ஆந்திர துணை முதல்வர் பவன் கல்யாண் தனது 3வது மனைவியை பிரிகிறார்
ஆந்திரப் பிரதேச துணை முதலமைச்சரும் நடிகருமான பவன் கல்யாணும், அவரது மனைவி அனா கொனிடேலாவும் பரஸ்பர சம்மதத்துடன் பிரிவதாக அறிவித்துள்ளனர். இதனை ஜனசேனா கட்சியின் ஊடகப் பிரிவு தெரிவித்துள்ளது.
கடந்த காலங்களிலும் இவர்களது விவாகரத்து தொடர்பாகப் பல்வேறு செய்திகள் பரவியபோது ஜனசேனா கட்சி அந்தத் தகவல்களை மறுத்திருந்தது. இந்நிலையில், தங்களது 13 ஆண்டுகால திருமண வாழ்க்கையை முடித்துக்கொள்ள முடிவு செய்துள்ளதாக, நவம்பர் 9ஆம் தேதி இருவரும் இணைந்து அறிக்கை வெளியிட்டதாக ஜனசேனா கட்சியின் ஊடகப் பிரிவு தெரிவித்துள்ளது.
அந்த அறிக்கையில், பரஸ்பர முடிவின் அடிப்படையிலேயே இருவரும் பிரிந்து வாழத் தீர்மானித்துள்ளதாகக் குறிப்பிடப்பட்டுள்ளது.
திருமண உறவை முடித்துக்கொண்டாலும், இருவரும் எப்போதும் நல்ல நண்பர்களாகத் தொடர்வோம் என்றும், ஒருவருக்கொருவர் மரியாதை மற்றும் பரஸ்பர புரிதலுடன் இந்த முடிவை எடுத்துள்ளதாகவும் அந்த அறிக்கையில் தெரிவிக்கப்பட்டுள்ளது.
குழந்தைகளின் மகிழ்ச்சியும், அவர்களுக்கான பொறுப்புகளுமே தங்களது முன்னுரிமை என்றும், குழந்தைகளுக்காக எப்போதும் அர்ப்பணிப்புடன் இருப்போம் என்றும் அவர்கள் குறிப்பிட்டுள்ளனர். மேலும், தங்களது தனிப்பட்ட வாழ்க்கைக்கான தனியுரிமையை அனைவரும் மதிக்க வேண்டும் என்றும் கோரிக்கை விடுத்துள்ளனர்.
பவன் கல்யாண் இதுவரை சட்டப்பூர்வமாக மூன்று திருமணங்கள் செய்துள்ளார்.
1997ஆம் ஆண்டு நந்தினியை முதன்முதலாகத் திருமணம் செய்துகொண்டார். பின்னர், 2008ஆம் ஆண்டு இருவரும் விவாகரத்து பெற்றனர். இதையடுத்து, நடிகை ரேணு தேசாயை 2009ஆம் ஆண்டு திருமணம் செய்துகொண்டார். 2012ஆம் ஆண்டு இருவரும் பிரிந்தனர். இவர்களுக்கு இரண்டு குழந்தைகள் உள்ளனர். அதன்பிறகு, ரஷ்யாவைச் சேர்ந்த அனாவை 2013ஆம் ஆண்டு பவன் கல்யாண் திருமணம் செய்துகொண்டார். இந்தத் தம்பதிக்கு இரண்டு குழந்தைகள் உள்ளனர்.
மொத்தமாக பவன் கல்யாணுக்கு நான்கு குழந்தைகள் உள்ளனர்.
விரிவாகக் காணொளியில்
- இது, பிபிசிக்காக கலெக்டிவ் நியூஸ்ரூம் வெளியீடு



