அவெஞ்சர்ஸ் டூம்ஸ்டே படத்திற்கு முன்பாக அவசியம் பார்க்க வேண்டிய மார்வெல் படங்கள்
பட மூலாதாரம், Getty Images
மார்வெல் சினிமாடிக் யுனிவெர்ஸ் அதன் அடுத்தகட்ட கிராஸ்-ஓவர் திரைப்படத்திற்குத் தயாராகி வருகிறது. டிசம்பர் 18ஆம் தேதி வெளியாகவுள்ள அவெஞ்சர்ஸ்: டூம்ஸ்டே படத்திற்கான கவுன்ட்-டவுனை மார்வெல் தொடங்கியுள்ளது.
முன்பு வெளியான அவெஞ்சர்ஸ், வகாண்டா, ஃபென்டாஸ்டிக் ஃபோர், பழைய எக்ஸ்-மென் திரைப்படங்கள் ஆகியவற்றில் வரக்கூடிய கதாபாத்திரங்கள் இந்தப் படத்தில் வருவது சமீபத்தில் வெளியான டூம்ஸ்டே டிரைலர் மூலம் உறுதியாகியுள்ளது.
ஆனால், டூம்ஸ்டே படத்தைப் பார்க்கையில், அதன் கதையோட்டத்தை தெளிவாகப் புரிந்துகொள்ள, அனைத்து எம்.சி.யு படங்களையும் ஒருவர் பார்த்திருக்க வேண்டுமா?
அடிப்படையில், மார்வெல் படங்களையும் பார்த்திருக்க வேண்டிய அவசியமில்லை என்றாலும், டூம்ஸ்டே படத்தின் கதையை தெளிவாகப் புரிந்துகொள்ள, அதற்கு முன்னோட்டமாக மார்வெல் உலகில் இதற்கு முன் வெளியான சில படங்கள் மற்றும் சீரிஸை ரசிகர்கள் பார்த்திருக்க வேண்டுமென டிஸ்னி ப்ளஸ் ஒரு பட்டியலை வெளியிட்டுள்ளது.
அதாவது, அவெஞ்சர்ஸ் அணியிலுள்ள கதாபாத்திரங்களின் தற்போதைய நிலை, மல்டிவெர்ஸ் விதிகள், எக்ஸ்-மென் உலகம், தண்டர்போல்ட்ஸ் படத்தில் அறிமுகம் செய்யப்பட்ட புதிய அவெஞ்சர்ஸ் அணி, ஃபென்டாஸ்டிக் ஃபோர் என டூம்ஸ்டே கதையில் பங்கு வகிக்கப்போகும் முக்கியமான சூப்பர் ஹீரோக்களின் அடிப்படையைப் புரிந்துகொள்ள சில முக்கியமான படங்கள் மற்றும் சீரிஸ்களை பார்த்தால் போதுமானது.
இப்படியாக, அவெஞ்சர்ஸ் டூம்ஸ்டே-வின் கதையை எளிதாகப் புரிந்துகொள்ள பார்க்க வேண்டிய படங்கள் என்னென்ன? இங்கு விரிவாகக் காண்போம்.
பட மூலாதாரம், Getty Images
1. அவெஞ்சர்ஸ்: இன்ஃபினிட்டி வார்
இந்தப் பட்டியலில் முதலில் பார்க்க வேண்டிய படம் அவெஞ்சர்ஸ்: இன்ஃபினிட்டி வார். தானோஸ், இன்ஃபினிட்டி ஸ்டோன்ஸ் அனைத்தையும் கைப்பற்றி, பிரபஞ்சம் முழுக்க வாழும் அனைத்து உயிர்களில் பாதியை அழிக்க முயல்வதும் அந்த முயற்சியைத் தடுக்க கேப்டன் அமெரிக்கா, ஐயர்ன்-மேன், ஸ்பைடர்-மேன், டாக்டர் ஸ்டிரேஞ்ச், பிளேக் பாந்தர், தோர் என ஒரு பெரிய சூப்பர் ஹீரோ பட்டாளமே போராடுவதும்தான் இதன் மையக் கதை.
