ਇਸ ਔਰਤ ਨੇ ਸ਼ਾਰਕ ਨੂੰ ਮੁੱਕੇ ਮਾਰ ਕੇ ਖੁਦ ਨੂੰ ਬਚਾਇਆ, ਅਚਾਨਕ ਕਿਵੇਂ ਇੰਨੀ ਹਿੰਮਤ ਆਈ

    • ਲੇਖਕ, ਲਾਨਾ ਲੈਮ
    • ਰੋਲ, ਸਿਡਨੀ
  • ਪ੍ਰਕਾਸ਼ਿਤ
  • ਪੜ੍ਹਨ ਦਾ ਸਮਾਂ: 4 ਮਿੰਟ

ਸ਼ਾਰਕ ਦੇ ਹਮਲੇ ਵਿੱਚ ਬਚਣ ਵਾਲੇ ਸਿਡਨੀ ਦੀ ਇੱਕ ਮਹਿਲਾ ਨੇ ਉਸ ਪਲ ਬਾਰੇ ਤਜਰਬਾ ਸਾਂਝਾ ਕੀਤਾ ਜਦੋਂ ਉਨ੍ਹਾਂ ਦਾ ਸਾਹਮਣਾ ਇੱਕ 4 ਮੀਟਰ ਲੰਬੀ 'ਗ੍ਰੇਟ ਵਾਈਟ' ਸ਼ਾਰਕ ਨਾਲ ਹੋਇਆ ਅਤੇ ਆਪਣੇ ਬਚਾਅ ਲਈ ਮਹਿਲਾ ਨੇ ਉਸ ਨੂੰ ਕਈ ਵਾਰ ਮੁੱਕੇ ਮਾਰੇ।

ਜੂਨ ਮਹੀਨੇ ਵਿੱਚ ਕੂਜੀ ਬੀਚ 'ਤੇ 34 ਸਾਲ ਦੇ ਲੀਆ ਸਟੀਵਰਟ ਨੂੰ ਸ਼ਾਰਕ ਨੇ ਪਾਣੀ ਦੇ ਹੇਠਾਂ ਅੰਦਰ ਖਿੱਚ ਲਿਆ ਸੀ। ਸ਼ਾਰਕ ਨੇ ਉਨ੍ਹਾਂ ਦੇ ਪੱਟਾਂ ਅਤੇ ਬਾਹਾਂ ਨੂੰ ਕੱਟ ਲਿਆ ਸੀ, ਜਿਸ ਕਾਰਨ ਉਨ੍ਹਾਂ ਦਾ ਬਹੁਤ ਜ਼ਿਆਦਾ ਖ਼ੂਨ ਵਹਿ ਗਿਆ ਅਤੇ ਉਨ੍ਹਾਂ ਨੂੰ ਇੰਨੀਆਂ ਗੰਭੀਰ ਸੱਟਾਂ ਲੱਗੀਆਂ ਕਿ ਡਾਕਟਰਾਂ ਨੂੰ ਉਨ੍ਹਾਂ ਦਾ ਖੱਬਾ ਹੱਥ ਕੱਟਣਾ ਪਿਆ।

ਇੱਕ ਇੰਟਰਵਿਊ ਵਿੱਚ, ਇੱਕ ਬੱਚੀ ਦੀ ਮਾਂ ਸਟੀਵਰਟ ਨੇ ਕਿਹਾ ਕਿ ਉਹ ਆਪਣੀ ਧੀ ਵਾਸਤੇ ਹਰ ਹਾਲ 'ਚ ਜ਼ਿੰਦਾ ਰਹਿਣ ਲਈ ਦ੍ਰਿੜ੍ਹ ਸਨ।

