அதிபர் பதவிக் காலத்தின் கடைசி 2 ஆண்டுகளில் டிரம்ப் எவ்வாறு செயல்படக் கூடும்?

காணொளிக் குறிப்பு, டிரம்பின் குடியரசுக்கட்சி பின்னடைவு அவரது அதிகாரங்களை கட்டுப்படுத்துகிறதா?
அதிபர் பதவிக் காலத்தின் கடைசி 2 ஆண்டுகளில் டிரம்ப் எவ்வாறு செயல்படக் கூடும்?
பிரசுரிக்கப்பட்டது

அண்மையில் நடந்து முடிந்த அமெரிக்க இடைக்கால தேர்தலில் டிரம்பின் குடியரசு கட்சி கடுமையான பின்னடைவை சந்தித்தது. டிரம்பின் இந்த தோல்வி உள்நாட்டில் அவரது அதிகாரங்களைக் கட்டுப்படுத்துகிறது. அதே நேரம் வெளிநாடுகளைப் பொறுத்தவரை நிலைமை வேறாக இருக்கக்கூடும் என பிபிசியின் சர்வதேச விவகார ஆசிரியர் ஜெரமி போவன் கூறுகிறார். இது தொடர்பாக ஒரு பகுப்பாய்வு கட்டுரையும் அவர் எழுதி உள்ளார். அதில் அவர் குறிப்பிட்டுள்ளவற்றை இந்த காணொளியில் பார்க்கலாம்.

டிரம்ப் எப்போதும் எதையும் மிகைப்படுத்திப் பேசுபவர். அமெரிக்காவின் பெரும்பான்மையான வாக்காளர்கள் அவருக்குப் பெரும் தோல்வியை அளித்திருப்பதில் ஒருவித அரசியல் ஊழ்வினை இருக்கிறது. ஆனால், தனது அரசியல் வாழ்க்கையின் இறுதிக்கட்டத்தை நோக்கி அவர் அமைதியாக சென்றுவிடுவார் என எதிர்பார்க்க முடியாது.

அமெரிக்க நாடாளுமன்றத்தின் இரு அவைகளிலும் பெரும்பான்மையை இழப்பது, உள்நாட்டில் தனது விருப்பப்படி முடிவுகளை எடுக்கவும், அரசியல் காய்நகர்த்தல்களை மேற்கொள்ளவும், குழப்பங்களை ஏற்படுத்தவும் அவருக்கு இருக்கும் அதிகாரத்தைக் கட்டுப்படுத்தும். ஆனால், வெளிநாட்டு விவகாரங்களில் நிலைமை வேறுபடலாம்.

அமெரிக்க அதிபராகவும், அந்நாட்டின் ஆயுதப் படைகளின் தலைமைத் தளபதியாகவும் இருக்கும் டிரம்ப், அமெரிக்காவின் ராணுவ வலிமையைப் பயன்படுத்துவதற்கு இன்னமும் பரந்த அதிகாரங்களைக் கொண்டிருக்கிறார்.

டொனால்ட் டிரம்பின் நடவடிக்கைகளையும், அவர் அடிக்கடி தனது நிலைப்பாட்டை மாற்றிக் கொள்வதையும் கணிப்பது எளிதல்ல. அதிபரான பிறகு, கொள்கை முடிவுகளில் திடீர் மாற்றங்களை செய்வதை ஓர் அரசியல் ஆயுதமாகவே அவர் பயன்படுத்தி வருகிறார். இருப்பினும், அவரிடம் மாறாத சில குணங்கள் இருக்கின்றன.

தோல்வியாளர்கள் என்று அவர் கருதுபவர்களை இழிவாகப் பார்ப்பதும், தன்னை ஒருபோதும் தோல்வியாளராக மற்றவர்கள் கருதிவிடக் கூடாது என்பதில் உறுதியாக இருப்பதும் அதில் ஒன்று.

இடைக்காலத் தேர்தலில் தனக்குக் கிடைத்த படுதோல்வியை மறைக்கும் வகையில், வெளிநாடுகளில் சில அதிரடி நடவடிக்கைகளை மேற்கொள்ள அதிபர் டிரம்ப் விரும்பலாம். தேர்தல் தோல்வியால் தனது செல்வாக்கு குறைந்துவிடவில்லை என்பதை நிரூபிக்கும் வகையில் சில நகர்வுகளை அவர் மேற்கொள்ளலாம்.

