Y Manics i chwarae gig arbennig yng Nghaerdydd i nodi 35 mlynedd

- Cyhoeddwyd
Bydd y Manic Street Preachers yn chwarae gig arbennig yng Nghaerdydd i nodi 35 mlynedd ers rhyddhau eu halbwm cyntaf.
Bydd y band yn chwarae Generation Terrorists yn llawn ar gaeau Blackweir yng Nghaerdydd ar nos Sadwrn 19 Mehefin.
Cafodd yr albwm ei ryddhau yn 1992 - yn cynnwys un o'r senglau mwyaf poblogaidd Motorcycle Emptiness - gan ddod â sylw enfawr i'r band o'r Coed Duon.
Dywedodd y cerddor a'r cyflwynydd Rhys Mwyn wrth Post Prynhawn ar Radio Cymru fod yr albwm yn un "pwysig iawn", a'i fod hefyd yn cael sgyrsiau yn Gymraeg gyda phrif leisydd y band, James Dean Bradfield.
'Mae James ar y siwrna' - dwi'n cael sgyriau efo fo yn Gymraeg'
Dywedodd Rhys Mwyn wrth raglen Post Prynhawn ar Radio Cymru fod yr albwm yn un "pwysig iawn", a bod cyfle i glywed rhai o'r caneuon llai cyfarwydd yn fyw yn un o bethau mwyaf cyffrous y gig.
"Dwi'n meddwl beth sydd yn braf ydy ma'n gyfle i edrych yn ôl ar yr albwm.
"Roedd yn albwm da, mae 'na tracks brilliant ar yr albwm yna," meddai.
"Efallai bod 'na ganeuon does 'na neb wedi eu clywed ers y 90au yn cael eu perfformio, ac mae hwnna'n bonws i'r gynulleidfa."
Ychwanegodd fod y Manics wedi datblygu i fod yn un o'r "artistiaid mwyaf llwyddiannus" i ddod o Gymru, ers eu dechreuadau "eiconoclastig iawn iawn iawn".
Dywedodd Rhys Mwyn hefyd ei fod yn gallu cael sgyrsiau yn Gymraeg gyda phrif leisydd y band, James Dean Bradfield, sy'n anfon negeseuon testun ato yn Gymraeg.
"Mae James ar y siwrna', dwi'n cael sgyrsiau efo fo yn Gymraeg - mae'n gyrru negeseuon testun yn Gymraeg, sydd yn wych o beth," meddai.
Ychwanegodd nad oedd y band yn pwysleisio eu Cymreictod gymaint ar ddechrau'r 1990au, ond eu bod bellach yn rhan o genhedlaeth o artistiaid Cymreig a ddaeth i amlygrwydd ar ddiwedd y ddegawd honno.
Dywedodd y band y bydd chwarae'r albwm yng Nghaerdydd, am un noson yn unig, "a chael profi'r holl deimladau yna eto yn anhygoel".
"Mae'n mynd i fod yn lot o hwyl. Welwn ni chi yna."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol .
Lawrlwythwch yr ap am y diweddaraf o Gymru ar eich dyfais symudol.