KALLATTIIN, US qoqqobii dinagdee yaaduun ishee, waraanaan mo’amuu amanuusheeti - Iraan

Haguuggii Tamsaasa Kallattii

1. Sa'aatii 3 duraChaayinaan haala Baha Giddu-galeessaa irratti ibsa kennite

   

   Madda suuraa, Reuters

   Ministirri Dhimma Alaa Chaayinaa Wang Yi, haalli Baha Giddugaleessaa fi naannoo Galoofta Persiyaa sadarkaa baay’ee yaaddessaa irra ga’uu isaa dubbatan.

   Wang, qaamoleen walitti bu’iinsa keessa jiran hatattamaan gara marii fi waliigaltee nagaatti akka deebi’an waamicha dhiyeessan.

   Wang kana kan jedhan, Beijing keessatti Ministira Dhimma Alaa Kuweet, Sheikh Jarraah Jaaber Al-Ahmad Al-Sabaah, waliin marii taasisaniin.

   Akka Ministeerri Dhimma Alaa Chaayinaa kun jedhanitti “maraanmartoon walitti bu’iinsaa kanaan dura ture irra deddeebi’amun uumamuu hin qabu” jedhan. Yeroo ammaa dursi tasgabbii uumuuf kennamuu akka qabu ibsan.

   Chaayinaan Kuweet waliin tumsa fi qindoomina ishee cimsuuf qophii ta’uu, akkasumas nagaa fi tasgabbii naannichaa deeggaruuf ni hojjatti jedhan.

   Waamichi Chaayinaan taasifte kun yeroo Ameerikaan Iraan irratti dhiibbaa diinagdee cimaa gochuuf akeekkachiisaa jirtutti.

   Ameerikaan biyyootaa fi dhaabbilee Iraan waliin daldalan irratti tarkaanfii qoqqobbii dinagdee fudhachuuf akka jirtu himte.

   Iraan gama isheen dhiibbaan diinagdee itti fufnaan. ulaa Hormuz keessa dooniin tokkollee hayyama ishee malee akka hin sochoone akeekkachiisa haaraa baaftetti.

2. Sa'aatii 4 duraWaraana Iraan: Carraaqqiin dippilomaasii cimee itti fufeera

   

   Madda suuraa, EPA

   Ajajaan waraanaa Paakistaan Asim Muniir Iraan fi Ameerikaa gidduutti fala barbaaduuf Teehiraan jiru.

   Qajeelchi sabaa-himaa waraanaa Paakisaan ibsa baaseen akka ibsetti, daawwannaan aanga’oota biyyattii Iraanitti taasisan qama Paakistaan “nanano Baha Giddugaleessaa keessatti nagana akka dhufu gochuuf wal dhibdee jiru kanaa nagana akka furamu gochuuti”.

   Burqaan oduu Iraan IRNA akkas jechuun barreesse: "Hanqiniin irra deddeebiin uumamanillee Asim Muniir gara Teehiraanitti yeroo afuraffaaf deddeebiyuun Iraan fi Ameerikaa gidduutti daandii dippilomaasii karaa Paakistaan fala nagaa barbaaduu agarsiisa," jedhe.

   IRNA'n itti dabaluun ejjennoon dippilomaasii Iraan: "Sadarkaa jalqabaarratti, Iraan US wal hubannaa (MoU) hojiirra akka oolchitu waadaa galte garuu hin raawwatiin jirtu akka irra deebitee ilaaltudha".

3. Sa'aatii 4 dura'Iraan guutummaatti kufaa jirti'- Tiraamp

   

   Madda suuraa, EPA

   Pirezidaantiin Ameerikaa Donald Tiraamp, Iraan “guutummaatti kufaa jirti” jechuun miidiyaa hawaasaa Truth Social irratti barreessan.

   Tiraamp kana duraas Ameerikaan Iraan irratti dhiibbaa diinagdee cimaa akka geessistu dubbatan.

   Ministirri Maallaqaa Ameerikaa Iskoot Beseent ammoo Iraan irratti “dhiibbaa olaanaa” caalu geessisuu 'Financial Times' gabaasera.

   Akka isaan jedhanitti, dandeettiin waraanaa Iraan fi sagantaan nukilaraashee haleellaa fi dhiibbaa cimaa keessa galaniiru.

   Dhiibbaan diinagdee kun gatii maallaqaa fi warqee Iraan irratti dhiibbaa uumaas jira.

   Gatiin doolaara tokkoo gabaa gurraachaa Riyaala Iraan keessatti gara miliyoona lamaa olitti olka'uun rekaardii haaraa qabateera.

   Ameerikaan biyyoonni ykn dhaabbileen Iraan waliin daldalaaf deggersa kennan tarkaanfii adabbii akka isaan mudatu akeekkachiifteetti.