ਉਨ੍ਹਾਂ ਕਿਹਾ, "ਮੇਰੇ ਮਨ ਵਿੱਚ ਬਸ ਇਹੀ ਚੱਲ ਰਿਹਾ ਸੀ ਕਿ... 'ਤੂੰ ਮੈਨੂੰ ਮੇਰੀ ਧੀ ਤੋਂ ਦੂਰ ਨਹੀਂ ਕਰ ਸਕਦੀ', ਅਤੇ ਮੈਂ ਆਪਣੇ ਆਪ ਨੂੰ ਮੋੜਿਆ ਅਤੇ ਉਸ 'ਤੇ ਲਗਾਤਾਰ ਮੁੱਕੇ ਬਰਸਾਉਣੇ ਸ਼ੁਰੂ ਕਰ ਦਿੱਤੇ - ਇਹ ਕਿਸੇ ਡਾਇਨਾਸੋਰ ਨਾਲ ਲੜਨ ਵਰਗਾ ਸੀ।"

ਕੁਝ ਹੀ ਪਲ ਪਹਿਲਾਂ, ਸਟੀਵਰਟ ਨੇ ਸ਼ਨੀਵਾਰ ਸਵੇਰੇ ਰੋਜ਼ਾਨਾ ਵਾਂਗ ਤੈਰਾਕੀ ਪੂਰੀ ਕੀਤੀ ਸੀ ਅਤੇ ਕਿਨਾਰੇ ਵੱਲ ਵਾਪਸ ਆ ਰਹੇ ਸਨ, ਉਦੋਂ ਉਨ੍ਹਾਂ ਨੂੰ ਖ਼ਤਰੇ ਦਾ ਅਹਿਸਾਸ ਹੋਇਆ।

ਉਨ੍ਹਾਂ ਨੇ ਨਾਈਨ ਨੈੱਟਵਰਕ ਦੇ '60 ਮਿੰਟਸ' ਸ਼ੋਅ ਨੂੰ ਦੱਸਿਆ, "ਮੈਂ ਆਪਣੇ ਪਿੱਛੇ ਇੱਕ ਕੁੜੀ ਦੀ ਤੇਜ਼ ਚੀਕ ਸੁਣੀ। ਮੈਂ ਮੁੜ ਕੇ ਦੇਖਿਆ ਤਾਂ ਉਸ ਦੇ ਪਿੱਛੇ ਇੱਕ ਬਹੁਤ ਵੱਡਾ ਫਿਨ (ਮੱਛੀ ਦੇ ਸਰੀਰ ਦੇ ਉੱਪਰਲੇ ਹਿੱਸੇ 'ਤੇ ਖੰਭ ਵਰਗੀ ਆਕ੍ਰਿਤੀ) ਦਿਖਾਈ ਦਿੱਤਾ। ਉਹ ਬਹੁਤ ਵੱਡਾ ਸੀ।"

'ਮੈਂ ਆਪਣੀ ਧੀ ਲਈ ਆਪਣੇ ਆਪ ਨੂੰ ਬਚਾਇਆ'

"ਜਦੋਂ ਮੈਂ ਉਸ ਦਾ ਆਕਾਰ ਦੇਖਿਆ ਅਤੇ ਮੈਨੂੰ ਅਹਿਸਾਸ ਹੋਇਆ ਕਿ ਇਹ ਡਾਲਫਿਨ ਨਹੀਂ ਹੈ।"

ਸਟੀਵਰਟ ਮੁੜੇ ਅਤੇ ਉਨ੍ਹਾਂ ਨੂੰ ਅਹਿਸਾਸ ਹੋਇਆ ਕਿ ਸ਼ਾਰਕ "ਬਿਲਕੁਲ ਨੇੜੇ ਸੀ... ਅਤੇ ਉਹ ਲਗਾਤਾਰ ਹੋਰ ਨੇੜੇ ਆ ਰਹੀ ਸੀ।"

Skip ਸਭ ਤੋਂ ਵੱਧ ਪੜ੍ਹਿਆ ਗਿਆ and continue reading
ਸਭ ਤੋਂ ਵੱਧ ਪੜ੍ਹਿਆ ਗਿਆ

End of ਸਭ ਤੋਂ ਵੱਧ ਪੜ੍ਹਿਆ ਗਿਆ

ਸ਼ਾਰਕ ਦਾ ਚਿਹਰਾ "ਡਰਾਉਣਾ" ਸੀ, ਉਸ ਦੀਆਂ "ਛੋਟੀਆਂ-ਛੋਟੀਆਂ ਕਾਲੀਆਂ ਅੱਖਾਂ" ਸਨ ਅਤੇ "ਉਸ ਦੇ ਦੰਦ ਅਤੇ ਮੂੰਹ ਬਹੁਤ ਵੱਡੇ ਸਨ।"

ਸਟੀਵਰਟ ਨੇ ਦੱਸਿਆ, "ਅਸੀਂ ਆਹਮੋ-ਸਾਹਮਣੇ ਸੀ," ਅਤੇ ਇੱਕ ਪਲ ਅਜਿਹਾ ਵੀ ਆਇਆ ਜਦੋਂ ਸ਼ਾਰਕ ਉਨ੍ਹਾਂ ਤੋਂ ਸਿਰਫ਼ 30 ਸੈਂਟੀਮੀਟਰ ਦੂਰ ਸੀ।

ਉਸ ਪਲ ਵਿੱਚ ਵੀ ਸਟੀਵਰਟ ਸ਼ਾਂਤ ਬਣੇ ਰਹੇ।

ਉਨ੍ਹਾਂ ਨੇ ਕਿਹਾ, "ਮੈਂ ਸੱਜੇ ਹੱਥ ਨਾਲ ਕੰਮ ਕਰਦੀ ਹਾਂ, ਇਸ ਲਈ ਮੈਂ ਸੋਚਿਆ 'ਚਲੋ ਖੱਬੇ ਹੱਥ ਨਾਲ ਮੁੱਕਾ ਮਾਰਦੀ ਹਾਂ।'"

"ਜਿਵੇਂ ਹੀ ਮੈਂ ਆਪਣਾ ਖੱਬਾ ਹੱਥ ਅੱਗੇ ਵਧਾਇਆ, ਉਸ ਨੇ ਮੇਰੇ ਹੱਥ ਦੇ ਹੇਠਲੇ ਹਿੱਸੇ (ਫੋਰਆਰਮ) ਨੂੰ ਫੜ ਲਿਆ ਅਤੇ ਮੇਰੀ ਚਮੜੀ, ਮਾਸਪੇਸ਼ੀਆਂ, ਸਭ ਕੁਝ ਨੋਚ ਦਿੱਤਾ... ਮੇਰੇ ਹੱਥ ਦੇ ਹੇਠਲੇ ਹਿੱਸੇ ਅਤੇ ਹਥੇਲੀ ਦੇ ਵਿਚਕਾਰ ਇੱਕ ਵੱਡਾ ਗੈਪ ਬਣ ਗਿਆ।"

Skip ਇਹ ਵੀ ਪੜ੍ਹੋ- and continue readingਇਹ ਵੀ ਪੜ੍ਹੋ-

End of ਇਹ ਵੀ ਪੜ੍ਹੋ-

'ਮੈਂ ਉਹ ਮਹਿਲਾ ਹਾਂ ਜਿਸ ਨੇ ਸ਼ਾਰਕ ਦੇ ਮੂੰਹ 'ਤੇ ਮੁੱਕਾ ਮਾਰਿਆ ਸੀ'

ਸ਼ਾਰਕ ਨੇ ਸਟੀਵਰਟ ਦੀ ਲੱਤ ਫੜ ਕੇ ਉਨ੍ਹਾਂ ਨੂੰ ਪਾਣੀ 'ਚ ਹੇਠਾਂ ਖਿੱਚਣਾ ਸ਼ੁਰੂ ਕਰ ਦਿੱਤਾ।

ਹੰਝੂ ਪੂੰਝਦੇ ਹੋਏ ਉਨ੍ਹਾਂ ਕਿਹਾ, "ਮੇਰੇ ਮਨ ਵਿੱਚ ਆਇਆ, 'ਬਸ ਇਹੀ ਹੈ, ਹੁਣ ਮੈਂ ਮਰ ਜਾਵਾਂਗੀ' ਅਤੇ ਫਿਰ ਮੈਨੂੰ ਆਪਣੀ ਧੀ ਆਗਸਟ ਦੀ ਯਾਦ ਆਈ। ਮੈਂ ਸੋਚਿਆ ਕਿ ਹੁਣ ਉਸ ਦੀ ਮਾਂ ਨਹੀਂ ਰਹੇਗੀ, ਉਹ ਬਿਨਾਂ ਮਾਂ ਦੇ ਵੱਡੀ ਹੋਵੇਗੀ।"