மார்வெல் உலகில் வரும் கிட்டத்தட்ட அனைத்து முக்கியக் கதாபாத்திரங்களும் ஒரு மிகப்பெரிய ஆபத்துக்கு எதிராக எவ்வாறு ஒன்றிணைகின்றனர் என்பதைப் புரிந்துகொள்ள இந்தப் படத்தைப் பார்க்க வேண்டியது மிகவும் அவசியம். ஏனெனில், டூம்ஸ்டே படமும் இதேபோன்ற மிகப்பெரிய கிராஸ்-ஓவர் நிகழ்வை மையமாகக் கொண்டு உருவாகிறது.
2. அவெஞ்சர்ஸ்: எண்ட்கேம்
இன்ஃபினிட்டி வார் படத்தின் நீட்சியாக வெளியான அவெஞ்சர்ஸ்: எண்ட்கேம், தானோஸ் ஏற்படுத்திய பேரழிவையும் அதில் அழிக்கப்பட்ட பிரபஞ்சத்தின் பாதி உயிர்களையும் சரிசெய்ய அவெஞ்சர்ஸ் எடுக்கும் முயற்சி மட்டுமின்றி, காலப் பயணம், மாற்று காலக்கோடுகள் (alternate ṭimelines) ஆகியவற்றையும் இந்தப் படம் பார்வையாளர்களுக்கு அறிமுகம் செய்கிறது.
இதன் முடிவில் ஐயர்ன்-மேனான டோனி ஸ்டார்க் உயிரிழக்கிறார், கேப்டன் அமெரிக்காவான ஸ்டீவ் ரோஜர்ஸ் கடந்த காலத்திற்குச் சென்று இன்ஃபினிட்டி ஸ்டோன்களை அந்தந்த காலவெளியில் சீரமைத்த பிறகு கடந்த காலத்திலேயே வாழத் தீர்மானிக்கிறார். இந்தப் படத்தில் கிட்டத்தட்ட உண்மையான அவெஞ்சர்ஸ் அணி கலைந்துவிடுகிறது.
ஏனெனில், இதில் கடந்த காலத்திலேயே தங்கிவிட்ட ஸ்டீவ் ரோஜர்ஸ் டூம்ஸ்டேவில் மீண்டும் வருவதை மார்வெல் உறுதி செய்துள்ளது. ஆனால் எப்படி மீண்டும் இந்த காலகட்டத்திற்கு வருகிறார் என்பது இன்னும் முக்கிய மர்மமாக நீடிக்கிறது.
இருப்பினும், டூம்ஸ்டே படத்தின் கதை தொடங்கும்போது பழைய அவெஞ்சர்ஸின் நிலை என்ன, ஏன் புதிய அணிகள் உருவாகியுள்ளன என்பதை அறிந்திருக்க எண்ட்கேமை பார்க்க வேண்டியது அவசியம்.
பட மூலாதாரம், Getty Images
3. லோகி – சீசன் 1
டூம்ஸ்டே பார்ப்பதற்கு முன்பாகப் பார்த்திருக்க வேண்டிய எம்.சி.யு படைப்புகளில் ஹாட்ஸ்டாரில் இருக்கும் லோகி சீரிஸும் ஒன்று.
மக்கள் தங்கள் முடிவுகளில் செய்யும் சில மாற்றங்களால் புதிய காலக்கோடுகள் உருவாகலாம் என்பதையும், அவற்றைக் கட்டுப்படுத்த டைம் வேரியன்ட் அதாரிட்டி என்ற காலக் காவலர்கள் அமைப்பு செயல்படுவதையும் லோகி சீரிஸின் முதல் சீசன் விளக்குகிறது.
இதன் இறுதியில் ஒரேயொரு பாதுகாக்கப்பட்ட, சீரான காலக்கோடு கட்டமைப்பு உடைக்கப்படுகிறது. அதனால் எண்ணற்ற மாற்று காலக்கோடுகள் கட்டுப்பாடின்றி உருவாகத் தொடங்குகின்றன. மார்வெல் உலகில் இப்போது முதன்மைப் பிரச்னையாகக் கருதப்படும் மல்டிவெர்ஸ் பிரச்னை முழுமையாக ஆரம்பமாகும் தொடக்கப் புள்ளி இதுதான்.
