சௌதிக்கு படைகளை அனுப்பும் பாகிஸ்தான், துருக்கி - மெக்கா ஒப்பந்தத்தில் என்ன நடக்கிறது?
பட மூலாதாரம், Getty Images
ஏமனின் ஹூத்தி கிளர்ச்சியாளர்கள் நடத்தி வரும் தாக்குதல்களை எதிர்கொள்ளும் நோக்கில், மெக்கா பாதுகாப்பு ஒப்பந்தத்தின் கீழ் செளதி அரேபியாவில் தங்களது படைகளை விரைவாக நிலைநிறுத்த துருக்கி, பாகிஸ்தான் மற்றும் செளதி அரேபியா ஒப்புக் கொண்டுள்ளன.
ரியாத்தில் திங்கள்கிழமை நடைபெற்ற மூன்று நாடுகளின் பாதுகாப்பு மற்றும் வெளிவிவகார அமைச்சர்களின் அவசரக் கூட்டத்திற்குப் பிறகு இந்த முடிவு எடுக்கப்பட்டது.
ஆகஸ்ட் 7ஆம் தேதி இந்த ஒப்பந்தம் கையெழுத்தான பிறகு, முதல்முறையாக மெக்கா பாதுகாப்பு ஒப்பந்தம் செயல்படுத்தப்பட்டுள்ளது. இந்த ஒப்பந்தத்தின்படி, மூன்று நாடுகளில் ஏதேனும் ஒரு நாட்டின் மீது நடத்தப்படும் தாக்குதல், மூன்று நாடுகளின் மீதான தாக்குதலாகக் கருதப்படும்.
செளதி அரேபியாவின் பாதுகாப்பு அமைச்சர் காலித் பின் சல்மான் சமூக ஊடகத்தில் வெளியிட்ட பதிவில், "மெக்கா பாதுகாப்புக் கூட்டணியின் மூலோபாய அரசியல் மற்றும் பாதுகாப்புக் குழுவின் அவசரக் கூட்டத்தில், தாக்குதல்களை எதிர்கொள்வதற்கான ஒற்றுமையும் பொதுவான நிலைப்பாடும் உறுதி செய்யப்பட்டன. இந்தத் தாக்குதல்களுக்கும் அவற்றின் பின்னணியில் இருப்பவர்களுக்கும் எதிராக மெக்கா பாதுகாப்பு ஒப்பந்தத்தின் வரம்புகளுக்குட்பட்டு கூட்டுப் பதிலடி திறனைச் செயல்படுத்துவது உறுதி செய்யப்பட்டது" என்று கூறினார்.
இந்தக் கூட்டத்தில் குறிப்பாக மெக்கா மற்றும் மதீனா போன்ற புனித நகரங்களை குறிவைத்து நடத்தப்பட்ட தாக்குதல்கள் கண்டிக்கப்பட்டன. ஆனால் ஹூத்தி இயக்கத்தின் பெயர் நேரடியாக குறிப்பிடப்படவில்லை.
செளதி ஆதரவு பெற்ற ஏமன் அரசு படைகள், ஹூத்திகள் கட்டுப்பாட்டில் உள்ள பகுதிகளை மீட்டெடுக்கப் பெரிய அளவிலான ராணுவ நடவடிக்கையைத் தொடங்கியுள்ள நேரத்தில் இந்த கூட்டம் நடைபெற்றுள்ளது. கடந்த 12 ஆண்டுகளாக நீடித்து வரும் போரின் போது ஹூத்திகள் கைப்பற்றிய அனைத்து பகுதிகளையும் மீட்டெடுப்பதே இந்த நடவடிக்கையின் நோக்கம் என ஏமன் அரசு தெரிவித்துள்ளது.
துருக்கி மற்றும் பாகிஸ்தான் படைகள் செளதி அரேபியாவில் நிலைநிறுத்தப்படுவது போர்க்களத்தில் உடனடியாக என்ன தாக்கத்தை ஏற்படுத்தும் என்பது இன்னும் தெளிவாகத் தெரியவில்லை.
