan.

Steve TandyFfynhonnell y llun, Getty Images
Disgrifiad o’r llun,

Dywedodd Steve Tandy fod y gêm nos Sadwrn yn "gyfle arall" i greu hanes

Dywedodd Steve Tandy fod y gem yn erbyn Awstralia yn gyfle arall i greu hanes.

"Roedden ni gyd mor falch ein bod wedi llwyddo i greu tipyn o hanes y penwythnos diwethaf," meddai.

"Mae'r wythnos yma'n cynnig cyfle a her arall i ni wrth i ni wynebu Awstralia ac ry'n ni'n edrych ymlaen yn fawr at weld os allwn ni berfformio gystal yr wythnos hon hefyd.

"Dyma'n gêm gartref olaf ym Mhencampwriaeth y Cenhedloedd. Mae'r gefnogaeth ry'n ni wedi ei derbyn yn ein gemau cartref wedi bod yn wych ac mae'r chwaraewyr a'r staff yn gwerthfawrogi hynny'n fawr.

"Mae pawb yn awchu i fynd yn ôl i Stadiwm Principality y penwythnos yma."

Tîm Cymru i wynebu Awstralia

Murray; Rees-Zammit, E James, Llewellyn, Adams; Costelow, T Williams; Smith, Lake (capten), Griffin, Jenkins, Carter, Mann, Morgan, Wainwright.

Eilyddion: Elias, G Thomas, Lewis, Plumtree, K James, Morgan-Williams, Hawkins, Hennessey.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol .

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig