தேனி அருகே பட்டாசுக் கடை விபத்தில் 4 பேர் காயம் - என்ன நடந்தது?
தேனி மாவட்டம் சின்னமனூர் அருகே இயங்கிவந்த பட்டாசு கடையில் நவம்பர் 6ஆம் தேதி இரவு விபத்து ஏற்பட்டது.
காமாட்சிபுரம் ஊராட்சியைச் சேர்ந்த முன்னாள் ஊராட்சி மன்றத் தலைவர் அழகுமுத்து என்பவருக்குச் சொந்தமான இந்த பட்டாசு கடை 10 ஆண்டுகளுக்கும் மேலாக இயங்கி வருகிறது. இந்த நிலையில், இரவில் கடையை மூடும் நேரத்தில், பட்டாசுகள் வைக்கப்பட்டிருந்த இடத்தில் திடீரென்று வெடிச்சத்தம் கேட்டது.
இதனைத் தொடர்ந்து உடனடியாகக் காவல்துறையினருக்கும் தீயணைப்புத் துறையினருக்கும் தகவல் தெரிவிக்கப்பட்டது.
சம்பவ இடத்திற்கு விரைந்து வந்த காவல்துறையினரும் தீயணைப்புத் துறையினரும் இணைந்து தீயை அணைத்தனர்.
இந்த விபத்தில் தீபாவளி விற்பனைக்கு என்று வைக்கப்பட்டிருந்த சுமார் பல லட்சம் மதிப்பிலான பட்டாசுகள், இரண்டு பிக்கப் வாகனங்கள் ஆகியவை எரிந்து சாம்பலாகின.
பட்டாசு கடையில் கடையில் இருந்த ஒரு பெண் உள்பட 4 பேருக்கு காயங்கள் ஏற்பட்டுள்ளது.
இந்த சம்பவம் குறித்து ஓடைப்பட்டி காவல் துறையினர் வழக்குப்பதிவு செய்துவிசாரணை மேற்கொண்டு வருகின்றனர்.
- இது, பிபிசிக்காக கலெக்டிவ் நியூஸ்ரூம் வெளியீடு