இடைக்காலத் தேர்தலுக்கு முந்தைய சில வாரங்களில், அமெரிக்கப் படைகளின் ராணுவ நடவடிக்கைகளும், டிரம்ப் அடிக்கடி வெளியிட்ட கடுமையான எச்சரிக்கைகளும் அதிகரித்தன. இதனால், அமெரிக்கா மீண்டும் இரானுடன் போரில் ஈடுபடத் தயாராகி வருகிறதா என்ற விவாதம் தீவிரமடைந்தது.

தேர்தலுக்கு முந்தைய நாளில், வளைகுடா பகுதியில் உள்ள இரானுக்குச் சொந்தமான ஒரு தீவின் மீது அமெரிக்கா சிறிய அளவிலான வான்வழித் தாக்குதலையும் நடத்தியது.

மருத்துவமனையில் அனுமதிக்கப்படுவதற்கு முன்பு, அமெரிக்க ஜனநாயகக் கட்சியின் செனட்டர் கிறிஸ் மர்பி, இரானுடன் மீண்டும் போர் தொடங்குவதற்கான சாத்தியமான ராணுவ நடவடிக்கைகள் குறித்து நடைபெற்ற ரகசிய ஆலோசனைக் கூட்டத்தில் பங்கேற்றார்.

அந்தத் திட்டங்கள் குறித்த விரிவான தகவல்களை வெளியிடாத அவர், அவற்றை 'பைத்தியக்காரத்தனமானவை' என்று விமர்சித்தார். மேலும், அவை மிக மோசமான அளவில் போர் தீவிரமடைய வழிவகுக்கும் என்றும் எச்சரித்தார்.

இரானின் பொதுமக்கள் பயன்படுத்தும் உள்கட்டமைப்புகளைக் குறிவைத்து அமெரிக்கா தாக்குதல் நடத்தத் திட்டமிட்டுள்ளதாகவும் தகவல்கள் வெளியாகியுள்ளன.

இத்தகைய தாக்குதல்கள் சர்வதேசச் சட்டத்தின்படி போர்க்குற்றமாகக் கருதப்பட வாய்ப்புள்ளது. அதுமட்டுமின்றி, வளைகுடா பகுதியில் உள்ள அமெரிக்காவின் நட்பு நாடுகளின் அதேபோன்ற முக்கிய உள்கட்டமைப்புகளைக் குறிவைத்து இரான் மிகக் கடுமையான பதிலடித் தாக்குதல்களை நடத்தவும் வாய்ப்புள்ளது.

அமெரிக்காவின் அரசியல் நிலவரங்களை இரான் உன்னிப்பாகக் கவனித்து வருகிறது. ஹோர்மூஸ் நீரிணையை முடக்கியதால் ஏற்பட்ட பாதிப்புகள் அமெரிக்காவின் உள்நாட்டுப் பிரச்னையாக மாறியுள்ள நிலையில், இரான் தனது மகிழ்ச்சியை மறைக்கவில்லை.

இதற்கிடையில், தேர்தலுக்குப் பிறகு இஸ்ரேலின் பொறுப்பு பிரதமராகச் செயல்பட்டு வரும் பெஞ்சமின் நெதன்யாகு, இரானில் உள்ள இஸ்லாமிய ஆட்சியை வீழ்த்த வேண்டும் என்ற தனது விருப்பத்தை மீண்டும் வலியுறுத்தியுள்ளார்.

இஸ்ரேலிலும் அமெரிக்காவிலும் வெளிவந்துள்ள செய்திகளின்படி, அவர் டிரம்ப்பை மீண்டும் போருக்குச் செல்லுமாறு வலியுறுத்தி வருகிறார். தன்னுடைய தற்போதைய கூட்டணியுடன் புதிய அரசாங்கத்தை அமைப்பதற்குத் தேவையான இடங்கள் நெதன்யாகுவிடம் இல்லை.

ஆனால், இரானுடனான பெரிய அளவிலான போர் மீண்டும் தொடங்கி நீடித்தால், இஸ்ரேல் மக்கள் நேரடித் தாக்குதல்களுக்கு உள்ளானால், நெதன்யாகுவுக்கு வேறு அரசியல் வாய்ப்புகள் உருவாகலாம்.

