በተባበሩት አረብ ኤሜሬትስ የጭነት መኪና ከቁጥጥር ውጪ ሆኖ በመገልበጡ 23 ተሽከርካሪዎች ሲጎዱ 14 ሰዎች ሞተዋል

የፎቶው ባለመብት, KARIM SAHIB/AFP via Getty Images
በተባበሩት አረብ ኤምሬትስ፣ ፉጃይራህ ውስጥ አንድ የጭነት መኪና ከቁጥጥር ውጭ ሆኖ በመገልበጡ በርካታ ተሽከርካሪዎች ላይ ጉዳት ሲያደርስ 14 ሰዎች መሞታቸውን እና በርካቶች ደግሞ መቁሰላቸውን የአገር ውስጥ ጉዳይ ሚኒስቴር አስታወቀ።
ሚኒስቴሩ ባወጣው መግለጫ ላይ አደጋው አምስት የጭነት መኪኖችን ጨምሮ በ23 ተሽከርካሪዎች ላይ ጉዳት ማድረሱ ተጠቅሷል።
አደጋው የተከሰተው ከእኩለ ሌሊት ጥቂት ቀደም ብሎ፣ ወደ ምሥራቃዊው ኤምሬት መግቢያ ላይ ተሽከርካሪዎች በጣም በዝግታ በሚንቀሳቀሱበት ወቅት መሆኑ ተገልጿል።
ግጭቱ "የጭነት መኪናው በእሳት እንዲያያዝ እና እሳቱም ወደ ሌሎች በርካታ ተሽከርካሪዎች እንዲዛመት በማድረግ፣ ከፍተኛ የሰው ሕይወት መጥፋት አስከትሏል" ሲል ገልጿል።
ሠላሳ ሰዎች ቆስለው ወደ ሆስፒታል መወሰዳቸውን የፉጃይራ ፖሊስ የገለጸ ሲሆን፣ የተጎጂዎችን አስከሬን ለመለየት የዲኤንኤ ምርመራ እየተካሄደ መሆኑንም አስታውቋል።
ከሟቾቹ መካከል የተወሰኑት የተባበሩት አረብ ኤምሬትስ ዜጎች መሆናቸውን ፖሊስ ይፋ አድርጓል።
በተባበሩት አረብ ኤምሬትስ የሚገኘው የሕንድ ቆንስላ ጽ/ቤት ዜጎቹ ከሟቾቹ መካከልም እንደሚገኙበት ገልጿል። እንዲሁም "ለተጎጂ ቤተሰቦች" ማሳወቁን እና እርዳታ እና ድጋፍ ለመስጠት ከአካባቢው ባለሥልጣናት ጋር እየሰራ መሆኑን ገልጿል።
ባለሥልጣናቱ እንዳሉት የጭነት መኪናው ከመገልበጡ በፊት ከሌላ ተሽከርካሪ ጋር መጋጨቱን እና በመንገድ ላይ "በዝግታ በሚንቀሳቀስ ትራፊክ" ምክንያት የቆሙትን ሌሎች ተሽከርካሪዎች ገጭቶ መገልበጡን ተናግረዋል።
የፖሊስ ፣ የሕክምና ባለሙያዎች እና የሲቪል መከላከያ ቡድኖችን ጨምሮ የአደጋ ጊዜ አገልግሎት ሠራተኞች እሳቱን ለማጥፋት፣ የቆሰሉትን ወደ ሆስፒታሎች ለማዛወር እና ቦታውን ለመጠበቅ ወደ ስፍራው ተንቀሳቅሰዋል።
የአገር ውስጥ ጉዳይ ሚኒስቴር እና የፖሊስ አባላት ለሟቾች ቤተሰቦች የተሰማቸውን ጥልቅ ሐዘን ገልጸው እንዲሁም ለተጎዱት ፈጣን ማገገም ተመኝተዋል።
ከቆሰሉት መካከል ግማሾቹ ሕክምና ከተደረገላቸው በኋላ ከሆስፒታል ሲወጡ የተቀሩት ደግሞ እንዲቆዩ ተደርጓል።
ባለሥልጣናቱ ተጎጂዎች የኤሚሬትስ፣ ኦማን፣ ሕንድ፣ ብራዚል፣ ፓኪስታን፣ ዮርዳኖስ እና ግብፅ ዜጎች መሆናቸውን ተናግረዋል።



