4. ஸ்பைடர்-மேன்: நோ வே ஹோம்
எம்.சி.யு-வில் மல்டிவெர்ஸ் என்பது ஒரு கோட்பாடு மட்டுமல்ல, வெவ்வேறு திரைப்பட உலகங்களைச் சேர்ந்த கதாபாத்திரங்கள் உண்மையாகவே சந்திக்க முடியும் என்பதை முதன்முதலில் நிறுவிய படம் ஸ்பைடர்-மேன்: நோ வே ஹோம்.
பீட்டர் பார்க்கரின் ரகசிய அடையாளத்தை உலகம் மறந்துவிட வேண்டும் என்பதற்காக டாக்டர் ஸ்டிரேஞ்ச் ஒரு மந்திரத்தைப் பயன்படுத்துகிறார். பீட்டர் அதில் மீண்டும் மீண்டும் மாற்றங்களைக் கேட்பதால் அந்த மந்திரம் கட்டுப்பாட்டை இழந்து, அதன் விளைவாக பீட்டர்தான் ஸ்பைடர்-மேன் என்பதை அறிந்தவர்கள் வெவ்வேறு பிரபஞ்சங்களில் இருந்து எம்.சி.யு-வின் பிரதான உலகுக்குள் வரத் தொடங்குகின்றனர்.
இதன்மூலம், டோபி மெகுயர், ஆண்ட்ரூ கார்ஃபீல்ட் என டாம் ஹாலண்டுக்கு முன்பு ஸ்பைடர்-மேனாக நடித்த இருவரும் அவர்களது வில்லன்களும் டாம் ஹாலண்ட் உலகுக்கு வந்துவிடுகின்றனர்.
வெவ்வேறு பிரபஞ்சங்களில் ஒரே சூப்பர் ஹீரோவின் மாறுபட்ட வடிவங்களாக வேறு நபர்கள் வாழலாம், மேஜிக் அல்லது அறிவியல் தவறாகப் பயன்படுத்தப்பட்டால் ரியாலிட்டிகளுக்கு இடையிலான எல்லை உடையலாம், வெறு பிரபஞ்சத்தைச் சேர்ந்த கதாபாத்திரங்கள் பிரதான உலகுக்குள் நுழையவும், திரும்பிச் செல்லவும் முடியும் என்ற மூன்று முக்கியமான விஷயங்களை இந்தப் படம் நிறுவுகிறது.
டூம்ஸ்டே படத்தில் பழைய எக்ஸ்-மென் உலகம், ஃபென்டாஸ்டிக் ஃபோர் எனப் பல்வேறு ரியாலிட்டிகள் சந்திக்க வாய்ப்புள்ளது. அந்த வகையான கிராஸ்-ஓவர் எவ்வாறு செயல்படக்கூடும் என்பதற்கான எளிய முன்னுதாரணமாக இந்தப் படம் அமைந்துள்ளது.
பட மூலாதாரம், Getty Images
5. லோகி – சீசன் 2
முதல் சீசனில் உருவான காலக்கோடு பிரச்னையின் விளைவுகளை இரண்டாவது சீசன் விரிவாகக் காட்டுகிறது.
காலக் காவலர்கள் அமைப்பான டி.வி.ஏ எதற்காக உருவாக்கப்பட்டது, பல காலக்கோடுகள் ஒரே நேரத்தில் இயங்குவது எப்படி, அவை அனைத்தையும் அழியாமல் பாதுகாக்க முடியுமா என்பனவற்றுக்கான முக்கியமான விளக்கங்களை லோகி சீசன் 2 வழங்குகிறது.
ஒருவேளை டிரைலர்களை வைத்துக் கணிக்கப்படுவதைப் போல, டிசம்பரில் வெளியாகவுள்ள டூம்ஸ்டே திரைப்படம் மல்டிவெர்ஸின் எதிர்காலத்தை மையமாகக் கொண்டிருந்தால், இதில் லோகி எடுத்த இறுதி முடிவு அதன் கதையில் நேரடியாகவோ அல்லது மறைமுகமாகவோ தாக்கம் செலுத்தக்கூடும்.
