"እናቴ ወደ ሕክምና ማዕከል ከሄድኩ እንደምሞት ነግራኝ ነበር"- ከኢቦላ የተረፈው ሐኪም

ዶ/ር ሬይመንድ ካሳራካ ካምዋንጋ
የምስሉ መግለጫ, ዶ/ር ሬይመንድ ካሳራካ ካምዋንጋ
ታትሟል
የንባብ ጊዜ: 4 ደቂቃ

ዶ/ር ሬይመንድ ካሳራካ ካምዋንጋ በኢቦላ ተይዞ ሊሆን ስለሚችል ወደ ሕክምና ማዕከል እንደሚገባ ሲናገር ቤተሰቦቹ ተደናግጠዋል።

በምሥራቃዊ ዴሞክራቲክ ሪፐብሊክ ኮንጎ ቡቴምቦ የሚኖረው ቤተሰቡ፣ የኢቦላ ሕክምና ማዕከልን "የሞት ቀጣና" አድርጎ ይወስደዋል።

አብዛኞቹ ወደ ማዕከሉ የሚገቡ ሕሙማን አይድኑም። በተለይ ቫይረሱ ተባብሶባቸው ወደ ማዕከሉ የሚገቡ ሰዎች የመዳን ዕድላቸው ጠባብ ነው።

የዶ/ር ሬይመንድ እናት 50 ዓመታቸው ነው። ልጃቸው ወደ ማዕከሉ እንዳይሄድ እያለቀሱ ለመኑት።

"በኢቦላ ማከሚያ ማዕከል ለመሞት ለምን ትመርጣለህ?" ሲሉ እናቱ ማሲካ ንዱንጎ ጠየቁት።

ዶ/ር ሬይመንድ የሚሠራው በቡቴምቦ በሚገኘው ካትዋ ሆስፒታል ነው። ወደ ሕክምና ማዕከሉ ካልሄደ እንደማይተርፍ ያውቃል።

ይህ የሆነው ያለፈው ሐምሌ ወር ላይ ነበር። ግንቦት ላይ የዓለም ጤና ድርጅት የዴሞክራቲክ ኮንጎ የኢቦላ ወረርሽኝ ዓለም አቀፍ የጤና ስጋት መሆኑን አውጇል።

ከዚያ ወዲህ 11,000 ሰዎች በቫይረሱ ተይዘው 5,400 የሚሆኑት ሞተዋል።

እስከ አሁን ከተነሱ የኢቦላ ቫይረስ ወረርሽኞች የአሁኑ ሁለተኛው የከፋው ወረርሽኝ ነው።

በሰሜን ኪቩ ግዛት የሚገኘው ቡቴምቦ ወረርሽኙ በስፋት የተሰራጨበት አካባቢ ነው። ከፍተኛ ቁጥር ያላቸው ታማሚዎች የተመዘገቡት በዚህ አካባቢ መሆኑን የዴሞክራቲክ ኮንጎ የጤና ሚኒስቴር አስታውቋል።

ዶ/ር ሬይመንድ ከበሽታው ከተረፉ 3,031 ሰዎች አንዱ ነው።

ማኅበረሰቡን እየጎዳ ያለውን ወረርሽኝ ለመግታትም ታሪኩን ያጋራል።

ከሞት ጋር ስላደረገው ግብግብ መጽሐፍ እየጻፈ ነው።

"ከቫይረሱ እንዳገገመ ሰው በሽታው እንዳለ እና መዳን እንደሚቻልም ሕያው ምስክር ነኝ" ይላል።

ከበሽታው አገግሞ በካትዋ ሆስፒታል ሕክምና ወደ መስጠት ሥራው ተመልሷል።

የ30 ዓመቱ የሕክምና ባለሙያ በቫይረሱ የተያዘው ለታማሚዎች ድጋፍ ሲሰጥ እንደሆነ ያምናል። ባለሙያዎቸ ራሳቸውን ለመከላከል በቂ መገልገያዎች አያገኙም።

መጀመሪያ ላይ ምልክቱን ያስተዋለው አፉን ሲመርረው ነበር። ከዚያም ራስ ምታት እና አጠቃላይ የሕመም ስሜት ተከተለ። ወዲያው ለኢቦላ ሐኪሞች አስታወቀ።

የመጀመሪያ ምርመራ ተደርጎለት ወደ ቤት ሲመለስም አልተሻለውም። በከተማው የኦቦላ መመርመሪያ መሣሪያ ስለሌለ 54 ኪሎሜትር ርቀት ላይ በሚገኘው ቤኒ ምርመራ ይደረጋል።

በግጭት በሚፈተነው አካባቢ የምርመራው ውጤት እስከሚታወቅ ጊዜ ይወስዳል። አጭር ርቀት ለመጓዝ ከ48 እስከ 72 ሰዓት መጓዝ የግድ ነው።

ዶ/ር ሬይመንድ ሦስት ቀናት ቤቱ ውስጥ አሳለፈ። ጡንቻውን እያመመው እና በጣም እየደከመም ነበር። በአራተኛው ቀን ማስመለስ እና ማስቀመጥ ጀመረው።

የዶ/ር ሬይመንድ እናት ማሲካ ንዱንጎ
የምስሉ መግለጫ, የዶ/ር ሬይመንድ እናት ማሲካ ንዱንጎ
Skip podcast promotion and continue reading
BBC News Amharic የቢቢሲ አማርኛ ዩቲዩብ ቻናላችንን ይቀላቀሉ!
የቢቢሲ አማርኛ ዩቲዩብ ቻናል

ዜና፣ ትንታኔ እና ታሪኮችን በምሥል እና በድምጽ ለማግኘት

ይህንን በመጫን ሰብስክራይብ ያድርጉ

End of podcast promotion

እናቱን እና የተቀረውን ቤተሰቡን ሰብስቦ ወደ ኢቦላ ሕክምና ማዕከል ሊገባ እንደሆነ ነገራቸው።

"እናቴ ማልቀስ ጀመረች፤ እህቶቼም ያለቅሱ ነበር። ምንም እንደማልሆን፣ ሐኪም ስለሆንኩ በራሴ እንደምተማመን ነገርኳቸው። ይሄን ማለቴ ሊያረጋጋቸው አልቻለም።"

ከዚያም በእግሩ ወደ ሕክምና ማዕከሉ አቀና። በዋናው መግቢያ በር ከመግባት ይልቅ ሐኪሞችን ጠራ።

ራሳቸውን የሚከላከሉበት አልባሳት አድርገው ወደ ማዕከሉ እንዲያስገቡት ጠየቃቸው። ወደ ለይቶ ማቆያም ተወሰደ።

ቫይረሱ ከሰውነት በሚወጡ ፈሳሾች ከሰው ወደ ሰው ይተላለፋል።

አሁን እየተሰራጨ ላለው ቡንዲቡግዮ የተባለው የቫይረሱ ዝርያ ክትባትም ሆነ ሕክምና የለም።

ዶ/ር ሬይመንድ እንደሚለው እየተሰጠ ያለው ሕክምና በቫይረሱ የተያዙ ሰዎች የሚያሳዩት ምልክት ላይ ያነጣጠረ ነው።

ከልክ ያለፈ ማስመለስ እና ማስቀመጥ እያሰቃየው እንደነበር የሚናገው ዶ/ር ሬይመንድ፤ የተሰጠው ሕክምና እነዚህ የቫይረሱ ምልክቶች ላይ ያነጣጠረ መሆኑን ያስረዳል።

አንዳንድ ታማሚዎች በእነዚህ የቫይረሱ ምልክቶች ምክንያት የሰውነት ክፍላቸው መሥራት ሊያቆም ይችላል። በሰውነት ውስጥ እና በውጭም መድማት የሚገጥማቸውም አሉ።

ዶ/ር ሬይመንድ በፈሳሽ እጥረት ተዳክሞ ስለነበር ሁኔታው አስፈርቶት እንደነበር ይናገራል።

"ሁኔታዬ አስፈራኝ። በየቀኑ ዐይኔ እያየ ታማሚዎች ሲሞቱ ነበር። ግን ተስፋ አልቆረጥኩም።"

ለ13 ቀናት በሆስፒታል ተኝቶ ሳለ እራሱን ለማነቃቃት በስልኩ ላይ ፊልም ይመለከት ነበር።

እያነበበ እና የቲክቶክ ቪድዮ እያየም ራሱን ለማረጋጋት ሞክሯል።

ከቫይረሱ ማገገሙ የተነገረው ቀን ከፍተኛ እፎይታ ተሰምቶታል። የተንከባከቡትን ሐኪሞች አመሰገነ።

በእርግጥ ከቫይረሱ ነጻ እንደሆነ ከተነገረው በኋላም መፍራቱ አልቀረም።

እናቱ "ወደ ቤት ሲመለስ አቀባበል አደረግንለት። ስለፈራን ግን ብዙ አልቀረብነውም" ሲሉ ለቢቢሲ ተናግረዋል።

ቫይረሱ በሰውነት ተሰራጭቶ ምልክት ለማሳየት 21 ቀናት ስለሚወስድበት ሐኪሙ ራሱን አግልሎ ቆይቷል።

የቤተሰቡ ቤት ውስጥ ሕጻናት እና በግጭት የተፈናቀሉ ሰዎችን ጨምሮ 18 ሆነው ይኖራሉ።

ምግብ ሲቀበላቸው ብቻ በሩቁ ያያቸው ነበር። ከቤተሰቡ ርቆ 21 ቀናት አሳለፈ።

ጎረቤቱ ካቩግሆ ሲፋ የተፈጠረውን ፍርሃት ታስታውሳለች።

"በጣም ፈርተን ነበር። በሕክምና ማዕከሉ ሳለ ፈጣሪ እንዲጠብቀው ስንፀልይ ነበር። በእግዚአብሔር እርዳታ እና በሐኪሞች ድጋፍ ወደ ጤናው ተመልሷል።"

