பல் துலக்கிய போது தவறுதலாக முழு பிரஷ்ஷையும் விழுங்கிய நபர் - என்ன ஆனது?

ராஜேந்திர மாலுசரே பல் துலக்கும்போது தவறுதலாக பிரஷ்ஷை விழுங்கிவிட்டார். (பிரஷ் படம் சித்தரிக்கப்பட்டது)
படக்குறிப்பு, ராஜேந்திர மாலுசரே பல் துலக்கும்போது தவறுதலாக பிரஷ்ஷை விழுங்கிவிட்டார். (பிரஷ் படம் சித்தரிக்கப்பட்டது)
    • எழுதியவர், ஓங்கார் கரம்பேள்கர்
    • பதவி, பிபிசி மராத்தி செய்தியாளர்
  • பிரசுரிக்கப்பட்டது
  • வாசிக்கும் நேரம்: 4 நிமிடங்கள்

பல் துலக்கும்போது கையிலிருந்து நழுவிய டூத் பிரஷ் நேராக வயிற்றுக்குள் சென்றுவிட்டது என்றால் கேட்பதற்கே விசித்திரமாக இருக்கலாம். ஆனால், உண்மையிலேயே அப்படி ஒரு சம்பவம் நடந்துள்ளது.

மகாராஷ்டிர மாநிலம் ராய்கட் மாவட்டம் பென் வட்டத்தில் உள்ள ஷிர்வாலி கிராமத்தைச் சேர்ந்த ராஜேந்திர மாலுசரேவுக்கு இப்படி ஒரு அரிய சம்பவம் நடந்தது. இதனால் அவர் மருத்துவமனையில் அனுமதிக்கப்பட வேண்டியிருந்தது.

50 வயதான ராஜேந்திர மாலுசரே ஓர் ஆட்டோ ஓட்டுநர்.

முதற்கட்டப் பரிசோதனையில் டூத் பிரஷ் தென்படவில்லை. ஆனால், எண்டோஸ்கோப்பி பரிசோதனையில் அது வயிற்றுக்குள் சிக்கியிருப்பது உறுதியானது. 19 சென்டிமீட்டர் நீளமுள்ள அந்த டூத் பிரஷ், அறுவை சிகிச்சை எதுவும் செய்யாமல் எண்டோஸ்கோப்பி மூலம் வெளியே எடுக்கப்பட்டது. சிகிச்சை முடிந்த சில மணி நேரங்களிலேயே அவர் வீடு திரும்பினார்.

எண்டோஸ்கோப்பி என்பது வாய் வழியாகக் கேமரா பொருத்தப்பட்ட மெல்லிய, நெகிழ்வான குழாயை உடலுக்குள் செலுத்தி, உணவுக்குழாய், வயிறு மற்றும் செரிமானப் பாதையின் உட்பகுதியைப் பரிசோதிக்கும் முறையாகும். இந்த முறையில், செரிமானப் பாதையில் சிக்கியுள்ள பொருள்களையும் அறுவை சிகிச்சையின்றி வெளியே எடுக்க முடியும்.

சித்தரிப்புப் படம்
படக்குறிப்பு, சித்தரிப்புப் படம்

பென் பகுதியைச் சேர்ந்தவரும் மாற்றுத்திறனாளியுமான ராஜேந்திர மாலுசரே, வழக்கம்போல அன்று காலையில் பல் துலக்கிக் கொண்டிருந்தார். அப்போது தவறுதலாக டூத் பிரஷ் தொண்டை வழியாக உள்ளே சென்றுவிட்டது. இதையடுத்து அவர் அருகிலிருந்த மருத்துவரை அணுகினார். எக்ஸ்-ரே பரிசோதனையில் டூத் பிரஷ் தென்படவில்லை. எனவே, மேலதிகப் பரிசோதனைக்காக நவி மும்பையில் உள்ள மருத்துவமனைக்கு அவர் அனுப்பிவைக்கப்பட்டார்.

அங்கு மேற்கொள்ளப்பட்ட எண்டோஸ்கோப்பி பரிசோதனையில் முழு டூத் பிரஷ்ஷும் வயிற்றுக்குள் சிக்கியிருப்பது தெரியவந்தது. மெடிகவர் மருத்துவமனையின் இரைப்பைக் குடலியல் நிபுணர், கல்லீரல் நிபுணர் மற்றும் எண்டோஸ்கோப்பி சிகிச்சை நிபுணரான மருத்துவர் ராவ்சாகேப் ரத்தோட் தலைமையிலான குழுவினர் இந்தச் சவாலான சிகிச்சையை வெற்றிகரமாகச் செய்தனர்.

