Efeilliaid methu credu eu taith o greu 'mainc o baletau' i Gadair Eisteddfod CFfI

Mae'r efeilliaid o Geredigion yn dweud ei bod yn "anodd credu" mai nhw sydd wedi creu Cadair Eisteddfod CFfI Cymru eleniFfynhonnell y llun, Meleri Jones
Disgrifiad o’r llun,

Mae'r efeilliaid o Geredigion yn dweud ei bod yn "anodd credu" mai nhw sydd wedi creu Cadair Eisteddfod CFfI Cymru eleni

GanGwen Aeron
BBC Cymru
  • Cyhoeddwyd

Mae creu Cadair Eisteddfod Cymdeithas Ffermwyr Ifanc Cymru yn "anrhydedd arbennig" i efeilliaid 23 oed o Geredigion sydd yn dweud ei bod yn "anodd credu" mai nhw sydd wedi cael y cyfrifoldeb o grefftio un o brif wobrau'r ŵyl.

Mae Bleddyn ac Owain Thomas, sy'n rhedeg cwmni adeiladu Brodyr Thomas ac yn aelodau o Glwb Ffermwyr Ifanc Felinfach, wedi creu Cadair Eisteddfod CFfI Cymru, fydd yn cael ei chynnal yng Ngheredigion ym mis Tachwedd.

Dywedodd Bleddyn, 23 oed, ei bod hi'n anodd credu pa mor bell maen nhw wedi dod ers eu dyddiau cynnar yn y mudiad.

"Mae'n dipyn o brofiad meddwl ein bod ni lai na deng mlynedd yn ôl yn gwneud mainc allan o baletau yn Rali'r Sir, ac erbyn hyn yn cael y cyfle i greu Cadair Eisteddfod CFfI Cymru!

"Mae'n anrhydedd mawr i ni, yn enwedig o feddwl ein bod ni'n dal yn rhan o'r mudiad pan ddechreuon ni."

Cafodd y Gadair, y Goron a gwobrau'r Eisteddfod eu dadorchuddio mewn digwyddiad yn Llyfrgell y Dref, Aberystwyth, nos Fercher.

Y Gadair, y Goron a phrif wobrau Eisteddfod CFfI Cymru 2026, wedi'u creu gan grefftwyr lleolFfynhonnell y llun, Meleri Jones
Disgrifiad o’r llun,

Y Gadair, y Goron a phrif wobrau Eisteddfod CFfI Cymru 2026, wedi'u creu gan grefftwyr lleol

Wrth gynllunio'r gadair, roedd y brodyr am ddangos dylanwad arfordir a chefn gwlad Ceredigion.

"Ro'n i eisiau creu rhywbeth oedd yn cynrychioli Ceredigion ac yn golygu rhywbeth gwahanol i bobl. Mae'r môr yn rhan mor bwysig o'r sir, gyda'r arfordir, ond mae gennym ni gefn gwlad a'r mynyddoedd hefyd.

"Y syniad oedd cyfuno'r ddwy elfen yna a dod â nhw at ei gilydd yn y gadair," meddai Bleddyn.

Mae pren derw yn sail i'r gadair, gyda'i chefn wedi'i gynllunio o amgylch thema cystadleuaeth eleni, sef 'Bwlch' neu 'Bylchau'.

Mae Bwa Ystrad Fflur yn nodwedd amlwg ar gefn y gadair, gyda llinellau sy'n dilyn patrwm tir wedi'i aredig yn ymestyn ar hyd y pren. Mae'r dyluniad hefyd yn cynnwys ffurf ffon fugail, gan gyfeirio at gysylltiad Ceredigion ag amaethyddiaeth a bywyd cefn gwlad.

Ychwanegodd: "Mae'n anrhydedd mawr cael gweithio ar rywbeth fel Cadair Eisteddfod CFfI Cymru. Mae'n gyfle gwahanol iawn i'r gwaith rydyn ni'n ei wneud o ddydd i ddydd, ac mae'n braf gallu creu rhywbeth fydd yn rhan o Eisteddfod Cymru ac yn cynrychioli ein sir."

Mae Bwa Ystrad Fflur, sy'n nodwedd amlwg yn nyluniad y Gadair, ymhlith yr ysbrydoliaethau y tu ôl i'r gwaithFfynhonnell y llun, Meleri Jones
Disgrifiad o’r llun,

Mae Bwa Ystrad Fflur, sy'n nodwedd amlwg yn nyluniad y Gadair, ymhlith yr ysbrydoliaethau y tu ôl i'r gwaith

Er mai busnes teuluol yw Brodyr Thomas, dywedodd Bleddyn fod cael gweithio ochr yn ochr â'i efaill yn gwneud y prosiect yn fwy arbennig fyth.