ஏற்கனவே பாகிஸ்தானின் நூற்றுக்கணக்கான வீரர்கள் செளதி அரேபியாவில் பணியாற்றி வருகின்றனர். கடந்த வாரம் செளதி ஆதரவு பெற்ற ஏமன் அரசுக்கு உதவ ஆயுதங்கள் ஏற்றிய நான்கு விமானங்களை பாகிஸ்தான் ஏடன் நகருக்கு அனுப்பியதாக ராய்ட்டர்ஸ் செய்தி வெளியிட்டது.
வளைகுடா பிராந்தியத்தில் உள்ள மேற்கு நாடொன்றின் அதிகாரி, தெற்கு ஏமனில் பாகிஸ்தான் ராணுவத்தினர் ஏற்கனவே இருப்பதாக மிடில் ஈஸ்ட் ஐ(Middle East Eye) இணையதளத்திடம் தெரிவித்திருந்தார். ஆனால், அவர்கள் செளதி ராணுவத்துடனான ஒப்பந்தத்தின் அடிப்படையில் அங்கு உள்ளனரா அல்லது பாகிஸ்தான் ராணுவத்தின் ஒரு பகுதியாக அங்கு செயல்படுகின்றனரா என்பது தெளிவாகவில்லை.
துருக்கி உண்மையிலேயே தனது படைகளை அனுப்ப முடியுமா?
பட மூலாதாரம், Getty Images
மத்திய கிழக்கு விவகாரங்களை ஆய்வு செய்யும் செய்தி தளமான மிடில் ஈஸ்ட் ஐ-யின் துருக்கி பிரிவு தலைவர் ரெகிப் சோய்லு, நாடாளுமன்றத்தின் அனுமதி இல்லாமல் வெளிநாட்டில் இராணுவப் படைகளை நிலைநிறுத்த துருக்கியால் முடியாது என்று எக்ஸ் தள பதிவு ஒன்றில் தெரிவித்துள்ளார்.
அவரது கருத்துப்படி, இருதரப்பு ஒப்பந்தத்தின் கீழ் வழங்கப்படும் ராணுவப் பயிற்சிக்கு மட்டுமே விதிவிலக்கு இருக்கலாம். துருக்கி அரசியலமைப்பின் 92வது பிரிவின்படி பொதுவாக வெளிநாட்டில் ஆயுதப்படைகளை அனுப்ப நாடாளுமன்ற அனுமதி அவசியமாகும். எனினும், சர்வதேச உடன்படிக்கைகள் அல்லது சர்வதேச மரபுகளின் அடிப்படையில் தேவையான நிலைநிறுத்தல்களுக்கு இந்த விதியிலிருந்து விலக்கு அளிக்கப்பட்டுள்ளது.
அங்காரா சமூக அறிவியல் பல்கலைக்கழகத்தின் சர்வதேச அரசியல் பேராசிரியர் முராத் யேஷில்தாஷ், செளதி அரேபியா மற்றும் பாகிஸ்தானுடன் துருக்கி கொண்டுள்ள பாதுகாப்பு ஒத்துழைப்பு, அந்நாடு தானாகவே எந்தப் போரிலும் பங்கேற்க வேண்டிய கட்டாய நிலையை உருவாக்காது என்று அக்டோபர் 6ஆம் தேதி 'டெய்லி சபா' நாளிதழில் எழுதிய கட்டுரையில் எழுதியுள்ளார்.
ஒப்பந்தத்தின் முழு விவரங்கள் இதுவரை வெளியிடப்படாததாலும், அதற்கு நாடாளுமன்ற ஒப்புதல் கிடைக்காததாலும், துருக்கி ஏற்க வேண்டியிருக்கும் உண்மையான ராணுவப் பொறுப்புகள் குறித்து இன்னும் தெளிவு இல்லை என்று அவர் எழுதியுள்ளார்.
