Mukuru wa Paul Pogba yafunzwe akekwaho umugambi mubisha ku muvandimwe we

Mathias Pogba arafunzwe mu gihe akorwaho iperereza ku mugambi akekwaho wo gushaka kuvana amafaranga ku muvandimwe we Paul mu buryo bunyuranyije n’amategeko.

Abandi bantu bane nabo barimo gukorwaho iperereza kuri uwo mugambi hamwe n’ubufatanyacyaha, nk’uko inzego z’ubucamanza zabibwiye ibiro ntaramakuru AFP.

Umunyamategeko wa Mathias Pogba, Yassine Bouzrou, yatangaje ko umukiriya we ari umwere.

Yabwiye ikinyamakuru BFMTV ati: “Tugiye kujuririra iki cyemezo.”

Mathias Pogba w’imyaka 32 yemera ko ari we uri muri video yabonetse ‘online’ mu kwezi gushize avuga ko “azahishura” ibitazwi kuri murumuna we w’imyaka 29.

Abashinjacyaha mu Bufaransa mu ntangiriro z’uku kwezi batangije iperereza nyuma y’uko uyu mukinnyi wa Juventus de Turin avuze ko yibasiwe n’ibikangisho no gushaka kumukuraho ibye.  

Yatanze ikirego ku bashinjacyaha b’i Turin tariki 16 z’ukwezi gushize kwa Nyakanga avuga ko hari umugambi wo kumukuraho miliyoni 13 z’amaEuro muri ubwo buryo.

Uyu musore watwaye igikombe cy’isi mu 2018 ari kumwe n’Ubufaransa, yagiye gukinira Juve mu mpeshyi ishize avuye muri Manchester United yigurishije.  

Mathias Pogba nawe ni umukinnyi wabigize umwuga wakiniye ikipe y’igihugu ya Guinea n’amakipe y’i Burayi nka Crewe, Wrexham, Crawley na Partick Thistle y’i Glasgow muri Scotland.