'மீனவர்கள் கரைக்குத் திரும்ப அறிவுறுத்தல்' - வங்கக்கடலில் நிலவும் காற்றழுத்தத் தாழ்வு நிலையால் எங்கெல்லாம் மழை பெய்யலாம்?

பட மூலாதாரம், IMD
வங்காள விரிகுடாவின் தென்கிழக்குப் பகுதியில் நிலவி வரும் ஆழ்ந்த காற்றழுத்தத் தாழ்வுப் பகுதி அடுத்த 24 மணி நேரத்தில் காற்றழுத்தத் தாழ்வு மண்டலமாக மாறும் என சென்னை வானிலை ஆய்வு மையம் தெரிவித்துள்ளது.
"அதன்பிறகு, இது வட-வடமேற்கு திசையில் நகர்ந்து, நவம்பர் 16-ஆம் தேதி மாலை வாக்கில் மத்திய வங்கக் கடலில் தீவிரமடைந்து புயலாக மாறக்கூடும்," என்றும் வானிலை அறிக்கையில் கூறப்பட்டுள்ளது.
மீனவர்களுக்கு கரைக்குத் திரும்ப அறிவுறுத்தல்
கடலில் மீன்பிடித்துக் கொண்டிருக்கும் மீனவர்கள் நவம்பர் 15-ஆம் தேதிக்குள் கரைக்குத் திரும்புமாறு அறிவுறுத்தப்படுவதாக வானிலை ஆய்வு மையம் தெரிவித்துள்ளது.
அந்த அறிவிப்பின்படி, மீனவர்கள் அந்தமான் கடல் பகுதி மற்றும் அந்தமான் - நிக்கோபார் தீவுகளைச் சுற்றியுள்ள பகுதிகளுக்கு நவம்பர் 16-ஆம் தேதி வரை செல்ல வேண்டாம் என்று அறிவுறுத்தப்பட்டுள்ளது.
தென்கிழக்கு வங்கக் கடல் பகுதிக்கு நவம்பர் 17-ஆம் தேதி வரையிலும், தென்மேற்கு வங்கக் கடல் பகுதிக்கு நவம்பர் 15 முதல் 18-ஆம் தேதி வரையிலும், மத்திய வங்கக் கடல் பகுதிக்கு நவம்பர் 16 முதல் 19-ஆம் தேதி வரையிலும் மீனவர்கள் செல்ல வேண்டாம் என்று அறிவுறுத்தப்படுவதாக அதில் தெரிவிக்கப்பட்டுள்ளது.
'வங்கக்கடலில் பலத்த காற்று வீசும்'
இந்தக் காற்றழுத்தத் தாழ்வுப் பகுதியின் தாக்கத்தால் நவம்பர் 16-ஆம் தேதி வரையில் அந்தமான் கடல் பகுதியிலும் 60 கிமீ வேகம் வரையில் காற்று வீசும் என வானிலை ஆய்வு மையம் தெரிவித்துள்ளது.
வானிலை அறிக்கையின்படி, தென்கிழக்கு வங்கக்கடலில், நவம்பர் 14 மற்றும் நவம்பர் 15 ஆகிய தேதிகளில் 60 கிமீ வேகம் வரையிலும் நவம்பர் 16 மற்றும் 17-ஆம் தேதிகளில் 70 கி.மீ. வேகம் வரையிலும் பலத்த காற்று வீசக்கூடும்.
தென்மேற்கு வங்கக்கடல் பகுதியிலும், நவம்பர் 14-ஆம் தேதி 60 கி.மீ வேகம் வரையிலும், நவம்பர் 15-ஆம் தேதி 65 கி.மீ வேகம் வரையிலும், 16-ஆம் தேதி 70 கிமீ வேகம் வரையிலும் நவம்பர் 17-ஆம் தேதி தொடங்கி அடுத்த 24 மணி நேரத்திற்கு 80 கி.மீ வேகம் வரையிலும் காற்று வீசக்கூடும்.
மத்திய வங்கக் கடலில் நவம்பர் 16-ஆம் தேதி 65 கி.மீ வேகம் வரையிலும், நவம்பர் 17-ஆம் தேதி தொடங்கி அடுத்த இரண்டு நாட்களுக்கு 80 கிமீ வேகம் வரையிலும் காற்று வீசக்கூடும்.
தமிழ்நாட்டில் எங்கெல்லாம் மழை பெய்யும்?
14-11-2026: மேற்கு தொடர்ச்சி மலை மாவட்டங்கள் மற்றும் வட கடலோர தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.
15-11-2026: மேற்கு தொடர்ச்சி மலை மாவட்டங்கள் மற்றும் தென் தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். வட கடலோர தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.
16-11-2026: மேற்கு தொடர்ச்சி மலை மாவட்டங்கள் மற்றும் தென் தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.
17-11-2026 மற்றும் 18-11-2026: தென்காசி, தூத்துக்குடி, திருநெல்வேலி மற்றும் கன்னியாகுமரி மாவட்டங்களில் ஓரிரு இடங்களில் மிதமான மழை பெய்யக்கூடும். ஏனைய மேற்கு தொடர்ச்சி மலை மாவட்டங்களில் ஓரிரு இடங்களில் லேசான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.
19-11-2026: மேற்கு தொடர்ச்சி மலை மாவட்டங்கள் மற்றும் தென் தமிழகத்தில் ஓரிரு இடங்களில் லேசான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.

பட மூலாதாரம், Getty Images
இலங்கையில் கனமழைக்கு வாய்ப்பு
இந்த வானிலை அமைப்பின் நகர்வு காரணமாக நவம்பர் 14 முதல் 16ஆம் தேதி வரை இலங்கையின் பல பகுதிகளில் கனமழை பெய்ய வாய்ப்புள்ளதாக இலங்கை வானிலைத் துறை தெரிவித்துள்ளது.
குறிப்பாக, கிழக்கு மாகாணத்தின் மட்டக்களப்பு, அம்பாறை, திருகோணமலை மாவட்டங்களிலும், வடக்கு, வடமத்திய மற்றும் வடமேற்கு மாகாணங்களிலும் கனமழை பெய்யக்கூடும். சில இடங்களில் திடீர் வெள்ளப்பெருக்கு ஏற்படவும் வாய்ப்புள்ளதாக எச்சரிக்கப்பட்டுள்ளது.
தற்போதைய கணிப்புகளின்படி, இந்த வானிலை அமைப்பு இலங்கையைக் கடந்து செல்லாமல் அதன் கிழக்குக் கடற்கரைக்கு அருகே வடக்கு நோக்கி நகரக்கூடும்.
- இது, பிபிசிக்காக கலெக்டிவ் நியூஸ்ரூம் வெளியீடு





























