Mae elusen Age Cymru yn annog pobl i gynnig cefnogaeth i bobl hŷn yn ystod y dyddiau nesaf.

"Yn ystod y tywydd twym, mae angen i bobl edrych mas am ei gilydd achos mae'r tywydd hyn yn gallu effeithio ar bobl hŷn," medd Rhian Morgan o'r elusen.

"Mae 'na wybodaeth a tips ar gael ar wefan Age Cymru ar sut i gadw'n cool a sut mae cadw'r cartref yn gymharol oer.

"Mae angen cadw golwg ar gymdogion a theulu hynach - rhowch gnoc ar y drws, cynigiwch mynd i siopa iddyn nhw neu bigo meddyginiaeth neu gofynnwch os ydyn nhw angen cael benthyg ffan. Mae'r camau hyn yn 'neud lot o wahaniaeth iddyn nhw.

"Mae modd ffonio 111 os am gyngor. Mae jyst eistedd mewn man oer mewn tywyllwch yn yfed digon o ddŵr yn beth da."

Ffynhonnell y llun, Getty

Mae nifer o gynghorau wedi newid trefniadau gwasanaethau er mwyn diogelu staff sy'n gweithio yn yr awyr agored.

Mae'r gwaith o gasglu gwastraff yn dechrau'n gynharach na'r arfer yng Nghaerdydd, Torfaen, Caerffili a Merthyr Tudful yn ystod y cyfnod o wres eithafol.

Ffynhonnell y llun, Getty Images

Mae’r undeb penaethiaid ysgolion, NASUWT, wedi dweud mewn datganiad nad ydy adeiladau ysgolion wedi cael eu hadeiladu ar gyfer delio gyda gwres sylweddol.

Dywedodd Neil Butler, y swyddog cenedlaethol yng Nghymru, fod hi’n “demtasiwn i ddiystyru heriau sy’n cael eu hachosi gan gwres".

Esboniodd Mr Butler mai anaml y mae system oeri mewn ysgolion a bod nifer o athrawon a phlant yn teithio milltiroedd i’r ysgol - sy’n gallu achosi risgiau iechyd a diogelwch mewn gwres.

Ar ran NASUWT, galwodd Mr Butler am gyflwyno y tymheredd uchaf a fyddai’n gallu cael ei orfodi'n gyfreithiol ym mhob ysgol a gweithle, er mwyn “galluogi ysgolion i wneud penderfyniadau cyflym”.

Ffynhonnell y llun, Getty Images

Dywedodd undeb UNISON Cymru fod penaethiaid yn gorfod gwneud penderfyniadau anodd a bod staff cefnogi ysgolion yn gwneud popeth o fewn eu gallu i gadw plant yn ddiogel.

Yn ôl y llefarydd, Rosie Lewis, mae nifer o staff yn aml yn gweithio yn ardaloedd poethaf ysgolion a phwysleisiodd bod yn rhaid i ddiogelwch fod yn “flaenoriaeth”.

Ychwanegodd Ms Lewis fod angen asesiadau risg ac na allai gwres eithafol gael ei drin fel problem un tro mwyach.

Dywed Kim Ombler, perchennog cartref gofal/ nyrsio Glan Rhos ym Mrynsiencyn ei bod wedi bod yn brysur yn paratoi ar gyfer y tywydd cynnes.

"Dan ni'n neud yn siŵr fod yna ddigon o ddiodydd o gwmpas.

"Byddwn ni addasu'r fwydlen yn ystod y dydd a newid y bwyd yn dibynnu ar y tywydd ac ry'n ni wedi prynu llawer o ice pops.

"Dan ni'n jyst yn gorfod sicrhau fod y preswylwyr yn yfed ac os 'dan nhw ddim yn yfed, dan ni'n rhoi jeli neu ice pop neu rywbeth i'r bobl sy'n medru cymryd nhw."

Ffynhonnell y llun, Llun cyfrannydd

"Mi nathon ni brynu ffans flwyddyn diwetha' pan gafon ni'r tywydd poeth. Dwi'n cofio mynd i nôl mwy o ffans a wedyn na'th bobman redeg allan o ffans, o'n i methu cael dim byd.

