Abubuwan da ke faruwa a Najeriya da sauran sassan duniya

Rahoto kai-tsaye

Nabeela Mukhtar Uba da Imam Saleh

1. 28 Satumba 2026Masu goyon bayan gwamnati sun ƙwace wani muhimmin gari daga ƴan tawayen Tigray

   

   Asalin hoton, Getty Images

   Wata ƙungiyar ’yan tawaye mai goyon bayan gwamnatin Habasha ta ce dakarunta tare da sojojin gwamnati sun ƙwace iko da garin Alamata mai matuƙar muhimmanci a yankin Tigray.

   Hotunan bidiyo da ƙungiyar ta wallafa a shafinta sun nuna dakarun suna yin fareti a kan titunan garin, yayin da suke ɗaga tutar ƙasar.

   Ƙwace ikon garin Alamata, wanda ke kan wata babbar hanyar safarar kayayyaki da man fetur, na iya zama babbar nasara ga gwamnatin Addis Ababa.

   Garin na kusa da iyakar kudancin Tigray da yankin Amhara.

   Hakan zai bai wa sojojin gwamnati damar matsawa zuwa babban birnin yankin, Mekelle, wanda ke da tazarar kusan kilomita 120 daga garin.

   Sabon tashin hankalin da ya ɓarke tsakanin sojojin gwamnati da ’yan tawayen Tigray ya haifar da fargabar sake ɓarkewar yakin basasa.

   A lokacin yakin da aka gwabza tsakanin shekarar 2020 zuwa 2022, an kiyasta cewa sama da mutane dubu 600 ne suka rasa rayukansu.

2. 28 Satumba 2026Ƴansanda sun kama wata mata bisa zargin kashe kishiyarta da taɓarya

   

   Asalin hoton, Getty Images

   Ƴan sandan jihar Bauchi sun kama wata mata bisa zargin cewa ta yi amfani da tabarya wajen lakada wa kishiyarta duka har ta mutu a yankin Tafawa Balewa na jihar.

   A cikin wata sanarwa, kakakin rundunar ƴan sandan jihar Nafiu Habib, ya ce an kama matar mai shekara 33 bisa zargin aikata kisan kai, bayan wani rikicin cikin gida da ya yi sanadin mutuwar kishiyarta.

   “Binciken farko ya nuna cewa matar Hauwa’u Haruna mai shekara 33, wadda ake zargin ba ta cikin hayyacinta, ta bugi matar farko, Jamila Adamu mai shekara 43, a goshinta da tabarya, lamarin da ya sa ta faɗi a sume,” in ji ƴan sandan.

   Habib ya ƙara da cewa lokacin da aka garzaya da Jamila zuwa asibiti, likita ya tabbatar da cewa ta rasu.

3. 28 Satumba 2026Iran ta musanta kitsa kai wa sojojin Birtaniya hari

   

   Asalin hoton, Shugaban Iran Masoud Pazeshkian

   Iran ta musanta hannu a harin kunar bakin wake da aka kitsa kai wa sansanin soji da ke kudancin Birtaniya.

   A wata sanarwa da ofishin diplomasiyyar Iran a birnin Landan ya fitar, ya ce Tehran ta yi allawadai da duk wani abu da ya shafi labaran da ake yadawa kan wannan batu.

   An dai cafke mutum 5 a jiya Lahadi, bayan gano wasu motocin daukar kaya 3 na tunkarar babbar kofar sansanin da sojin sama na Amurka ke amfani da shi wajen kai hari Iran.

   Ƴansandan Birataniya sun ce dukkan mutanen 5 da ake tsare da su 'yan Birtaniya ne, ana kuma zarginsu da laifukan ta'addanci da mallakar ababen fashewa.

   Dukkansu mazauna birnin Landan ne kuma matasa tsakanin shekaru 20 da haihuwa.

4. 28 Satumba 2026INEC ta sanar da ranar fara karɓar katin zaɓe na PVC a faɗin Najeriya

   Hukumar Zaɓe Mai Zaman Kanta ta Najeriya, INEC, ta ce za a fara rabawa da kuma karɓar katunan zaɓe na dindindin, PVC, daga ranar 9 ga Oktoba, 2026 a faɗin ƙasar.

   Shugaban INEC, Farfesa Joash Amupitan, ne ya bayyana hakan a ranar Litinin a Kaduna, yayin taron tattaunawa na shiyyar Arewa maso Yamma da ma’aikatan hukumar, tare da tantance matakin shirin da aka ɗauka gabanin babban zaɓen shekarar 2027.

   Farfesa Amupitan ya ce aikin rajistar masu kaɗa ƙuri’a na baya-bayan nan ya samar da sabbin rajista sama da miliyan 10.7.

   Ya yi kira da a kawar da matsalolin da ke kawo cikas ga rabon katunan a matakin ƙananan hukumomi, domin kauce wa hana ’yan ƙasa da suka cancanta cin moriyar haƙƙinsu na zaɓe.

   Haka kuma, ya bayyana cewa INEC na inganta tsare-tsarenta na fasaha, ciki har da hanyoyin tantance masu kaɗa ƙuri’a da isar da sakamakon zaɓe, da kuma tsarin ƙirga sakamakon zaɓe, ciki har da sabon tsarin eEC8A da aka ƙaddamar.

   Shugaban hukumar ya ce INEC na kuma aiwatar da tsarin ‘Zero-Failure’, wato manufar rashin samun tangarda a harkokin jigilar kayayyakin zaɓe.

   Ya ce tsarin ya haɗa da kai kayan zaɓe tun da wuri, jigilar su, haɗin gwiwa da jami’an tsaro, da kuma horas da ma’aikatan wucin gadi da za a ɗauka domin gudanar da zaɓen.

5. 28 Satumba 2026Ƴan bindiga sun sace fiye da mutum 60 a Zamfara da Neja

   

   Asalin hoton, Getty Images

   Rahotanni na cewa an sace mutam fiye da 60, a wasu hare-hare da ƴan bindiga suka kai jihohin Zamfara da Neja, da ke arewacin ƙasar.

   Ƴan sandan jihar Neja sun ce wasu da ake zargin ƴan bindiga ne sun sace fiye da mutane 20 daga ƙauyen Mukura da ke gundumar Kasuwan-Garba a ƙaramar hukumar Mariga da yammacin Lahadi.

   A cikin wata sanarwa, kakakin ƴan sandan jihar, Abiodun Wasiu, ya ce harin ya faru ne da misalin ƙarfe 3 na rana, a ranar 27 ga Satumba, kuma jami’an tsaro na haɗin gwiwa sun fara wani samame na ceto domin ganin an kuɓutar da waɗanda aka sace.

   A wani hari na daban kuma, kamfanin dillancin labarai na AFP ya ruwaito cewa an yi garkuwa da aƙalla manoma 47, galibinsu mata, an yi garkuwa da su yayin da suke girbin gyada a yankin Mariga ranar Asabar.

   Sai dai an ce adadin waɗanda aka sace na iya zarce haka.

   Rahotannin kafafen yaɗa labarai na cikin gida sun kuma ce aƙalla mata 40 aka yi garkuwa da su a Yargada da ke kusa da Gusau a makwabciyar jihar Zamfara ranar Lahadi.

   Garkuwa da mutane domin neman kuɗin fansa na ci gaba da zama ɗaya daga cikin manyan ƙalubalen tsaro da Najeriya ke fuskanta, musamman a sassan arewa maso yamma da arewa ta tsakiya, inda ƙungiyoyin masu ɗauke da makamai, waɗanda aka fi sani da ’yan bindiga, ke gudanar da ayyukansu a faɗin yankunan karkara.

   Ƙungiyoyin masu aikata laifukan sukan kai hare-hare kan ƙauyuka, su yi wa mazauna fashi, su sace dabbobi tare da yin garkuwa da mutane domin neman kuɗin fansa. A yankunan da lamarin ya fi shafa, manoma na fama da matsalar zuwa gonakinsu saboda rashin tsaro, lamarin da ke jefa rayuwar al'ummomi da samar da abinci cikin haɗari.

6. 28 Satumba 2026Yadda wani jirgin sama ya faɗa kan makarantar framare yayin da ɗalibai ke karatu

   

   Asalin hoton, Getty Images

   Gobara ta tashi a wata fitacciyar makarantar kimiyya ta National Academy of Sciences da ke Ukraine, bayan da wani jirgi mara matuƙi ya faɗa cikin ginin makarantar.

   Wasu hotuna sun nuna ma’aikatan makarantar a bakin tagogi, yayin da suke ƙoƙarin tserewa daga ginin.

   Magajin birnin Kyiv, Vitali Klitschko, wanda ya kai ziyara wurin, ya ce Rasha ta mayar da birnin zuwa wurin da take luguden wuta.

   Wakilin BBC ya ce a makonnin da suka gabata, Ukraine na fuskantar hare-hare akai-akai, inda na baya-bayan nan aka kai shi da rana a tsakiyar birnin.

   Wani bidiyo da aka ɗauka a lokacin harin ya nuna yadda jirgin mara matuƙin ya faɗa cikin ginin makarantar.

   Shugaban Ukraine, Volodymyr Zelenskyy, ya ce Ukraine za ta mayar da kakkausan martani, tare da yin kira ga ƙawayenta da su ɗauki matakin da ya dace.

7. 28 Satumba 2026Netanyahu ya ziyarci Daular Larabawa a asirce

   

   Asalin hoton, Getty Images

   Kafofin yaɗa labaran Isra’ila sun ce a jiya Lahadi, Firaimiinistan Isra’ila, Benjamin Netanyahu, ya kai ziyara zuwa Hadaddiyar Daular Larabawa domin ganawa da Shugaba Mohammed bin Zayed.

   Wannan na zuwa ne a daidai lokacin da ake ta cece-kuce kan wani gargaɗi da shugaban UAE din ya yi, ya yi wa Mista Netanyahu cewa Hamas na shirin kai hari kan Isra’ila kafin harin 7 ga Oktoba, 2023.

   Sai dai Netanyahu ya musanta hakan.

   Wakiliyar BBC ta ce, kamar yadda gidan talabijin na Isra’ila, Channel 12, ya ruwaito, Firayim Ministan da tawagarsa sun yi balaguron ne a jirage daban-daban.

   Netanyahu ya shafe sa’o’i huɗu a Hadaddiyar Daular Larabawa, inda ya gana ido-da-ido da Shugaba Mohammed bin Zayed.

8. 28 Satumba 2026An gano ƙoƙon kai da ƙasusuwan mutum 28 a Abia

   

   Asalin hoton, Abia State Police Command

   Ƴansanda a Najeriya sun ce suna gudanar da bincike kan aƙalla mutum 28 da aka gano ƙoƙon kansu da ƙasusuwansu daga wasu sansanonin miyagu a dazuka da ke jihar Abia a kudu maso gabashin ƙasar.

   An gano gawarwakin ne yayin wani samame da Rundunar 'Yan Sandan Jihar Abia ta gudanar a yankin Isuochi na karamar hukumar Umunneochi, yankin da ya sha fama da satar mutane da sauran munanan laifuka.

   Kakakin rundunar ƴansandan jihar Maureen Chinaka ta ce ƴansanda sun gano ƙoƙon kawuna da ƙasusuwan mutum 28 daga sansanonin da ke dazukan Umuaku da Nneato.

   Masu bincike na zargin cewa ƙasusuwan na iya kasancewa na mutanen da aka sace, amma ana ci gaba da bincike domin tantance ko su wane ne da kuma yadda suka mutu.

   Jami'ai daga ɓangarori daban-daban na rundunar 'yan sanda ne suka shiga aikin, ciki har da sashen yaki da miyagun laifuka da sashen yaki da satar mutane da sashen yaki da kungiyoyin asiri, da sashen tattara bayanan sirri da sauran rundunoni na musamman.

   'Yan sanda sun ce sun kaddamar da samamen ne bayan samun bayanan sirri kan zargin ayyukan masu aikata laifi a dazukan.

   A cewar kakakin, zuwa yanzu ba a kama kowa ba yayin samamen saboda waɗanda ake zargi sun tsere kafin ƴansanda su isa sansanonin.

   Ƴansanda sun ce ana ci gaba da gudanar da bincike yayin da kuma aka ƙara sa ido domin gano mutanen da suke tsere.

   Kwamishinan ƴansandan jihar Abia Wilfred Afolabi ya ce samamen wani ɓangare ne na yaƙin da ake na tarwatsa maɓoyar miyagu da kuwa yaƙi da matsalar tsaro a jihar.

   Gano ƙasusuwan na iya ƙara tayar da hankula game da ƙungiyoyin masu satar mutane da ke fakewa a dazukan da ke sassan kudu maso gabashin Najeriya, inda suke sace direbobi, matafiya da mazauna yankunan domin neman kuɗin fansa.

   A shekarun baya-bayan nan, hukumomi sun gano gawarwakin da suka fara ruɓewa a samamen da aka kai kusa da kasuwar shanu da kuma ake zargin suna da alaƙa da ayyukan masu satar mutane.

9. 28 Satumba 2026Iran ta shigar da ƙorafi kan taƙaita zirga-zirgar jiragenta

   

   Asalin hoton, Getty Images

   Shugaban Hukumar Kula da Sufurin Jiragen Sama ta Iran ya ce ƙasar ta aika da ƙorafi a hukumance ga Hukumar Kula da Sufurin Jiragen Sama ta Duniya (ICAO), kan takunkumin da aka ƙaƙaba wa harkokin sufurin jiragen saman Iran.

   Abouzar Shiroudi ya shaida wa kamfanin dillancin labaran Iran, IRNA, cewa ƙorafin ya ƙunshi bayanai da ke bayyana matsayar Iran kan taƙaita zirga-zirgar jiragenta.

   Ya kuma ce kai hare-hare kan filayen jiragen sama da jirage babban misali ne na laifukan yaƙi a dokokin ƙasa da ƙasa.

   Ya ƙara da cewa Iran ta kuma gabatar da ƙorafi makamancin wannan ga kotun Hague.

   Tun bayan fara aiwatar da takunkumin Amurka kan kamfanonin jiragen saman Iran a makon da ya gabata, filayen jiragen sama a ƙasashe daban-daban sun soke zirga-zirgar jiragen kamfanonin Iran.

   Iraki da Georgia da Haɗaɗɗiyar Daular Larabawa da Azerbaijan da Oman, waɗanda suke daga cikin manyan wuraren da 'yan Iran ke zuwa da kuma hanyoyin da suke bi wajen wucewa zuwa Turai da Amurka, sun soke zirga-zirgar jiragen Iran sakamakon matsin lamba daga Amurka.

   Kamfanin dillancin labarai na Fars ya ce kamfanonin jiragen saman Iran na tattaunawa domin samar da sabbin hanyoyin zirga-zirgar jirage.

10. 28 Satumba 2026Kwalara ta halaka 'fursuna shida' a Kano

    Fursunoni shida sun mutu sakamakon ɓarkewar cutar kwalara a wani gidan gyaran hali da ke arewacin Najeriya, a cewar ƙungiyoyin kare haƙƙin ɗan adam da a yanzu suke neman hukumomi su ayyana dokar ta ɓaci kan lamarin.

    An soma ganin alamun ɓarkewar cutar makonni biyu da suka mutu lokacin da wani fursuna a gidan gyaran hali na Kurmawa a jihar Kano ya fara amai da gudawa, kamar yadda hukumar kula da gidajen gyaran hali ta Najeriya ta bayyana.

    Hukumar ta ce gwajin da aka yi ya tabbatar da cewa kwalara ce kuma tuni ta tabbatar da mutuwar fursunoni biyu amma ƙungiyoyin kare haƙƙin bil adama na cewa waɗanda suka mutu sun kai shida a tsukin mako ɗaya.

    A baya-bayan nan ma, mutum 37 sun mutu a jihar Neja bayan an kulle su a ƙaramin ɗaki sakamakon kama su da aka yi bisa zargin haƙar ma'adanai ba bisa ƙa'ida ba.

11. 28 Satumba 2026Ƴanbindiga sun sace fiye da mutum 80 a Neja da Zamfara

    

    Asalin hoton, Getty Images

    Fiye da mutum 80, akasarinsu mata sun ɓace bayan da ƴanbindiga suka ƙaddamar da hare-hare biyu da ƴanbindiga suka kai a wasu jihohin arewacin Najeriya a ranakun ƙarshen mako.

    Kamfanin dillancin labarai na AFP ya ruwaito cewa a ranar Asabar, ƴanbindiga sun sace aƙalla manoma 47 yayin da suke gona a jihar Neja inda kuma a jiya Lahadi, aka yi garkuwa da mata 40 a jihar Zamfara.

    Ƴanbindiga na yawan kai munanan hare-hare kan ƙauyuka inda suke halaka mutane tare da ƙona gidajensu bayan sun sace musu dukiya.

    Wata majiya a jihar Neja ta ce manoma 47 galibinsu mata, an sace su a gonakinsu da ke Rimi a yankin Mariga na jihar Neja.

    Wani rahoton tsaro da aka shirya wa kungiyoyin jin kai, wanda AFP ta gani, ya tabbatar da faruwar hare-haren amma bai bayyana adadin mutanen da aka sace ba.

    Matan da aka sace jiya Lahadi an yi garkuwa da su ne a Yargada da ke Gusau a jihar Zamfara, a cewar wani rahoton tsaro da aka shirya wa Majalisar Dinkin Duniya, wanda AFP ta gani.

12. 28 Satumba 2026Sojojin Amurka takwas sun ji rauni a harin Iran

    

    Asalin hoton, US Central Command

    Kafar yaɗa labarai ta NBC ta ambato wasu jami'an gwamnatin Amurka uku na cewa sojojin ruwan ƙasar guda takwas sun ji rauni sakamakon harin makami mai linzami da Iran ta kai kan wani jirgin ruwa a Mashigar Hormuz.

    Majiyoyin uku sun shaida wa NBC cewa sojojin Amurka na cikin jirgin lokacin da Iran ta kai harin a ranar 14 ga Satumba.

    Ba su bayyana irin jirgin da aka kai wa harin ba, amma sun ce ba jirgin yaƙin Amurka ba ne.

    A yayin rikicin baya-bayan nan tsakanin Iran da Amurka, rundunar sojin Amurka da ke kula da yankin Gabas ta Tsakiya, CENTCOM ta ce wasu daga cikin hare-haren da ta kai martani ne ga ƙoƙarin Iran na kai hari kan jiragen ruwan Amurka.

    Sai dai rundunar ta ce babu wani jirgin yaƙin Amurka da ya samu lahani a waɗan nan hare-haren.

    A baya-bayan nan, wani kwamandan dakarun juyin juya halin Iran ya yi iƙirarin cewa dakarun ƙasar sun yi nasarar tarwatsa wani makami a saman wani jirgin Ruwan Amurka.

13. 28 Satumba 2026Shettima ya koma Najeriya bayan taron UNGA

    

    Asalin hoton, Stanley Nkwocha/X

    Mataimakin shugaban Najeriya Kashim Shettima ya koma ƙasar bayan da ya wakilci Shugaba Bola Tinubu a zauren babban taron Majalisar Ɗinkin Duniya karo na 81 da aka yi a New York da ke Amurka.

    Wata sanarwa da mai bai wa Shettima shawara kan yaɗa labarai, Stanley Nkwocha ya fitar ce ta tabbatar da komawar Shettima Najeriya.

    A cewar sanarwar, yayin bulaguron, Shettima ya gabatar da jawabi a taron na UNGA inda a nan Najeriya ta sake jaddada kiranta na kawo sauye-sauye a kwamitin tsaro na Majalisar Dinkin Duniya inda kuma ta nemi a bai wa wasu ƙasashen Afirka kujerar dindindin.

    A tsukin lokacin, Shettima ya gana da ƴan Najeriya mazauna ƙetare inda a zaman ya jaddada muhimmancin ƙwarewarsu da kuma alfanun da suke da shi ga ci gaban ƙasa.

    Komawar Shettima Najeriya na zuwa ne a daidai lokacin da Tinubu ya sake tsawaita hutunsa inda fadar shugaban ƙasar ta ce zai koma gida a makon da muke ciki.

14. 28 Satumba 2026'Ba lallai sai Tinubu yana Abuja ba ne zai yi aikinsa'

    

    Asalin hoton, Fadar Shugaban Najeriya

    Mai bai wa shugaban Najeriya, Bola Tinubu shawara kan yaɗa labarai, Bayo Onanuga ya ce ana sa ran shugaban ƙasar zai koma ƙasar cikin makonnan bayan da ya shafe makonni a Turai inda daga nan yake wanzar da ayyukan gwamnati.