லோகி டூம்ஸ்டேவில் வருவது உறுதியாகியுள்ள நிலையில், அவர் உருவாக்கிய புதிய மல்டிவெர்ஸ் நிலைமையைப் புரிந்துகொள்ள இந்த சீரிஸை பார்க்க வேண்டியது அவசியம்.
6. டாக்டர் ஸ்டிரேஞ்ச் இன் தி மல்டிவெர்ஸ் ஆஃப் மேட்னெஸ்
மல்டிவெர்ஸ் எவ்வளவு ஆபத்தானதாக மாறக்கூடும் என்பதை இந்தப் படம் விளக்குகிறது. ஒரு பிரபஞ்சத்தைச் சேர்ந்த ஒருவர் மற்றொரு பிரபஞ்சத்தின் நிகழ்வுகளில் தொடர்ந்து தலையிடும்போது, இரண்டு எதார்த்தங்களும் ஒன்றோடொன்று மோதும் அபாயம் உருவாகலாம். இது எம்.சி.யு-வில் இன்கர்ஷன் (Incursion) என்று அழைக்கப்படுகிறது.
இன்கர்ஷன் ஏற்பட்டால், அதற்குக் காரணமாக அமைந்த ஒன்று அல்லது இரண்டு எதார்த்தங்களுமே அழியக்கூடும். காமிக்ஸில் டாக்டர் டூம் மற்றும் சீக்ரெட் வார்ஸ் கதைகளுடன் இந்த இன்கர்ஷன் நிகழ்வு முக்கியமான தொடர்பைக் கொண்டுள்ளது. ஆகையால் டூம்ஸ்டே படத்திலும் இது மையப் பிரச்னையாக மாற வாய்ப்புள்ளது. ஆனால், படத்தின் கதை வெளியாகாத நிலையில், இதை வலுவான சாத்தியமாகக் கருதலாம். அந்தச் சாத்தியங்களைப் புரிந்துகொள்ள இந்தப் படத்தைப் பார்க்க வேண்டும்.
பட மூலாதாரம், Getty Images
7. தி மார்வெல்ஸ்
தி மார்வெல்ஸ் திரைப்படத்தின் முக்கியத்துவம் அதன் பிரதான கதையைவிட, படத்தின் இறுதியில் வரும் போஸ்ட்-கிரெடிட் காட்சிகளில் அதிகமாக இருக்கிறது. அதில், மோனிகா ராம்போ மற்றொரு ரியாலிட்டிக்கு சென்று, அங்கு அந்த ரியாலிட்டியை சேர்ந்த தனது தாய் மரியா ராம்போ-வின் மாற்று வடிவத்தையும் பீஸ்ட் என்ற எக்ஸ்-மென் கதாபாத்திரத்தையும் சந்திக்கிறார்.
இதன்மூலம் எம்.சி.யு-வின் பிரதான ரியாலிட்டிக்கும் எக்ஸ்-மென்னுடன் தொடர்புடைய மற்றொரு ரியாலிட்டிக்கும் இடையே பாதை உருவாகி இருப்பது தெரிய வருகிறது.
டூம்ஸ்டே படத்தில் பழைய எக்ஸ்-மென் கதாபாத்திரங்கள் மீண்டும் திரும்புவதால், இந்தக் காட்சி அடுத்த பெரிய மல்டிவெர்ஸ் மோதலுக்கான முன்னோட்டமாக இருக்க வாய்ப்புள்ளது.
8. எக்ஸ்-மென் & எக்ஸ்2
டூம்ஸ்டே படத்தில் பாட்ரிக் ஸ்டூவர்ட், இயன் மெக்கெல்லன், ஜேம்ஸ் மார்ஸ்டென், ஆலன் கம்மிங், ரெபெக்கா ரோம்ஜின் போன்ற பழைய எக்ஸ்-மென் படத்தின் நடிகர்கள் இடம்பெறுகின்றனர்.
ஆகையால், அவர்களின் பாத்திரங்களைப் புரிந்த்கொள்ள 2000இல் வெளியான எக்ஸ்-மென், 2003இல் வெளியான எக்ஸ்2: எக்ஸ்-மென் யுனைடட் ஆகிய படங்களைப் பார்ப்பது உதவும்.