"Wrth i ni gael mwy o dywydd poeth, mae buddsoddi mwy mewn offer awyru yn syniad ar gyfer y dyfodol," ychwanegodd.

"Mi fydd hi hefyd yn bwysig gofalus am y staff," meddai.

Cyngor Casnewydd

Mae Cyngor Casnewydd wedi cyhoeddi y bydd Amgueddfa Casnewydd, yr Oriel Gelf a'r Llyfrgell Ganolog ar gau ddydd Mercher a ddydd Iau oherwydd y tymheredd uchel.

Trafnidiaeth Cymru

Mae Trafnidiaeth Cymru wedi canslo nifer o wasanaethau ar draws Cymru yn sgil y tywydd eithafol - y rheswm pennaf yw prinder trenau.

Mae llai o drenau yn teithio rhwng Manceinion a Chaerdydd drwy Crewe ac Amwythig.

Mae llai o drenau hefyd rhwng Wrecsam a Chaer.

Yn y de mae llai o drenau rhwng Caerdydd a Glyn Ebwy.

Does yna ddim gwasanaeth rhwng Pen-y-bont ar Ogwr a Maesteg, Llandudno a Blaenau Ffestiniog, na rhwng Pontypridd a Bae Caerdydd.

Does yna ddim trenau chwaith yn tiethio o Coryton i Benarth nag o orsaf Lefel Isel y Mynydd Bychan.

Y cyngor yw i wirio cyn teithio a pheidio teithio os nad oes rhaid.

Yn sgil y rhagolygon tywydd eithafol ar gyfer dydd Iau penderfynwyd gohirio’r sgwrs rhwng Ned Thomas ac Elin Haf Gruffydd Jones yn y Ganolfan Uwchefrydiau Cymreig a Cheltaidd yn Aberystwyth.

Bydd cyfle arall i glywed y ddau’n sgwrsio yn yr Eisteddfod Genedlaethol ar y testun 'Rhyngwladoli a’r Gymraeg' - y sgwrs yn nodi pen blwydd Ned Thomas yn 90 eleni.

Y digwyddiad hwnnw ddydd Mercher, 5 Awst, am 12:00 ar Stondin y Coleg Cymraeg Cenedlaethol

Ffynhonnell y llun, Y Ganolfan Uwchefrydiau Cymraeg a Chymreig

Tywydd

Wrth i'r tymheredd barhau i godi, pa dywydd sydd i ddod yn ystod y dyddiau nesaf?

Dyma gyflwynydd tywydd S4C, Alex Humphreys, â'r rhagolygon.

Gyda'r darogan y bydd tywydd poeth eithafol yn fwy cyffredin yn y dyfodol, mae'r sector adeiladu wedi gorfod ystyried fwyfwy sut mae sicrhau bod cartrefi ac adeiladau eraill yn addas yn y fath amodau.

Dywed Ifan Glyn, Cyfarwyddwr Ffederasiwn y Meistri Adeiladu yng Nghymru, bod y mater "wedi bod ar ein radar ni" ers rhyw chwarter canrif a bod rheoliadau adeiladu wedi newid yn y blynyddoedd diwethaf.

Ond rhybuddiodd mai'r "sialens fwyaf" yw uwchraddio adeiladau - mae amcangyfrif y bydd 80% o'r stoc dai erbyn 2025 yn gartrefi a gafodd eu codi cyn i dywydd crasboeth ddod yn ffactor i'w ystyried.

"Mae lot o'r gwaith sydd wedi cael ei 'neud o ran uwchraddio wedi rhoi sylw mawr ar gadw'r tai yn gynnes yn y gaeaf," dywedodd, "ond bydd hefyd angen iddyn nhw roi mwy o ystyriaeth i'w cadw nhw'n oer yn ystod y cyfnodau eithafol o boeth 'ma."

Ffynhonnell y llun, Llun cyfrannydd

"Ysgolion, cartrefi gofal, fflatia' llawr uchaf - dyna lle mae'n problema' mawr ni. Tai a gafodd eu hadeiladu yn y 1970au - dydi rheiny ddim yn wych."