   Iraanis biyyoota dhiibbaa Ameerikaa keessatti hirmaatan “diinota” jechuun deebii akka kennitu dubbatti.

   Hanga yeroo kanaatti, Ajajaan Waraana Paakistaan Fiil Maarshaal Asim Muniir fi Ministirri Dhimma Keessaa Mohsiin Naqvii marii gaggeessuuf Tehraan jiru. Akka ibsa waraana Paakistaanitti, kaayyoon daawwannaa isaanii furmaata nagaa argamsiisuudha.

4. Sa'aatii 5 duraTurkiin Interpool Netaaniyaahuu bakka argametti akka to'atu gaafatte

   

   Madda suuraa, Reuters

   Turkiin Ministirri Muummee Israa’el Benjaamiin Netaaniyaahuu aktiivistoota gargaarsa namoomaa Gaazaatti dhiyeessuuf turan irratti haleellaa raawwatameen walqabatee beeksisa baasee bakka argametti qabamee akka to’atamuuf Interpool gaafachuuf akka jirtu himte.

   MInistirri Haqaa Turkii Akiin Gurleek akka jedhetti, himannaa duguuggaa sanyii, yakkawwan namoomaa fi hiraarsuu dabalatu Netaaniyaahuu fi shakkamaa biraa irratti ajajni hidhaa baheera.

   Dhimmi kun namoota 35 bidiroowwan Galaana Addunyaarraan, qaama bishaan idil-addunyaarratti osoo gargaarsa gara Gaazaa geessaa jiranii Israa'eliin qabamuu isaanii hordofee kan mudate ta'uu Rooyitars gabaaseera.

   Turkiin oppereeshinii waraanaa Israa'el Gaazaa keessatti gaggeessitu warra cimsanii balaaleeffatan keessaa tokko yoo taatu, tarkaanfiin idil-addunyaa Israa'el irratti akka fudhatamuuf gaafachaa turteetti.

   Israa'el gamasheetiin seera idil-addunyaa fi mirgoota namoomaa akka hin cabsine irra deddeebiin ibsiti.

5. Sa'aatii 6 duraUS Iraaniin qoqqobuuf akka jirtu ibsite, Iraan daldala boba'aa Ulaa Hormuuz irraa adda kutuuf dhaadatte

   

   Madda suuraa, AP

   Ameerikaan qoqqobbiiwwan diinagdee Iraan fi michuuwwan daldalaa ishee irratti xiyyeeffate kaa'uuf akka jirtu ibsiteetti.

   ''Qoqqobbiiwwan diinagdee hanga ammaa kaa'aman irraa baayyee cimaa kan ta'e,'' jechuun ibse Ministeerri Maallaqaa US.

   Iraan gamasheen ''waraanni diinagdee haala kanaan kan itti fufu yoo ta'e,'' daldala boba'aa karaa Ulaa Hormuuz taasifamu kamiyyuu dhaabsisuuf dhaadatte.

   Ministirri Maallaqaa US Iskot Besent dhimma kanarratti ibsa kennu jedhamee eegamaa jira.

   Qoqqobbiin diinagdee Ameerikaan amma Iraan kaa'uuf jettu bara 1979 yeroo mootummaan Islaamaa Iraan hundaa'ee as qoqqobbiiwwan kaa'aman hunda kan caalu ta'uun ibsameera.

   Iskot yaada Dilbata kaleessaa kenneen ''Wiixatarraa eegalee qoqqobbiin diinagdee akkaan murteessaa ta'e tokko ni eegala. Kunis haleellaa diinagdee hamaa hanga yoonaa morkataa US irra kaa'amee hin beeknedha,'' jedhan.

6. Sa'aatii 7 duraKubbaan Maraadoonaan goolii 'hand of God' ittiin galche doolaara mil 3.3tti gurgurame

   

   Madda suuraa, PA Media

   Kubbaan Diyeegoo Maaraadoonaa tapha Waancaa Addunyaa 1986 irratti harkaan galche caalbaasiidhaan doolaara Ameerikaa miiliyoona 3.3tti gurgurame.

   Gooliin sun guyyaa taateen sun mudatarraa eegalee maqaa 'hand of God' jedhuun seenaa kubbaa miillaa keessatti beekameera.

   Tapha Arjentiinaan goolii 2 fi 1n Ingilaand injifachuun waancaa nyaatte sanarratti Diyeegoo Maaraadoonaa gooli eegaa Piitar Shiltan bira darbuun harkasaatiin tuqee goolii lakkoofsise.

   Tapha booda yaada gaazexeessitootaaf kenneen gooliin sun ''mataa Maaraadoonaan xiqqoon tuqamtee, harka Waaqaan xiqqoo itti bu'amtee,'' galte jedhe.