ஏனெனில், பேராசிரியர் சார்ல்ஸ் சேவியர், மேக்னட்டோ, சைக்ளாப்ஸ், மிஸ்டிக், நைட்கிராலர் ஆகியோர் யார், அவர்களின் முக்கியத்துவம் என்பனவற்றை இந்த இரண்டு படங்களைப் பார்ப்பதன் மூலம் அறிந்துகொள்ள முடியும்.
பட மூலாதாரம், Getty Images
9. எக்ஸ்-மென்: டேஸ் ஆஃப் ஃப்யூச்சர் பாஸ்ட்
பழைய எக்ஸ்-மென் படங்களில் டூம்ஸ்டே-வுக்கு மிகவும் பொருத்தமான ஒன்றாக எக்ஸ்-மென்: டேஸ் ஆஃப் ஃப்யூச்சர் பாஸ்ட் இருக்கிறது. அழியப் போகும் எதிர்காலத்தை மாற்றுவதற்காக வுல்வரினின் உணர்வு கடந்த காலத்திற்கு அனுப்பப்படுகிறது. கடந்த காலத்தில் செய்யப்படும் மாற்றங்கள் ஒரு காலக்கோட்டின் எதிர்காலத்தை எப்படி மாற்றுகிறது என்பதை இந்தப் படம் ஆராய்கிறது.
எக்ஸ்-மென் படங்களுக்கு இடையிலேயே பல காலக்கோடுகள் மற்றும் முரண்பட்ட வரலாறுகள் இருப்பதால், அவற்றை எம்.சி.யு மல்டிவெர்ஸ் கோட்பாட்டிற்குள் இணைத்துப் பார்க்கத் தேவையான அடிப்படைப் புரிதலை இந்தப் படம் வழங்கும்.
10. டெட்பூல் & வுல்வரின்
ஃபாக்ஸ் நிறுவனத்தின் உருவான பழைய மார்வெல் உலகத்திற்கும் தற்போதைய எம்.சி.யு-வுக்கும் இடையிலான பாலமாக டெட்பூல் & வுல்வரின் திகழ்கிறது.
இதில், காலக் காவலர்கள் அமைப்பு, அழிந்து கொண்டிருக்கும் காலக்கோடுகள், ஆங்கர் பீயிங் (anchor being) – அதாவது ஒரு குறிப்பிட்ட காலவெளியை தக்கவைக்கத் தேவையான நபர் என்ற கருத்து மற்றும் பல பழைய மார்வெல் திரைப்படங்களின் கதாபாத்திரங்கள் இடம்பெறுகின்றன.
எளிதாகக் கூற வேண்டுமெனில், ஒரு காலக்கோட்டுக்குத் தேவைப்படும் முக்கியமான நபரை இழந்தால் அந்த ரியாலிட்டி படிப்படியாக அழியக்கூடும் என்ற புதிய கருத்தை இந்தப் படம் முன்வைக்கிறது. ஆனால், இந்த விதி அனைத்து பிரபஞ்சங்களுக்கும் பொருந்துமா என்பது இன்னும் தெளிவுபடுத்தப்படவில்லை.
ஆனால், டூம்ஸ்டே-வில் எக்ஸ்-மென் மற்றும் பிற பழைய மார்வெல் உலகங்கள் முக்கியத்துவம் பெறுவதால், இந்தப் படத்தைப் பார்க்க வேண்டியவற்றின் பட்டியலில் இருந்து தவிர்க்க முடியாது.
பட மூலாதாரம், Getty Images
11. பிளாக் பேந்தர்: வகாண்டா ஃபாரெவர்
டிச்சாலா-வின் மரணத்திற்குப் பிறகு வகாண்டா எத்தகைய மாற்றத்தை எதிர்கொண்டது என்பதை இந்தப் படம் காட்டுகிறது.
இதில், டிச்சாலா-வின் சகோதரியான ஷூரி புதிய பிளாக் பேந்தராக அறிமுகமாகிறார். இம்பாக்கு முக்கியமான தலைவராக உருவெடுக்கிறார். அதேநேரம் நமோர் மற்றும் அவரது நீருக்கடியில் வாழும் மக்கள் அறிமுகமாகின்றனர்.