19 சென்டிமீட்டர் நீளமுள்ள டூத் பிரஷ்

டூத் பிரஷ்ஷை விழுங்கிய சுமார் 3 முதல் 4 மணி நேரத்துக்குப் பிறகு மாலுசரேவுக்கு வயிற்றில் லேசான வலி ஏற்படத் தொடங்கியது. எண்டோஸ்கோப்பி பரிசோதனையில் 19 சென்டிமீட்டர் நீளமுள்ள டூத் பிரஷ் வயிற்றில் இருப்பது உறுதியானது.

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

டூத் பிரஷ் போன்ற நீளமான, கடினமான பொருள் செரிமானப் பாதை வழியாக இயற்கையாக வெளியேறுவதற்கான வாய்ப்பு மிகக் குறைவு. இத்தகைய பொருள்கள் உணவுக்குழாய் அல்லது செரிமானப் பாதையின் குறுகலான பகுதிகளில் சிக்கிக்கொள்ளலாம். இதனால் உட்புறக் காயங்கள், செரிமானப் பாதையில் அடைப்பு அல்லது குடலில் துளை ஏற்படுவது போன்ற தீவிரச் சிக்கல்கள் உண்டாகலாம் என்று மருத்துவர்கள் தெரிவித்தனர்.

இந்த நோயாளிக்கு மேற்கொள்ளப்பட்ட எண்டோஸ்கோப்பி சிகிச்சை சுமார் 30 நிமிடங்கள் நீடித்தது. டூத் பிரஷ் வயிற்றுக்குள் கிடைமட்டமாகச் சிக்கியிருந்ததால், அதைப் பிடித்து உணவுக்குழாயின் வளைவுகள் வழியாகப் பாதுகாப்பாக வெளியே கொண்டுவருவது பெரும் சவாலாக இருந்தது. சிகிச்சையின்போது டூத் பிரஷ், வயிறும் உணவுக்குழாயும் இணையும் பகுதியில் சிக்கிக்கொண்டது. அதன் பிறகு தொண்டையின் குறுகலான பகுதி வழியாக அதை வெளியே எடுக்கும்போதும் மிகுந்த கவனம் தேவைப்பட்டது. பலமுறை முயற்சி செய்த பிறகு, அறுவை சிகிச்சை எதுவும் செய்யாமல் முழு டூத் பிரஷ்ஷையும் மருத்துவர்களால் வாய் வழியாக வெளியே எடுக்க முடிந்தது.

டூத் பிரஷ்ஷை வெளியே எடுத்த பிறகு, மீண்டும் எண்டோஸ்கோப்பி செய்து உணவுக்குழாயிலோ செரிமானப் பாதையிலோ காயம் ஏற்படவில்லை என்பதை உறுதிப்படுத்தினர். சிறிது நேரம் கண்காணிப்பில் வைத்திருந்த பிறகு, நோயாளியின் உடல்நிலை சீராக இருப்பது தெரியவந்தது. இதையடுத்து அன்றே அவர் வீடு திரும்ப அனுமதிக்கப்பட்டார்.

மீனின் முள்ளை விழுங்குவது, சிறு குழந்தைகள் பொருள்களை விழுங்குவது, நாணயங்கள் அல்லது பேட்டரிகள் வயிற்றுக்குள் செல்வது போன்ற செய்திகள் அல்லது சம்பவங்களை நாம் படித்தும் கேட்டும் இருக்கிறோம். ஆனால், ஒருவர் முழு டூத் பிரஷ்ஷையே விழுங்கியிருப்பது அரிதான சம்பவமாக இருக்கலாம்.

ஆனால், மாலுசரேவுக்கு முதலில் எக்ஸ்-ரே பரிசோதனை செய்தபோதும் அவர் விழுங்கியிருந்த டூத் பிரஷ் எக்ஸ்ரேவில் ஏன் தெரியவில்லை என்று மருத்துவர் ராவ்சாகேப் ரத்தோடிடம் நாங்கள் கேட்டோம்.

"பிளாஸ்டிக் பொருள்கள் பொதுவாக எக்ஸ்-ரே படங்களில் தெளிவாகத் தெரிவதில்லை. எலும்புகள், உலோகம் போன்ற பொருள்கள்தான் எக்ஸ்-ரேவில் பெரும்பாலும் தெளிவாகத் தெரியும். பிளாஸ்டிக் போன்ற பொருள்கள் பல நேரங்களில் எக்ஸ்-ரேவில் தெரிவதில்லை. எனவே, எக்ஸ்-ரே முடிவுகளை மட்டும் வைத்து ஒரு பொருள் உடலுக்குள் இல்லை என்று முடிவு செய்துவிட முடியாது. நோயாளி ஒரு பொருளை விழுங்கியதாக உறுதியாகக் கூறினாலோ, அதைத் தொடர்ந்து அவருக்குத் தொந்தரவுகள் ஏற்பட்டாலோ மேலதிகப் பரிசோதனைகள் அவசியம். இந்த நோயாளியின் விஷயத்தில் எண்டோஸ்கோப்பி செய்த பிறகுதான் முழு டூத் பிரஷ்ஷும் வயிற்றுக்குள் இருப்பது கண்டறியப்பட்டது. எனவே, இதுபோன்ற சம்பவங்களில் நோயாளியின் மருத்துவ வரலாறும் அறிகுறிகளும் முக்கியத்துவம் பெறுகின்றன" என்று அவர் தெரிவித்தார்.

