'Sioc enfawr' i deulu o Gymru fu'n dyst i'r saethu yng Ngwlad Pwyl

Roedd Lars Thomas allan yn bwyta gyda'i wraig, ei blant a'i rieni pan ddechreuodd y saethu
- Cyhoeddwyd
Mae Cymro oedd allan yn bwyta gyda'i deulu yn Kraków yng Ngwlad Pwyl wedi disgrifio'r eiliadau brawychus pan ddechreuodd dyn saethu yng nghanol y ddinas.
Roedd Lars Thomas, sy'n wreiddiol o Borth-y-rhyd ac sydd wedi bod yn byw yn Kraków ers chwe mis, mewn bwyty ar sgwâr canolog y ddinas brynhawn Sadwrn pan glywodd sŵn ergydion gwn a gweld pobl yn rhedeg drwy'r strydoedd.
Mae chwech o bobl wedi'u lladd yn yr ymosodiad, gan gynnwys dyn o Brydain, ac mae 16 arall wedi'u hanafu.
Mae'r dyn sy'n cael ei amau o fod y gyfrifol am yr ymosodiad hefyd wedi marw yn yr ysbyty, yn ôl heddlu Gwlad Pwyl.
'Clywed sŵn saethu'
Mewn cyfweliad ar raglen Dros Frecwast fore Llun, dywedodd Mr Thomas, oedd gyda'i wraig, eu tri phlentyn a'i rieni ar y pryd, ei fod wedi gweld pobl yn ffoi cyn i staff y bwyty ddweud wrth bawb am gadw draw o'r ffenestri.
"Clywais i sŵn, ond doeddwn i ddim yn gwybod beth oeddwn i'n ei glywed ar y dechrau. Roedd yna gunshots mas tu fas, ac wedyn gwelais i lawer o bobl yn rhedeg ar hyd y strydoedd.
"O'n i jyst yn meddwl, like, what's going on?
"Dechreuodd rhai pobl adael y restaurant, tra bod eraill yn ishte yno, jyst yn ceisio deall y sefyllfa.
"Wedyn dyma staff y restaurant yn dweud wrth bawb am ishte lawr a 'stay away from the windows'."

Ychwanegodd fod y sefyllfa'n dechrau teimlo'n fwy difrifol wrth i staff y bwyty rybuddio pawb i beidio â mynd allan.
"'Dyna pryd nes i feddwl, reit, mae rhywbeth yn digwydd mas tu fas. Roedd e'n eithaf scary.
"Roedd yr heddlu wedi cyrraedd yn eithaf cyflym ac roedden nhw'n gweiddi, 'stay, don't come out', yn Polish."
Dywedodd nad oedd yn credu bod ei blant yn deall yn iawn beth oedd yn digwydd.
"Sai'n credu oedd y plant yn deall beth oedd yn digwydd, a fi'n hapus nad oedden nhw'n deall. Roedd fy ngwraig jyst yn shocked hefyd o weld beth oedd yn digwydd."
Esboniodd fod yr ymosodiad wedi bod yn sioc enfawr i bobl leol hefyd, gan nad oedd trais o'r fath yn rhywbeth yr oeddent yn disgwyl ei weld yng Ngwlad Pwyl.
"O, massive sioc i bawb, you know. Ma' hwn ddim yn digwydd yn Kraków, ma' ddim yn digwydd yn Poland.
"Roedd pawb yn Poland jyst yn shocked o weld y newyddion. Maen nhw'n meddwl, you know, ma' hwn ddim yn digwydd yn Poland. Mae'n wlad eithaf safe fan hyn."

Roedd yna awyrgylch anarferol yn ardal y saethu wedi i Brif Sgwâr Farchnad y ddinas ailagor nos Sul
Ar raglen Dros Frecwast, dywedodd y newyddiadurwr Sion Pennar, sy'n byw yng Ngwlad Pwyl, bod y digwyddiad ddydd Sadwrn yn un "eitha' digynsail" yn y wlad, sy'n cynnal deuddydd o alaru cenedlaethol.
"Mae Kraków a Gwlad Pwyl yn dal yn trio dygymod efo'r hyn sydd 'di digwydd ond mae 'na lot o gwestiyna' sy'n parhau o ran cymhelliad y saethwr honedig," meddai.
"Mae wedi cael ei ddisgrifio fel rhywun efo gwleidyddiaeth radical ond mae 'na lot o gwestiyna' ynghylch pam wnaeth o hyn [a] sut mae'r awdurdodau wedi ymateb.
"Gan fod Kraków yn gymaint o hwb twristiaeth, mae 'na lot o bobl, yn dramorwyr ac yn Bwyliaid, wedi gweld petha', wedi clywed petha', wedi mynd trw' brofiada' erchyll."
'Cuddio o dan y bar'
Aeth ymlaen i ddweud: "Ymhlith y bobl nes i siarad efo ddoe oedd dynes o'r enw Izzy Morgan o Bontarddulais, oedd dri drws i lawr o lle ddechreuodd y saethu, medda hi.
"Bu'n rhaid iddi redeg i'r bar tu fewn a chuddio o dan y bar, wrth glywed be' oeddan nhw'n meddwl yn wreiddiol oedd yn dân gwyllt."
Roedd yna "awyrgylch arbennig o ryfedd - awyrgylch barchus, awyrgylch ddistaw" wedi i'r prif sgwâr ailagor nos Sul, a sawl person "yn eu dagrau".
Fe ddisgrifiodd hefyd y canhwyllau a'r blodau a gafodd eu gosod er teyrnged i'r rhai a fu farw cyn i'r sgwâr ailagor ar gorneli'r strydoedd cyfagos.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.