ஷூரி, இமாக்கு, நமோர் என மூவருமே டூம்ஸ்டே-வில் வருகின்றனர் என்பதால் வகாண்டா அணியின் இப்போதைய அரசியல் மற்றும் உணர்வுபூர்மான நிலையைப் புரிந்துகொள்ள வகாண்டா ஃபாரெவரை பார்க்க வேண்டும்.
12. கேப்டன் அமெரிக்கா: பிரேவ் நியூ வேர்ல்ட்
ஸ்டீவ் ரோஜர்ஸ் கடந்த காலத்திற்குச் சென்று ஓய்வு பெற்றுவிட்ட நிலையில், சாம் வில்சன் முழுமையாக கேப்டன் அமெரிக்கா பொறுப்பை ஏற்றுக் கொள்வதை இந்தப் படம் காட்டுகிறது.
உலகளாவிய அரசியல் பிரச்னைகள், அரசாங்கங்களின் அதிகாரப் போட்டி, சூப்பர் பவர் கொண்ட மனிதர்கள் தொடர்பான அச்சங்கள் ஆகியவை இதில் முக்கியத்துவம் பெறுகின்றன.
அதோடு, ஒரு புதிய அவெஞ்சர்ஸ் அணியை உருவாக்க வேண்டிய தேவை இருப்பதையும் இது சுட்டிக்காட்டுகிறது. டூம்ஸ்டே போன்ற உலகளாவிய அச்சுறுத்தலின்போது அவெஞ்சர்ஸ் அணியை வழிநடத்தப் போவது யார் என்ற கேள்விக்கு சாம்சன் வில்சன் முக்கியமான பதிலாக இருக்கலாம் என்பதால் இது முக்கியத்துவம் பெறுகிறது.
பட மூலாதாரம், Getty Images
13. தண்டர்போல்ட்ஸ் – தி நியூ அவெஞ்சர்ஸ்
யெலெனா பெலோவா, பக்கி பார்ன்ஸ், ஜான் வாக்கர், பாப் ஆகியோர் இந்தப் படத்தில் ஓர் அணியாக ஒன்றிணைகின்றனர். இவர்களில் யாருமே வழக்கமான சூப்பர் ஹீரோக்கள் அல்ல. தங்களுடைய கடந்தகால தவறுகள், மனநலப் பிரச்னைகள், குற்ற உணர்வுகளுடன் போராடிக் கொண்டிருக்கும் இயல்பான மனிதர்கள்.
படத்தின் முடிவில் இந்த அணி தி நியூ அவெஞ்சர்ஸ் எனப் பொது மக்களுக்கு அறிமுகப்படுத்தப்படுகிறது. ஆனால் சாம் வில்சன் தலைமையிலான அவெஞ்சர்ஸ் அணிக்கும் இவர்களுக்கும் இடையே பெயர் மற்றும் அதிகாரம் தொடர்பான முரண்பாடு உருவாகும் வாய்ப்பு உள்ளது.
டூம்ஸ்டே படத்தில் பக்கி, யெலெனா, ஜான் வாக்கர், பாப் ஆகியோர் இடம்பெறுவதால் தண்டர்போல்ட்ஸ் மிக முக்கியமான நேரடி முன்னோட்டப் படமாகிறது.
14. தி ஃபென்டாஸ்டிக் ஃபோர்: ஃபர்ஸ்ட் ஸ்டெப்ஸ்
இந்தப் பட்டியலில் கடைசியாகவும், ஒருவேளை மிக முக்கியமானதாகவும் பார்க்கப்பட வேண்டிய படம் தி ஃபென்டாஸ்டிக் ஃபோர்: ஃபர்ஸ்ட் ஸ்டெப்ஸ்.
ரீட் ரிச்சர்ட்ஸ், சூ ஸ்டார்ம், ஜானி ஸ்டார்ம், பென் கிரிம் ஆகிய ஃபென்டாஸ்டிக் ஃபோர் உறுப்பினர்கள், எம்.சி.யு-வின் பிரதான உலகில் இருந்து வேறுபட்ட பழமைத்தன்மையைக் கொண்ட எதிர்காலத்துவ பிரபஞ்சத்தில் வாழ்கின்றனர்.