எண்டோஸ்கோப்பி ஏன்?

இந்த நோயாளிக்கு எண்டோஸ்கோப்பி மூலம் சிகிச்சை அளிக்க முடிவு செய்தது ஏன் என்று கேட்டபோது, மருத்துவர் ரத்தோட், "நோயாளியைப் பரிசோதித்த பிறகு டூத் பிரஷ் வயிற்றில் இருப்பது தெளிவானது. இதையடுத்து, எண்டோஸ்கோப்பி மூலம் அதை வெளியே எடுக்க முடிவு செய்தோம். எண்டோஸ்கோப்பியில் வாய் வழியாக ஒரு நெகிழ்வான குழாய் உடலுக்குள் செலுத்தப்படும். அதன் முனையில் கேமரா இருப்பதால் செரிமானப் பாதையின் உட்பகுதியைப் பார்க்க முடியும்."

எண்டோஸ்கோப்பி சிகிச்சையை சித்தரிக்கும் படம்
படக்குறிப்பு, எண்டோஸ்கோப்பி சிகிச்சையை சித்தரிக்கும் படம்

"இந்தச் செயல்முறையில் சிறப்புக் கருவிகளின் உதவியுடன் சிக்கியுள்ள பொருளைப் பிடித்து வெளியே எடுக்க முடியும். இந்தச் சம்பவத்தில் எண்டோஸ்கோப்பின் முனையில் பிரத்யேக கருவி ஒன்றைப் பொருத்தி, டூத் பிரஷ்ஷின் ஒரு முனையைப் பிடித்தோம். அதைச் சரியான முறையில் வெளியே கொண்டுவர முயற்சிகள் மேற்கொள்ளப்பட்டன. நோயாளியின் உடல்நிலையையும் பொருள் சிக்கியிருந்த இடத்தையும் கருத்தில் கொண்டு எண்டோஸ்கோப்பி மூலம் சிகிச்சை அளிக்க முடிந்ததால் அறுவை சிகிச்சையைத் தவிர்க்க முடிந்தது. எனினும், இத்தகைய முடிவை எடுப்பதற்கு முன்பு பொருளின் நிலை, செரிமானப் பாதையின் நிலை, நோயாளியின் ஒட்டுமொத்த உடல்நிலை ஆகியவற்றைப் பரிசோதிப்பது அவசியம்" என அவர் மேலும் கூறினார்.

சிகிச்சையில் பிரஷ் சிக்கியபோது...

டூத் பிரஷ்ஷை வாய் வழியாக வெளியே எடுக்க முயன்றபோது மருத்துவக் குழுவினர் பல தடைகளைச் சந்தித்தனர். எண்டோஸ்கோப்பின் முனையில் சிறப்புக் கவசத்தைப் பொருத்தி டூத் பிரஷ்ஷின் ஒரு முனையைப் பிடித்தனர். ஆனால், வயிறும் உணவுக்குழாயும் இணையும் இடத்தில் அது சிக்கிக்கொண்டது.

நோயாளியின் உடல் இருக்கும் நிலையை மாற்றியும், மீண்டும் மீண்டும் முயற்சி செய்தும் அதை நகர்த்தினர். அதன் பிறகு தொண்டையின் குறுகலான பகுதியிலும் அது சிக்கியது. டூத் பிரஷ் வளையாத தன்மை கொண்டது என்பதால், இந்தச் செயல்முறையை மிகுந்த கவனத்துடன் மேற்கொள்ள வேண்டியிருந்தது.