எக்ஸ் தளத்தில் அவர் வெளியிட்ட பதிவில் "மெக்கா ஒப்பந்தம் வெறும் ஒற்றுமை அறிவிப்பாக இல்லாமல், தரையில் ராணுவப் படைகளை நிலைநிறுத்தும் வகையிலான உறுதியான பாதுகாப்பு ஏற்பாடாக மாறியுள்ளது. இது எதிர்பார்த்ததைவிட மிக வேகமாக நடந்துள்ளது. இதன் மூலம் வலுவான செய்தி அனுப்பப்படுகிறது. கூட்டுப் பாதுகாப்பு தொடர்பான விதிமுறை செயல்படுத்தப்பட்டுள்ளது என்பதையும் இது காட்டுகிறது. இவ்வாறு, முதல் சவாலுக்கான பதில் தற்போது வெளிப்பட்டுள்ளது." என எழுதியுள்ளார்,
அடுத்த 30 நாட்களுக்குள் மெக்கா ஒப்பந்தத்துக்கான அல்லது ராணுவப் படைகளை நிலைநிறுத்துவதற்கான ஒப்புதலை துருக்கி நாடாளுமன்றத்தின் நிகழ்ச்சி நிரலில் கொண்டுவரப்படும் என்று எதிர்பார்க்கப்படுகிறது.
எனினும், துருக்கியின் ஆரம்பகட்ட பங்களிப்பு ஏமனில் போர் வீரர்களை நிலைநிறுத்துவதாக இருக்காது என்று எதிர்பார்க்கப்படுகிறது. அதற்குப் பதிலாக, செளதி அரேபியாவில் வான் பாதுகாப்பு, டிரோன் எதிர்ப்பு, உளவுத்தகவல், கண்காணிப்பு மற்றும் உளவு நடவடிக்கைகளுக்கான திறன்களை வழங்குவதற்கான வாய்ப்பே அதிகம்.
"இதன் மூலம் துருக்கி செளதியின் பாதுகாப்பு வலையமைப்பில் இணைந்துகொள்ள முடியும். அதே நேரத்தில், தனது ஆபத்தையும் ராணுவப் பங்கேற்பின் அளவையும் கட்டுப்படுத்தப்பட்ட வரம்புக்குள் வைத்திருக்க முடியும். எனினும், ரியாத்தின் அறிவிப்புக்குப் பதிலடியாக ஹூத்திகள் வரும் நாட்களில் செளதி அரேபியாவின் எரிசக்தி உள்கட்டமைப்புகள் மற்றும் தெற்கு நகரங்களைக் குறிவைத்து ஏவுகணை மற்றும் டிரோன் தாக்குதல்களைத் தீவிரப்படுத்த வாய்ப்புள்ளது. தங்கள் மிரட்டல்களில் துருக்கி மற்றும் பாகிஸ்தானின் பெயர்களையும் ஹூத்திகள் நேரடியாகக் குறிப்பிடலாம். இப்போது உண்மையான கேள்வி, போர் தீவிரமடைந்தால் மெக்கா ஒப்பந்தம் எவ்வாறு செயல்படும் என்பதுதான்."
துருக்கி சமநிலையான கொள்கையைப் பின்பற்ற வேண்டும் என்றும் பேராசிரியர் யெஷில்தாஷ் தெரிவித்துள்ளார். "துருக்கி வான் மற்றும் ஏவுகணைத் தடுப்பு, டிரோன் எதிர்ப்பு, முன்கூட்டிய எச்சரிக்கை, பயிற்சி மற்றும் தொழில்நுட்ப உதவி ஆகியவற்றை வழங்கலாம். ஆனால், தாக்குதல் நடத்தும் ராணுவ நடவடிக்கைகள் தொடர்பான முடிவுகளில் தனது கட்டுப்பாட்டைத் தொடர்ந்து வைத்திருக்க வேண்டும். துருக்கியில் தயாரிக்கப்பட்ட ராணுவத் தளவாடங்கள் ஏமனில் பயன்படுத்தப்படுவது மட்டும், துருக்கி அங்கு ராணுவ நடவடிக்கையில் ஈடுபட்டுள்ளது என்பதற்கான ஆதாரமாக இருக்காது" என அவர் எழுதியுள்ளார்.
"துருக்கி தனது உதவியின் வரம்புகளைத் தெளிவாக வரையறுக்க வேண்டும். இரானுடன் ராஜதந்திர உரையாடலைத் தொடர்ந்து பேண வேண்டும். பதற்றத்தைக் குறைக்கும் முயற்சிகளை ஊக்குவிக்க வேண்டும். தனது கூட்டாளிகளின் நடவடிக்கைகளால் தானும் ஒரு விரிவான மோதலில் சிக்கிக்கொள்வதைத் துருக்கி தவிர்க்க வேண்டும்."