டூம்ஸ்டே படத்தில் ஃபென்டாஸ்டிக் ஃபோர் மற்றும் வகாண்டா கதாபாத்திரங்கள் சந்திப்பதை மார்வெல் உறுதி செய்துள்ளது. எனவே அவர்கள் தங்கள் பிரபஞ்சத்தில் இருந்து எம்.சி.யு-வின் பிரதான ரியாலிட்டிக்கு எப்படி வருகின்றனர் என்பது டூம்ஸ்டே படத்தின் முக்கியமான மல்டிவெர்ஸ் கேள்வியாக இருக்க வாய்ப்புள்ளது.
அது மட்டுமின்றி, காமிக்ஸ்களில் டாக்டர் டூம், ஃபென்டாஸ்டிக் ஃபோர் அணியின் முக்கியமான எதிரியாக காட்டப்படுகிறார். குறிப்பாக, ரீட் ரிச்சர்ட்ஸ், விக்டர் வான் டூம் இடையிலான அறிவுப் போட்டி, ஈகோ, தனிப்பட்ட முரண்பாடுகள் மார்வெல் காமிக்ஸில் மிகவும் முக்கியமானது.
பட மூலாதாரம், Getty Images
டாக்டர் டூம்-ஐ புரிந்துகொள்ள ஐயர்ன் மேன் படங்களைப் பார்க்க வேண்டுமா?
பல ஆண்டுகளாக ஐயர்ன் மேனாக உலகம் முழுக்கப் புகழ்பெற்ற ராபர்ட் டௌனி ஜூனியர் டாக்டர் டூம் கதாபாத்திரம் வாயிலாக மீண்டும் மார்வெல் உலகுக்குள் நுழைகிறார். எனவே, டோனி ஸ்டார்க், விக்டர் வான் டூம் இடையே தொடர்பு இருக்கலாம் என்று கோட்பாடுகள் முன்வைக்கப்படுகின்றன.
ஆனால், மார்வெல் அதிகாரபூர்வமாக அப்படியான தொடர்பு இருப்பதாக எதுவும் தெரிவிக்கவில்லை. எனவே, டாக்டர் டூமை புரிந்துகொள்ள ஐயர்ன் மேன் படங்களைப் பார்க்க வேண்டிய அவசியமில்லை. அதேநேரம், டூம் டோனி ஸ்டார்க்கின் தோற்றத்தைக் கொண்டிருப்பது அவெஞ்சர்ஸ் அணியினரிடம் உணர்வுபூர்வமான தாக்கத்தை ஏற்படுத்துமா என்ற கேள்வி மிகப்பெரிய மர்மங்களில் ஒன்றாக விளங்குகிறது.
அவெஞ்சர்ஸ்: டூம்ஸ்டே திரைப்படம் அவெஞ்சர்ஸ் மட்டுமே இடம்பெறும் படைப்பாக இருக்கப் போவதில்லை. இதுவரையிலான தகவல்களின்படி, ஸ்டீவ் ரோஜர்ஸ், தோர் உள்ளிட்ட பழைய அவெஞ்சர்ஸ், சாம் வில்சன் தலைமுறையைச் சேர்ந்த புதிய எம்.சி.யு ஹீரோக்கள், நியூ அவெஞ்சர்ஸ் அணியாக முன்னிறுத்தப்பட்ட தண்டர்போல்ட்ஸ், வகாண்டா மற்றும் நமோரின் உலகம், ஃபென்டாஸ்டிக் ஃபோர், எக்ஸ்-மென் என ஆறு வெவ்வேறு கதைத்தடங்கள் இதில் ஒன்றாகச் சந்திக்கவுள்ளன.
இந்த உலகங்கள் அனைத்தையும் ஒன்றாக இணைக்கும் பொதுவான பிரச்னையாக மல்டிவெர்ஸ் அமைந்திருக்க வாய்ப்புள்ளது. அதில் டாக்டர் டூம் எவ்வாறு பொருந்துகிறார், அவரது முக்கியத்துவம், தீவிரம் எப்படி இருக்கப் போகிறது என்பது திரைப்படம் வெளியாகும்போதே தெரிய வரும்.
- இது, பிபிசிக்காக கலெக்டிவ் நியூஸ்ரூம் வெளியீடு