"Mae gweithio gyda theulu'n gallu bod yn her weithiau, ond mae cael y cyfle i wneud rhywbeth fel hyn gyda fy mrawd yn brofiad arbennig.

"Rydyn ni'n deall ein gilydd yn dda ac yn rhannu'r un weledigaeth, felly mae'n gwneud y broses yn haws ac yn fwy pleserus.

"Mae gweld y gwaith yn dod at ei gilydd yn gwneud y canlyniad terfynol yn fwy gwerth chweil, yn enwedig gan ein bod ni wedi gweithio arno ochr yn ochr o'r dechrau i'r diwedd."

Y chwe chrefftwr o Geredigion sydd wedi cydweithio i greu gwobrau Eisteddfod CFfI Cymru 2026Ffynhonnell y llun, Meleri Jones
Disgrifiad o’r llun,

Y chwe chrefftwr o Geredigion sydd wedi cydweithio i greu gwobrau Eisteddfod CFfI Cymru 2026

Nid y brodyr Thomas yw'r unig rai o'r mudiad sydd wedi cyfrannu at wobrau'r Eisteddfod eleni.

Dylan ac Elen Bowen o Gemwaith Bowen, ger Castell Newydd Emlyn, sydd wedi creu'r Goron. Fel cyn-aelodau o'r CFfI, dywedodd Elen ei bod yn fraint gweithio ar y prosiect gyda'i gŵr, yn union ddeng mlynedd ar ôl iddo greu ei goron gyntaf ar gyfer Eisteddfod CFfI Cymru.

Mae'r môr yn ganolog i'r dyluniad, gyda thonnau copr wedi'u siapio â llaw i adlewyrchu symudiad Bae Ceredigion. Defnyddiwyd dŵr halen o'r bae i newid lliw'r copr, gan greu arlliw glas sy'n atgyfnerthu cysylltiad y goron â'r arfordir.

"Mae pob coron yn dipyn o anrhydedd, ac rydyn ni'n mwynhau'r her o ddylunio a chreu rhywbeth gwahanol bob tro," meddai Elen.

Mae'r môr a'r arfordir yn greiddiol i ddyluniad y Goron a grëwyd gan Dylan ac Elen BowenFfynhonnell y llun, Meleri Jones
Disgrifiad o’r llun,

Mae'r môr a'r arfordir yn greiddiol i ddyluniad y Goron a grëwyd gan Dylan ac Elen Bowen

Yn y cyfamser, dau ffrind a seiri lleol, Dion Evans o Glwb Pontsian a Gethin Morgans o Glwb Llanwenog, sydd wedi creu gweddill y gwobrau.

Gan ddefnyddio pren derw a charthenni traddodiadol, mae eu dyluniadau'n adlewyrchu siâp a chymeriad Ceredigion, gyda phob gwobr yn meddu ar ei hunaniaeth unigryw ei hun.

Cafodd y carthenni eu gwehyddu yn Amgueddfa Wlân Cymru, a dyma'r rhediad cyntaf i ddod oddi ar beiriant newydd yr amgueddfa wrth iddi nodi 50 mlynedd ers ei sefydlu.

'Llwyfan newydd i lenorion ifanc'

Yn ogystal â dathlu crefft a thraddodiad, bydd Eisteddfod CFfI Cymru eleni yn cyflwyno menter newydd i hyrwyddo gwaith llenyddol aelodau'r mudiad.

Am y tro cyntaf, bydd y gerdd a'r darn rhyddiaith buddugol yn cael eu cyhoeddi mewn cyfrol ar y cyd â Chyhoeddiadau Stamp.

Yn ôl Enfys Hatcher Davies, cadeirydd yr Eisteddfod, y bwriad yw sicrhau bod gwaith llenyddol aelodau'r CFfI yn cyrraedd cynulleidfa ehangach.

"Rydyn ni eisiau rhoi llwyfan haeddiannol i lenorion y mudiad a sicrhau bod eu gwaith yn cael ei ddarllen y tu hwnt i lwyfan y cystadlu," meddai.

Bydd gwobrau'r Eisteddfod yn cael eu cyflwyno ym Mhafiliwn Bont, Pontrhydfendigaid, ddydd Sadwrn 21 Tachwedd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.