"ਮੈਨੂੰ ਬਸ ਇੰਨਾ ਪਤਾ ਸੀ ਕਿ ਮੈਂ ਉਸ ਨੂੰ ਛੱਡ ਨਹੀਂ ਸਕਦੀ... ਸੁਣਨ ਵਿੱਚ ਅਜੀਬ ਲੱਗ ਸਕਦਾ ਹੈ, ਪਰ ਮੈਂ ਆਪਣੀ ਇੱਛਾ-ਸ਼ਕਤੀ ਨਾਲ ਆਪਣੇ ਆਪ ਨੂੰ ਬਚਾ ਕੇ ਵਾਪਸ ਲਿਆਈ।"

ਸ਼ਾਰਕ ਨਾਲ ਲੜਨਾ "ਪੱਥਰਾਂ ਵਾਲੀ ਕੰਧ 'ਤੇ ਮੁੱਕਾ ਮਾਰਨ" ਵਰਗਾ ਸੀ, ਪਰ ਉਹ ਲੜਦੇ ਰਹੇ।

"ਸ਼ਾਇਦ ਮੇਰਾ ਇੱਕ ਮੁੱਕਾ ਉਸ ਨੂੰ ਜ਼ੋਰ ਨਾਲ ਲੱਗਾ ਅਤੇ ਉਸ ਨੇ ਮੈਨੂੰ ਛੱਡ ਦਿੱਤਾ। ਇਹ ਦੁਨੀਆ ਦਾ ਸਭ ਤੋਂ ਮੁਸ਼ਕਿਲ ਕੰਮ ਸੀ, ਪਰ ਮੈਂ ਲੜ ਕੇ ਆਪਣੇ ਆਪ ਨੂੰ ਬਚਾਇਆ।"

ਦੂਜੇ ਤੈਰਾਕਾਂ ਨੇ ਸਟੀਵਰਟ ਨੂੰ ਖਿੱਚ ਕੇ ਕਿਨਾਰੇ ਤੱਕ ਪਹੁੰਚਾਇਆ ਅਤੇ ਉਨ੍ਹਾਂ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਨ੍ਹਾਂ ਨੂੰ 'ਇੰਡਿਊਸਡ ਕੋਮਾ' ਵਿੱਚ ਰੱਖਿਆ ਗਿਆ ਅਤੇ ਉਨ੍ਹਾਂ ਦੀਆਂ ਲਗਭਗ ਇੱਕ ਦਰਜਨ ਸਰਜਰੀਆਂ ਹੋਈਆਂ।

ਇੰਨੇ ਭਿਆਨਕ ਤਜਰਬੇ ਦੇ ਬਾਵਜੂਦ, ਸਟੀਵਰਟ ਨੇ ਕਿਹਾ ਕਿ ਉਹ ਅਜਿਹੀ ਕੁੜੀ ਵਜੋਂ ਯਾਦ ਨਹੀਂ ਕੀਤੇ ਜਾਣਾ ਚਾਹੁੰਦੇ ਜੋ "ਬੀਚ 'ਤੇ ਹਮਲੇ ਦਾ ਸ਼ਿਕਾਰ ਹੋਈ ਸੀ।"

ਉਨ੍ਹਾਂ ਕਿਹਾ, "ਮੈਂ ਉਹ ਮਹਿਲਾ ਹਾਂ ਜਿਸ ਨੇ ਸ਼ਾਰਕ ਦੇ ਮੂੰਹ 'ਤੇ ਮੁੱਕਾ ਮਾਰਿਆ ਸੀ।"

Skip ਇਹ ਵੀ ਪੜ੍ਹੋ- and continue readingਇਹ ਵੀ ਪੜ੍ਹੋ-

End of ਇਹ ਵੀ ਪੜ੍ਹੋ-

ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTER, WhatsApp ਅਤੇ YouTube 'ਤੇ ਜੁੜੋ।)