'Sefydlogrwydd' yng nghanlyniadau TGAU gyda 62.3% yn A*-C
Blwyddyn 10 i gael canlyniadau hefyd
Pynciau newydd sbon fel dawns a TGAU cyfryngau digidol a ffilm yn cael eu cyflwyno
Yn Ysgol Gyfun Gymunedol Penweddig mae Iolo'n dweud ei fod wrth ei fodd.
Cafodd ganlyniadau o 3 A*, 5 A, 4 B ac 1 C a Rhagoriaeth mewn Mathemateg. Mae'n edrych ymlaen at ddychwelyd i'r ysgol fis nesaf.
Iolo ym Mhenweddig
Yn siarad ar Dros Frecwast ar BBC Radio Cymru bore 'ma roedd Elan Gwyn, sy'n gwnselydd gyrfa gyda Gyrfa Cymru.
"Dyma'r tro cyntaf mae myfyrwyr yn gwneud penderfyniadau ar beth maen nhw eisiau neud nesaf, felly mae hynna'n gallu achosi nhw fod yn nerfus. Mae ganddyn nhw ddigon o opsiynau a 'dan ni'n hapus yn sôn am yr opsiynau yna i gyd wrth bobl i helpu nhw neud y penderfyniad iawn.
"Ym mhob ysgol fe fydd 'na fel arfer cynghorydd gyrfa yno tra'ch bod yn cael canlyniadau, felly mae croeso i chi fynd i siarad gyda nhw neu mae gennym ni rif ffon ar y wefan gallwch chi gysylltu hefo. Da ni yma ar gael i bawb i gysylltu efo i gael cymorth."
Elan Gwyn, cwnselydd gyda Gyrfa Cymru
Craig Duggan
Newyddion BBC Cymru
Mae disgyblion hefyd wedi dechrau cyrraedd Ysgol Gyfun Gymunedol Penweddig, Aberystwyth.
Abigail a’i mam falch, Ffion. Mae Abigail yn bwriadu mynd ymlaen i astudio trin gwallt yng ngholeg Ceredigion
Mae Gwenan wedi derbyn dwy radd A*, chwech A, pedair B ac un C. Mae hi'n bwriadu aros yn yr ysgol i ddilyn cyrsiau Safon Uwch ym mhynciau Cymraeg, Bioleg a Drama
Mae Ysgol Gyfun Gymraeg Glantaf yng Nghaerdydd yn prysuro wrth i ddisgyblion ddod yno i gasglu eu canlyniadau.
Ava, Bella a Holly, newydd dderbyn canlyniadau TGAU Holly: “Ni mor hapus!! Ni’n dathlu heno!”
Ila, Lowri, Grace a Nonna wrth eu bodd ac yn dychweld yma i’r chweched
Mae ymateb cymysg wedi bod i'r drefn newydd, gyda rhai athrawon yn dweud bod "pwysau llethol" ar staff a bod disgyblion "yn cael eu hasesu rownd y rîl".
Dywedodd Dr Llinos Jones, pennaeth Ysgol Gyfun Gymraeg Bro Myrddin yng Nghaerfyrddin, fod "cymaint o newidiadau wedi digwydd ar yr un pryd, ac mae hyn yn sicr wedi rhoi straen ychwanegol ar y system addysg, sydd eisoes dan bwysau sylweddol".
"Mae pryder arbennig ynghylch canlyniadau blwyddyn 10 eleni", meddai, "gan mai dyma'r garfan gyntaf i sefyll y cymwysterau newydd ac nid oes gennym yr un lefel o brofiad na sicrwydd ynghylch sut y bydd y canlyniadau'n edrych".
Dywedodd Ian Morgan, Prif Weithredwr bwrdd arholi CBAC, eu bod wedi "gwrando'n astud ar sylwadau ysgolion ac arweinwyr colegau" ac wedi cyflwyno newidiadau.
"Rwy'n credu ei fod yn deg," ychwanegodd.
"Er bod newid bob amser yn her o ran ei reoli a sicrhau tegwch i ddysgwyr, rwy'n credu ein bod wedi dylunio cyfres o gymwysterau a fydd yn helpu dysgwyr i ddangos beth mae nhw'n ei wybod, ei ddeall, a'n dangos be' allan nhw wneud."