அத்தகைய சூழலில், அனைத்துக் கட்சிகளையும் உள்ளடக்கிய 'தேசிய ஒற்றுமை' அரசாங்கத்தை அமைத்து, தனது கணிசமான அரசியல் செல்வாக்கைப் பயன்படுத்தி அதில் ஆதிக்கம் செலுத்தவும் முயற்சிக்கலாம்.

டிரம்ப் தனது கவனத்தைத் திருப்பக்கூடிய மற்றொரு முக்கியமான மோதல், யுக்ரேன் - ரஷ்யா போர். இந்தப் போர், முதலாம் உலகப் போரை விடவும் நீண்ட காலமாகத் தொடர்ந்து வருகிறது.

இடைக்காலத் தேர்தலுக்கு முன்பு, ரஷ்யாவிடம் இருந்து டீசல் வாங்குவதற்காக அந்நாட்டின் மீதான சில பொருளாதாரத் தடைகளை அமெரிக்கா தளர்த்தியது. அமெரிக்க நுகர்வோருக்கு ஏற்பட்டுள்ள பொருளாதார நெருக்கடியைக் குறைக்கும் நோக்கில், ரஷ்யா மீதான தடைகளை மேலும் தளர்த்தவும், அந்த நடவடிக்கையை நீட்டிக்கவும் டிரம்ப் முடிவு செய்யலாம்.

இடைக்காலத் தேர்தல் முடிவுகள், டிரம்ப் மேற்கொண்டு வருவதாக ரஷ்யா கூறும் 'அமைதி முயற்சிகளை' பாதிக்காது என்று நம்புவதாக ரஷ்ய அதிபர் மாளிகையின் செய்தித் தொடர்பாளர் தெரிவித்துள்ளார்.

டிரம்ப் தொடர்ந்து யுக்ரேன் அதிபர் ஸெலென்ஸ்கிக்கு அழுத்தம் கொடுத்து வருகிறார். ரஷ்யாவுடன் ஓர் ஒப்பந்தத்தை எட்டுவதற்காக, யுக்ரேன் தனது சில பகுதிகளை ரஷ்யாவிடம் ஒப்படைக்க வேண்டும் என்று அவர் வலியுறுத்தி வருகிறார். அத்தகைய ஒப்பந்தம், யுக்ரேன் அரசு சரணடைவதற்குச் சமமானதாக இருக்கும்.

தேர்தல் தோல்வியால் ஏற்பட்ட அதிருப்தியில் இருக்கும் டிரம்ப், தான் ஏற்கெனவே பலமுறை வலியுறுத்தியும் ஸெலென்ஸ்கி நிராகரித்துவரும் பிராந்திய விட்டுக்கொடுப்புகளை ஏற்குமாறு அவருக்கு மேலும் அழுத்தம் கொடுக்கலாம்.

அதே நேரம், டிரம்பின் அடுத்தகட்ட நடவடிக்கைகள் குறித்து உள்நாட்டிலும் வெளிநாடுகளிலும் நாம் கணிக்கும் எதுவும் தவறாகலாம் என்பதை மீண்டும் நினைவில் கொள்ள வேண்டும். ஆனால், வெள்ளை மாளிகையில் எஞ்சியிருக்கும் தனது பதவிக்காலத்தை அதிபருக்கான சாய்வு நாற்காலியில் அமர்ந்து அமைதியாகக் கழித்துவிடும் நபர் அவர் அல்ல என்பது மட்டும் உறுதி.

அதிபராக இருந்த காலம் முழுவதும், டிரம்ப் தனது அதிகாரத்தைப் பெரிதும் ரசித்ததுடன், அதை முழுமையாகப் பயன்படுத்தவும் விரும்பினார். அந்தப் போக்கு மாறப்போவதில்லை. அமெரிக்காவை இனி தனது விருப்பப்படி ஆட்டிப்படைக்க முடியாவிட்டாலும், உலகத்தையே தன்னால் ஆட்டிப்படைக்க முடியும் என்பதை நிரூபிக்க அவர் முயற்சிக்க வாய்ப்புள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு