नेपाल बस दुर्घटनाः सङ्खुवासभाबाट झापा हिँडेको बस बाटोबाट २०० मिटर तल खस्यो, कम्तीमा १५ जनाको मृत्यु

पूर्वी नेपालको सङ्खुवासभा जिल्लामा बिहीवार बिहान एउटा बस दुर्घटना हुँदा कम्तीमा १५ जनाको मृत्यु भएको अधिकारीहरूले जनाएका छन्।

प्रमुख जिल्ला अधिकारी नूरहरि खतिवडाले भने, "त्यहाँनिर बाटो घुमाउरो र भिरालो भएकाले त्यो खतरायुक्त नै रहेको देखियो। आज गाडीधनीले नै गाडी चलाएका कुरा समेत सुनिएको छ।"

चालकको समेत मृत्यु भइसकेकाले दुर्घटनाको स्पष्ट कारण अझै आइनसकेको खतिवडाले बीबीसीलाई बताए।

यसअघि बिहानै उद्धार गरिएका केही घाइतेलाई उपचारका लागि धरान र केहीलाई चैनपुर लगिएको प्रहरी नायब उपरीक्षक लालध्वज सुवेदीले बीबीसीलाई बताएका थिए।

"तीन जनालाई धरानतर्फ र बाँकीलाई चैनपुर पठाइएको भन्ने छ," सुवेदीले थपे।

'२०० मिटर तल खस्यो'

बसमा कति मानिस सवार थिए र दुर्घटना कसरी भयो भन्ने कुरा अहिले यकिन हुन नसकेको उनले बताए।

झापाको दमकतर्फ जाँदै गरेको बस सङ्खुवासभाको मादी नगरपालिकामा दुर्घटनामा परेको प्रहरीले जनाएको छ।

सङ्खुवासभाका सहायक प्रमुख जिल्ला अधिकारी मोहनमणि घिमिरेका अनुसार बिहान साढे सात बजेतिर दुर्घटना भएको थियो।

"सङ्खुवासभाको मादी नगरपालिका-६ ओखरबोटेका गुडेको ना ४ ख ७३५ नम्बरको बस सडकबाट २०० मिटर तल खसेको थियो," उनले भने।

घिमिरेका अनुसार बीच बाटोमा थप यात्रु चढे वा ओर्लेको बारेमा अझै यकिन हुन सकेको छैन।

"तर थप यात्रु चढेको सम्भावनालाई नकार्न सकिँदैन। त्यही भएर खोजी कार्य जारी राखिएको छ," उनले थपे।