Dywedodd hefyd bod "angen bod yn glir na fydd unrhyw ddysgwr dan anfantais oherwydd mai hwn yw'r tro cyntaf i'r cymwysterau hyn gael eu cyflwyno".
"Byddwn ni'n gwneud popeth y gallwn i sicrhau bod y broses yn deg ac yn gytbwys i bob dysgwr."
Dr Llinos Jones
Fe wnaeth nifer y dysgwyr yng Nghymru wnaeth gael y canlyniadau TGAU gorau gynyddu ychydig yn 2025 o gymharu â'r flwyddyn flaenorol.
Roedd 62.5% o raddau dysgwyr rhwng A* ac C - 0.3% o gynnydd ar ganlyniadau 2024.
Dywedodd Ian Morgan, Prif Weithredwr bwrdd arholi CBAC ei fod yn disgwyl i ganlyniadau TGAU heddiw ddangos "sefydlogrwydd" yn gyffredinol.
Tra'n bod yn aros am yr ymateb o'r ysgolion...
Draw ar wefan Bitesize mae adnoddau dysgu ac enghreifftiau o'r math o gwestiynau mae disgyblion Cymru wedi bod yn eu hwynebu.
Allwch chi ateb y cwestiynau ymarfer mathemateg yma?
1. Beth yw ffactorau cysefin 42?
2. Beth yw pedwar term cyntaf y dilyniant cwadratig n2 + 4?
3. Mae Clare a Frances yn cael £400 i’w rannu gan berthynas oedrannus. Maen nhw’n rhannu’r arian yn y gymhareb 7:9. Faint mae’r ddwy’n ei gael?
Fe gewch yr atebion yn nes ymlaen...
Mae'r baneri'n chwifio du allan i Ysgol Gyfun Gymunedol Penweddig, Aberystwyth.
Fe fydd tua 100 o ddisgyblion blwyddyn 11 yn cael eu canlyniadau TGAU heddi.
Ym mis Medi 2025 cafodd cyfres o gymwysterau TGAU newydd eu cyflwyno yn ysgolion Cymru.
Mae pob cymhwyster TGAU wedi cael ei adolygu a'i ddiweddaru, gyda rhai pynciau newydd sbon fel dawns a TGAU cyfryngau digidol a ffilm yn cael eu cyflwyno.
Mae yna newidiadau i'r ffordd mae nifer o'r cymwysterau'n cael eu hasesu, gyda llai o bwyslais ar arholiadau mewn rhai pynciau.
Mae mwy o bwyslais ar asesiadau yn ystod oriau ysgol, sy'n cynnwys gwaith cwrs ac asesiadau llafar. Mewn rhai pynciau, mae asesiadau di-arholiad yn cyfrif am hyd at 40% o'r radd derfynol.
Heddiw fe fydd disgyblion blwyddyn 10 yn cael marciau am y cymwysterau hynny hanner ffordd drwy'r cwrs.
Fe fydd mwy o gymwysterau'n cael eu hailwampio dros y ddwy flynedd nesaf fel rhan o newidiadau yn sgil cyflwyno'r Cwricwlwm i Gymru. Fe fydd y don nesaf o TGAU newydd yn cael eu cyflwyno gan gynnwys hanes a gwyddoniaeth - dau bwnc gafodd eu oedi ers llynedd.
Fe fydd cymwysterau galwedigaethol newydd hefyd yn cael eu cyflwyno o fis Medi 2027.
Bore da a chroeso i'n llif byw ar ddiwrnod pwysig i filoedd o bobl ifanc Cymru sy'n derbyn eu canlyniadau TGAU.
Llynedd roedd nifer y dysgwyr yng Nghymru a wnaeth gael y canlyniadau TGAU gorau wedi cynyddu ychydig ers y flwyddyn flaenorol. Ers hynny mae pynciau newydd wedi eu cyflwyno ac addasiadau i'r ffordd y caiff disgyblion eu hasesu.
Yr wythnos ddiwethaf roedd cynnydd bychan yn y nifer o bobl ifanc wnaeth dderbyn y canlyniadau Safon Uwch gorau yng Nghymru.
Arhoswch gyda ni am yr ystadegau a'r ymateb.