2015 ஏப்ரலில், ஏமனின் ஹூத்தி கிளர்ச்சியாளர்களுக்கு எதிராகப் போரிட்ட செளதி தலைமையிலான கூட்டணியில் இணைவதற்கான முன்மொழிவை பாகிஸ்தான் நாடாளுமன்றம் நிராகரித்திருந்தது. அப்போது பாகிஸ்தானின் இந்த முடிவு, இரான் ஆதரவு கிளர்ச்சியாளர்களுக்கு எதிராக விரிவான சுன்னி முஸ்லிம் முன்னணியை உருவாக்க செளதி மேற்கொண்ட முயற்சிக்கு பின்னடைவை ஏற்படுத்தியது.
"ஏமன் மோதலில் பாகிஸ்தான் நடுநிலை வகிக்க வேண்டும். இதன் மூலம் நெருக்கடியை முடிவுக்குக் கொண்டுவருவதற்கு பாகிஸ்தான் தீவிரமான ராஜதந்திரப் பங்கை வகிக்க முடியும்" என்று அப்போது பாகிஸ்தான் நாடாளுமன்ற உறுப்பினர்கள் தெரிவித்திருந்தனர்.
இந்த அறிவிப்பின் முக்கியத்துவம் என்ன?
பட மூலாதாரம், Getty Images
ஹூத்திகளுக்கு எதிரான ராணுவ நடவடிக்கை தொடங்கியுள்ள நிலையில் இந்த அறிவிப்பு வெளியாகியிருப்பது முக்கியத்துவம் வாய்ந்ததாகக் கருதப்படுகிறது. ஹூத்திகளுக்கு எதிரான பதிலடி ராணுவ நடவடிக்கையைத் தொடங்குவதற்கு சர்வதேச ஆதரவு தனக்கு இருப்பதை உறுதி செய்ய செளதி அரேபியா விரும்பியதாக, வளைகுடா பகுதியில் உள்ள மற்றொரு மேற்கத்திய அதிகாரி 'மிடில் ஈஸ்ட் ஐ' செய்தி நிறுவனத்திடம் தெரிவித்தார்.
பாகிஸ்தான், முஸ்லிம் உலகின் ஒரே அணு ஆயுத சக்தி கொண்ட நாடாகும். இரானுக்கும் அமெரிக்காவுக்கும் இடையிலான மத்தியஸ்தராகவும் பாகிஸ்தான் செயல்பட்டுள்ளது. தன்னை ஒரு நடுநிலையான மத்தியஸ்தராக முன்னிறுத்தவும் அது முயற்சி செய்து வருகிறது.
துருக்கி நேட்டோ அமைப்பின் உறுப்பு நாடாகும். அதே நேரத்தில், இஸ்ரேலின் எதிர் தரப்பாகவும் தன்னை நிலைநிறுத்திக் கொண்டுள்ளது. காஸாவில் இஸ்ரேல் நடத்தி வரும் போரின் காரணமாக, அரபு மற்றும் முஸ்லிம் உலகில் இஸ்ரேல் கடுமையான எதிர்ப்பை எதிர்கொண்டு வருகிறது. காஸாவில் இஸ்ரேலின் நடவடிக்கைகளை ஐக்கிய நாடுகள் சபையும் மனித உரிமை நிபுணர்களும் இனப்படுகொலை என்று கூறியுள்ளனர்.
மெக்கா ஒப்பந்தத்தைச் சுட்டிக்காட்டுவதன் மூலம், ஹூத்திகளுக்கு எதிரான தனது பதிலடி நடவடிக்கைக்கு பரந்த பிராந்திய ஆதரவு இருப்பதை செளதி அரேபியா வலியுறுத்த முடியும்.
கடந்த வாரம் செளதி அரேபியா, ஐக்கிய அரபு அமீரகத்தின் துணை அதிபர் மன்சூர் பின் சயீதையும் வரவேற்றிருந்தது. ஹூத்திகளுக்கு எதிரான ஒற்றுமையை வெளிப்படுத்துவதும் இந்தச் சந்திப்பின் நோக்கமாக இருந்தது.
திங்கள்கிழமையே செளதி அரேபியாவின் பட்டத்து இளவரசர் முகமது பின் சல்மான், அமெரிக்க ஜனநாயகக் கட்சி செனட்டர் கிறிஸ் மர்ஃபியுடன் இரண்டு மணி நேரம் பேச்சுவார்த்தை நடத்தினார். இதை மர்ஃபி தெரிவித்தார்.
