வயநாடு நிலச்சரிவில் குடும்பத்தில் 9 பேரை இழந்த பெண்ணின் வாழ்க்கையில் புதிய அத்தியாயம்
கேரள மாநிலம் வயநாடை சேர்ந்தவர் ஸ்ருதி. 2 ஆண்டுகளுக்கு முன்பு 2024ஆம் ஆண்டு வயநாடு நிலச்சரிவில் தனது குடும்பத்தைச் சேர்ந்த 9 பேரை இழந்ததுடன், பேரிடரில் அவரது வீடும் முற்றிலும் சேதமடைந்தது.
இந்த இழப்பிலிருந்து அவர் மீண்டு வருவதற்குள், சாலை விபத்தில் அவரது வருங்கால கணவராக இருந்த ஜென்சன் உயிரிழந்தார். அந்த விபத்தில் ஸ்ருதியும் காயமடைந்தார்.
அப்போது ஸ்ருதியின் வாழ்க்கைக் கதை கேரளா முழுவதும் பலரது மனங்களையும் உருக்கியது.
தற்போது ஸ்ருதி தற்போது தனது வாழ்க்கையில் புதிய அத்தியாயத்தைத் தொடங்கியுள்ளார். சனிக்கிழமை அன்று கேரளாவின் குருவாயூர் கிருஷ்ணர் கோவிலில் சந்தீப் என்பவருக்கும் ஸ்ருதிக்கும் திருமணம் நடைபெற்றது. இதில் இந்திய கம்யூனிஸ்ட் கட்சியின் (CPI) சட்டமன்ற உறுப்பினரும் முன்னாள் அமைச்சருமான கே. ராஜன், ஸ்ருதியின் உறவினர்கள், நண்பர்கள் என பலரும் கலந்துகொண்டனர்.
இந்தத் தருணம் தனக்கு மகிழ்ச்சியளிப்பதாக ஸ்ருதி தெரிவித்தார்.
"மிகவும் மகிழ்ச்சியாக உள்ளது. எனது வாழ்க்கையில் நடந்த அனைத்தையும் அறிந்த பிறகும் என்னைத் திருமணம் செய்துகொள்ள அவர் முன்வந்தார். நாங்கள் இருவரும் மகிழ்ச்சியாக வாழ வேண்டும் என்று இறைவனிடம் வேண்டிக்கொள்கிறேன்."
வயநாடு மாவட்ட ஆட்சியர் அலுவலகத்தில் பணிபுரியும் சந்தீப், இதனை மகிழ்ச்சியான தருணம் எனவும் புதிய தொடக்கம் எனவும் விவரித்தார்.
- இது, பிபிசிக்காக கலெக்டிவ் நியூஸ்ரூம் வெளியீடு



