ஆமணக்கு கொட்டைகளை சாப்பிட்ட சிறுமி பலி - 7 குழந்தைகளுக்கு தீவிர சிகிச்சை
விளையாடிக் கொண்டிருந்தபோது ஒரே குடும்பத்தைச் சேர்ந்த எட்டு குழந்தைகள் ஆமணக்குக் கொட்டைகளைச் சாப்பிட்டதால் உடல்நல பாதிப்பு ஏற்பட்டுள்ளது. இதையடுத்து சிறிது நேரத்திலேயே குழந்தைகளின் உடல்நிலை மோசமடைந்தநிலையில் . இந்தச் சம்பவத்தில் உடல்நலம் பாதிக்கப்பட்ட நான்கு வயது சிறுமி ஒருவர் உயிரிழந்தார். மற்றொரு குழந்தையின் நிலை கவலைக்கிடமாக உள்ளது.
மகாராஷ்டிர மாநிலம் நந்துர்பார் மாவட்டத்தில் உள்ள மோடல்காவ் கிராமத்தில் நவம்பர் 11ஆம் தேதி இந்தச் சம்பவம் நடந்துள்ளது.
குழந்தைகளின் பெற்றோர் கூலி வேலைக்காக பந்தர்பூருக்குச் சென்றிருந்தனர். இதனால் குழந்தைகள் பாட்டியின் பராமரிப்பில் இருந்தனர். பாட்டி கால்நடைகளை மேய்ப்பதற்காக வெளியே சென்றிருந்தபோது இந்தச் சம்பவம் நிகழ்ந்துள்ளது.
குழந்தைகள் வாந்தி எடுத்ததுடன், சிலர் மயங்கிய நிலையிலும் காணப்பட்டனர். இதையடுத்து அவர்கள் உடனடியாக தாத்காவ் அரசு மருத்துவமனையில் அனுமதிக்கப்பட்டனர்.
"இன்று மோடல்காவ் கிராமத்தில் இருந்து ஏழு முதல் எட்டு குழந்தைகள் எங்கள் மருத்துவமனைக்குக் கொண்டுவரப்பட்டனர். இந்தக் குழந்தைகள் ஆமணக்குக் கொட்டைகளைச் சாப்பிட்டிருந்தனர். இதையடுத்து அவர்கள் உடனடியாக மருத்துவமனைக்குக் கொண்டுவரப்பட்டனர்.
இதில் நிர்மலா என்ற நான்கு வயது சிறுமி ஏற்கெனவே உயிரிழந்த நிலையில் மருத்துவமனைக்குக் கொண்டுவரப்பட்டார். மற்ற குழந்தைகளுக்கு நீரிழப்பு பாதிப்பு இருந்தது. அவர்களுக்குச் சிகிச்சை அளிக்கப்பட்டு வருகிறது.
ஐந்து வயது மனோஜ் என்ற சிறுவனின் உடல்நிலை கவலைக்கிடமாக இருப்பதால், மேல் சிகிச்சைக்காக நந்துர்பார் மாவட்ட அரசு மருத்துவமனைக்கு அனுப்பி வைக்கப்படுகிறார். மற்ற குழந்தைகளின் உடல்நிலை தற்போது சீராக உள்ளது." என்று மருத்துவ அதிகாரி சந்தீப் வல்வி தெரிவித்தார்.
"பிற்பகல் மூன்று மணியளவில் நான் தண்ணீர் எடுப்பதற்காகச் சென்று கொண்டிருந்தேன். அப்போது குழந்தைகள் சீதாப்பழ மரத்தடியில் அமர்ந்திருந்ததைப் பார்த்தேன். திரும்பி வரும்போது சில குழந்தைகள் கீழே விழுந்து கிடப்பதைக் கண்டேன். இதையடுத்து, குழந்தைகளின் பாட்டியிடம், குழந்தைகள் ஏன் இப்படி காட்டுப் பகுதியில் படுத்துக் கிடக்கின்றன என்று கேட்டேன். அதன் பிறகு ஐந்து முதல் பத்து நிமிடங்களுக்குள் குழந்தைகளின் பாட்டி என்னிடம் வந்தார். குழந்தைகள் ஆமணக்குக் கொட்டைகளைச் சாப்பிட்டுவிட்டு மயங்கிக் கிடப்பதாகக் கூறினார். உடனடியாக வாகனத்துக்கு ஏற்பாடு செய்து குழந்தைகளை மருத்துவமனைக்கு அனுப்பி வைத்தேன்." என்று நேரில் பார்த்த நபர் கூறினார்.
- இது, பிபிசிக்காக கலெக்டிவ் நியூஸ்ரூம் வெளியீடு