Mae cysgod allanol a gwell awyru naturiol ymhlith y camau a all leddfu'r amodau, ynghyd â "gwydr sy'n gallu rheoli gwres" a tho â "deunyddiau sy'n adlewyrchu gwres".

"Dwi'n tybio bydd mwy o dechnoleg felly yn dod i'r farchnad dros y blynyddoedd a'r degawdau nesa' 'ma," meddai.

Wrth i aelwydydd symud o foeleri nwy i bympiau gwres, fe fyddai yna bwysau ar y Grid Cenedlaethol, meddai, pe tai "pawb fory nesa' yn rhoi systemau oeri yn eu tai hefyd".

Mae'n rhaid i'r sector hefyd ystyried "nid yn unig sut ydan ni'n adeiladu ond lle 'dan ni'n adeiladu... yn enwedig yn ein dinasoedd fydd 'na lot mwy o angen am goed a mannau gwyrdd ac yn y blaen."

Mae ton o wres eithafol hefyd mewn rhai gwledydd yn Ewrop ac yn Hong Kong mae'r tywydd yn gynhesach na'r adeg yma o'r flwyddyn fel arfer.

Mae disgwyl i'r gwres llethol yn Ewrop barhau gydol ddydd Mercher.

Mae rhybuddion coch am dywydd eithafol ar draws hanner Ffrainc.

Mae disgwyl i'r tymheredd fod ar ei uchaf yn Yr Iseldiroedd a Gwlad Belg ddydd Gwener ac yn Yr Almaen mae disgwyl i'r tymheredd godi i 40C dros y penwythnos.

Ffynhonnell y llun, Getty Images

Ffynhonnell y llun, Getty Images

Ffynhonnell y llun, Getty Images

Ffynhonnell y llun, Getty Images

Trafnidiaeth Cymru

Mae trenau rhwng Llandudno a Blaenau Ffestiniog wedi cael eu canslo i’r ddau gyfeiriad yn sgil y tywydd eithafol, medd Trafnidiaeth Cymru.

Fydd y gwasanaeth ddim yn ôl tan 21:37 heno.

Yn lle trenau bydd Trafnidiaeth Cymru yn trefnu trafnidiaeth arall i deithwyr.

Ffynhonnell y llun, Getty Images

NFU Cymru

Mae'r gwres poeth yn golygu bod yna rai arwerthiannau anifeiliaid wedi'u canslo heddiw.

"'Dan ni'n gwybod yn barod bod 'na un neu ddau o arwerthiannau defaid wedi ei gohirio heddiw 'ma, ac mae eraill wedi dweud y bydden nhw'n dechrau pwyso ŵyn am 4:30 y bore, a dechrau'r arwerthiant llawer iawn cynt na fysen nhw fel arfer, sy'n arferiad da cyn iddi fynd rhy boeth," meddai Paul Williams o NFU Cymru.

"Mae'n golygu nid yn unig bo' ni'n cludo nhw i'r farchnad mewn adeg pan mae'n dipyn brafiach i wneud hynny, ond mi fydd yr anifeiliaid wedi gadael y farchnad mewn tywydd llawer mwy caredig.

"Unwaith eto, arferiad da ydi hyn a synnwyr cyffredin i drio gwneud o mor braf a fedrwn ni i'r stoc a'n hanifeiliaid ni."

Ffynhonnell y llun, Getty Images

Mae'r rhagolygon yn awgrymu y gallai Cymru dorri y record tymheredd uchaf ar gyfer mis Mehefin, sef 33.7C a gofnodwyd ym Machynlleth yn 2000.

Mae posibilrwydd hefyd y bydd y tymheredd yn herio record uchaf erioed Cymru o 37.1C, a gofnodwyd ym Mhenarlâg yn Sir y Fflint yn 2022.

Y Swyddfa Dywydd

Mae'r Swyddfa Dywydd wedi ymestyn y rhybudd coch sydd mewn grym o deirawr - tan 23:59 nos Iau.