2022ஆம் ஆண்டு ஐக்கிய நாடுகள் சபையின் ஆதரவுடன் போர் நிறுத்தம் ஏற்படுவதற்கு முன்பு, ஏமன் போரின் மிகத் தீவிரமான விமர்சகர்களில் ஒருவராக மர்ஃபி இருந்தார். ஜூலை மாதம் அந்தப் போர் நிறுத்த ஒப்பந்தம் முறிந்தது. அதன் பின்னர் ஹூத்திகள் செங்கடலில் செளதி கப்பல்கள் மீது தாக்குதல்களைத் தொடங்கினர். இரண்டு மாதங்களுக்குப் பிறகு, செங்கடல் கடற்கரையோரமாக ஹூத்திகள் ராணுவ நடவடிக்கையையும் தொடங்கினர்.
செளதி அரேபியாவின் ஆதரவுடன் செயல்படும் ஏமன் படைகள், ஹூத்திகளின் கட்டுப்பாட்டில் இருந்த பெரும்பாலான கடலோரப் பகுதிகளை மீண்டும் தங்கள் கட்டுப்பாட்டுக்குள் கொண்டுவந்துள்ளதாக திங்கள்கிழமை தெரிவித்தன.
1979ஆம் ஆண்டு இஸ்லாமியப் புரட்சிக்குப் பிறகு அரபு நாடுகள் மிகப்பெரிய அச்சுறுத்தலாகக் கருதி வந்த இரான் ஆட்சி இன்னும் நீடித்து வருவதாக பிரிட்டிஷ் நாளிதழான 'ஃபைனான்ஷியல் டைம்ஸ்' ஆசிரியர் குழு ஆகஸ்ட் 17ஆம் தேதி எழுதியிருந்தது.
"பிராந்தியம் முழுவதும் ராணுவத் தளங்கள், எரிசக்தி நிலையங்கள், விமான நிலையங்கள் மற்றும் பிற உள்கட்டமைப்புகள் மீது இரான் தாக்குதல்களை நடத்தியது. இதையடுத்து, வளைகுடா நாடுகள் தங்களது பாதுகாப்பை உறுதி செய்யும் முதன்மை சக்தியாக அமெரிக்காவைச் சார்ந்திருப்பதை மீண்டும் மதிப்பிடத் தொடங்கின" என்று 'ஃபைனான்ஷியல் டைம்ஸ்' ஆசிரியர் குழு குறிப்பிட்டிருந்தது.
"இதன் விளைவாக, செளதி அரேபியா, துருக்கி மற்றும் பாகிஸ்தான் ஆகிய நாடுகள் பரஸ்பர பாதுகாப்பு ஒப்பந்தத்துக்கு ஒப்புக்கொண்டன. இரான் மற்றும் போரால் உருவாகும் நிலையற்ற தன்மையை எதிர்கொள்வதற்கு அமெரிக்காவை மட்டுமே நம்பியிருக்க முடியாது என்ற புரிதலை இந்த ஒப்பந்தம் பிரதிபலிக்கிறது."
மெக்கா ஒப்பந்தத்துக்கு மறுபுறம், ஆபிரகாம் ஒப்பந்தத்தின் கூட்டாளி நாடுகள் உள்ளன. அவற்றில் குறிப்பாக ஐக்கிய அரபு எமிரேட்ஸ் இடம்பெறுகிறது. செளதி அரேபியாவுக்கும் ஐக்கிய அரபு எமிரேட்ஸுக்கும் இடையிலான கருத்து வேறுபாடுகள் படிப்படியாக அதிகரித்து வருகின்றன. ஐக்கிய அரபு எமிரேட்ஸ் தனது பாரம்பரிய அரபு கூட்டாளிகளிடமிருந்து விலகி தனிப் பாதையை வேகமாகத் தேர்ந்தெடுத்து வருகிறது. அதே நேரத்தில், இஸ்ரேலுடனான தனது உறவுகளையும் மேலும் வலுப்படுத்தி வருகிறது.
- இது பிபிசிக்காக கலெக்டிவ் நியூஸ்ரூம் வெளியீடு