    Cikin wani saƙo da ya wallafa a shafin X, Onanuga ya ce Shugaba Tinubu yana nan cikin ƙoshin lafiya kuma ya kasance yana tafiyar da harkokin gwamnati yayin da yake hutu.

    Ya ce ba lallai sai shugaban ƙasar ya kasance a Abuja ba ne zai iya sauke nauyin da ke kansa na shugabanci ba.

    Ya bayar da misali da taron da Tinubu ya yi da masu hannun jari a Faransa ciki har da rawar da ya ce shugaban ya taka wajen samar da wani shirin tashar jirgin ruwa ta dala biliyan 7 a Ogun wanda gwamnatin jihar ke jagoranta.

    Kalaman Onanuga na zuwa ne yayin da ɓangaren hamayya ke sukar yadda Tinubu ya ɗauki tsawon lokaci ba ya Najeriya da kuma ƙin halartar babban taron Majalisar Ɗinkin Duniya karo na 81.

    Tinubu ya bar Najeriya ne ranar 30 ga watan Agusta domin hutun shekara na tsawon makonni uku inda ya fara zuwa birnin London kafin daga bisani ya je Paris a Faransa.

    Daga baya Fadar shugaban ƙasar ta sanar cewa Tinubu zai tsawaita hutun da ƴan kwanaki inda aka tsara zai dawo a ƙarshen makon da ya gabata.

    Tsohon mataimakin shugaban ƙasa kuma ɗan takarar shugaban ƙasa na jam'iyyar ADC Atiku Abubakar, ya ki yadda shugaban ya daɗe a wajen ƙasar ba tare da miƙa ragamar mulki ba.

    Shi ma dan takarar shugaban kasa na jam'iyyar NDC, Peter Obi, ya taba sukar matakin Tinubu na yin hutunsa a Turai.

15. 28 Satumba 2026Faɗa na ƙara tsananta a Yemen

    Ana ci gaba da gwabza ƙazamin faɗa a kusa da birnin Taiz a Yemen inda sojojin gwamnati da ke samun goyon bayan Saudiyya ke kokarin daƙile sabon farmakin da mayaƙan Houthi, waɗanda Iran ke mara wa baya, ke kai wa.

    Birnin Taiz yana wani yanki ne a tsakanin yankunan arewa da ke ƙarƙashin ikon ƙungiyar Houthi da kuma yankunan kudanci da ke hannun gwamnati.

    Wakiliyar BBC ta ce majiyoyi daga ɓangaren Houthi sun shaida wa BBC cewa suna shirin kai wani gagarumin farmaki.

    Amma sojojin gwamnati sun ce suna sane da wannan shirin kuma suma sun shirya daƙile shi.

16. 28 Satumba 2026Hukumomi sun tsare mutum biyar kan zargin ta‘addanci a Birtaniya

    

    Hukumomi a Birtaniya sun tsare wasu mutum biyar bisa zargin aikata laifukan ta'addanci bayan wani lamari da ya auku a kusa da sansanin sojojin saman ƙasar da sojojin Amurka ke amfani da shi don kai hare-hare kan Iran tun watan Maris.

    Shugaba Trump ya ce mutanen sun shirya kai hari ne da zai haifar da mummunar ɓarna.

    Wakilin BBC ya ce mazauna yankin sun bayyana cewa an ƙara tsaurara matakan tsaro a kusa da sansanin sojan saman na Birtaniya.

    An fahimci cewa 'yan sandan da ke yaƙi da ta'addanci suna gudanar da bincike kan ko Iran tana da hannu a wannan lamarin.

17. 28 Satumba 2026Assalamu Alaikum

    Masu bibiyar mu a wannan shafi na Kai Tsaye, BBC Hausa, barkan mu da safiya. Da fatan muna lafiya.

    A yau Litinin, kamar kullum, za mu kawo muku labarai da rahotanni na abubuwan da ke faruwa a Najeriya da sassan duniya.

    Sai ku kasance tare da mu domin karanta wainar da ake toyawa a duniya. Akwai sauran shafukanmu na sada zumunta - Fesbuk da X da Instagram inda za ku iya zuwa domin karanta ƙarin labarai da kallon bidiyo.