Yn Lloegr mae'r rhybudd wedi ei ymestyn ar draws Dorset, Hampshire a Sussex.

Mae yna rybudd oren arall ar gyfer canolbarth Lloegr ddydd Gwener - mae hwnnw'n cydredeg â'r rhybudd coch.

Yn ôl Beverley Holt, is-reolwr Cartref Dyfi ym Machynlleth, maen nhw wedi gwneud newidiadau gan gynnwys y fwydlen, gweithgareddau ac archebu mwy o wyntyllau i gadw’r gwesteion yn oerach.

“Mae’n anodd - rydyn ni’n trio cadw pawb yn oer, yn cael dŵr a chadw’r llenni ar gau. “Mae genno’ ni ffans yn mynd, mae gan staff y gegin hufen iâ a rhew i’r holl ddiodydd,” meddai Ms Holt.

Roedd rhai o’r trigolion yn eistedd tu allan yn y cysgod yno a dywedodd Patricia Lampitt, 88, ei bod hi’n mwynhau’r gwres.

Dywedodd Lois Burke, 90, ei bod hi fel bod dramor - rhywbeth yr oedd hi’n arfer ei wneud yn gyson – gan ychwanegu na fyddai hi eisiau hi fod yn boethach.

Mae’r tywydd yn gwneud Sally, 86, yn “eithriadol o flinedig”, ond dywed ei bod yn dal i wneud ymarferion corff er mwyn cadw ei hun rhag mynd yn stiff.

Steffan Messenger
Gohebydd Amgylchedd BBC Cymru

Mae'n debygol iawn y gwelwn ni'r record o ran tymheredd ar gyfer mis Mehefin yn cael ei thorri heddiw - fe ddaethon ni'n agos at hynny ddoe.

Efallai wir y gwelwn ni'r diwrnod poethaf ar gofnod i Gymru dros y deuddydd nesaf.

Ry'n ni eisoes wedi gweld y record o ran isafswm tymheredd ar gyfer mis Mehefin yn cael ei chwalu - wrth i'r tymheredd beidio gostwng yn is nag 20.3C yn Sain Tathan, Bro Morgannwg nos Lun.

Bydd sawl un ohonon ni wedi profi noson drofannol, anghyfforddus neithiwr hefyd.

Er mor anarferol y rhybudd coch yma heddiw gan y Swyddfa Dywydd ac er mor drawiadol y rhagolygon, cofiwch i ni weld y diwrnod poethaf ar gofnod ym mis Mai hefyd, rai wythnosau nôl.

Llynedd oedd yr haf poethaf ar gofnod a mae'r deg o flynyddoedd poethaf erioed i Gymru oll wedi bod ers y flwyddyn 2000. Felly mae'r recordiau yma'n cael eu torri'n fwy rheolaidd yn ddiweddar ac wrth gwrs newid hinsawdd yw'r cyd-destun i hynny.

Ffynhonnell y llun, Janey Liz/Weather Watchers

Mae cyfarfod rasys ceffylau Ffos-las yn Sir Gaerfyrddin wedi cael ei ganslo ddydd Mercher oherwydd y gwres.

Dywedodd y trefnwyr ar gyfryngau cymdeithasol: "Er nad oes rhybudd coch mewn grym yma, mae'r penderfyniad wedi ei wneud er lles y ceffylau, gan ystyried yr amodau a'r angen i deithio i'r cwrs rasio."

Ffynhonnell y llun, Getty Images

Mae dros 500 o ysgolion ar gau neu ar gau yn rhannol.

Mae Ysgol Glan Morfa yng Nghaerdydd yn un o'r rhai sydd ar agor.

"Dan ni wedi cymryd camau ychwanegol. Mae'n dipyn o her i fod yn onest," medd y pennaeth Meilir Tomos.

"Dan ni'n sicrhau bod y plant yn cael digon o seibiant yn ystod y gwersi, cael cyfle i fynd i'r tŷ bach neu gael diod a chyfle i ddod allan i'r goedlan yn ystod y dydd fel bo nhw'n cael awyr iach."