லாஸ் ஏஞ்சலிஸ் மேயர் தேர்தலில் வென்ற தமிழ்ப்பெண் - யார் இந்த நித்யா ராமன்?
அமெரிக்காவின் லாஸ் ஏஞ்சல்ஸ் நகரத்தின் மேயராக கேரளாவில் பிறந்த தமிழ் பெண் நித்யா ராமன் பொறுப்பேற்க உள்ளார்.
யார் இந்த நித்யா ராமன்?
கேரளத்தின் திருச்சூரில் 28 ஜூலை, 1981-இல் ஒரு தமிழ் பிராமணக் குடும்பத்தில் பிறந்தவர் நித்யா ராமன். அவரது தந்தை வெங்கட்ராமன் கேரள மாநிலத்தின் பொதுத்துறை நிறுவனமான கெல்ட்ரான்-இல் பணிபுரிந்தவர். திருச்சூர் பகுதியைச் சேர்ந்த தாயார் சுதா இந்தியன் ஓவர்சீஸ் வங்கியில் பணிபுரிந்தார்.
அவரது உறவினர்கள் தற்போதும் திருவனந்தபுரத்தில் வசித்துவருகிறார்கள்.
லாஸ் ஏஞ்சலிஸ் மேயர் தேர்தலில் நித்யா ராமன் வெற்றி பெற்றதைத் தொடர்ந்து பிபிசி தமிழிடம் பேசிய அவரது உறவினர் வனஜா சங்கர், "நித்யா ராமன் என்னுடைய சகோதரனின் மகள். நாங்கள் சில தலைமுறைகளுக்கு முன்பாக தமிழ்நாட்டிலிருந்து கேரளாவுக்கு குடிபெயர்ந்தோம். ஆறு வயது வரை நித்யா படித்தது, வளர்ந்தது எல்லாம் இங்கே திருவனந்தபுரத்தில் தான்." என்று கூறினார்.
"அவரது அப்பா ஐஐடி பாம்பே-இல் கல்வி பயிலச் சென்றார். பிறகு அமெரிக்காவிற்குச் சென்றார். அவர் சென்று ஒரு வருடம் கழித்து நித்யாவும் அவரது அம்மாவும் அமெரிக்கா சென்றார்கள்" என அவர் கூறினார்.
நித்யா ராமன், நியூயார்க் நகர மேயர் ஸோஹ்ரான் மம்தானியுடன் அடிக்கடி ஒப்பிடப்படுகிறார். இருவருமே ஜனநாயக சோசலிஸ்டுகள். முற்போக்கான கொள்கைகளை முன்வைத்து தேர்தலில் போட்டியிட்டவர்கள்.
இந்திய வம்சாவளியைச் சேர்ந்த நித்யா ராமன், நகர்ப்புறத் திட்டமிடல் நிபுணர். ஹார்வர்டு பல்கலைக்கழகம் மற்றும் மாசசூசெட்ஸ் தொழில்நுட்பக் கழகத்தில் (MIT) படித்தவர்.
நித்யா ராமன் சில நேர்காணல்களில் சென்னையில் தான் ஆற்றிய சமூகப் பணிகள் குறித்து குறிப்பிட்டுள்ளார்.
2015இல் 'சென்னையில் பத்தாண்டுகளில் (2005-2015) வெளியேற்றப்பட்ட (குடிசைப் பகுதி) மக்கள் குறித்து ஓர் ஆய்வுக் கட்டுரை' நித்யா ராமனின் பெயரில் வெளியிடப்பட்டது.
2020-ஆம் ஆண்டு நகர மன்றத் தேர்தலில் முதன்முறையாகப் போட்டியிட்டு வரலாற்றுச் சிறப்புமிக்க வெற்றியைப் பெற்றார். இதன்மூலம் லாஸ் ஏஞ்சல்ஸ் நகர மன்றத்திற்குத் தேர்ந்தெடுக்கப்பட்ட முதல் ஆசிய-அமெரிக்கப் பெண் மற்றும் முதல் தெற்காசியர் என்ற பெருமையைப் பெற்றார்.
2024-ஆம் ஆண்டு மார்ச் மாதம் நடைபெற்ற தேர்தலில் பெரும் வாக்கு வித்தியாசத்தில் மீண்டும் வெற்றி பெற்றார்.
பதவிக்கு வந்தது முதல் வீடற்ற மக்களுக்குக் கூடுதல் அக்கறையுடனும் திறம்படவும் சேவைகளை வழங்குவது, குறைந்த விலையில் வீடுகளைக் கட்டுவது உள்ளிட்ட விவகாரங்களுக்கு முன்னுரிமை அளித்து வருகிறார்.
நித்யா ராமன் தனது கணவர் வாலீத் சந்திரசேகரன் மற்றும் இரட்டைக் குழந்தைகளான கர்ண், காவேரி ஆகியோருடன் லாஸ் ஏஞ்சல்ஸின் சில்வர் லேக் பகுதியில் வசித்து வருகிறார். அவரது கணவர் தொலைக்காட்சித் தொடர்களுக்கான திரைக்கதை எழுத்தாளர்.
- இது, பிபிசிக்காக கலெக்டிவ் நியூஸ்ரூம் வெளியீடு



