«Тинч аҳолига қарши даҳшатли жиноят» - Россия зарбаси оқибатида Украинадаги автобусларда ўнлаб одам ҳалок бўлди

Россиянинг фронт яқинидаги Краматорск шаҳрида икки фуқаролик автобусига қанотли бомба билан берган зарбаси оқибатида 33 киши ҳалок бўлди, деб хабар берди қутқарув хизмати вакиллари.

Донецк вилояти раҳбари Вадим Филашкиннинг айтишича, яна 18 киши яраланган. У Россияни йўловчилар бўлган автобусни атайлаб нишонга олганликда айблаб, мақсад имкон қадар кўпроқ тинч аҳолини ўлдириш бўлганини айтди.

Маҳаллий прокуратура тарқатган суратларда ёнғиндан қорайган автобус қолдиқлари, унинг атрофига сочилиб кетган парчалар ва йўлда ётган жабрланганлар кўринган.

Краматорск ва унга қўшни Славянск шаҳарлари Россия Владимир Путин Донбасснинг бутун саноат ҳудуди устидан назорат ўрнатиш мақсади доирасида эгаллашга ҳаракат қилаётган «қалъалар камари» деб аталувчи мудофаа чизиғининг бир қисмидир.

Бироқ пайшанба кунги ҳужум Россиянинг Украина бўйлаб зарбаларини кескин кучайтиргани ва тинч аҳоли орасида қурбонлар сони сезиларли ошган бир пайтга тўғри келди.

БМТ маълумотларига кўра, жорий йил август ойига қадар Украинада Россия ҳужумлари оқибатида ҳалок бўлган тинч аҳоли сони 2025 йил давомида ҳалок бўлган фуқаролар сонидан ҳам ошиб кетган.

Чоршанба куни Киевдан шарқдаги Прилуки шаҳрида беш қаватли турар жой биноси вайрон қилинган ҳужумнинг ўзида 22 киши ҳалок бўлди. Улар орасида беш нафар бола ҳам бор. Болалардан уч нафари атиги бир ёшда эди.

Москва ҳозирча сўнгги ҳужум юзасидан изоҳ бергани йўқ. Аммо қутқарув хизмати вакилларининг маълум қилишича, зарба натижасида йўловчилар бўлган икки автобусда ёнғин чиққан.

Филашкин Донецк вилоятида ҳали ҳам қолаётган аҳолини Украинанинг хавфсизроқ ҳудудларига кўчиб ўтишга чақирди.

Қўшни икки шаҳарда хавфсизлик вазияти кескин ёмонлашгани сабабли, у ердаги барча жамоат транспорти ҳаракатини тўхтатишга қарор қилинган. «Фуқаролар хавфсизлиги биринчи ўринда туриши керак. Биз йўловчилар ва ҳайдовчилар ҳаётини хавф остига қўйишга ҳақли эмасмиз», — деди Филашкин.

Москва Украинага кенг кўламли босқинни бошлашга асос сифатида кўп йиллар давомида асосан рус тилида сўзлашувчи Донбассни «озод қилиш» ва «ҳимоя қилиш» заруратини келтириб келган.

Донбасс Луганск ва Донецк вилоятларидан иборат. Луганск вилоятининг катта қисми Россия назоратида бўлиб турган бир пайтда, Кремль Украина назоратида қолган Донецк вилояти ҳудудининг яна 20 фоизини ҳам эгаллашни мақсад қилмоқда.

Россия шунингдек, Украина пойтахти Киевга ҳам доимий ҳаво ҳужумларини амалга оширмоқда. Шаҳарда кун давомида ҳаво ҳужумидан огоҳлантирувчи сиреналар янграмоқда.

Киев ҳокими Виталий Кличконинг айтишича, пайшанба кунги ҳужумларда уч киши ҳалок бўлган, яна 14 киши яраланган. Ярадорлардан икки нафари оғир аҳволда.

Россия ҳужумлари мактаб ўқувчиларини дарсларни ташлаб, бошпаналарга яширинишга мажбур қилмоқда, тадбиркорлик объектлари фаолияти тўхтамоқда ва жамоат транспорти ишида узилишлар юзага келмоқда.

Россиянинг Украина инфратузилмасига, айниқса энергетика тизимига берган зарбалари электр таъминотида узилишларга олиб келмоқда ва ҳатто сув таъминотига ҳам таъсир кўрсатмоқда.

Украина президенти Володимир Зеленский сўнгги ҳужумдан жабрланганларнинг оила аъзолари ва яқинларига таъзия билдирди. У Украинанинг ҳамкор давлатлари мамлакатни ҳимоя қилиш учун «янги мудофаа пакетлари орқали аниқ амалий чоралар» кўриши кераклигини айтди.

Прилукидаги ҳужумдан олдин Зеленский шу ҳафта Россия катта ҳужумга тайёргарлик кўраётгани ҳақида разведка маълумотлари борлигидан огоҳлантирган эди. Киевда эса бундай огоҳлантиришлардан сўнг оилалар метро бекатларига бошпана излаб йўл олди.

Ҳозирча бундай огоҳлантиришлар украиналиклар учун ҳимоя воситаларидан бири бўлиб қолмоқда.

Дунё бўйлаб ҳаводаги нишонларни уриб тушириш учун мўлжалланган ракеталар танқис. Шу сабабли Украинанинг Россия томонидан учирилаётган баллистик ракеталарни тўхтатиш имконияти чекланган.

Сўнгги ойларда Россия ва Украина бир-бирининг ҳудудларига узоқ масофадан бериладиган зарбаларни кучайтирди. Россия ҳужумларида Украинадаги маълумотлар марказлари ва логистика омборлари ҳам нишонга олинмоқда.

Урушнинг катта қисми давомида Краматорск Украина армияси учун логистика ва таъминот маркази вазифасини бажариб келган. Аммо ҳозир Россия қўшинлари шаҳарнинг шарқий қисмига яқинлашиб бораётгани сабабли Краматорск деярли ҳар куни Россия ҳужумларига дуч келмоқда.

Хусусан, Россия Славянск ва Краматорск шаҳарларига планер, яъни қанотли бомбалардан фойдаланиб зарбалар берилмоқда. Бундай бомбалар махсус қанотчалар билан жиҳозланган бўлиб, оддий бомбалар каби тўғридан-тўғри пастга тушмайди, балки ҳавода сирпаниб, нишон томон ҳаракатланади.

Август ойининг охирида бир куннинг ўзида Краматорскка тўққизтагача планер бомбаси ташланган.

Краматорск шаҳар кенгаши ҳужумни «Россия армияси томонидан тинч аҳолига қарши содир этилган даҳшатли жиноят» деб атади.

«Россияликлар яна бир бор ҳеч қандай ҳарбий нишон бўлмаган жойга зарба берди», — дейилади шаҳар кенгаши баёнотида.