சித்தரிப்புப் படம்
படக்குறிப்பு, சித்தரிப்புப் படம்

"டூத் பிரஷ்ஷை வெளியே எடுத்த பிறகு மீண்டும் எண்டோஸ்கோப்பி செய்யப்பட்டது. இந்தப் பரிசோதனையில் உணவுக்குழாயின் மேல் மற்றும் கீழ்ப் பகுதிகள் ஆய்வு செய்யப்பட்டன. டூத் பிரஷ்ஷை வெளியே எடுக்கும்போது அதன் கடினமான தன்மையால் உட்புறச் சவ்வில் காயம் ஏற்பட்டுள்ளதா, ரத்தப்போக்கு ஏற்பட்டுள்ளதா அல்லது வேறு ஏதேனும் பாதிப்பு உள்ளதா என்று பரிசோதித்தோம். பரிசோதனையில் தீவிரமான காயம் எதுவும் தென்படவில்லை. அதன் பிறகு நோயாளி சிறிது நேரம் கண்காணிப்பில் வைக்கப்பட்டார். உடல்நிலை சீராக இருப்பது உறுதி செய்யப்பட்டதும், மூன்று முதல் நான்கு மணி நேரத்துக்குள்ளேயே அவர் வீடு திரும்ப அனுமதிக்கப்பட்டார்," என மருத்துவர் ரத்தோட் கூறினார்.

இதுகுறித்து, பிபிசி மராத்தி ராஜேந்திர மாலுசரேவைத் தொடர்புகொண்டு, அன்று நடந்த சம்பவம் பற்றி கேட்டது.

"பல் துலக்கிய பிறகு பிரஷ்ஷைக் கொண்டு நாக்கைச் சுத்தம் செய்வது எனக்குப் பழக்கம். அப்படிச் செய்யும்போது பிரஷ் கையிலிருந்து நழுவி உள்ளே சென்றுவிட்டது. அப்போது தொண்டையிலும் காயம் ஏற்பட்டது. அதனால் அது தொண்டையிலேயே சிக்கியிருக்கும் என்று நினைத்தேன். ஆனால், பின்னர் அது வயிற்றுக்குள், அதாவது இரைப்பைக்குள் சென்றுவிட்டது என்று தெரியவந்தது. முதலில் பிரஷ் உள்ளே சிக்கிக்கொண்டதால் மூச்சுவிடுவதில் சிரமம் ஏற்படுமோ என்று பயந்தேன். ஆனால், உடனடியாக மருத்துவரிடம் சென்றேன். பென்னில் சிகிச்சை அளிக்க முடியாததால் நவி மும்பையின் கார்கருக்குச் சென்றேன். அறுவை சிகிச்சை செய்ய வேண்டியிருக்கும் என்று நினைத்தேன். ஆனால், எண்டோஸ்கோப்பி மூலம் சிகிச்சை அளிக்கப்பட்டது. அன்றே என்னை வீட்டுக்கு அனுப்பிவிட்டார்கள்," என அவர் தெரிவித்தார்.

இந்தச் சம்பவத்தின் அரிய தன்மையைத் தாண்டி, இதிலிருந்து பொதுமக்கள் என்ன முக்கியமான செய்தியைப் புரிந்துகொள்ள வேண்டும் என்று மருத்துவர் ரத்தோடிடம் கேட்டோம்.

"மிக முக்கியமாக, பல் துலக்கும்போது அவசரப்படக் கூடாது. டூத் பிரஷ் வாயில் இருக்கும்போது பேசுவது, சிரிப்பது அல்லது வேறு வேலைகளில் ஈடுபடுவது ஆகியவற்றைத் தவிர்க்க வேண்டும். குறிப்பாக, டூத் பிரஷ்ஷை வாய்க்குள் ஆழமாகச் செலுத்திப் பல் துலக்குவதைத் தவிர்க்க வேண்டும். தவறுதலாக டூத் பிரஷ்ஷையோ வேறு ஏதேனும் பெரிய பொருளையோ விழுங்கிவிட்டால் உடனடியாக மருத்துவமனைக்குச் செல்ல வேண்டும்," என அவர் தெரிவித்தார்.

மருத்துவர் ரத்தோட் மேலும் ஒரு ஆலோசனையையும் வழங்குகிறார். "இதுபோன்ற நேரங்களில் சுயமாக வாந்தி எடுக்க முயற்சி செய்யக் கூடாது. உணவைச் சாப்பிட்டு பொருளைக் கீழே தள்ளவும் முயற்சிக்கக் கூடாது. இதனால் உணவுக்குழாயில் காயம் ஏற்படலாம் அல்லது அந்தப் பொருள் மேலும் இறுக்கமாகச் சிக்கிக்கொள்ளலாம். தொடக்கத்தில் வலி குறைவாக இருந்தாலும், உட்புறக் காயம் அல்லது வேறு சிக்கல்கள் ஏற்படுவதற்கான வாய்ப்பை நிராகரிக்க முடியாது. எனவே, உரிய நேரத்தில் பாதிப்பைக் கண்டறிந்து சரியான சிகிச்சை பெறுவது மிகவும் அவசியம்," என்கிறார் அவர்.

- இது, பிபிசிக்காக கலெக்டிவ் நியூஸ்ரூம் வெளியீடு