   Maaraadoonaan taphuma sanarratti goolii biraa galcheera. Gooliin sun ''goolii jaarraa kanaa'' jedhamuun galmoofteetti.

   Gameessi kubbaa miillaa kun taphattoota Ingilaand dirree keessa turan shan fi gooli eegaa isaanii bira darbuun goolii lammataa galche.

   Kubbaan Maraadoonaan galche kun amma doolaara miiliyoona 3.3tti gurguramus, garuu miiliyoona 10tti siqa jedhamee eegamee ture.

   Kubbaa kana daanyaa Tuuniiziyaa bara 1986 tapha xumuraa Waancaa Addunyaa taphachiise Alii Bin Naasir jedhamutu waggoota 30f eegee tursiise.

   Daanyaan kun kubbaa kana bara 2022 doolaara miiliyoona 2.27tti gurguree ture.

   Namni kubbaa kana bite bara 2023 caalbaasiif dhiheessee ture, garuu gatii ka'umsaa waan hin arganneef kubbaan hin gurguramin hafe.

   Tapha sanarratti qomeen (uffati) Maaraadoonaan uffatee taphates bara 2022 keessa caalbaasiidhaan paawondii miiliyoona 7.1tti gurgurameera.

   

   Madda suuraa, Getty Images

7. Sa'aatii 8 duraKuusaan balfaa jiguun yoo xiqqaate namoonni 31 ta'an dhuman

   

   Madda suuraa, AFP via Getty Images

   Magaalaa guddoo Giinii kan taate Konaakirii keessatti kuusaan balfaa jiguun hanga ammaatti yoo xiqqaate namoonni 31 ta'an du'uu mootummaan biyyattii ibse.

   Balaan kun balfi magaalattii keessatti waggootaaf kuufamaa ture manneen naannoo jiran irratti jiguun mudate. Kunis rooba cimaa booda.

   Balaa kanaan kanneen du'an malee namoonni 22 biroon kan miidhaman yoo ta'u, kanneen keessaa ja'a baayyee miidhaman.

   Balaan kun naannawa Daaresalaam jedhamutti mudate. Bulchaan naannawa kanaa Laansiin Siilaam lakkoofsi namoota du'anii kana caalaa ta'uu akka danda'u AFPtti hime.

   Namoonni hedduun balfa jige kana jalatti awwaalamanii waan jiraniif lakkoofsi namoota du'anii daran dabaluu danda'a sodaan jedhu jira.

   Mootummaan biyyattii lubbuu namoota balaa kanaan miidhamanii baraaruuf meeshaalee akkaan murteessoo ta'an akkasumas humna waraanaa bobbaaseera.

   Lubbu baraartonni balfa walirra tuulamuun gaara fakkaate kana konkolaataa iskaavaatariin qotuun diriirsuun namoota jalatti awwaalaman baraaruuf wayita yaalan mul'ataniiru.

   Ministirri Muummee biyyattii Maamaadoo Owurii Baah bakka balaan kun itti mudate daawwataniiru.

   Biyya lixa Afrikaa kanatti bara 2017 keessas balaan walfakkaataan mudachuun namoonni 10 du'aniiru.

   

   Madda suuraa, Reuters

8. Sa'aatii 9 duraBalaa konkolaataa Finfinneetti mudateen lubbuun namootaa darbe

   

   Madda suuraa, FBC

   Balaa konkolaataa har'a ganama toora sa'atii lamaatti magaalaa Finfinneetti mudateen haga ammaatti lubbuun namoota ja'aa darbuu Poolisiin magaalattii ibseera.

   Balaan kun kutaa magaalaa Boolee, Aanaa 11 naannawa mana amantii Ortodoksii Qiddist Kidaane Mihret jedhamutti mudate.

   Balaa kanaan kanneen lubbuun darban malee miidhaa salphaa fi cimaan qaqqabuu poolisiin ibseera.

   Konkolaataan balaan irra ga'e kun minibaasii yoo ta'u Koyyee Faccee irraa gara Gooroo imalaa ture.

   Wayita bataskaana kana bira ga'u konkolaataa iskaavaatarii hojii daandiirratti bobba'ee ture irraa meeshaan guddaan konkolaataa minibaasii kanarratti kufuun balaan mudate.

   

   Madda suuraa, FBC

9. Sa'aatii 9 duraAshamaa! Tamsaasa kallattii eegallee jirra

   Tamsaasa kallatti kanaan odeessa biyya keessaa fi alaa gurguddoo argattu.

   Nu hordofaa.

   Odeessaalee har'aa keessaa: Masiriin shaakala waraanaa qilleensarraa jabaa Chaayinaa waliin gaggeessite

   Laguu waggaa jahattin arguu jalqabe, doktoroonni sababasaa baruu hin dandeenye