APC ta yi Allah-wadai da hare-haren da ake kai wa tarukan jam’iyyun adawa

Asalin hoton, Bayo Onanuga
Jam’iyyar APC mai mulki a Najeriya ta yi Allah-wadai da hare-haren da ake kai wa tarukan siyasa na jam’iyyun adawa a wasu sassan ƙasar, inda ta buƙaci jami’an tsaro su kama waɗanda ke da hannu a hare-haren.
A cikin wata sanarwa da mai magana da yawun kwamitin yaƙin neman zaɓen shugaban ƙasa na jam’iyyar, Dele Alake ya fitar, APC ta ce ta lura da ƙaruwar hare-haren da ake kai wa tarukan siyasa a sassan ƙasar.
Jam’iyyar ta ce hare-haren da aka ruwaito a jihohin Edo, Cross River da Gombe, da sauran waɗanda aka kai wa magoya bayan jam’iyyu da shugabannin siyasa, abin Allah-wadai ne.
Ta kuma yi Allah-wadai da tarwatsa taron tattaunawa da aka shirya yi a yau Alhamis na jam’iyyar NDC a Legas.
APC ta yi kira ga jam’iyyun siyasa, ’yan siyasa da magoya bayansu da su kame kansu, tare da guje wa duk wani abu da ka iya haddasa rikici da tarzoma a cikin al’umma yayin da ake ci gaba da kamfen.
Ta kuma buƙaci jami’an tsaro su ƙara kaimi wajen hana duk wani nau’in tashin hankali da ya shafi siyasa, tare da tabbatar da kama waɗanda ke haddasa hare-haren da waɗanda ke aikata su, domin hukunta su bisa tanadin doka.





