በዚህ ክስተት ምክንያት ስለ ኢቦላ ያላቸው አመለካከት መለወጡን ይናገራሉ።

አንዳንዶች በሽታው መኖሩን እንደማያምኑ ካቩግሆ ትናገራለች።

በኢቦላ የተያዘ ሰው በአካባቢያቸው ማየታቸው ስለ ቫይረሱ የሚሰራጨውን ሐሰተኛ ዜና እንዲለዩ አስችሏል።

ዶ/ር ሬይመንድ ከቫይረሱ ካገገመ በኋላ ማኅበረሰቡን ማስተማር ጀምሯል።

ታሪኩን በማጋራት ሐሰተኛ መረጃ እና አሉባልታን ለማስወገድ ይሞክራል።

"ከሆስፒታል ወጥቼ በሳምንቱ መጽሐፍ መጻፍ ጀምሬያለሁ። 'ዘ ፕራይስ ኦፍ ሴቪንግ ላይቭስ' ይባላል። የመጽሐፉን ረቂቅ ለግንዛቤ ማስጨበጫ ትምህርት እያዋልኩት ነው። ጉልህ ለውጥ ማምጣትም ጀምሯል።"

የግንዛቤ ማስጨበጫ ትምህርቱን ሲሰጥ በኢቦላ ሕክምና ማዕከል የተነሳቸውን ፎቶዎችም ያሳያል።

ሆኖም ግን የሚያደርገው ንቅናቄ በፈተና የተሞላ ነው። ማኅበረሰቡን ለማስተማር ሲሞክር ብዙዎች ለመቀበል ይቸገራሉ።

ንቅናቄው የሰብአዊ እርዳታ ተቋማት ገንዘብ ለማግኘት የሚያደርጉት ጥረት አካል ይመስላቸዋል።

የሚጠራጠሩት የሕክምና ባለሙያዎችንም ጭምር ነው። በአካባቢው ያለው ግጭት እና ድህነት ችግሩን አባብሶታል።

"ኢቦላ የተከሰተው በጦርነት ወቅት ነው። በጦርነቱ ያልሞቱ ሰዎችን ለመግደል በሚል ባለሥልጣናት የፈጠሩት አድርገው የሚያዩትም አሉ" ይላል ሐኪሙ።

በወረርሽኝ ስርጭት ወቅት በበሽታው የተያዙ እና የሞቱ ሰዎች ቁጥር ሲገለጽ የማኅበረሰቡ ፍርሃት እና ጥርጣሬ ከፍ እንደሚል ያስረዳል።

በሚያደርገው ንቅናቄ ምክንያትም በስልክ የግድያ ዛቻ ይደርሰዋል።

ስለ ኢቦላ መረጃ እንዲያሰራጭ ተከፍሎታል ብለው የሚያስቡም አሉ።

ግንዛቤ ለመስጠት የሚንቀሳቀሱ የጤና ባለሙያዎች በማኅበረሰቡ አባላት ጥቃት ይደርስባቸዋል። መንግሥት ችግሩን ለመቅረፍ በበቂ ሁኔታ አለመሥራቱን ሐኪሙ ይናገራል።

"መንግሥታችን ነገሩን አቅልሎታል" ይላል።

ድንበር የለሽ ሐኪሞች (ኤምኤስኤፍ) ለኦቦላ የተመደበው ገንዘብ ያለ አግባብ ወደ ሌላ ሥራ መመደቡን በቅርቡ ይፋ አድርጓል። ዶ/ር ሬይመንድም በዚህ ይስማማል።

"ለኢቦላ የተመደበው ገንዘብ በመንግሥት ለሌላ ጥቅም እየዋለ ነው። ራሳችንን ከበሽታው ለመከላከል በቂ መገልገያ የለንም" ይላል።

ቢቢሲ ከዴሞክራቲክ ኮንጎ መንግሥት ምላሽ ጠይቋል።

በአገሪቱ የቫይረሱን ስርጭት ለመግታት በሚደረገው ጥረት መሰናክሎች ቢበዙም ሐኪሙ ተስፋ አልቆረጠም። ግቡ በሽታውን ማቆም ነው።

"የኢቦላ ስርጭትን ለማቆም በሚደረገው ጥረት ተስፋ መቁረጥ አለብን? በፍጹም! ባለን አቅም ማድረግ የምንችለውን እያደግን እንቀጥላለን። በእርግጥ ያለን አቅም ውስን ነው።" ብሏል።