Visi perezida w’ishyirahamwe ry’umupira mu Burundi, FFB, 'arafunze'

Umuyobozi wungirije w'ishyirahamwe ry'umupira w'amaguru mu Burundi 'arafunze' mu gihe hakorwa iperereza ku ibura ry'amafaranga y'agahimbazamusyi k'Intamba mu Rugamba ubwo zari muri CAN.

BBC yamenye ko uyu muyobozi, Habimana Aimable batazira Marandura, afunzwe kuva kuwa gatandatu.

Ngo ari gukorwaho iperereza ku ibura ry'amafaranga y'agahimbazamusyi (agashirukabute) k'abakinnyi b'Intamba mu Rugamba bari bagiye mu Misiri mu gikombe cya Afurika.

BBC yagerageje kuvugana n'igipolisi cy'u Burundi kuri iyi nkuru ariko kugeza ubu ntibirashoboka.

Abakozi mu ishyirahamwe ry'umupira mu Burundi bavuga ko uyu muyobozi afunganywe n'abandi bakozi babiri mu gihe hari gukorwa iperereza.

Amafaranga y'agashirukabute yagombaga guhabwa Intamba mu Rugamba muri CAN ntabwo zayabonye.

Abo muri iyi kipe babwiye umunyamakuru wa BBC wari mu Misiri ko Habimana ari mu bayobozi bari bashinzwe kuyabagezaho.

Ibibazo by'agashirukabute kagenerwa abakinnyi mu gikombe cya Afurika byavuzwe no ku ikipe ya Uganda ubwo yari itarasezererwa, abakinnyi banze kwitoza batarahabwa ako gashirukabute.

Icyo kibazo kandi cyaranavuzwe mu kipe ya Nigeria, aho abakinnyi bayo banze kujya mu myitozo irushanwa rigitangira, bavuga ko batarabona impembo yabo.

Turakomeza kubakurikiranira iyi nkuru.