
የፎቶው ባለመብት, ebc/screencapture
ትግራይ ውስጥ በነበረው የግዳጅ ወታደራዊ ምልመላ
ምክንያት “እስከ 800 ሺህ" የሚደርሱ ወጣት የክልሉ ነዋሪዎች ወደ አዲስ አበባ እና ሌሎች የአገሪቱ አካባቢዎች መሸሻቸውን የኢትዮጵያ የጦር
ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ ተናገሩ።
ፊልድ ማርሻል ብርሃኑ ይህንን የተናገሩት ሰሞነኛው
የፌደራል መንግሥት እና የትግራይ ኃይሎች ግጭት በድጋሚ ከተነሳ ወዲህ ለመጀመሪያ ጊዜ ትናንት አርብ ኅዳር 4 ቀን 2019 ዓ.ም.
በክልሉ መዲና መቀለ ተገኝተው ባደረጉት ንግግር ነው።
ኢታማዦር ሹሙ በቆይታቸው በክልሉ ከሚገኙ ከሠራዊት
አዛዦች ጋር ግምገማ ማድረጋቸውን እንዲሁም “ወደ ሠራዊቱ አንዳንድ አሀዶች” በመሄድ ወታደሮችን ማግኘታቸውን ገልጸዋል። በመቀጠል
ክልሉን የማስተዳደር ጊዜያዊ ኃላፊነትን ከተረከበው የባለአደራ አስተዳደር አመራሮች ጋር መወያየታቸውን አክለዋል።
ከመቀለ ከተማ ነዋሪዎች ጋር ባደረጉት ውይይት
በ2013 ዓ.ም. ከተነሳው ደም አፋሳሹ የሁለት ዓመት ጦርነት አንስቶ የነበሩ ክስተቶችን አንስተዋል።
ከፕሪቶሪያ ስምምነት በኋላ
በክልሉ ለታዩ ሁኔታዎች የህዝባዊ ወያነ ሓርነት ትግራይ (ህወሓት) አመራሮችን ተጠያቂ አድርገዋል። ይህንን ክስ ውድቅ የሚያደርገው ህወሓት በበኩሉ የፌደራል መንግሥት የፕሪቶሪያ ስምምነት እንዳፈረሰ በመግለጽ ይከስሳል።
ከመስከረም አጋማሽ እየተካሄደ ያለው ውጊያ “በሻዕቢያ
አመራር፣ በግብፆች ሎጂስቲክስ እና አቅርቦት” የተጀመረ ነው የሚል ክስ ያሰሙት ኢታማዦር ሹሙ፣ “እንደ ድሮ ትግራይ አንገባም ብለን
መቆም ትክክል አይደለም ብለን፣ ከትግራይም ወራሪውን ኃይል አባረናል። አሁን ወደ ሻዕቢያ ሄዷል” ሲሉ ተደምጠዋል።
አክለውም፣ “አሁን ድሮ የኛ ምሽጎች የነበሩ
ላይ ነው ያለነው። ጦርነቱን እንዲከፍቱ ታዝዘው ጦርነቱን ከፍተው የተሸነፉ ሰዎች ደግሞ እንዳጎርጊስ፣ አዲ ኳላ፣ መንደፈራ ነው
ያሉት። አንዳንዶቹ አስመራ ነው ያሉት” ሲሉ የህወሓት አመራሮች ወደ ኤርትራ ሸሽተዋል የሚል ክስ በድጋሚ አቅርበዋል።
ህወሓት እና የኤርትራ መንግሥት ለአሁኑ ክስ
ምላሽ ባይሰጡም፣ ከዚህ ቀደም ‘የህወሓት አመራሮች ወደ ኤርትራ ተሻግረዋል’ የሚለውን ክስ ውድቅ አድርገው ነበር። የህወሓት ምክትል
ሊቀ መንበር አማኑኤል አሰፋ "አመራሩ ትግራይ ውስጥ እየሠራ ነው" ሲሉ ከሦስት ሳምንት በፊት ለፈረንሳዩ የዜና
ወኪል ኤኤፍፒ ተናግረዋል።
የኤርትራ የማስታወቂያ ሚኒስትር የማነ ገብረመስቀልም
በተመሳሳይ "ውሸት" ሲሉ ክሱን ውድቅ ማድረጋቸውን የዜና ወኪሉ በወቅቱ ዘግቧል። የኤርትራ መንግሥት ኢትዮጵያ ውስጥ
የሚንቀሳቀሱ ታጣቂዎችን ይደግፋል በሚል የቀረበበትን ክስም ተቃውሟል።
ኢታማዦር ሹም ፊልድ ማርሻል ብርሃኑ፣ በመቀለው
ውይይት ላይ የፌደራል መንግሥት ከዚህ ቀደም ያሰማውን የጦርነቱ ተጠናቅቋል አዋጅ አስተጋብተዋል። የፌደራል መንግሥት የአሁኑን “ጦርነት
ለማሸነ[ፉ] የትግራይ ወጣት ሚና ትልቅ” እንደነበር ሲናገሩ ተደምጠዋል።
“ወጣቱ ከጦርነቱ ጎን አልነበረም፤ ከህወሓት
ጎን አልነበረም። ድሉ የፈጠነው ለዚህ ነው” ያሉት ፊልድ ማርሻል ብርሃኑ፣ በክልሉ ሲካሄድ የነበረው ወደታራዊ አፈሳ ለዚህ አስተዋጾ
ማድረጉን ጠቅሰዋል።
“የትግራይ ወጣት እያፈሱ ስላስቸገሩ፣ አብዛኛው
የትግራይ ህዝብ ወጣት ወደ መሃል አገር፣ ወደ እናት አገሩ፣ ወደ ቤቱ ተሰዷል። አስታውሳለሁ ባለኝ ዳታ እስከ 800 ሺህ ወጣት
ትግራይን ለቅቆ አዲስ አበባ፣ አዳማ፣ ድሬዳዋ፣ ሀዋሳ፣ አሶሳ፣ ጋምቤላ ተበትኗል” ብለዋል።
የክልሉ ነዋሪ ከፌደራል መንግሥት ቆን እንዲቆምም
ጥሪ አቅርበዋል። “’ልጆቻችን ናቸው’ እየተባለ ልጆቻችሁን አታስጨርሱ። ህወሓት የኛ ልጆች ናቸው እያላችሁ ውድ ታዳጊ ትግራይን
መቀየር የሚችል ቴክኖሎጂ መቀበል የሚችል ልጆች አታስጨርሱ” ብለዋል።